40 views مشاهدة
أخر تحديث : الخميس 5 نونبر 2015 - 2:50 مساءً

ظهور المهدي في المقصورة عندو علاقة بكسب المريخ لشكاويه
• في مباراة الهلال الافريقية في الاسكندرية امام فريق سموحة المصري عندما شاهدت (الصادق المهدي) في مقصورة المباراة …قلت الزول دا ح يجيب لينا (الهوا).
• لجنة الاستئنافات لو شافت لقطة الصادق المهدي قاعد في مقصورة المباراة – اللقطة براها كافية لاعادة مباراة الامل والمريخ وتعطيل اهداف (رزاق) في جمال سالم.
• رزاق جاب ليه قونين ..سمير فضل بعد العمر دا طلعها من (الشبكة).
• اول مرة اشوف لي حارس مرمى (مولانا).
• الناس ديل ما بستحملو حاجات زي دي….الصادق المهدي بي شحمو ولحمو في المباراة.
• جماعتكم بفتشوا للصادق المهدي للحوار الوطني ..يلقوه في المباراة.
• صدمة كبيرة.
• حاجات زي دي بتنعكس طوالي على لجنة استئنافاتهم.
• وعندما شاهدت مريم الصادق المهدي مران الهلال من داخل الاستاد وهو يستعد لمواجهة مازيمبي الكنغولي ..قلت خلاص الحكاية تمت ..مباراة هلال كادوقلي مع المريخ والتى انتهت بالتعادل السلبي سوف تمنح نقاطها لفريق المريخ.
• خاصة ان مريم الصادق المهدي جابت ليها (فواكه) معها للاعبي الهلال.
• فواكه …هو بدون فواكه …جية مريم الصادق المهدي لاستاد الهلال.
• اتخيلوا ح يحصل شنو وقت تجيب ليها معاها (فواكه).
• والناس ديل جنهم وجن الفواكه.
• عندهم موقف عديل كدا من (الفواكه).
• ح يشوفوا ليهم اي (سبب) كدا ويمنحوا بيه المريخ نقاط المباراة.
• يعني ممكن يعيدوا مباراة المريخ والامل عشان في احد الركاب فاتوا (القطر).
• وعلاقة عطبرة بالقطارات علاقة وطيدة ومعروفة.
• وممكن يعتبروا المريخ فائزا على هلال كادوقلي …عشان (الكهربة) قطعت في معسكر المريخ.
• الكهربة تقطع ليه؟.
• هذا امر غير قانوني – زلابية ساكت ما بجي.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• لكن انت ما قلت لينا بالتحديد كدا علاقة ظهور السيد الصادق المهدي في مباراة الهلال وسموحة في الاسكندرية بشكاوي المريخ شنو؟.
• العلاقة واضحة يا جماعة.
• مالكم عاوزين تجيبوا لينا الكلام؟.
• لجنة الاستئنافات ممكن تعبر هذا الامر مخالفا للوائح (البرلمان) السوداني …موش (ضباط) الاتحاد العام لكورة القدم كلهم (اعضاء) في البرلمان السوداني بما في ذلك مازدا المدير الفني السابق للمنتخب.
• انتوا قايلين الجماعة ديل حاسبونا بلوائح كورة القدم ؟…ابدا ما في كلام زي دي.
• الناس ديل حاسبونا بلوائح البرلمان السوداني.
• عملوا لينا الشكوى كلها (ابيي) ومحلية كادوقلي ….الرياضة فيها كلام زي دا.
• الشغل دا شغل سياسة.
• لجنة الاستئنافات ممكن تكون اعتبرت الصادق المهدي ما (لافي) العمة كويس …وهذا حسب نظرتهم بعد المباراة.
• ويمكن يكون عندهم رأي في (الجلابية).
• انتوا ما شفتوا الكاردينال كان قاعد جوار الصادق المهدي في المقصورة.
• يقعد ليه؟.
• وكمان بعد دا بيجي يلبس ليه (كسكتة).
• كسكتة يا الكاردينال.
• الكسكتة مع (الزلابية) – اعادة طوالي.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• الهلال وقت جاب القون في سموحة …الناس بدل ما تجري على (الشغيل) صاحب الهدف جرت على الصادق المهدي ، القاعد في المقصورة.
• لجنة الاستئنافات اكيد الكلام دا ما عجبها – واعتبرته مخالف للوائح البرلمان السوداني.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• عشان كدا انا اصلا ما بستبعد (لجنة الاستئنافات) تجتمع يوم الخميس القادم وتعتبر توقيع ولاءالدين موسي في كشوفات الهلال توقيع غير قانوني مخالف للنظم واللوائح و(الزلابية).
• انا قلت (الزلابية) – معيلش شيلوها من الجملة الفوق.
• نزلت براها كدا.
• اتكتبت بدون ما اشعر.
• ممكن لجنة الاستئنافات تجتمع وتقول (ولاءالدين موسي) لاعبا لفريق المريخ ، لأن القلم الذي وقع به ولاءالدين قلم اسامة عطا المنان.
• واسامة وقلمو للمريخ.
• عليه وحسب المادة 25 من قانون (الزلابية) البايتة يعتبر ولاءالدين لاعبا للمريخ.
• ناس الهلال لو احتجوا …ح يقولوا ليهم (القانون) بقول كدا.
• الزلابية بتقول كدا – عندكم كلام.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• وممكن نفس اللجنة تجتمع يوم الاحد القادم …وتراجع اوراق ابوعاقلة عبدالله لاعب الهلال الجديد الذي انتقل له من ام بدة وتقول تسجيله ما قانوني.
• نقول ليهم كيف الكلام دا؟.
• يقولوا لينا ابوعاقلة عندما وقع في كشوفات الهلال ما كان شارب (شاي الصباح) وهذا الامر اثر في (تركيزه) …عشان كدا توقيعو غير قانوني.
• ويا ريت لو بقيفوا على كدا.
• لجنة الاستئنافات ح تضرب ليها (صحن زلابية) ثم ترجع وتعتمد تسجيل ابوعاقلة في كشوفات المريخ.
• ما تستغربوا لي في (العمود) دا.
• عاوزين تستغربوا امشوا شارع النيل.
• ما عاوز لي اي زول يستغرب لي في العمود دا.
• الناس ديل عادوا ليهم مباراة من رأسهم – غالبهم يعني يعتبروا ابوعاقلة لاعبا للمريخ.
• اوعكم تقولوا لي (القانون).
• القانون دا مع (الزلابية) ما عندو اي (قيمة).
• ما عندو اي وجود.
• وممكن عمار الدمازين ذاتو ما يعتمدوا ليكم تسجيله.
• نقول ليهم في شنو؟.
• يقولوا لينا عمار الدمازين لقى حافز تسجيله ناقص (10) جنيه..او في (50) جنيه ما فيها نمرة ..عليه فان تسجيله يعتبر غير قانوني.
• يضربوا ليهم (زلابية) – ويعتمدوا ليك تسجيل عمار الدمازين في المريخ.
• قلنا ليكم…كلمتكم ..قلت ليكم ظهور الصادق المهدي في مقصورة مباراة الهلال وسموحة في الاسكندرية بتعمل لينا مشكلة.
• الظهور دا …خلاهم يجيبوا ليهم (لجنة تسيير) للمريخ.
• لجنة دعموها بـ (30) مليار.
• دعموها كيف بـ (30) مليار ..والمريخ الى الآن ما دخل (التسجيلات)..لو عندهم (30) مليار على الاقل كان سجلوا (النعسان).
• كان اعادوا امير كمال.
• انتوا كمان ما عارفين قروش الحكومة.
• الحكومة بتدعم بـ (30) مليار ..ما بتشوف منها غير (مليار).
• الـ (29) مليار ما تسألوني منها.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• الطريف ان لجنة التسجيلات رفضت تسجيل حمدي لاعب الامل في كشوفات المريخ.
• شفتوا الناس ديل عينهم قوية كيف؟.
• بدون خجل – بعد كل هذه المشاكل ..جايبين لاعب الامل يسجلوه.
• لاقتكم قوة عين زي دي؟.
• لجنة تسيير المريخ الظاهر خبرتها قليلة في (الزلابية) – عشان كدا رفضوا ليهم تسجيل حمدي الامل.
• هم ذاتهم غلطانين.
• لو حمدي دي سقتوه ومشيتوا بيه على (لجنة الاستئنافات) كان سجلوه ليكم.
• انتوا غلطانين ..ما كان تمشوا بي (حمدي) وانتوا عارفين انكم مخالفين للقانون على لجنة التسجيلات.
• كان تمشوا بيه على لجنة الاستئنافات ..هسع كان ح يكون معاكم في (المناقل) لو مشيتوا بيهو على لجنة الاستئنافات.
• ………………..
و
• انتوا منتظرين شنو؟.
• ما تقولوا لي امير كمال.
• حمدي الامل ..لاعب الرديف فشلتو في تسجيله.
• يلا الكاردينال ورينا (الكسكتة).
• ورينا (الشغل).
• الجماعة ديل عاوزين ليهم حصة (تسجيلات).
• قالوا الكاردينال بتصور وما بسجل.
• هسع امير كمال دا بدون ما يتصور ح يسجلو ليكم.
• المريخ يكمل اتفاقه مع خالد النعسان وما يسجلو.
• يتفق مع امير كمال وما يسجلوه.
• مع كوفي ..وبرضو ما يسجلوه.
• يا الكاردينال الموضوع دا طول شوية.
• احسم لينا المواضيع.
• اعطيتهم فرصة كافية.
• بعد كدا مفروض تتدخل طوالي.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ملف التسجيلات قبل الجهاز الفني.
• مفروض مجلس الهلال يحسم التسجيلات اول.
• الجهاز الفني ملحوق.
• نتمنى حمدي الامل في الهلال.
• عشان (الرديف) بتاع الهلال يولع نار.
• وناس الامل بالاحترام والتفاوض والحق ..ما عندهم اي مشكلة.
• موضوع النعسان وصل وين؟.
• التسجيلات باقى ليها 24 يوم.
• المنتخب ما في زول جايب خبرو.
• لكن ناس كريمة ما بقصروا.
• الخرطوم بقت تقصر.
• وفي الانتظار.
• وبكرة فرحة اكبر.
• ………..
• السيدة (ل) – عندكم زلابية خطيرة شديد…لو الاتحاد الافريقي شال منها حبة ..ح يعتبروا المريخ فاز على مازيمبي 5 / صفر في الكنغو.
• وقرّط على كدا.

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.