لا جابو سيرة الكتل .. لا جابو سيرة الاكل !

101 views مشاهدة
أخر تحديث : السبت 21 ماي 2016 - 11:14 صباحًا
لا جابو سيرة الكتل .. لا جابو سيرة الاكل !

يتملك الاخ اسامة عطا المنان العديد من الميزات ولكن اهمها دون شك هذا البرود والقدرة علي تحويل الاسود لابيض والجرأة في مواجهة الحقائق .. أما اعضاء مجلس ادارة اتحاد كرة القدم السوداني فانهم يملكون الكثير من الميزات والنثريات والحوافز ولكن اكبر ميزاتهم في قدرتهم علي الاشادة بارقام اسامة عطا المنان والتصفيق كمان !!

بكل جرأة تلقي أسامة عطا المنان الاشادة بما يقدمه من دعم لاتحاد الكرة في السفر والاعاشة للمنتخبات الوطنية .! وبكل جراة قدم الطريفي الصديق ما أسماه منصرفات المنتخبات مؤكدا علي ان الاتحاد عاجز عن الايفاء التام بها لذلك يطلب يد العون من اسامة ومعتصم جعفر وطبعا اكد برضو انهم مصرين علي السفر ! طبعا ما جابوا سيرة لزكي احتمال عشان انتخابات اتحاد الخرطوم .. زكي عباس مالوا يا الطريفي ما برضوا دعم المنتخب وعندو مديونية .. خليك من النثرية والعهدة الدولارية .. لكنو برضو داعم ! ما جبتو سيرتو ليييه .. خائفين ناس اتحاد الخرطوم يسألوه من الدولار ! زي ما سألوه عن السبب البخلي يشيل نصيب الاتحاد من الدخل كاش رغم كثرة النقاش !

أجتمع مجلس ادارة اتحاد كرة القدم برئاسة معتصم جعفر وغياب مجدي شمس الدين كالعادة . مجدي اذكي من الجلوس في اجتماعات هذه الايام !

مجدي محامي وقانوني وشاطر ومتابع وعارف اي حاجة .. مجدي يخطط للخروج من الورطة زي الشعرة من العجين .. ونحن نتمني ان لا ينجح كالعادة مجدي شمس الدين !

أسامة عطا المنان يتلقي التهاني والاشادة من اعضاء مجلس الادارة علي الشفافية المالية !! لا حولة ولا قوة الا بالله !! شفافية حتة واحدة .. بالغتو لكن ..

أسامة (الشفاف) شففكم في قروش الفيفا .. وراكم انو وكالة تاكس صرفت مئات الالاف من دولارات الفيفا .. التجاني والمهدي صرفوا قروش الاتحاد !

الرجل الشفاف وراكم تفاصيل ما حدث في سيكافا والمائة وخمسين الف دولار وتوقيع جمال الوالي ولا شفافيتو ما وصلت الحد ده !

ان شاء الله في شفافيتو دي وراكم انو سجل بقروش الاتحاد للوادي نيالا وطلع ليكم ديون وكالة تاكس وتوقيعات اللاعبين علي حوافز اليورو .. لو شفتو يا ناس مجلس الادارة نثريات اللاعبين .. حتستمتعو بلاعبي منتخبكم .. امير ربيع وهيثم مصطفي المعز محجوب !! خلي اسامة يوريكم كشف الحوافز واليوريو يا بتاعين الشفافية !

من حقكم تصفقوا وتشيدوا يا اعضاء المجلس .. اذا كان زكي عباس عليه عهدة لم يردها عندما كان رئيس بعثة وطارق عطا عليه عهدة وناس تانين ! لازم تصفقوا وتشيدوا وتقولوا اسامة شفاف طالما نثريات البعثات للاداريين خمسمائة يورو ! يورو وراء يورو يا شروني ! شفافية شديدة واشادة كمان !

وفي اثناء الشفافية دي شايف ما جبتو خبرة لسيرة التاجر المصري الملاح يا دكتور معتصم .. ولا الاتصالات ولا الانذارات القانونية ! ولا ساكت الشفافية دي ما مرت علي شارع الستين والملايين والامير والخير من الله !

شفافين جدا يا الطريفي وكمان بتقولوا الدولة ما دعمتنا ونحن محتاجين .. ما تورونا في عام 2015 الدولة دفعت ليكم كم ؟ دعمتكم بي كم .. لو ما قادرين نحن بنوريكم !

نحن والله شفافية مافيها اموال الاتحاد الافريقي دي مستغربين فيها .. يا الصفقتو علي الشفافية يا اعضاء مجلس الادارة يا طيبين .. ما سالتوا عن الدولارات الباع بيها الاتحاد حقوق التلفزة لمباريات المنتخب السوداني ! ولا سألتو عن نصيب الاتحاد من وصول الهلال والمريخ لدوري المجموعات ! ولا ساكت جبتو سيرة لاكثر من مليون يورو في خزانة الاتحاد ورغم ذلك يتحدث الطريفي عن ضائقة مالية لمنتخبات تخرج من الدور الاول .. ما تشوفو بنك عودة يا الطريفي ولا تذاكر الرياض جده السافرت بيها انت ومجدي وغرمتو بسببها الاتحاد اموال لصالح وكالة مجدي ! يا سلام يا شفاف من الله بخاف .. جبتو سيرتو الشفافية وما جبتو سيرة (الاكل) ولا النثريات في سيكافا والتسجيلات وتسجيلات لاعبين اجانب في موسم الشتاء والصيف ولا ما كده يا عصام شعبان ! شفافية قال .. والشفافية دي ما خلتكم شفتو مباراة المريخ والضرب والبونية ولا تعليق ساكت مافي .. اسامة عطا المنان برضو بقطع التذاكر للمريخ وعندو دولارات الاتحاد الافريقي .. ما كان  يشفف شوية ويتحدث عن بونية حاتم محمد احمد او يكون شجاعا مثل محمد سيد احمد ليتكلم عن قضية شيبوب .. لماذا لم تناقشوا الجاكومي بشفافية عندما تحدث لكم عن عدم وجود مراجع داخلي ! كان تقولو لي عندنا مراجع اسمو وراق ؟ ولا هو ما مراجع يا يعقوب ؟

بس نعترف لاسامة بانو كان شفاف جدا في سؤال محمد سيد احمد عن التأجيلات حيث اكد اسامة بانه اجل مباريات المريخ عشان محمد سيد احمد دخل واسطة ! بالمناسبة في شفافية تاني في موضوع اللاعب الهامي لاعب الاهلي عطبرة ! شفافية بالشطة اسمها تسجيل خارج الاتحاد وباورنيك خارج الاتحاد . يا اسامة ما توريهم تفاصيل القضية ومفاوضات الوادي نيالا مع اللاعب ولا اقول وريهم تفاصيل لاعب اسود دارفو حصل فيهو شنو !

قالو اعضاء المجلس اشادوا باسامة .. حاجة طبيعية يا دكتور بكري .. الحوافز بتعمل اكثر من اشادة بس كان تبعدوا من حكاية شفافية دي !

زكي عباس برضو شفاف .. دولارات الاتحاد وين يا سكرتير الاتحاد المحلي . رجعت العهدة ولا لسه . مجرد سؤال ؟!!!

نحن وراكم وراكم حتي الوصول للشفافية الحقيقية .

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.