زول امبده رجع جده !

86 views مشاهدة
أخر تحديث : الخميس 24 دجنبر 2015 - 4:32 مساءً
زول امبده رجع جده !

قال ليك في واحد بتاع نكات .. معلم .. اي نكته بقولا الناس كلها بتضحك فيها .. في يوم صاحبنا ده كان في قمة مزاجو وشغال نكات وسط مجموعة كبيرة من الناس .. والناس بتضحك .. الا واحد (ثقيل) ابا يضحك كلو كلو .. صاحبنا يعاين ليهو بطرف عينو ويقول في النكات .. ابتسامة صغيرة ما طلعت منو ! في النهاية سألو قال لي انت يا زول نكاتي دي كلها ما عجبتك ! ما بتضحك مالك ؟ الثقيل قال لي انا بفهم النكته بعد يومين !! بتاع النكات ذاتو ثقيل بعد يومين مشى لي في البيت و قال لي ..عملت لي شنو في النكات !!!!!
اها انا ذاااتي ثقيييل .. زمااااان لمن المريخ جاب سعيد السعودي من السعودية كان عايز يسجلوا في الفئات السنية ! طبعا كشف المريخ طوااالي مليان .. الا كشف المهرجان . ههه فاااااضي .
طبعا سعيد ده ماشاء الله جا البلد دي زول كبير ما ممكن يلعب في الفئات السنية .. وطبعا الوكت داك العبقري شمس الفلاح ما كان ظهر عشان يوري الناس حكاية تغيير الاسم دي ويخلي سعيد يسجل باسم اخو الصغير ! ناس المريخ قاموا طوالي طلعوا شهادة ميلاد (مضروبة) وصغروا لي سنو وعملو مولود في امبدة !
طبعا الثقالة جاتنا من جدة .. هلالاب جده طوالي رسلوا لي صورة شهادة ميلاد سعيد وأقامتو .. لقينا ود الناس مولود في جدة ! معقولة بس من جدة لامبدة !
ناس الاتحاد المحلي الخرطوم طبعا الحكاية دي عندهم عااااديه .. ضربو طناش .. يا اخوانا الزول ده مولود في جده .. ولا كأنوا بنتكلم معاهم ! والاتحاد العام .. نام .. وسعيد لعب صغيير في المريخ لكن سكيناهم ليك لحدي ما صعدو قبل مواعيدو .. زي مازن ولا محمد شمس الفلاح ده ! مصعدنوا للفريق الاول رغم انو من مواليد 97 ونجم منتخب الشباب والاولمبي .. لكن الجماعة طبعا مهددين .. الزول ده لو لعب مع الفريق الكبير وهو تحت السن طوااالي الشكاوي بتجي .. وطبعا مافي زول عارف البجي بعد سمير فضل ابو مليونين ده بكون زيو ولا ممكن يكون زي الفاتح خضر !!
المهم ناس المريخ ضحوا بي خانة ورفعوا سعيد ولعب سعيد وللحقيقة الولد مهذب جدا وكسب احترام الجميع ولكنه لم يكن موفقا في كثير من المباريات خصوصا مباراة النطحة الشهيرة ..
اها قبل يومين سمعنا بانو سعيد السعودي ماشي يحترف في السعودية .. طبعا مسكين مشى بالدرجة السياحية .. ما هو برضو ما نائب امين عام ! والله ناس اتحاد الكورة ديل حيرونا .. اول حاجة مافي وظيفة في الاتحاد اسمها نائب الامين العام ! هو الامين العام ذاتو قاعد في محل السكرتير .. سمعنا بنائب السكرتير .. والغريبة ما عندو درجة رجال الاعمال .. نائب الامين العام دي مافي خالص .. لكن ناس الاتحاد عملوا ليهو لائحة وكمان دخلوا في تذاكر طيران رجال الاعمال ! واومال !! مش صاحب اسامة عطا المنان .. وبشتغل ميزانية الفيفا !!! ظريفة .. اقصد خطابات الفيفا ؟ بالمناسبة اليورو اليومين دي نازل .. اعملوا حسابكم !! واحد قال لي انت ذاتك اعمل حسابك ؟؟ قلت لي انا محروس باليقين ورب العالمين والهلالاب الموجودين في اي مكان وشرفاء الوسط الرياضي ..
ياخي نسيتونا قصتنا .. اها سعيد السعودي قالوا سجل محترف في السعودية .. طبعا استغربنا .. زول قبل عشرة سنين وزيادة .. دي على طريقة سنة وزيادة .. شايف الجماعة خلو الاغنية الشبابية الرائعة دي (يا الطال غيابك طال .. سنة وزيادة) شكلو الزول عملها هجرة عدييل ..
قلنا سعيد السعودي ده ما ممكن اندية السعودية تسجلوا بعد العمر ده كلو في خانة لاعب اجنبي ونحن عارفين الخانات هناك غالية جدا .. اتاريهو استفاد من قانون جديد يسمح للاعب المولود في السعودية يشارك وكأنه لاعب سعودي . يعني ما بحسبوا في خانات الاجانب ! قلنا ليهم لالا لا .. الزول ده مولود في امبده وشهادة ميلادو معانا !! ثقالة كده بس ..

بيت البكاء شغااااال ..
الجماعة لسه في بيت البكاء لكن طبعا السودانيين بعد اليوم التالت بقلبوا الموضوع ونسه يا ونسي .. عادي ما تزعل .. واليومين دي مافي ونسة غير في الفلس في المنطقة دي .. طبعا في مناطق تانية الونسة كلها في اليورو !
اها نمشي علي اهل الفقيد .. ونبدا مع شقيقه مزمل (من ساهموا بخمسة جنيهات عددهم أقل من ثلاثة آلاف في شركة زين، وأقل من ألفين في سوداني.
* ومن اشتركوا بعشرة جنيهات حوالي 1400 في زين، و800 في سوداني.
* ومن ساهموا بخمسين جنيها 177 في زين، و89 في سوداني.
* ومن ساهموا بمائة جنيه شهرياً عددهم 70 في زين، و44 في سوداني.
* إحصائيات شركة (إم تي إن) لم تتوفر لنا بعد) اه اه اه اهههههها
ود عم الفقيد هيثم كابو الذي اشتهر بـ(العتب مرفوع) شغااال عتاب ولوم في اي زول ما عزاهم في مصابهم الجلل (مضى أكثر من نصف الزمن فإما التسيير أو الرحيل ! يجب منذ الآن التفكير في أسماء جديدة تقود المريخ في ما تبقى من فترة التسيير و(كفاية وعود ومواسير)
في واحد قريب (الفقيد) قالوا جا امس من لندن .. بتكلم شوية انجليزي وشوية عربي .. اسمو بابكر سلك (ماي بيبول .. كان كترت عليك الهموم اتدمدم ونوم ..تنوم كيف يا الهوان !!!!
تنوم كيف بي همومك الكترت دي مفروض يكون شعارك ما انوم
عشان احل المشاكل البقت هموم هو انت مليان هموم
كيف بجيك النوم )
سهر شديد .. تصدق يا سلك .. نحن بنصلي العشاء وننوم .. مرتااااحين

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.