سنة وزياده !

51 views مشاهدة
أخر تحديث : الأربعاء 16 دجنبر 2015 - 1:05 مساءً
سنة وزياده !

مساااااكين . كل القدرو عليه .. قالو شرف شيبوب ما بقدر يلعب في الهلال الا بعد سنة ونص ! لا قالوا الكاش بقلل النقاش .. لا قالوا لاعبنا وبنرجعوا . لا قالوا الهلال ما بقدر يشيل اللاعب .. لا قالوا العفش داخل البص علي مسؤولية صاحبه .. لا قالوا نتحدي .. لا قالوا ولا قالوا .. كل القالوا سنة وزيادة .. عامر الجوهري بس ( يا الطال غيابك طال .. سنة وزيادة .. قول لي كيف .. القي السعادة !!

شيبوب مشي يا دوب .. مشي الجنوب .. من هسة تحسب يا حبوب .. الباقي ليك سنة وزيادة .. وبعد السنة والزيادة دي بجيكم ولا بجينا !

نحن اصلا ما شفقانين .. يجي بعد سنة يجي بعد سنتين .. علي راحتو .. ( علي كيفك تفوت .. علي كيفك تعال ) دي بالمناسبة الحان صلاح ادريس لكن الكلمات للكاردينال .. والكاردينال قال لي امشي وتعال ( سنة وزيادة )

الجماعة مسكوا ليك في المادة 55 من الصباح شغالين ..شيبوب مشي .. لكن ما بجي راجع الا بعد سنة وزيادة ! مسؤولين من الخير .. المشكلة في مشيتو ولا المشكلة في رجعتو .. دي زي المادة 105 .. الحساب ببدا من مشيتو ولا من رجعتو .. انتو مالكم ومال رجعتو .. خليكم في مشيتو !! نحن بالنسبة لينا ما عندنا مشكلة في رجعتو ولا في مشيتو .. عايزين نمشي مشيناه .. وعايزين نجيبو بنجيبو .. المشكلة فيكم انتو .. ويا سلام ..سافر مشي ولا قال سلام .. دي من كلماتي انا ..ههههه .. والله الاغاني اليومين دي بقت ساهلة خلاص .. وقالوا لي شيبوب .. مشي الجنوب .. والرجعة ذاته .. بعد .. سنة وزيادة !

ضربة من امها .. من النوع البودي المستشفي طوالي .. خصوصا في البرد ده .. الضرب شديد وزي ما بقولوا اخوانا في المنتديات (بالحتة الفيها الحديدة )

تعود الهلال علي ضرب المريخ في (الارتكاز) من وهبة وادوارد وعلاء وحمودة والشغيل.. بس ضربة شيبون دي تاريخية .. رقم قياسي .. لاول مرة في التاريخ لاعب يشيلو من جووووه الكشف .. قاعد مسجل .. لاعب في المريخ .. اسمو موجود والله .. والتسجيلات انتهت . والجماعة قفلوا خلااااص .. عملوا الترتيبات .. في الهجوم بكري وتراروي .. تراوري ما جا .. في الوسط المتقدم اوكرا والوك .. الوك قصتو ما معروفة .. في الوسط المتاخر .. عمر بخيت وشيبون !! ههههه وسنة وزيادة !

يجي علي راحتو .. لا لاعبنا ولا كشفنا ناقص .. يكون ده اللاعب الزائد في الكشف .. والله انا محتار لي سنة وزيادة . المريخ ده بلعب بكشف زائد كيف .. اتاري شيبون ما كان مسجل !! معقول يا كاردينال من جووووه الكشف .. والله دي قوية .. وكمان لو كان انتظرت شوية لحدي ما ودو اسمو في الكشف الافريقي !

أقول ليكم حاجة .. انتو ما تعملوا لي عقد .. عاااادي زي عقد ابراهومة الصغير ! دخلوا العقد اتحاد الكرة .. عاااادي زي كرت ايداهور الاحمر .. قولوا شيبون وقع لينا وسافر جوبا اجازة .. عااادي زي سفر تراوري .. قولوا نحن اصلا بندي اللاعبين اجازات طويلة (سنة وزياده) بالمناسبة السنة وزياده دي بتخص اللاعب الهاوي .. يمشي هاوي ويجي هاوي.. ما عندها علاقة بشيبون بمشي هاوي وبجي محترف .. اسمعونا في هوي السودان .. محمد سيد احمد دشن حملته الانتخابية من هوي السودان بمادة اللاعب الهاوي .. الامين العام للمريخ بعد سنة زيادة سوف يشهد عودة شيبون مع جلوسه علي كرسي الامانة العامة .. يعني يومك التبقي امين عام .. شيبون بكون رجع .. وجع وجع شيبون رجع !

هو نحن مالنا ومال شيبون اصلا .. يمشي ولا يجي .. لاعب كان بلعب هاوي في المريخ .. انتقل محترف لفريق الملكية .. انتقال عااادي جدا ..

لو الهلال عايزو يطلبوا رسميا من الملكية .. لو الملكية وافق خلااااص .. لو ما وافق نجيبو بابييي .. نطلع لي شهادة اقامة .. نسجلوا لاعب جديد .. تقولوا اي حاجة نكلم ليكم سمير فضل ! هي ابييي دي حقتكم براكم .. نحن برضو كنا عايشين فيها .. سنة وزياده ..

قال الجماعة قعدوا مع شيبون قبل يومين وشايلين ليهم 2000 الف  .. قال ليهم زيدوها سنة وزياده .. قالوا لي النعسان جيبناه بمائة الف .. قال ليهم لكن انا صااااحي ..

قالوا لي طيب انت شيل دي وفي شهر ستة نتمها ليك .. قال ليهم الجنية السوداني سعروا نازل ودي سنة وزياده .. جيبو دولار .. قالوا لي طيب بكرة بنشوف اسامة عطا المنان !!

عااادي جدا يعني الوادي نيالا احسن من المريخ .. علي الاقل المريخ في الدوري الممتاز وممكن تخصموا من قروش الرعاية والتلفزيون .. والله فكرة وراحت عليكم .. كان تدينوا من اسامة واهو الديون علي قفا من يشيل .. الاندية عايزة من الاتحاد .. والرئيس مدين الاتحاد .. وامين الخزينة بدين الاتحاد .. والذكي بدين الاتحاد .. والغبي بدين الاتحاد ! المشكلة شنو لو ادوكم ستمائة مليون (دين) لي بعدين .. كان سجلتوا الولد بدل الكشف ده ! انا قاصد كشف اللاعبين ! كان تدينو وتكتبو شيك ان شاء الله بي سته شهور . اقول ليكم حاجة اكتبوا بي سنة وزيادة .. !

نقيف هنا ولا نديكم …..زيادة ..

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.