لائحة ترف في زمن التقشف ..

0
84 views

 

كلما اتذكر حديث الدكتور معتصم جعفر في قناة الشروق واراجع المستندات التي بحوزتي اضحك حزنا !!

أمس وانا أقلب في الاوراق الكثيرة التي اهداني لها صديق  عزيز وجدت لائحة الاتحاد المالية والتي صدرت في عام 2010 .. تجولت في بنود اللائحة فتخيلت ان هذا الاتحاد السعودي او الاماراتي .. فهي لائحة لا تشبه نهائيا اتحاد يشكو مدرب منتخبه من قلة المباريات وفترة الاعداد بسبب المال ويشكو رئيسه من عدم القدرة علي دفع مرتب اجنبي ..

في لائحة اتحاد (التقشف) حق مكفول للضباط الاربعة بالسفر بدرجة رجال الاعمال في السفريات الخارجية ! قلنا مافي مشكلة .. برضو معتصم جعفر رجل اعمال ومتعود علي درجة رجال الاعمال .. ومجدي بالمشاركات الخارجية اصبح لا يحتمل الا درجة رجال الاعمال واسامة عطا المنان رجل صاحب وكالة ودرجة الاعمال عادية عنده والطريفي صديق برضو سكرتير اتحاد الخرطوم السابق !!

وجدنا ان درجة رجال الاعمال تمتد فتشمل وكيل الاكاديمية .. مع العلم بان هذه الاكاديمية نائمة منذ فترة مائة المائة ! ولولا تذكرة درجة رجال الاعمال لما تذكرناها !!

تذاكر رجال الاعمال مستمرة .. فاللائحة تؤكد علي انها تشمل الامين العام للاتحاد .. ماشاء الله تبارك الله .. اتحاد غني جدا به سكرتير وامين عام ! وهو امر غير موجود في معظم اتحادات العالم ! منصب السكرتير ده خلاص بدلوهو بالامين العام ! لكن في السودان في منصبين لنفس المهام وبنفس التذاكر ! نفسي اعرف الفرق بين السكرتير والامين العام شنو ! انا اعرف الفرق بين الدرجة السياحية ودرجة رجال الاعمال لكن الفرق بين السكرتير والامين العام دي صعبة شوية ! ياخي فرزو بيناتهم في التذاكر عشان ما تلخبطونا ! في الهلال في امين عام .. وفي اهلي مدني في سكرتير ! فرق والله ..!

لسه درجة رجال الاعمال مستمرة . فهي تصل الي منصب نائب الامين العام ! طبعا ما ده عصام شعبان .. ولد المصارين البيض !  برضو بسافر بدرجة رجال الاعمال وبياخد نثريات علي تسجيلات اللاعبين المحليين ونثريات للاعبين الاجانب ونثريات تانية حامياني !

ولا يوجد في اللائحة نص واضح يفرض علي الاتحاد ضرورة قطع كل تذاكر درجة رجال الاعمال من وكالة تاكس ولكن الموضوع اكبر من اللائحة نفسها ! فكل التذاكر من وكالة تاكس ! قلنا مافي مشكلة .. برضو تاكس وكالة اسامة ومجدي .. وجحا اولى بلحم تورو .. وطالما ان اللائحة تعطي الحق القانوني لهؤلاء بالسفر عبر درجة رجال الاعمال فهذا حقهم .. ولكننا نسأل عن تغيير الاتجاهات .. برضو من حق رجال الاعمال ! يعني لو سافر مجدي والطريفي مثلا للسعودية في مهمة رسمية في الرياض ! هل من حقهم ان يعدلوا التذكرة ويدفع الاتحاد ملايين الجنيهات لوكالة تاكس لان الثنائي الرائع يريد ان يزور عروس البحر الاحمر !

في لائحة اتحاد التقشف بند واضح وصريح يتحدث عن ان نثرية عضو مجلس الادارة في السفريات الخارجية 1500 دولار اذا كانت هناك دعوة خارجية مكتملة الدسم .. بمعني اذا كان عضو المجلس (معزوم) والاعاشة والاقامة علي حساب صاحب الدعوة ينال مبلغ 1500 دولار ولو مسافر بدون التزام من صاحب الدعوة يقرر الضباط الاربعة تكلفة الاستضافة ..

هناك ايضا بند وضع بعناية .. وهو نثرية مدير المنتخب والاداري المسئول حيث ينال كل منهما مبلغ 750 دولار نثرية في البعثات الخارجية .. نوجهكم نحو منتخب الشباب .. راجعو عدد السفريات .. اسماء المسافرين .. المدير والاداري المسؤول !

ولكن هناك مفاجأة غير سارة لكم .. فهناك بند واضح وصريح يتحدث عن الشخص المسؤول عن التصديق علي الاموال .. تصدقوا.. السكرتير !! ففي الفصل الثالث (20) نقرا الاتي (السكرتير هو السلطة المخولة لها بالتصديق علي المصروفات في حدود الميزانية المصدقة )

لا اعتقد انني مضطر لاقول لكم ان امين الخزانة هو من يقوم بالتصديق وان مجدي شمس الدين لا يصدق نهائيا الا في حالات نادرة جدا !! من حقكم تشفقوا علي المعلومة فكل شئ جائز !! وبرضو بقول ليكم اصبروا !!

الزول ده لسه ببكي !

كان العزاء في السودان يمتد لايام كثيرة وبحمد الله فقد اتفق معظم اهل السودان علي ان يكون العزاء ليوم او يومين علي الاكثر .. كنا نتوقع ان يتم رفع العزاء امس ولكن يبدو ان اهلنا في العرضة جنوب مصابهم جلل .. حتي انهم لم يتوقفوا عن سيرة الفقيد نهائيا !

ومازال شقيق الفقيد مزمل يواصل في النواح حتي انه قال (ارتداء شيبوب للكسكتة أهون علينا من دعم نادر مالك للانتخابات) يعني حارقاك الكسكته اكتر من مشية شيبوب  ! خلاص يا صديقي نخلي يلبس .. جلابية بيضاء مكوية .. وطاقية بيضاء ! حمراء كيف يا مزمل انت كمان ما تبالغ .. معليش عندكم بكاء لكن رأيك شنو في الاغنية دي .. ابعد روحك انت . من الزول اب كسكته .. بكسر حته حته !

تحدثنا عن العادات الطيبة في السودان ولكن الشئ المؤسف ان بيت البكاء لم يشهد اي تكافل حتي (الكشف) ناس الحلة قاطعوا ! زول دفع مافي .. الكراسة فااااضيه .. سألنا الحاصل شنو قالوا اسألو شقيق الفقيد .. قلنا يا مزمل الحاصل شنو ؟ قال القروش كلها كملت في العلاج ..

(الأخ آدم سوداكال تكفل بنفقات سفر أبوجريشة إلى نيروبي لإعادة شيبوب، وساهم بمبلغ مالي مقدر (مع الوالي) لتمويل عملية إخراج شيبوب من جوبا) ههه طلعتوا بالقمر ولا شنو ؟!

كملتوا قروشكم في الخطة والخطة البديلة .. بالمناسبة مزمل ما بتوب تاني جاب سيرة الخطة البديلة وهو يتحدث عن عدم قدرة المجلس علي سفر الفريق للقاهرة (لذلك اقترحنا خطة بديلة تمكن اللجنة من بدء الإعداد محلياً بأعجل ما تيسر) اقول ليك حاجة رأيك شنو في 433

.. طبعا الخيمة قصيرة شوية . عشان كده سلك قاعد بره .. ببكي ويلوم براحة لكننا سمعنا الكلام وشمينا ريحة المطار (عيب يا شفوت .. المحرية فيكم اكبر من كده ) كده ولا كده ولا ضربو كده .. نخليكم في بيت البكاء ولا نسوقكم معانا !!

خلو بالكم من .. انتو المحترف الجبتو للمهرجان وما لعبتو اسمو منو ؟ علي العموم خلو بالكم منو ؟؟!!!

 

NO COMMENTS

LEAVE A REPLY