انتوا (عمر بخيت) دا ما كلمتوه بـ (النفرة)!!؟؟

66 views مشاهدة
أخر تحديث : الإثنين 9 ماي 2016 - 2:58 مساءً
انتوا (عمر بخيت) دا ما كلمتوه بـ (النفرة)!!؟؟
  • مرة كنا قاعدين زي (السمك) الما فيه (ريحة)!!.
  • اقصد زي (السمك) الما فيه (شوك).
  • السمكة تفوت في حلقك متل (الموزة).
  • متل كورة سادومبا في اكرم الهادي سليم.
  • اكرم الهادي سليم قالوا ليه (سادومبا) راجع تاني..اكرم طوالي مسك (حصوتو).
  • سادومبا دا الزول البجيب (الحصوة) لي اكرم الهادي سليم.
  • اكرم الهادي سليم من اكل (النجيلة) الكتير – لمن ناس اتحاد كورة القدم في ولاية الخرطوم قرروا يبدلوا النجيل الطبيعي بالنجيل الصناعي.
  • حفاظا على (النجيل).
  • وانت يا علي جعفر – سادومبا يلم فيك بي حالتك دي ..إلّا يفرتكك ضفر ضفر.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • نحن كنا قاعدين كدا زي (الموبايل) القاطع شحن!!.
  • ساكتين ساكت.
  • قاعدين نتونس.
  • ونجرجر في (الضل).
  • نطقطق في اصابعينا.
  • الكهربة قاطعة.
  • قالوا ليك في واحد مشى مركز التوزيع بتاع الكهربة.
  • اشترى ليه (كهربة).
  • زولكم بدل ما ينزل الكهربة في (العداد) نزلها في (موبايله).
  • موبايله عطشان عطش.
  • قال هي وينها الكهربة البنزلوها في (العداد)؟ – والله لو شحنت لي (موبايلي) دا ، تكون ما قصرت.
  • عندنا قريبنا زول بيلفح الكلام.
  • شغال لفاح كلام.
  • قريبنا دا اشترى ليه (مروحة).
  • هو راجع البيت .. شايل (المروحة) فرحان بيها فرح شديد ..لاقوه ليك (السر ود الفرملة)..السر دا كمان زول لئيم وصعب.
  • وعندو (طاقية) واحدة.
  • هسع (الطاقية) الدخلها هنا شنو؟.
  • (السر ود الفرملة) لاقاهو داخل البيت بـ (المروحة)…قال ليه انت (المروحة) دي عاوز تركبها وين؟…والله إلّا تركبها في (شجرتكم) الكبيرة بتاعة (الدوم) الفى الحوش.
  • غايتو نحن (مراوحنا) بقت قاعدة ساكت – زي الناس الشغالة في الحكومة.
  • يا في (الواتساب) – يا طلعوا (الفطور).
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • الليلة (التلاتاء) لكن لو دفعتوا ليهم بعملوها ليكم (الاربعاء).
  • اي حاجة جايزة.
  • اي حاجة ممكنة.
  • مرة كنت عاوز اقلع لي (ضروس) – الدكتور قال لي إلّا تجيب ليك (شهادة) من ناس اللجنة الشعبية.
  • قلت ليه انا (ضرسي) دا عاوز اقلعو من (شارع الوادي)..اللجنة الشعبية مالها ومال (خشمي)؟.
  • كمان عاوزين يشاركونا في (ضروسنا).
  • اصلو (التسوس) دا ما جاء من فراغ.
  • الضرس من جاب ليه (تسوس) مفروض اعرف الحاصل شنو؟.
  • في (شافع) سليط …لسانو زي (مفرمة الملوخية) – اصلو ما بسكت.
  • ور – ور – ور.
  • اليوم كلو.
  • الشافع كان واقف في الباب متل (الكمشة) في حلة العدس.
  • الله يقطع العدس – وسنين العدس.
  • الشافع جانا جاري وقال لينا انتوا (عمر بخيت) دا ما سمع بـ (النفرة)؟.
  • ما كلموه.
  • اتغاتتوا عليه الجماعة ديل.
  • قلنا ليه : ليه بتقول كلامك دا؟.
  • الحاصل شنو؟.
  • مالك يا زول؟.
  • انت جنيت؟.
  • ان شاءالله خير – عامل (سنونك) ، متل (اللحاف) الملفوف في طرف السرير وقاعد في الشمس.
  • الشافع قال لينا : ابدا ..اصلو عمر بخيت كورتو التى لعبها قدام الكوكب المراكشي ما كورة زول سمع بـ (النفرة).
  • عمر بخيت (قطع).
  • غايتو يا ما كلموه – يا النفرة (قطعت) في عمر بخيت.
  • يكون اداغلوا عليه ناس محي الدين عبدالتام وما كلموه – باعتباره قادم من الهلال.
  • عشان كدا عمر بخيت من اول ربع ساعة (قطع).
  • وقعد يرفع في ايدو.
  • عمر بخيت حايم في النص ..ما فاضل ليه إلّا يوقف ليه (ركشة) عشان يصل خط 18.
  • المباراة كلها يضارب ويشاكل ويعفص في اولاد الناس.
  • لدرجة ان حكم المباراة منحه (كرت اصفر).
  • عمر بخيت دا بيلعب (12) سنة في الهلال ما شال ليه (كرت).
  • ناس سلك خربو طبعو.
  • الشغل البعمل فيه عمر بخيت دا شغل زول ما سمع بـ (النفرة).
  • وكان لي عبده جابر وعلاءالدين يوسف لعبوا كتر خيرهم (مبنجين).
  • بنجوّهم عديل كدا.
  • خدروهم.
  • بنجوّهم بـ (النفرة).
  • والله (القروش) دي فيها حلاة (بنج).
  • ساقطة وباردة.
  • خاصة لمن تكون جايبنها من غير تعب وعرق.
  • ولمن تقع ليك على فلس.
  • وان كان على (بكري المدينة)…كورتو البيلعبها دي كورة (19) جنيه.
  • قرش ما بنزيدو فيها.
  • الـ (10) مليار جنيه مع التسجيلات وناس تراوري وعلي جعفر المفكوك بتصلك يا بكري المدينة (19) جنيه.
  • والـ (19) جنيه ..لو وصلتك كاملة ..ما خلت ليك شيء.
  • لكن الظاهر كدا ومن خلال العرض الذي قدمه المريخ امام الكوكب المراكشي ..ان (النفرة) كلام جرايد ساكت.
  • او (وعود) وشيكات.
  • الكورة القدموها ناس مصعب عمر ديل ..ما كورة زول قابض ليه (10) مليار جنيه.
  • دي كورة (شيكات) ساكت.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • يوم داك – (التاي ود كيس الخضار) وقعت فيها (صاقعة).
  • انتهت منو.
  • لجنتو عديل كدا.
  • ما خلت فيه شيء.
  • شلناه وجري على الحوادث.
  • الدكتور واقف ساعة ونص في رأسو.
  • قلنا ليه يا دكتور حالتو خطيرة الزول دا؟…مالو حاصل عليه شنو؟.
  • عندو شنو يا دكتور؟.
  • الدكتور قال لينا (ملاريا).
  • قلنا ليه ملاريا شنو كمان يا دكتور؟ ..الزول دا (الصاقعة) وقعت في رأسو الكبير دا قدام عيونا دي.
  • الدكتور قال لينا تقع فيه صاقعة – يخش فيه قطر ..يقع ليه من طيارة ..(ملاريا).
  • اصلو ما عندنا ليه غير (الملاريا).
  • قلنا ليه يا دكتور لكن الملاريا بتشيل (الاضنين) برة ..وبتكسر (الترقوة) ..وبتنتهي من (الضلع) ؟.
  • الدكتور قال لينا الملاريا بتعملها.
  • قلنا ليه يا دكتور الملاريا بتعمل (حروقات) من الدرجة الاولى في الجسم بهذه الصورة؟.
  • الدكتور قال لينا بتعملها.
  • قلنا ليه يا دكتور الملاريا بدل انثى الانوفلس بقت تنقلها (الصواعق).
  • الدكتور قال لينا (الواتساب) ذاتو بنقل الملاريا.
  • معقولة يا دكتور!!!؟.
  • الدكتور قال لينا انا شغال في المستشفى دي (40) سنة – ما حصل كتبت حاجة للمريض غير (الملاريا).
  • قلنا ليه طيب يا دكتور بتنصحنا بي شنو؟.
  • الدكتور قال لينا بـ (الكينين).
  • (التاي ود كيس الخضار) وقت سمع كلمة (الكينين) قام يتنفض من (نقالتو) ..وقال لينا يا ريت (الصاقعة) لو كتلتني.
  • علاقة الكينين بالصاقعة شنو؟.
  • قلنا ليه يا زول انت ما نصيح – انت عقلك دا ما فيك..صاقعة شنو؟…الدكتور قال : (ملاريا) – انت بتعرف اكتر من الدكتور كمان!!.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ……..

          و

  • عندما وضعت اللجنة المنظمة مباراة المريخ وهلال كادوقلي قلنا ان الاتحاد العام يقصد ان لا تلعب المباراة وهو يبرمجها في رمضان يوم 10 يونيو.
  • وكادوقلي ..لو فيها (كشافات) – مع القطوعات دي ما فيها كهارب.
  • شغل بتاع (جري) عديل كدا.
  • يا ما تلعب ..يا طلعوها من كادوقلي.
  • اللجنة المنظمة برمجت مباراة القمة يوم 20 يونيو ..ولو المريخ صعد لمرحلة المجموعات في الكونفدرالية سوف يلعب اول مباراته يوم 17 او 18 او 19 يونيو.
  • يعني مباراة (قمة) ما في.
  • هروب اخر.
  • جري في وضح النهار.
  • بل مباراة المريخ امام الاهلي شندي ايضا لن تلعب اذا تأهل المريخ للمجموعات.
  • يا جماعة في (استهبال) اكتر من كدا؟.
  • شفتوا ليكم (لف ودوران) اكتر من هذه البرمجة دي.
  • مجلس الهلال ساكت ..وعماد الطيب فرحان.
  • والكاردينال بتصور لي مع مهند الريدة.
  • والله يا مجدي واسامة عطا المنان مفروض يمسكوكم (محلية) عديل كدا.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ………….
  • السيدة (ل) – لو طقتني (طلقة) في رأسي دا – اوعك يقولوا ليك (ملاريا).
  • وقرّط على كدا.
رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.