دق الدلجة – محمد عبد الماجد – بكري المدينة بدل يسك (كورتو) بقى يسك (شيكاتو)

252 views مشاهدة
أخر تحديث : السبت 4 يونيو 2016 - 3:16 مساءً
دق الدلجة – محمد عبد الماجد – بكري المدينة بدل يسك (كورتو) بقى يسك (شيكاتو)

 من رأسي : ما عارف ليه الزول وقت يكون ما بيعرف يسوق وما عندو رخصة قيادة .. بيفتكر ناس الحركة قاصدنو؟.

 من كراسي :دائما نبدل نمط الكينونة – مثلما نبدل القمصان. خوسيه ايميليو باشيكو

  • ما عاوز اشمت في بكري المدينة – لكن البحصل ليه الايامات دي عجبني.
  • بكري المدينة انتقل للمريخ من اجل (المال) – جاء للقلعة الحمراء فوجد المريخ حالته في غاية الصعوبة.
  • رئيس النادي كل يوم والتاني بيطلع ضده (امر قبض) – ولجنة تسيير المريخ اي (شيك) بتوقع عليه اقنع من سداده.
  • اوامر القبض التى طلعت على رئيس نادي المريخ على (كارولوس) ما طلعت.
  • شيك لجنة التسيير متل (الاسكراتش) وقت رصيده ينزل في التلفون – بيبقى ارقام ما عندها اي قيمة.
  • لا قيمة ولا طعم.
  • ولا زول واقف في الشارع – اليوم كلو – عاوز يقول حاجة وما عاوز يقول.
  • زي المنتظر ليه زول.
  • انا الدخلني الحتة دي شنو؟.
  • ما عارف.
  • بدون ما اشعر لقيت نفسي بكتب في الحتة دي.
  • انا كان مالي؟.
  • ارجع لي بكري المدنية.
  • عليكم الله خلونا في شغلنا.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • امس في صحيفة الجوهرة – هذا الخبر.
  • احسن الواحد يجيب ليكم الخبر بي ضبانتو ..وبعدين نقعد نتنافش.
  • شوفوا الخبر بقول شنو: ( تم القاء القبض ظهر الامس على المدير المالي لنادي المريخ بقسم شرطة الازهري اثر بلاغ بشيك بقيمة 30 الف جنيه يرجع الى لاعب الفريق بكري المدينة ، وكان عبدالحي قد قام بتسليم الشيك الى اللاعب بكري المدينة إلا ان خلو حساب النادي من مال ادي الى ارتداد الشيك حين تقدم به اللاعب ليتم القبض على المدير المالي للنادي الاحمر).
  • 30 الف جنيه في خزينة نادي المريخ ما موجودة.
  • هذا هو الخبر كما جاء في صحيفة الجوهرة بدون اي تدخل مني.
  • بدون ما اقول شيء.
  • تعليقي ماشي عليكم بيه.
  • بى صراحة – ومن غير زعل.
  • بكري المدينة دا (طابور خامس).
  • طابور خامس عديل كدا.
  • الزول دا يا طابور لي ناس الهلال.
  • يا طابور لي جمال الوالي.
  • ما معقول لاعب في الفريق ومازال في كشوفات النادي يفتح بلاغ في امين خزينة النادي.
  • دي عملية ما كريمة.
  • ولا بتطلع ليها من لاعب.
  • إلّا اذا كانت الخطوة وراها دوافع اخرى – وفيها اجندة عشان تكشف لجنة التسيير وتقدمهم بهذه الصورة.
  • معقولة 30 الف جنيه ..يدخل فيها امين خزينة نادي المريخ (السجن).
  • هي حصلت؟.
  • حالتكم بقت صعبة.
  • بكري المدينة الذي كان يتحدث عن (المليارات).. باع الهلال في (300) الف ببحث الآن في المريخ عن (30) الف.
  • وبيدخل امين خزينة نادي المريخ السجن.
  • هسع عليكم الله العملية دي (سادومبا) لاعب الهلال المحترف – اللاعب الاجنبي ممكن يعملها في امين خزينة المريخ.
  • سادومبا ما بعملها فيكم وهو بيلعب في الهلال – يعملها فيكم لاعب بيلعب في صفوفكم وبيلبس شعاركم.
  • سادومبا خلوه ..شيبوب (الهاوي) ما بعملها.
  • شيبوب (التلب) من الطابق الرابع ما بعملها.
  • يا ترى بعد هذه الحالة العلاقة كيف ستكون بين امين الخزينة وبكري المدينة؟.
  • بين المجلس واللاعب.
  • الشيء الغريب ..ان اللاعب مصاب ومتوقف عن ممارسة نشاطه ..والمجلس شرع في اجراءات السفر ،حتي يغادر اللاعب الى الامارات من اجل العلاج.
  • مسفرنو للعلاج ..بفتح فيهم بلاغ وبدخل امين الخزينة (السجن).
  • والله شيبوب الله شافو.
  • شيبوب الله بريدو.
  • شيبوب الله مرقو من التلتلة دي.
  • 30 الف جنيه ..ما بقدروا يسددوها وبدخلوا فيها السجن ..مليارات شيبوب كان ح يعملوا فيها شنو؟.
  • والكهربة قاطعة.
  • والنفط ميزانيته بقت عبارة عن (رسوم).
  • 30 الف جنيه بتعمل فيكم كدا.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • بكري المدينة عندما كان في الهلال – كان همو كلو في الكورة.
  • كان بسك الكورة – حتى اطلق عليه اعلام المريخ بجري المدينة.
  • بكري المدينة هسع برضو بيجري.
  • بيجري ما عشان الكورة.
  • بيجري عشان (الشيكات).
  • بكري بقى مهموم بالشيكات اكتر من الكورة.
  • بالمناسبة يا ناس المريخ.
  • عشان تجهزوا (ملياراتكم) وتبقوا عارفين من بدري.
  • بكري المدينة بقى ليه معاكم موسم ..و4 شهور.
  • وقت الزول دا بسك فيكم في (30) الف جنيه ..ح تعيدوا تسجيلوا كيف بـ (3) مليار جنيه.
  • بكري المدينة فالح.
  • لعب في المريخ الموسم الاول فقط.
  • والموسم التاني عملوا ليهم كلو (اصابات).
  • وموسمه الثالث بحاول يظهر تاني – عشان يعيد قيده بـ (المليارات).
  • نحن كهلالاب راضيين كل الرضا من بكري المدينة.
  • الزول دا في الموسم الاول ليه مع المريخ دفّع ليك المريخ 3 مليار جنيه.
  • في الموسم التاني دخل ليك امين خزينة المريخ السجن في (30) الف جنيه.
  • في الموسم الثالث – اذا جمال الوالي رجع – بكري المدينة برجع يجري تاني.
  • والاصابات الكتيرة دي ذاتها بتروح.
  • وتختفي.
  • انتظروا جمال الوالي يرجع – شوفوا بكري المدينة ح يشكي تاني من اصابة.
  • صداع تاني بكري المدينة ما بشكي منو.
  • الزول دا اصابتو (مادية).
  • مشكلتو في (الشيكات).
  • زي تراروي.
  • في قروش ..بيلعب ليكم.
  • ما في قروش ..امو عيانة.
  • بكري المدينة شغال بي نفس الماكينة بس مع تعديل طفيف كدا.
  • في قروش بيجري ليكم.
  • ما في قروش – انا مصاب.
  • وراجي عبدالعاطي برضو.
  • هسع عليكم الله ..راجي عبدالعاطي دا من فات جمال الوالي شفتوه بيلعب.
  • السنة كلها مصاب.
  • جاب ليه قونين في الوفاق ..وتماها ليكم (اصابات).
  • زولكم وقت لقى الموضوع فيه (اقوان) – قال احسن يعمل فيها (مصاب).
  • وعلاءالدين يوسف…وين الاسم دا؟.
  • الجماعة ديل كلهم طابور خامس.
  • بيلعبوا مع جمال الوالي فقط.
  • جمال موجود بكونوا زي (الحصين) ما عندهم اي مشكلة.
  • جمال الوالي مافي – اي واحد فيهم بمسك (ركبتو).
  • وبكري المدينة مع الركبة ..بطلع ليه امر قبض على امين خزينة نادي المريخ.
  • علاقة هؤلاء اللاعبين مع جمال الوالي.
  • ما عندهم علاقة بي المريخ.
  • ما تتغشوا ساكت.
  • وتوجعوا قلبوكم.
  • الغريبة اعلام المريخ الموالي – ولا قاعد ينتقد هذه الحالات.
  • عارفين ليه؟.
  • عشان جمال الوالي يرجع.
  • الاعلام وناس بكري المدينة وراجي وعلاءالدين يوسف واحد.
  • كلهم بنفذوا في اجندة واحدة من اجل عودة الوالي.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ………….

         و

  • اعضاء لجنة تسيير المريخ عملوا اي شيء ..وما قصروا ..ودخلوا السجن من اجل المريخ.
  • مع ذلك اعلام المريخ بنتقد في اللجنة.
  • غايتو الزول وقت يكون ما بريدك في (امر القبض) يحدر ليك.
  • اعلام المريخ مفروض يطلقوا عليه اعلام جمال الوالي.
  • الاحداث الاخيرة وضحت ذلك.
  • وقدمت الاعلام بصورته الحقيقية.
  • يقولوا ليك بنهواه في كل الظروف.
  • امر قبض واحد – جاب خبركم.
  • حقيتكم ظهرت.
  • تاني ما نسمع لينا واحد فيكم يقول : (نهواه في كل الظروف).
  • عصام الحاج ظهر انو ما عندو اي موقف.
  • شغال ساكت.
  • يوم كدا ويوم كدا.
  • هلال مريخ باقى ليها 16 يوم.
  • وسادومبا مولع.
  • وشيبوب بفتش لي علي جعفر فتيش.
  • عاوز ليه معاه سبب.
  • المنتخب السوداني يلعب اليوم مباراة (صامتة).
  • الحكومة والوالي كلها مشغولة بالمريخ.
  • وعودة جمال الوالي.
  • والنفرة.
  • والمنتخب بيلعب برة.
  • وما في زول من السلطة شغال بيه.
  • نتمنى ان يخرج المنتخب بنتيجة ايجابية اليوم.
  • قولوا يا رب.
  • وخلونا نتلاقى على فرح.
  • يا والي الخرطوم ..عليك الله كورتنا دي ما تقرب لينا عليها.
  • شوف (كهربتك).
  • شوف الخريف ..على الابواب.
  • حكاية تقعد مع ديل ..وتقعد مع ديك ..عشان جمال الوالي يرجع …ما بتحل لينا مشكلة الكهربة.
  • ولا الخريف.
  • هسع تجيكم (مطرة) تقعدوا تجاروا.
  • المطرة عاوز يمرقكم منها جمال الوالي.
  • الفريق القومي دا – ليه ما عملتوا ليه (نفرة).
  • ان شاءالله نفرة في الجرايد.
  • نفرة كلام ساكت.
  • شوية كدا كان حللتوا الحكاية.
  • و
  • (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • …….
  • السيدة (ل) – شوال السكر بقى بي نص مليون …مسكلي لينا يوماتي قبل الافطار ..عشان نطعّم المويات بالمسكول…(مسكولك زي وقية السكر).
  • وقرّط على كدا.
رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.