ممكن نستاذنكم ونتكلم عن الصدارة !!

55 views مشاهدة
أخر تحديث : السبت 5 مارس 2016 - 2:49 مساءً
ممكن نستاذنكم ونتكلم عن الصدارة !!

من اول مباراة في  الدوري .. قالو المريخ متصدر .. دي ما مشكلة .. المشكلة في انهم بصروا يكتبوا صفة الوصيف امام الهلال !! قوة عين غريبة .. فريق وصيف نادي خمسة سنوات متتاليات .. وفي موسم الفارق بينه  ونده 18 نقطة وبجيب سيرة الوصيف  .. نحن والله طيبين البنصفكم بالوصيف !!

مباراة واحدة في الدوري قالوا المريخ متصدر .. مباراة تانية تحدثوا عن الصدارة والجدارة .. مباراة تالتة كتبوا عن صدارة الهدافين .. قلنا ليهم روقوا انتو لسه ما طلعتوا من ملعب (الحكومة) اول طلعة نسوا ليك الصدارة وقعدوا يتكلموا في ملعب (النقعة) ..

البرمجة فرضت علي الهلال ان يغيب لاسبوع .. ما صدقوا رجعوا تاني يكتبوا في الصدارة .. الناس ديل مخلوعين خلعه .. طبع الاقليات كده .. اي حاجة بكبروها واي حاجة بخافو منها .. لو سمعوا صفارة قطر يقولوا ليك الحكم حسب للهلال ضربة جزاء ! والغريبة هم يتحدثوا عن انحياز التحكيم وينسبون انتصارات الهلال للتحكيم .. قلنا ليهم علي الاقل نحن لما الحكم ينحاز لينا بنستروا .. بنغلب .. ان شاء الله بقون !! معقولة بس حكم ينحاز وينضرب ومباراة بدون شرطة وارهاب وفي ملعبك وتخرج مهزوم ومن فريق يحمل اسمك الله يجازي محنك يا مريخ الفاشر !! وحكم ينحاز ليك في كل دقائق المباراة امام النسور .. يترك امير كمال بعد ان اعتدي بالضرب علي لاعب النسور الذي سالت الدماء من وجهه ولا حتي مخالفة !! ضربة جزاء سيحة خلااااص لما خجل قال  والله ما واضحة ! اي حاجة عملها الحكم والمريخ ما قادر يجيب قون .. المتعود علي هدايا عمو سمير ما بغلب !! هو فعلا انتو تعبانين لييه ..شكوي شكوتين اخر الموسم والموضوع ينتهي ! بس اسمحوا لينا نتحدث عن الصدارة .. عشان عايزين نوريكم الناس بتكلموا في الصدارة متين .. لما يكون نصف الدورة الاولي انتهي ! انتو مع معتصم جعفر واسامة عطا المنان مش عملتوا بدعة (بطل نصف الموسم) وقلتوا عايزين تشاركوا في البطولة العربية .أسمحوا لينا وبعد اذنكم نتحدث عن الصدارة في منتصف الموسم !  بفارق النقاط .. والاهداف .. افضل هجوم .. افضل دفاع . والهداف مننا ! دي كده اسمها الصدارة غير كده اسمها (الشتاره) يعني ما ممكن بعد كورة تقول انا اتصدرت .. علي الاقل انتظروا مباريات الاسبوع الاول تنتهي !! عندكم شفقة غريبة .. امس في صحيفة كاتبه عنوان بديع ( انفراد .. الوالي رئيسا بالانتخاب في يونيو !!!!!!!!!!! معقولة بس ولا حتي خاتين حساب للقدر ! ولا ساكت زول يطعن في .. اصلا الطعن في البلد اليومين دي كتر !!! ولا حتي فرصة للمنافس .. ياخي لو عارفين ما عندو منافس اعملوا اعتبار للدولار المرتفع ده !!! مش امكن شهر ستة يصل ستة وعشرين جنيه والظروف الاقتصادية تجبر الناس علي مواقف جديدة ؟؟ وين موقف الوالي الجديد .. انا قاصد بتاع المواصلات ما تفهموني غلط .. المهم شفقة غريبة .. ابوشيبة قال حكم مباراة المريخ والنسور كان جيدا ولكن نعيب عليه الوقت بدل الضائع حيث انه احتسب خمسة دقائق بينما توقفت المباراة لست دقائق !!!!!!!! وده حكم جيد يا ابوشيبة !! معقولة بس !حكم يحرم المريخ من دقيقه كاملة وقت بدل ضائع وتقول عليه جيد والله انت راجل طيب ومسامح !! رايك شنو في تمانية دقائق وقت بدل ضائع .. قون وراء قون .. عينك ما تشوف الا النور .. تقول قون بشه الاول تسلل نجيب ليك التاني . تقول مخالفة مع الحارس نصور ليك التالت .. تقول ضربة الجزاء غير صحيحة نجيب ليك الرابع .. تشيلهم كلهم نجيب ليك قون كاريكا .. ما عجبك نجيب قون موكورو تزعل نديك محمد عبد الرحمن !!

أقول ليك حاجة في اجتماع للجنة شؤون اللاعبين غير الهواة بعد بكرة .. اشتكي ليهم .. قول ليهم المريخ خسر بسبب لعب هاوي محترف اسمو شيبوب !! برضو شكوي مناسبة ومتطابقة مع الفكر المتقدم لناديكم ! كيف يغيب شيبوب عن وسط المريخ وهو لاعب هاوي ..طوالي اللجنة دي بتديكم النقاط ؟ انتو عايزين ياتو نقاط ؟ الفاشر ولا الخرطوم !!! الاتنين .. مافي مشكلة يا ابوشيبة اصلا اسامة عطا المنان عندو (حساب) مفتوح مع ناس المريخ .. يديكم كم نقطة وبعدين (الحساب) يجمع .. قروش سيكافا مع قروش الاتحاد الافريقي مع تذاكر السفر مع كم نقطة او نظام الميل بتاع الخطوط العالمية ده وممكن المريخ يكون في الصدارة !!!هههههه بس من غير جدارة !

بالمناسبة لجنة شؤون اللاعبين ستناقش قضية لاعب اسود دارفور الذي وقع لنادي الوادي نيالا الذي يرعاه اسامة عطا المنان ! اسامة احتمال كبير يكون رئيس الاجتماع ! برضو في حساب بين الوالي نيالا ..ههه خطأ مطبعي .. اقصد الوادي نيالا واسامة والموظف الذي يجدد الجوازات !! بس اعمل حسابك من اسود دارفور .. نحن عندنا تمانية اقوان عايزين نتفرج بيها ما فاضين هسة يا اسامة بس راجعين ليك .. سمعت بلاتر قال شنو !! ورونا نثريات الحكام الافارقة يا مجدي شمس الدين ! قول الحقيقة وبنديك قون هدية .. بتاع بشة الاول افتكر جميل .. يلا كلم الناس دي وشيل الهدية .. دفعت كم نثريات حكام مباراة المنتخب وجنوب افريقيا !!!

نحن عندنا مباراة في افريقيا وما عارفين ندفع للحكام نثريات كم !!! بمناسبة المباراة الافريقية .. يا عمار الدمازين خلي بالك .. انت بتلعب في الهلال .. كورة الضرب والانفعال دي ما بتنفع معانا .. ركز يا ابني شوية .. الخانة دي ما ساهلة وده رزق احرص عليه .. انت ما شفت ناس اسامة ومجدي ومعتصم ديل حريصين كيف علي رزقهم … يورو سااااكت .. السكات ما بنفعكم احسن تتكلموا قبل ما نطلع مستندات نثريات الحكام .. افتكر نقيف هنا تمانية اقوان كفاية .. وشكرا لموافقتكم لنا للحديث عن الصدارة التي تملكونها !! قال متصدرين قال وتراروي في صدارة الهدافين كمان!!!

رابط مختصر

أضـف تـعـلـيق 2 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.