البيتو من (ضفر) ما يجدع (عمار الدمازين) بالحجارة

90 views مشاهدة
أخر تحديث : السبت 5 مارس 2016 - 10:36 صباحًا
البيتو من (ضفر) ما يجدع (عمار الدمازين) بالحجارة

• وانا زي بشوفك طالعة من نص العيون…
• مستعجلة…
• متلفحة النور ..والسكون…
• من غير تجي – ببقى الحضور…
• نقعد نجادل في الجنون …
• الدينا عيد …
• وإلّا اصلو (الفرحة) من طبع الفنون….
• ……..
• قالوا ليك …اجتمع مجلس المريخ (لجنة التسيير) عقب مباراة النسور والمريخ وقرر المجلس باكمله تقديم شكوى فورية في اللاعب رقم (37) في فريق النسور امس.
• لكن النسور ما فيه لاعب بالرقم (37).
• ما عشان كدا.
• انتوا قايلين (الشكوى) في شنو؟ – ما في الكلام دا.
• حسب كلام مزمل ابوالقاسم ليهم ..قال ليهم (الشكوى) دي مضمونة.
• واسامة عطا المنان قال ليهم (الشكوى) دي لو ما دفعتوا فيها (رسوم) ح تكسبوا المباراة.
• مضمونة مية المية.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• لمن جمال الوالي كان رئيس لنادي المريخ كان في مثل هذه الحالات صحيفة (الصدى) بتطلع بـ (اي دمعة حزن لا لا).
• يا حلاوة.
• وصحيفة (الزعيم) بتطلع بـ (نهواه في كل الظروف).
• هسع في فترة اسامة ونسى لمن يحصل تعادل زي تعادل النسور دا بيقطعو المجلس.
• وبقولوا ليه وين مرتبات المحترفين؟.
• ولماذا لم يمنح اللاعبين حوافز الانتصار السابق؟.
• لا بعرفوا ليك دمعة ولا بعرفوا ليك نهواه في كل الظروف.
• دا كلام (رومانسية) ساكت.
• اسامة ونسى بوروه (العين الحمراء).
• في فترة جمال الوالي لمن تحصل خسارة بيطالبوا يشيلوا (الجهاز الفني).
• في فترة اسامة ونسي التعادل ساكت بيطالبوا يشيلوا (مجلس الادارة).
• غايتو لو اتحرفنتوا شديد كدا.
• واخلصتوا للشعار.
• ممكن يعيدوا ليكم (ضربة الجزاء).
• اعادة مباراة تاني تشموها قدحة.
• يعني ممكن الليلة سيحة يطلع في عالم الرياضة ويقول ضربة الجزاء مفروض تتعاد.
• حليل زمن جمال الوالي – المباراة كلها كان بعيدوها.
• هسع ضربة جزاء ما بيعدوها ليهم.
• فرق!!.
• انتوا ما تحمدوا ربكم ..ادوكم (ضربة جزاء) ملح ساكت – وطردوا ليكم لاعب من النسور.
• ناس مزمل بكونوا عشمانين يطردوا ليهم تلاتة.
• طبعا رضا مصطفى الشيخ ..الليلة ممكن يطلع في عالم الرياضة ويعتذر للمريخاب..ويقول ليهم (ارضية الملعب) كانت غير جيدة.
• ولاعبو النسور لعبوا بي (عنف) زايد.
• اصلو الزول دا كلما يتعثر المريخ بقول لينا كلامو دا.
• نحن حافظنو.
• وما بعيد كمان يجيب ليهم لقطات من تتويج المريخ الموسم الماضي.
• اصلو رضا مصطفى الشيخ ..وقت ما يلقى ليه ضربة جزاء للمريخ – بقوم يجيب ليهم (التتويج).
• والله – الليلة إلّا تجيب ليهم (حنان بلوبلو) في عالم الرياضة عشان تغني ليهم (حمادة بوظ اعصابنا).
• ما عندك طريقة غير دي.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• بعد مباراة الهلال والنسور بابكر سلك كتب تحت عنوان (دخلوها ونسيرها حام).
• ونحن بنقول ليه (دخلوها وحمامها طار).
• امير كمال امس مركز في (دخل المباراة).
• كل ما يدخل (مشجع)..بياخد ليه (نطة).
• الزول دا عندو باقى قروش بسددوها ليه من دخل المباريات.
• المباراة ذاتها ما حقتكم يا امير كمال.
• طبعك بقى كعب بتركز في شباك التذاكر اكتر من شباك المريخ.
• سلك كتب بعد مباراة الهلال التى انتصر فيها على النسور 1 / صفر..(دخلوها نسيرها حام).
• الهلال انتصر من غير ضربة جزاء…(مشكوك في صحتها).
• وحالة طرد.
• وكمامات.
• كتب سلك :
• (فداسي يكون في الحليماب – مهاجم النسور يكون في العامراب – غايتو الاهلة مشوا الكورة – دخلوها ونسيرها حام – النجومية كانت لمكسيم برغم اخطاء الخروج المتكرر – وده في حد ذاتو مؤشر للمستوى والمحتوى).
• يا ربي جمال سالم امس كان ماسك (الشاي).
• يا سلك الكلام دا ما تكبتوا عن فريق عندو (ابوعاقلة).
• شوف خالد النعسان بتاعكم ..امس دخل المباراة بي (بطانيتو).
• اول مرة اشوف لي لاعب بدخل في الشوط الثاني (نعسان).
• الزول دا من جيبوه في التسخينة مع بكري المدينة ظاهر عليه (نعسان).
• بكري المدينة (نعس) معاهو.
• كان تخلوه يتم نومتو في الكنبة – بدل ما ينوم ليكم في خط 18.
• بعدين عندكم مدرب ..تقول زائغ من فرقة الفاضل سعيد المسرحية.
• الزول دا لو جرب (الكوميديا) ممكن ينجح.
• كوميديان خطير.
• وكان لي بكري المدينة ..الظاهر عليه ..ما قادر يتجانس مع مجلس (اسامة ونسى).
• ظاهر.
• واضحة دي.
• المليارات تكون انتهت.
• عشان كدا بكري المدينة قطع.
• بعد مباراة الهلال والنسور طبعا سلك اتفاصح شديد ..وقلت ليه انا ..يا سلك كدا انتظر مباراة المريخ والنسور.
• كلمتو.
• قلت ليه ما تستعجل.
• لكن ما بسمع الكلام.
• قلت ليه لو عندك كلام قولوا لينا بعد مباراة المريخ والنسور.
• اصبر 72 ساعة.
• الضيق كعب.
• الضيق ضيع عليك (شيبوب)..جابوه من جوبا ومشوا بيه اديس ابابا ..وكينيا وسلموه الكاردينال.
• تقول جايبنو عشان عبدالتام يتصور معاه في مطار الخرطوم.
• سلك عشان زول بتاع (تمهيدي)..استعجل.
• وكشف ورقو.
• شوفوا سلك كتب شنو؟..تقول شاهد مباراة المريخ والنسور في (طشت) ياسر المنا.
• الزول دا اي حاجة كتبها في الهلال حصلت عليه في مباراة الامس.
• سبحان الله.
• قلنا ليكم الهلال دا كلو بركة.
• سلك كتب تحت عنوان (عصرة لمن إسماعيل اتلفت)…اتخيلوا الهلال اتعصر وهو غالب من الدقيقة السادسة من عمر المباراة.
• طيب انتوا نقول عليكم شنو؟.
• يدوكم ضربة جزاء تطيروها.
• يطردوا ليك لاعب ..تقعدوا تتلفتوا.
• يعملوا ليكم شنو تاني؟.
• الغريبة سلك الذي سخر من الهلال الذي فاز على النسور وكتب بعد المباراة (عليكم الله الكورة دي ما خاينه؟.. اقل شيء لاعب النسور بعد الدمازين جلي الكورة بي راسو).
• سلك الليلة ح يقول شنو في كورة مهاجم النسور التى منحها له (ضفر)..وضربت في القائم.
• البيتو من (ضفر) ما يجدع (عمار الدمازين) بالحجارة.
• نحن لو ضفر دا بيلعب معانا – من الشارع ما بنمرق.
• ولا بنطلع.
• يمين عمار الدمازين بالنسبة لي (ضفر) اختصاصي مخ واعصاب.
• كمان بتتكلموا عن عمار الدمازين.
• امال علي جعفر يبقى شنو؟..تقول زارع ليه (بصل) – المباراة كلها قاعد ينطط براهو.
• تقول بيربط ليه في (اريل).
• ان شاءالله بس يا سلك المدرسة التى دخلكم ليها مهاجم النسور امس بعد ان ضربت كورته بالقائم ..تكونوا استفيدتوا منها.
• ان شاءالله تكونوا اتعلمتوا ليكم حاجة.
• بي صراحة كدا (ضفر) دا ..مع (الكمامات) عاوز ليه (نقالات).
• ترواري (كمامات) براها ممكن تمرقو.
• لكن ضفر دا مع (الكمامات)..شوفوا ليه حل.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• من الآن ..لو ما حصل تدخلات من (لجنة الاستئنافات) ولجنة الحكام – اقول ليكم ان الفارق بين الهلال والمريخ سوف يتجاوز الـ (18) نقطة – الرقم القياسي المسجل باسم الهلال في الممتاز.
• من الآن اراهنكم ان الفارق سوف يتجاوز رقم رمضان احمد السيد.
• اتذكروا الكلام دا – عشان نحن ما بنعيد الكلام مرتين.
• الجماعة ديل في الخرطوم – وقدام النسور بعملوا كدا وقت يمشوا عطبرة يعملوا شنو؟.
• شندي!!.
• كادوقلي!!.
• الابيض!!.
• غايتو وقعتكم سودا.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ………….

و

• الليلة يوم فرحتنا.
• مع الامير ..ح تشوفوا الملك.
• بكرة نتلاقى في نفس المساحة ان شاءالله.
• عشان ناس ولاءالدين الليلة عندهم كلام كتير.
• ………
• السيدة (ل) – الزول وقت يكون فرحان ما يتقل في الفول.
• وقرّط على كدا.

رابط مختصر

أضـف تـعـلـيق 1 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.