في (التسجيلات) الهلال بفتش في (مهاجم) والمريخ بفتش في (رئيس)

0
63 views

 

  • الفهم (الانجليزي) – اهم زول في المدرسة عند (الاول) – هو (مدير المدرسة) واستاذ اللغة الانجليزية.
  • في نفس المدرسة اهم زول في المدرسة عند (الطيش) – هو الزول البييع (دردمة) قدام باب المدرسة.
  • فهم.
  • اي زول بي فهمو.
  • حكاية المريخ الآن وموقفه بتذكرني ليك بي قصة (حقتي براي) – قصة جايبها من البلد.
  • القصة بتقول في زول تعب – تعب شديد.
  • تعب تعب الموت.
  • زول كبير في السن.
  • بقى يتكلم برة من رأسو.
  • الناس قنعوا منو.
  • والمستعجلين رسلوا خبر (الوفاة) في (الواتساب) قبل ما تحصل.
  • في ناس الاخبار الزي دي بيستعجلوا ليها.
  • الزول قبل ما يموت يجيبو ليك خبرو.
  • اهل الزول التعبان قعدوا يتجاروا ويفتشوا ليهم في (دكتور).
  • وتلج.
  • في واحد من الناس الكبيرة – قال ليهم انا عندي زول (خطير)..ح اجيبو يشوف ليكم عمكم.
  • عمكم التعبان دا.
  • الزول اختفى ساعة ونص ..وجاء سايق معاهو (محامي).
  • الناس قالوا ليه جايب لينا (محامي) نعمل بيه شنو؟…نحن عاوزين لينا (دكتور) تجيب لينا (محامي).
  • نحن في (محكمة).
  • انت يا زول قايل زولنا دا بالع ليه (شيك).
  • الزول قال ليهم والله (المحامي) دا بيشتغل اي حاجة…ما عندو اي مشكلة.
  • اهل الزول (التعبان) – قال ليهم لو هو ما عندي مشكلة – نحن عندنا مشكلة.
  • الجماعة قالوا يتصرفوا براهم دخلوا وطلعوا وما لقوا ليهم (دكتور).
  • الحلة (ممرض) ما فيها.
  • وقت احتاروا خلاص.. وبقى ما عندهم خيار غير (المحامي)..قالوا للمحامي يا زول كدا ادخل لينا عليه.. شوف لينا الحاصل عليه شنو؟..يمكن الله يكون كاتب على ايديك البركة.
  • المحامي دخل عليه… وطلع منو بعد ساعة ونص.
  • الجماعة لاقوه في الباب – قالوا ليه : اها عملت شنو؟.
  • المحامي قال ليهم كتّبتو ليكم (وصيتو) الاخيرة.
  • دخلتوا ليه (محامي) يعني ح يعمل ليه شنو؟..اكتر من يكتب ليه (وصيتو).
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • عدم الاختصاص دا بذكرني ليك بالمريخ الآن.
  • عبدالتام رئيس غرفة تسجيلات المريخ.
  • واعلام المريخ عاوز يجيب (جمال الوالي) رئيس للمريخ.
  • واسامة ونسى باقى ليه 21 يوم في المريخ.
  • والتسجيلات باقى ليها 5 ايام.
  • ومباراة الكوكب المراكشي باقى ليها 48 ساعة.
  • ومباراة القمة باقى ليها 45 يوم.
  • لخبطة شديد.
  • حالتكم (صعبة).
  • اول مرة التسجيلات تكون على الابواب …واعلام المريخ يطالب ليه بـ (مجلس) كامل.
  • عاوزين يشطبوا ناس اسامة ونسى وعبدالتام وعامر والرشيد وشقاق.
  • يا مزمل ..انتوا ممكن تشطبوا (ديدي).
  • تشطبوا محمد موسى.
  • اكرم الهادي سليم.
  • المعز محجوب.
  • عنكبة.
  • ممكن تشطبوا لغاية عمر بخيت.
  • لكن كونكم تفكروا تشطبوا (اسامة ونسى) ذاتو – دي كبيرة دي.
  • خلوكم تتدخلوا في (الشأن الفني)…تشطبوا وتسجلوا على كيفكم – كمان عاوزين تشيلوا ليكم (مجلس) وتجيبوا ليكم (مجلس) جديد.
  • دي قوية دي.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ناس الهلال حسموا (تسجيلاتهم) من بدري.
  • السنة دي ناس الهلال دخلوا بي فهم جديد.
  • تسجيلاتهم ذاتها بقت بي نظام.
  • جابو حسن.
  • وجابو حسين.
  • الغريبة حسن جابوه من فريق.
  • وحسين جابوه من فريق.
  • اقنعوني الموضوع دا (صدفة).
  • اول مرة اشوف لي صدفة زي (التؤام).
  • ناس الهلال قالوا لقوا ليهم مدافع اسمو (محمد) ، وبفتشوا الآن في مهاجم اسمو (محمدين).
  • شرطهم الاول يكون اسمو (محمدين).
  • والهلال لو جاب ليه مهاجم اسمو ادماكو ..بجيب ليه مدافع اسمو ادماكوين.
  • النظام عندنا كدا السنة دي.
  • الحمدلله الهلال حسم موضوع التسجيلات.
  • حتى المحترفين – الهلال وصل فيهم الى بر.
  • حاجاتنا واضحة ومعروفة.
  • الهلال عاوز ليه (مهاجم) ما فيه كلمة.
  • مهاجم – مهاجم.
  • ما عاوزين لينا مهاجم يتمها لينا ارتكاز.
  • وصور مع الكاردينال.
  • ما تجيبوا لينا طرف شمال ..وتقولوا لينا بيلعب مهاجم وقت المدرب يحتاج ليه قدام.
  • عاوزين مهاجم..من ولدوه بيلعب مهاجم.
  • يجيبوا ليك المحترف من بلدو (باك)…يطلعوا ليك من مطار الخرطوم (مهاجم).
  • اي زول يتصور مع الكاردينال يقولوا ليك (مهاجم).
  • نحن (المهاجم) السنة دي بنجيبو.
  • بنلقاهو.
  • بنجيبو مهاجم عديل.
  • الكلام الناس البفتشوا ليهم في (رئيس نادي).
  • غايتو السنة دي (المفوضية) – إلّا تفتح ليكم باب (التجنيس).
  • جنسوا ليكم (رئيس).
  • المريخ (14) سنة …جمال الوالي كان فيها رئيس.
  • الهلال في الفترة دي مروا عليه سبعة رؤوساء.
  • عشان كدا في المريخ في ازمة رؤوساء.
  • جماعتكم ..في موضوع اللاعبين ..كانوا مرتاحين.
  • نحن نشطب ..وهم يسجلوا.
  • طمبل – مجاهد – علاءالدين شرارة – علاءالدين يوسف.
  • الباشا – اكرم الهادي سليم.
  • بكري المدينة.
  • كلتشي – تراوري.
  • اي زول جبناه شطبناه ..سجلوه.
  • موضوع الرؤوساء دا – رأسهم ضرب فيه.
  • لو ما خجلانين وشايفنها تقلية عليهم ..كانوا جابوا (الامين البرير).
  • شيخ العرب.
  • كانوا جابوا صلاح ادريس.
  • انتوا يا جماعة زي ما جبتوا مجاهد وطمبل وريتشاد وبكري المدينة وعلاءالدين يوسف وعلاءالدين طيارة وهيثم مصطفى والباشا واكرم الهادي سليم وعبده جابر وكلتشي وتراوري …تموا جميلكم وجيبوا (الامين البرير).
  • كدا بتكونوا قفلتوا الرياضات.
  • عشان نحن ذاتو نرتاح من ناس بابكر سلك دي.
  • وحالتنا تبقى واحدة.
  • ما فاضل ليكم حاجة من الهلال غير (الرئيس).
  • جيبوا ليكم رئيس من الهلال ..وخلونا نحسم (الجوطة) دي.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • الامين البرير – طبعا لو بقى رئيس نادي المريخ – اول حاجة بعملها بيجتمع ليك بي اعلام المريخ.
  • البرير بقول لاعلام المريخ ..ِشوفوا انتوا لو عاوزين تكتبوا عن (الاقتصاد) ما في زول بيسألكم.
  • المسلسلات التركية ..ما عندي معاكم مشكلة.
  • العلاقات السودانية – المصرية …ما بقول ليكم حاجة.
  • بس الامر الفني دا ما تدخلوا لي فيه.
  • يعني الفوضى التى يعاني منها المريخ الآن – البرير بيحسمها ليكم.
  • المريخ سبق له الاستعانة بي ميكلوس وبرانكو وريكاردو وغارزيتو.
  • جربتوا اي حاجة في الهلال.
  • غريبة عليكم يعني تجربوا ليكم (رئيس) من الهلال.
  • جمال الوالي ما عندو ليكم قروش تاني.
  • واسامة ونسي بعد 21 يوم ما بقعد ليكم.
  • ما عندكم غير (البرير).
  • خلوه يرتب ليكم الاوضاع ..لمن تلقوا ليكم رئيس.
  • الكاردينال ذاتو بعد 7 شهور ممكن نفكو ليكم.
  • خلوه بس يكمل لينا (الجوهرة).
  • لكن يبقي في معلوميتكم – الكاردينال ما بعمل ليكم (جوهرة) في المريخ.
  • (كشك) ما بعملوا ليكم في المريخ.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • لكن اقول ليكم.
  • البرير كتير عليكم.
  • والكاردينال كتير عليكم.
  • ما عندنا ليكم غير (عماد الطيب).
  • امين عام في الهلال ممكن يكون رئيس في المريخ.
  • جمال الوالي (مشجع) عندنا بقى عندكم رئيس.
  • وابوالعائلة …لاعب عندنا ..بقى عندكم رئيس.
  • عماد الطيب دا لو لقيتوه (رئيس)..بترتاحو في عضمكم دا.
  • غايتو لو عندكم (دكاكين) عندكم فيها مشكلة ..بجيهها ليكم.
  • في موضوع (الدكاكين) اصلو ما بقصر.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • …………..

         و

  • الريال واتلتيكو موعد مع (كسير العضام).
  • غايتو بتشوفوا ليكم (ركبة) طايرة.
  • مباراة الريال وسيتي امس ..كانت دون المستوى.
  • معقولة دي مباراة في نصف النهائي.
  • ……..
  • السيدة (ل) – الوجع الحقيقي احساس يحب ان تشعر بيه عند الاخر.
  • وقرّط على كدا.

NO COMMENTS

LEAVE A REPLY