دق الدلجة – محمد عبد الماجد – البتعملوا فيه دا ما عندو اسم تاني غير (الجرسة) 7 يونيو 2016

0
2

 

 من رأسي :

العيد باقي ليه جمعتين و 17 يوم و9 ساعات و24 دقيقة.

مرقتوا تبْ !!

 من كراسي :

لا يمكننا حل مشكلة باستخدام العقلية نفسها التي أنشأتها.

البرت انشتاين

  • لو عاينتوا في جزئية العمود من فوق في زاوية (من كراسي) – ح تلقوني عملتها ليكم واضحة.
  • وواضحة شديد كمان.
  • بس يمكن الليلة عشان اول يوم في رمضان ما ح تكونوا مركزين معاي.
  • لكن بوضحها ليكم.
  • وبختها ليكم عديل.
  • بجيب ليكم خبرها.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • البرت انشتاين بقول : (لا يمكننا حل مشكلةٍ باستخدام العقلية نفسها التي أنشأتها).
  • الكلام دا قالوا انشتاين ..وانشتاين الكلام دا تعب فيه وقرأ ليه – وعمل فيه (تجارب).
  • يعني ما كلام ساكت.
  • كلام ما قاطعو من رأسو ساكت.
  • يعيدوا ليكم الكلام مية مرة عشان يقع ليكم.
  • يا جماعة الله.
  • وبالواضح كدا مشكلة المريخ (جمال الوالي) – هل يمكن ان تكون (المشكلة) ..جزء من الحل؟.
  • دي بتبقى.
  • ما عاوز اقول ليكم وروني حل للمشكلة…واعمل ليكم فيها (جمال فرفور).
  • بي طريقتكم – لكن الحقيقة دي بنقولها ليكم.
  • المريخ دا طار كم مرة من التمهيدي؟.
  • وكم مرة طلعوا ليهم (امر قبض) لرئيس المريخ؟.
  • الديون الحالية في المريخ – سببها منو؟.
  • والصرف باسراف من تسبب فيه.
  • عادوا ليه المباريات ما نفع.
  • اعتبروه فايز في مباريات خسرها عديل في الملعب ما نفع.
  • حسبوا ليه ضربة جزاء برة الخط ما نفع.
  • سجلوا ليه الوك بدون رقم وطني ما نفع.
  • وقفوا ليه الدوري الممتاز 90 مرة – برضو ما نفع.
  • تاني شنو؟.
  • كل هذه المشكلات سببها الاول هو جمال الوالي – مع ذلك شورى المريخ مشى اجتمع مع والي الخرطوم عشان يجيب ليهم المشكلة تاني.
  • هسع عليكم الله لو اتكلمتوا ليكم في (مطرة) ما كان احسن ليكم.
  • لو ناقشتوا موضوع (الكهربة) – ما كان افضل من البتعملوا فيه دا.
  • يا عالم ..انشتاين بقول :(لا يمكننا حل مشكلةٍ باستخدام العقلية نفسها التي أنشأتها).
  • دي المرة التالتة اعيد ليكم الكلام دا.
  • تاني ما بعيدو ليكم.
  • ولا بقول ليكم كلام (سمح) زي دا.
  • بي طريقتكم.
  • انشتاين دا في رمضان – بكون زي (البطيخة).
  • زي الموية الباردة.
  • زي (التلجة).
  • ريقكم مالو نشف كدا؟.
  • انتوا في اول يوم في رمضان …الجرسة ما في داعي ليها.
  • اول يوم بعمل فيكم كدا.
  • طيب وقت تصلو يوم خمسة بحصل عليكم شنو؟.
  • جرسة مبالغ فيها.
  • والله الجرسة الجد البعملو فيها المريخاب.
  • قبل رمضان يقولوا نحن ما بنلعب في كادوقلي وشندي وما بنلعب امام الهلال عشان عندنا مباراة افريقية.
  • طاروا من افريقيا.
  • قالوا نحن ما بنلعب في كادوقلي وشندي وما بنلعب امام الهلال في شهر رمضان المبارك.
  • ديل يعملوا ليهم شنو؟.
  • خلاص طلعوا ليهم كادوقلي من الدوري الممتاز.
  • وشندي جيبوها ليهم في (الكلاكلة).
  • انتوا يا ناس المريخ وقت ما عاوزين تلعبوا – وما عندكم قدرة للكلام دا ..ما تغيروا (تخصصكم) دا.
  • شوفوا ليكم شغلة تانية…بدل ما توقفوا لينا الدوري الممتاز دا ساكت.
  • ناس المريخ بقوا يعزلوا المباريات.
  • مباراة في نص الدورة الاولى يقولوا ليك عاوزين نلعبها في البداية …(زي ما حصل مع قمة الفاشر).
  • ومباريات في الدورة الاولى يقولوا ليك عاوزين نلعبها في الدورة الثانية.
  • وقت تجي التسجيلات الموضوع يبقى ليهم حار.
  • الناس ديل لو عارفين (سادومبا) دا ..كان مباراة القمة لعبوها من الاسبوع الاول.
  • كان لعبوها وانتهوا من (الدوشة) دي.
  • هسع سادومبا طلع ليهم معاهو (شيبوب) ما عرفو يعملوا شنو؟.
  • ما عرفوا يتصرفوا كيف؟.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • الموسم الماضي ..عادوا ليهم مباراة كادوقلي بعد ان تعادلوا امام هلال الجبال.
  • وخسروا في شندي – بكري المدينة ضرب حكم المباراة.
  • الموسم دا قالوا ما بنلعب عديل كدا.
  • لا في كادوقلي ولا في شندي.
  • قدر ما يبرمجوا ليهم المباريات دي – ينطوا منها.
  • والله عملتوها ظاهرة.
  • وشينة في حقكم.
  • البتعملوا فيه دا – ما عندو اسم تاني غير (الجرسة).
  • زيكو وقت شال الكورة وهرب ..فعل ذلك بقوة عين.
  • لكن (الهروب) البتعملوا فيه انتوا قبل المباراة ما تلعب دا شنو؟.
  • مرة يقولوا ليك نحن ما بنلعب لو ما برمجوا المباريات المؤجلة من الدورة الاولى قبل فترة التسجيلات.
  • ومرة يقولوا ليك نحن ما بنلعب في شهر رمضان.
  • ومرة يقولوا ليك وقت يشوفوا سادومبا وشيبوب ..اي لاعب اتسجل في الفترة الاخيرة ما يلعب في المباريات المؤجلة.
  • انتوا الموضوع دا بقى ليكم حار الآن.
  • انتوا ما قلتوا شيبوب عندو (رباط صليبي).
  • وما قلتوا سادومبا (كبير).
  • مالكم؟.
  • الحصل عليكم شنو؟.
  • ح تفضلوا تأجلوا في المباريات دي لمتين؟.
  • ناس المريخ ديل زي الزول وقت تقوم تصب فيه (مطرة) وهو راقد في الحوش.
  • يشيل (المرتبة) ويدخل جوة ..المطرة تقيف.
  • يطلع برة المطرة تصب.
  • يدخل جوة المطرة تقيف.
  • يطلع تصب.
  • الليل كلو من الحوش للصالون زي (النجار) البركب ليه في (شبابيك) – الدقيقة والتاينة بطلع (يسف) برة ويرجع يركب في الشبابيك تاني.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • الاتحاد العام لو تابع لي ناس المريخ …ناس المريخ بعد رمضان بقولوا ما بنلعب في كادوقلي وشندي عشان (الخريف).
  • وبعد (الخريف) – ح يقولوا (الشتاء).
  • وبعد الشتاء (المولد).
  • وبعد المولد يخشوا في رمضان القادم.
  • مباريات كادوقلي وشندي ما اظن ح تلعب قريب.
  • خاصة جمال الوالي رجع.
  • جمال الوالي يطلب بس وناس اسامة عطا المنان يأجلوا.
  • ليكم هسع عليكم الله يا ناس مجلس الشورى ..انتوا جمال الوالي الموسم قبل الفات موش استقال بعد مباراة عزام عندما خسر المريخ…وقعدتوا تحنسوا فيه لمن رجع.
  • ولمن المريخ صعد جمال الوالي رجع.
  • جمال الوالي دا بعد مباراة الترجي والفوز بهدف وحيد – موش تاني قدم استقالتو وقال ما عاوز.
  • وقعدتوا تحنسوا فيه.
  • ولمن المريخ اتأهل للمجموعات ..رجع من جديد.
  • وخسر المريخ وخرج من دور الاربعة ..قام جمال الوالي استقال للمرة التالتة في موسم واحد.
  • هسع الجديد شنو؟…عشان يرجع تاني.
  • الزول دا قاعد يستقيل براهو.
  • وبتمشوا ترجعوه.
  • ويا ريت لو برجع عبر الجمعية العمومية – ما كنا بنقول حاجة ..جمال الوالي بيرجع بي (لجنة تسيير).
  • مرقنبو قرنبو ذاتها.
  • والي الخرطوم الظاهر عليه ما متابع الاحداث دي.
  • والي الخرطوم لو عرف ان جمال الوالي في موسمه الاخير استقال تلات مرات اصلو ما برجعو في لجنة تسيير.
  • غايتو يا شيبوب حظك…امامك فرصة تاريخية ..عشان تخلي جمال الوالي تاني يستقيل.
  • سادومبا دي بفتش ليها فتيش.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ………………

     و

  • نحن اي حاجة ما كعبة معانا.
  • وفي الانتظار في اي لحظة.
  • في رمضان.
  • في العيد.
  • العصر.
  • المساء.
  • جوة البلد في قطر – كلو جاهزين.
  • مستعدين في اي لحظة.
  • انتوا يا ناس المريخ ما عارفين (الغربال) رجع.
  • يعني اسبوع تاني ح يكون حاجة ما تخلص.
  • ولو كمل رمضان (تمارين) – في العيد يا ناس المريخ إلّا تشوفوا ليكم بلد.
  • رمضان كريم.
  • تصوموا وتفطروا على خير ان شاءالله.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ……….
  • السيدة (ل) – نص كلمة (طعمية) دي اول مرة اسمع بيها عندكم.
  • وقرّط على كدا.

NO COMMENTS

LEAVE A REPLY