شيبوب رفض وليس تحويل..

0
60 views

لاحظت ان اعلام المريخ يكتب بقصد او دون قصد .. بجهل او دون جهل عن ان لجنة شؤون اللاعبين تعاملت مع قضية اللاعب شيبوب مثل تعاملها مع قضية اللاعب الوك وقامت بتحويلها للفيفا وهو امر خاطئ جملة وتفصيلا .. فلجنة شؤون اللاعبين غير الهواة رفضت شكوي المريخ ورفضت ان تزج بنفسها في قضية هي ليست طرفا فيها حيث اكدت اللجنة علي ان وصول طلب شهادة النقل الدولية للاعب من الاتحاد التونسي تعني بوضوح ان اللاعب قد وقع عقدا مع شبيبة القيروان واصبح بالتالي منتمي لنادي واتحاد خارج اطار الاتحاد السوداني لكرة القدم ولا يستطيع ان يفعل له عبد العزيز شروني شيئا .. لجنة شؤون اللاعبين رفضت شكوي المريخ لعدم الاختصاص وقالت بذوق لاهل المريخ لو عندكم شكوي قدموها للفيفا ! لو عندكم . ما عايزين علي كيفكم .. هي لم تحول الملف للفيفا كما فعلت في قضية الوك .. الذي تم تحويله او سيتم تحويله هو كرت اللاعب شيبوب للاتحاد التونسي .. بختك يا عصام شعبان .. ممكن برضو تطالب بحافز لاكمال اجراءات تسجيلات لاعبين اجانب ! هههه .. عفوا القارئ العزيز .. الشرح لاحقا !!  حتي ولو لم يتم تحويل الكرت سيتم استخراج كرت للاعب شيبوب ليكون المحترف السوداني الوحيد خارج الوطن وسيذكر المذيع ذلك عندما يشارك شيبوب مع المنتخب في اول مباراة قادمة .. ده المحترف الوحيد الذي يلعب خارج السودان يشارك مع فريق شبيبة القبائل التونسي .. النادي التونسي لم يدفع مليما في الصفقة بحكم ان اللاعب كان هاويا في ناديه السابق ههههه !

لجنة شؤون اللاعبين غير الهواة اخطأت منذ البداية في النظر في قضية لاعب هاو ولكنها ضحكت في النهاية من طلب المريخ باعتبار شيبوب لاعب محترف وتحويل هويته !! صدقوا دي اسامة عطا المنان زاتو ضحك فيها وقال (دي انا زاتي ما فكرتا فيها !!

عايزين تعملوا محترف وبعقد كمان ومن  غير يوقع عقد  وعايزين الاتحاد يسالكم عن عقدو بعد يوقع العقد !! ويسألكم عن موافقتكم او عدم الموافقة لان هناك اتحاد طلب اوراقه ! والله دي نكتة موسم 2016 مع بدايتو كده .. لكن النكات حتتواصل في اول شكوي ضد مازن شمس الفلاح ! حتكون في نكات كتيرة في الشكوي دي .. ده ما مازن ده محمد ! الاقرار الشرعي القدموا اللاعب بؤكد انو محمد هو مازن واي زول في البلد دي عارف انو محمد ما مازن ! يعني اللاعب الكان في شباب المريخ وتم تصعيده للفريق الاول هو ما نفس اللاعب ! جسدا نعم .. اسما وعمرا لا ؟! دي يا شروني يقدموها متين الشكوى دي ! قبل المباراة باعتبار انها خطأ في التسجيل حسب لوائحكم الجديدة ؟ ولا بعد المباراة باعتبارها خطأ في التزوير !!!! يعني لو مازن او محمد ده نال ثلاثة بطاقات مثلا وشارك في مباراة .. الشكوى تكون كيف ..! قبل المباراة باعتبارها شكوى في البطاقات كما تقول اللائحة الجديدة ؟؟ ممكن مازن يجي يقول لا ده ما انا!!! الشارك ده اخوي محمد ! انا ما عندي اي انذار ! واللجنة المنظمة بقيادة مجدي شمس الدين واسامة تقول كلام صاح مفروض الشكوى تكون في التسجيل وتكون قبل المباراة ! وعاااادي لجنة الاستئنافات توافق على طريقة تفسير المادة 105 ويجي بعد ذلك من يتفاخر بان اهل القانون في المريخ كسبوا القضية ! اديك مقترح يا شروني .. لو احترتو خلااااص في شمس الفلاح حولوا ملفوا للفيفا وبكده يكون للمريخ لاعبين ملفاتهم في الفيفا !! اتنين ما تلاتة عشان ملف شيبوب ده خلاص في البحر الابيض المتوسط !

قال ليكم لو عندكم شكوي امشوا الفيفا .. يلا امشوا الفيفا .. مش قلتوا عندكم سوابق وفي لاعب دنماركي اعتبروا محترف رغم انو ما محترف ! يلا فرصة نشوف لاعب سوداني محترف رغم انو ما عندو عقد !!!!

مجلس المريخ طلع عاقل وركز علي القضايا المهمة . التركيز علي الديون ومعرفة دولارات المريخ وكيفية استلامها من اسامة عطا المنان ده الكلام الصاح .. شيبوب ده خلاص راح .. المريخ عندو مشاكل مالية وعندو دولارات كتيرة جات من الكاف .. باي حق يستلمها اسامة عطا المنان قبل ما تصل المريخ ! ناس المريخ عايزين يقعدوا مع اسامة في موضوع الديون لكن اسامة وين ؟ رجع تاني يتابع بطولة (الشان) بعد ما حضر اجتماع اللجنة المنظمة والتزم الصمت في قضية (شيبوب) لانو اصلا رجع عشان اجتماع اخطر واهم ! التفاصيل لاحقا ..

ديون المريخ يبدو انها ستفجر الاوضاع اكثر .. فقد جاء في (الزاوية) انو الوزارة تدخلت في الامر وسوف تطلب من الدائنين تقديم مستنداتهم خصوصا وان هناك جهة كما يقول الخبر طالبت بحقوقها علي وجه السرعة وان رئيس المريخ المسكين اسامة ونسي مهدد بالقبض بسبب هذه الديون .. ! ديون موروثه من المجلس السابق واللوم علي اسامة ونسي ! والله يا عصام الحاج مرات بتقول حكم .. أكتب وأكتب يا ود الحاج .. في ناس برضو بتقرأ وبتخرج بالمفيد . كلام عصام .. غير شخصية عصام ! لو فيهو شيء مفيد ممكن تستفيدو منو . الفكرة ليست ملك احد ! كل العالم بتكلم عن اقتصاديات الاندية .. عصام الحاج بتكلم عن اقتصاديات الاندية .. شنو المشكلة !

الهجمة الاعلامية القادمة ستكون علي الوزير الذي طالب بتفاصيل ديون المريخ ! الناس ديل جنهم وجن الشفافية والديون والاموال !!!

شيبوب في تونس .. الوك في الفيفا .. دولارات المريخ عند عطا المنان .. كاس الممتاز عند الهلال .. لجنة الاستئنافات في الذكريات .. وثورة الهلال مستمرة والسادن يطلع بره .. هههه حلوة دي .. نواصل نحن ولا نجيب البوليس !!!

رفض شكوي شيبوب

NO COMMENTS

LEAVE A REPLY