0
177

بالطول بالعرض .. أسامة يهز الارض
في بيان الادارة المالية الشهير بعد الكشف عن دعم الفيفا للاتحاد السوداني جاءت عبارة اشتهرت بها كل البيانات المشابهة في المؤسسات المختلفة (نحن نعمل بشفافية ومن اراد اي معلومة فليأتي الينا) طبعا هذه عبارة تصلح للضحك فقط .. فكل المؤسسات التي تستعملها في بياناتها تكون في الغالب مؤسسات سرية من الصعب جدا ان تحصل فيها علي معلومة !
نحن نعلم تمام العلم بان الدكتور كمال شداد بكل قوة شخصيته كان يعاني في الحصول علي معلومات من الادارة المالية دعك من صحفي يبحث عن الحقيقة !
ونقول للاخ اسامة وللادارة المالية شكرا في كل الاحوال فنحن نستمتع اكثر عندما تكون المعلومة اكثر صعوبة وتحتاج الي جهد اكبر .. علي الاقل هي تعطي فرصة للصحفي الاكثر اجتهادا حتي يتميز .. فالمعلومات التي تأتي من الاتحاد عبر النشرة الاعلامية تتساوي فيها كل الصحف ولا تعطي تميزا لاحد !! بمناسبة النشرة الاعلامية سمعنا قبل فترة (طويلة) عن خبراء مصريين قادمين من اجل الموقع الالكتروني ثم سمعنا قبل فترة (متوسطة) عن انتهاء العمل في الموقع الالكتروني ثم سمعنا قبل فترة (قليلة) عن اموال كثيرة صرفت علي الموقع الالكتروني وسمعنا وسمعنا ولم نر شئيا !!!
وحقيقة نحن في شوق للموقع الالكتروني فعلي الاقل يمكن ان نستقي منه معلومات في غاية الشفافية وربما بالصور علي طريقة صحيفة (الدار)
يعني ممكن تنشروا لينا تكفل (الادارة المالية) بمنصرفات تصحيح اوضاع اجانب نادي (الوادي نيالا) معلومات كده ومعاها صور للثنائي النيجيري ماثيو وانياما .. الغريبة ما لقينا ليهم صورة نهائيا ! تسجيل سري ده يا اسامة علي طريقة الحسابات ولا شنو !
الموقع الالكتروني للاتحاد .. منصرفات ومنصرفات ولا نري موقع ولا نري حتي جوازات ! الثنائي ده بلعب لسه في الوادي نيالا ولا اخليتو خاناتهم تمهيدا لضم (روجر) لاعب اسود دارفور الذي كنت تريد ان تسحبه من ناديه وتسجله علي طريقة (الوك ) بدري بدري ومن غير مازول يعرف حاجة ولكننا سعداء بانتصار نجوم دارفور عليك وبالتاكيد نحن سعداء بانتصار الصحافة الرياضية عليك في بداية الموسم !
شفافية اسامة عطا المنان عشان تحصلها لازم تقوم بدري خالص .. قال شفافية في الاموال قال .. ياخي شفافية الاموال صعبة عليك خليها .. اعمل لينا شفافية في التسجيلات دي .. ورينا سجلتو الوك اكيج للمريخ باي صفة ؟ لاعب وطني .. ولا اجنبي ؟ انتقال حر ولا تسويق .. طلبتوا ورقوا من المريخ كوستي ولا من الملكية جوبا ؟؟ يا شفاف ..
ياخي انت ما شفاف في توقيعك .. معقول تكون شفاف في ترقيعك .. ترقيعك دي ما عندها معني للقافية ساكت .. زي الغنا الشباب اليومين دي !!
لاحظنا حاجة لذيذه اخي اسامة .. اصلا نحن عندنا ثقالات الملاحظات .. لما توقع لروحك بتعمل التوقيع بتاعك بالطول ! يعني بتكتب اسمك لي فوق ولما توقع لمجدي شمس الدين بتعمل التوقيع بالعرض .. يعني بتكتب اسمك لي تحت !! وتحت تحت كده نحن عارفين ليه ما بتكتب عن مجدي شمس الدين رغم انو القانون بقول كده ؟ بتعرف يعني شنو قانون يا اسامة !! معليش مصيرك تعرف .. المهم نحن لاحظنا انو طلب التذاكر لوكالة تاكس بخصوص ثنائي (مريخ كوستي) كان بتوقيعك البي العرض يعني توقعيك بتاع مجدي شمس الدين .. لكن توقيعك بتاع تصديق قروش بكري المدينة كان بالطول . يعني مساهمتك واضحة للعريس!! وتوقيعك في الشيكات طبعا بالطول لكن توقيعك في خطاب ايقاف اجراءات لاعب اسود دارفور كان بالعرض . يعني عايز تقول عملوا مجدي .. ياخي احترم عقولنا شوية .. نحن كلنا عارفين مجدي مسافر !
شايف الادارة المالية نست حكاية الشفافية وما ردت علينا في قصة (اليورو) مش حرام عليكم ما تكلمونا بطريقة التحويل دي .. التجار كلهم مستغربين كانوا في الطريقة البتحولوا بيها الدولار .. طلعتوا خبرة .. لكن لسه نحن محتارين بتسحبوا كيف ! بدوكم ليهو يورو حاااار كده ولا سوداني .. وبتحولوا كيييف والسعر كيف .. والله المسؤوليات عليك كتيرة يا اسامة .. شئ تحويل وشئ تضريب وشئ تسويق وبرضو بتجي التسجيلات وبدري كماان .. وين بتلقي وكت لي ده كلوا ! ومشرف علي الوادي نيالا ومريخ نيالا وشكوي الرابطة كوستي وطلبات الفحص والانتخابات . ما قلت ليك انت الظاهرة ما الوك !! بس اديك خبر .. اقتراب نهاية الظاهرة .. عشان مزمل ابو القاسم يعرف انو الثورة الزرقاء ليست صغيرة ! مسكين مزمل ما عاش في نادي ثورات !!
اخر ثقالة .. واحد ثقيل في المنتديات .. كتب .. الاتحاد السوداني وقع لـ(اسامة) في (عطا) ههههه

NO COMMENTS

LEAVE A REPLY