كورة القدم في السودان سنة 2020م

48 views مشاهدة
أخر تحديث : الخميس 10 دجنبر 2015 - 3:16 مساءً
كورة القدم في السودان سنة 2020م

• انتوا عارفين شكل كورة القدم في السودان سنة 2020م ح تكون كيف؟…اختلاف توتلي.
• الزول الما عندو ذاكرة قوية ما بعرفها.
• اسامة عطا المنان (كورتو) دي بتلعبو في (روما) مع محمد صلاح.
• ما تستبعدوا الحكاية.
• ناس بشه ونزار حامد سنة 2020 يمكن يعملوا ليهم (عيادات خارجية) ..ويخلوا الكورة لي ناس سمير فضل.
• يجقلبوا فيها زي ما عاوزين.
• ما في زول بيسألهم.
• نتيجة المباراة يحددها (فطور السمك).
• والحاجة الباردة.
• وقهوة المكاتب.
• قهوة المكاتب دي فيها حاجة.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• شكل الكورة في 2020 ح يكون غريب …الفاتح خضر يمكن يكون بقى حارس مرمى عديل.
• الزول دا بجيبها من جوة.
• العالم كلو ح يكون تطور – إلّا نحن.
• نحن بس الراجعين لي وراء.
• نحول في الطبق عشان نشوف (الكورة).
• الروس لمن يحولوا (الطبق) بيصلوا القمر..نحن بنحول (الطبق) عشان نشوف موسى الزومة.
• ما عندنا اي حاجة.
• اكتر حاجة ممكن نعملها نحول المواقف.
• ونتم الباقى كلام في الجرايد.
• 2020م.
• اتوقعوا اي شيء…زول قلبو ما قوي ما يتم العمود دا ذاتو ..يمشي يشوف ليه (شارع نيل) يقعد فيه.
• 2020م.
• يمكن تشوفوا (الصومال) في كاس العالم – ح تقولوا لي الصومال كيف تصل كاس العالم؟ ..ح اقول ليكم طول ما الصومال دي ما عندهم (اسامة عطا المنان) ممكن يصلوا كاس العالم.
• ما تستبعدوا الموضوع دا.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• جنوب السودان ..في سنتنا دي اتعادلت مع المنتخب السوداني (المؤسس للاتحاد الافريقي) تعادلنا مع منتخب عمره اقل من (5) سنوات.
• قالوا ليك مجدي شمس الدين فرحان بالتعادل دا.
• 2020 …لعيبتنا ونجومنا بمشوا يحترفوا في (جنوب السودان) – ح يخلوا ليكم البلد يا مجدي شمس الدين.
• 2020 عشرين اتوقعوا اي شيء.
• اصلو ما بخجلو منها.
• ولا بتعقدوا.
• ضربة الجزاء لو ما طلعت ليها تصديق من اسامة عطا المنان ما بحسبوها ليك.
• زي التموين.
• الكورنر ..عند الطريفي الصديق – اصلو قاعد ساكت – فرحان مفتكر انو كومو بيكبر كلما ظلم الهلال.
• ديل حفظوهم جدول خمسة ..وزحوا ليهم بعيد.
• 2020م.
• المدينة الرياضية ح تكون بقت (كافتريات).
• كافتريات عديل كدا …(ما تسألوني كتير ما بقدر اقول ليكم اكتر من كدا).
• واستاد الخرطوم بكون قلبوه مستشفى خصوصي …هو وينها الكورة عشان يعملوا ليها استادات؟.
• الاستادات دي تعبانين فيها ساكت.
• ما في ليها اي داعي.
• شايلة ليها مساحات في الفاضي.
• سنة 2020 ..بكون حسم المباريات في (المكاتب) بقت حاجة رسمية (ما فيها اي خجلة) ..وبكون ما محتاجين لينا لي استاد.
• كتر خير استاد الخرطوم صمد كتير.
• شكرا ليه ما قصر.
• استاد مروي ح يبقي (مركز صحي)..شهر شهرين كدا ويقلبوه (فندق)…عشان الحكاية ما تكون واضحة.
• اول حاجة يعملوه مركز صحي.
• والشهر التاني يعملوه فندق.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• 2020.
• فريق المريخ الشايفنو دا بي (خالد النعسان) ..بحقق بطولة الممتاز في الموسم الواحد سبع مرات.
• خالد النعسان بقسم لقب الهداف مع شروني.
• ناس اسامة عطا المنان بطولة واحدة للمريخ تاني بشوفوها الوقت داك شوية على المريخ.
• 2020.
• دوري الممتاز من الاسبوع الثالث ممكن يقلبوه ليك (جر الحبل) ناس مجدي ديل شغالين على كيفهم.
• ولا في زول بيسألهم.
• ولا في زول بقول ليهم حاجة.
• ينطوا من مواقفهم بدون خجلة.
• جيبوا ليهم (حبل).
• ولا بعاينوا لي زول.
• ولا بتلفتوا.
• عشان كدا عملنا ليهم الممتاز (جر حبل).
• خليهم يعملوا اي حاجة في (جر الحبل) ما في زول ح يسألهم.
• ما في زول ح يقول ليهم شيء.
• ان شاءالله محمد سيد أحمد يبقى رئيس الاتحاد.
• محمد سيد أحمد قال ح نطبق القوانين ..قوانين شنو البطبقوها يا محمد ..انتوا زارعين ليكم (بطاطس).
• كلامك دا ما بقولوا إلّا زول زارع ليه (فجل).
• يا زول القوانين دي اصلو ما تجيب سيرتها هنا.
• القوانين دي كدي خليها بعيد.
• 2020م.
• ممكن يعتبروا المريخ فائز 13 / صفر….بي (خالد النعسان) دا.
• خلاص عاوز تقبل لينا على خالد النعسان.
• ما بيناتنا.
• ما في اي مشكلة.
• سنة 2020م.
• ح يقولوا اول حاجة نمنح المريخ (البطولة) قبل انطلاقتها ونلعب بعد كدا ..ما بنزعل..ولا بنقول حاجة.
• بنكون اتعودنا على الحاجات دي.
• ما جر حبل ساكت!!.
• ديل كورة القدم ساطوها ما يسوطوا (جر الحبل).
• 2020م.
• كورة القدم في السودان ما بتبقى زي كورة القدم التى نشوفها في العالم كلها.
• ما في اي مقارنة.
• شبه ساكت ما في.
• حكاية 11 لاعب.
• وحارس مرمي.
• وحكم راية.
• الحاجات دي كلها ما في داعي ليها …ناس سمير فضل ما محتاجين للنظريات دي ..دي حاجات (زحمة) ساكت.
• كلام فارغ.
• ولا في داعي ليها.
• ولا في لزوم.
• نعمل بيها شنو؟.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• سنة 2020م..مقابر احمد شرفي دي (شبر) ما بكون فاضل فيها.
• عشان تذكروا (الموت).
• عشان تذكروا الحساب.
• 2020 ..مقابر البكري بتكون قفلت.
• ابقوا عارفين.
• ومقابر فاروق دي اصلا ما تحلموا بيها.
• احسن نكون واضحين معاكم.
• ونقول ليكم الحقيقة.
• سنة 2020 – قناة النيل الازرق بتكون بقت (حمراء) عديل كدا.
• ما تغشوا الناس ساكت.
• والطاهر حسن التوم بكون قلب الشجرة القدّام القناة في شارع النيل (استديو).
• مداد 4.
• 2020 اتوقعوا اي حاجة.
• هوى السودان بكون بقى كتاحة.
• واكرم الهادي سليم بكون المدير الفني للمنتخب السوداني.
• ناس معتصم جعفر ديل.
• بعملوا اي حاجة.
• ولا بتلفتوا.
• 2020 …تركب مواصلات الكلاكلة …الكمساري يطقطق ليك ..تدفع (ربع القيمة) وتقول ليه : (مريخابي).
• كدا.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• كورة القدم في السودان سنة 2020م ح تكون بقت (كمونية) ساكت.
• وعدس وكوارع.
• انا قلت (كوارع).
• معليش (كوارع) دي دخلت غلط في العمود دا ..مفروض تمشي لي عمودي السياسي.
• لكن..كوارع دي فيها حاجة.
• 2020م.
• الروسي تمسكو من اضانو وتقول ليه رأيك شنو في المباراة؟.
• يقول ليك : الهلال عندو ضربة جزاء الحكم ما احتسبها ليه.
• كمان الروس بجاملو ليهم زول.
• ……………
و
• يا جماعة الكورة بالطريقة دي ما بتمشي.
• ولا تغشوا نفسكم.
• الشركة الراعية للممتاز من هسع ترفع يدها …الهلال الوضع دا ما عاجبو.
• التلفزيون …كلموه وقولوا ليه بطولة ما فيها الهلال (نقل) من ورقة لي ورقة كتير عليها.
• ولا تكضبوا.
• ولا تحرقوا دمكم.
• لا بد من عودة حق الهلال.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ………
• السيدة (ل)..ان شاءالله الخريف السنة القادمة يكون للنخرة.
• وقرّط على كدا.
• ——
• صحح

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.