دق الدلجة – محمد عبد الماجد – لو مشيتوا (الفيفا) إلّا تقولوا ليهم (شيبولا) ما صائم !! 21 يونيو 2016

0
8937 views

 

من رأسي :

صلاح نمر وصابر عطرون واحمد عبدالله ضفر ومصعب عمر ، عليهم احضار اولياء امورهم ومقابلة عزيز شيبولا وذلك لامر هام وضروري.

 من كراسي :

عرفت الحب لأول مرة في حياتي. إنه كالموت تسمع عنه كل حين خبر ولكنك لا تعرفه إلا إذا حضر. وهو قوة طاغية، يلتهم فريسته، يسلبه أي قوة دفاع، يطمس عقله وإدراكه، يصب الجنون في جوفه حتى يطفح به، إنه العذاب والسرور واللا نهائي.

نجيب محفوظ

  • امس وقت كنت بشاهد في مباراة القمة وبتفرج في (العمائل) البعمل فيها (شيبولا) في دفاع المريخ ..قلت والله (صابر عطرون) دا فعلا (صابر).
  • الزول دا ما ناحية (صابر) ما عندنا في ذلك شك.
  • لكن من ناحية انو (عطرون) – عليكم الله اعفونا من الموضوع دا.
  • عطرون شنو؟…لاعبكم دا (سكر) عديل.
  • ما شفنا ليه اي (عطرون).
  • الزول دا بعد العمائل العملها فيه (شيبولا) بقدر يتم صيامو.
  • يعني باقى الشهر دا بقدر عليه.
  • وإلّا بتشوفوا ليه (عذر).
  • وكان جينا للناحية التانية …ح تفهموا حاجة.
  • مصعب عمر ..اي (قون) اتسجل في العشر سنوات الاخيرة …كان هو السبب فيه.
  • هدف شيبولا الاول كان سوء تغطية منو.
  • وهدف سادومبا التاني ..ضربة جزاء ارتكبها مصعب عمر.
  • تاني يعمل ليكم شنو الزول دا.
  • خلوها مباراة الهلال ..ارجعوا لمباراة مازيمبي (تلات مباريات).
  • مباراة وفاق سطيف.
  • مباراة الكوكب المراكشي.
  • اي قون اتسجل في المريخ …سببو مصعب عمر.
  • لدرجة اني امس اقترحت بيني وبين نفسي …تدوه شعار الهلال يلبسو مع شيبوب وكاريكا.
  • الزول دا اصلو ما قصر معانا.
  • شيبولا …قسم ليك (مصعب عمر) على مية حتة.
  • كل حتة في حتة.
  • اول مرة اتسحر لي بي (كمونية).
  • دي حصلت عليكم قبل كدا.
  • نحن امس اتسحرنا بـ (كمونية).
  • غايتو الله يجازي محنك يا شيبولا.
  • الزول دا جبتوه من وين يا الكاردينال.
  • الظاهر كدا نزل مع (الكشافات) الالمانية دي.
  • عبارة عن ماكينة المانية.
  • ما فيه اي كلمة.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • وكان لي صلاح نمر …اول مرة اشوف لي (نمر) مسالم كدا.
  • وما عندو اي مشكلة.
  • وبسمع الكلام.
  • هادي.
  • وبتراشق مع (سادومبا).
  • نمركم دا الظاهر مرخص (قط).
  • قلنا ليكم ألعبوا على دفاع المريخ.
  • السرعة مع (التقلة) بطلع حاجات ما بتخلص.
  • امس سادومبا وصلاح نمر …متل الزول اللابس ليه قميص ما حقو.
  • وقميص كبير منو كمان.
  • سادومبا يجي ويفوت في صلاح نمر.
  • اول مرة اشوف نظرية (الضوء) بيسبق (الصوت).
  • سادومبا (برق)…وصلاح نمر (رعد).
  • تشوف (البرق) اول حاجة – وبعد مسافة تسمع بي صوت (الرعد).
  • سادومبا يجي ويفوت …عادي كدا ..بعد ربع ساعة ..بتشوف (صلاح نمر) في كادر الصورة.
  • الحاصل شنو؟.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ناس المريخ شباكننا السنة كلها (الفيفا).
  • الفيفا…الفيفا.
  • كل يوم يحفظو ليهم (مادة) من (النت) ويسمعوها لينا في (الجرايد).
  • قالوا بيشتكوا في (شيبوب).
  • جماعتكم وقت لقوا الهلال لم يشرك (شيبوب) في مباراة الخرطوم الوطني افتكروا الهلال خايف من موقفه القانوني.
  • متوكل أحمد علي صدق.
  • دور ليك (تصريحات) على مدار الساعة.
  • قعد يهدد في ناس الهلال.
  • اها امس الهلال معنى كدا – اشرك ليكم (شيبوب) في اخر 4 دقائق من عمر المباراة.
  • جماعتكم وقت شافوا شيبوب ..في القائمة ..قالوا شيبوب ما بشارك ..بقعد كنبة.
  • شيبوب وقت قام يسخن في الشوط التاني ..قالوا دي حركات ساكت من ناس الهلال.
  • عاوزين يطيروا قلب ضفر ساكت.
  • وقت الحكم الرابع رفع اللائحة ..وفيها مكتوب الرقم (32) – علاءالدين يوسف عاوز يقوم جاري…لو ما ثبتوه ناس محسن عمر.
  • قالوا انتوا ناس الهلال ديل جنوا.
  • انتوا الزول دا ما قلتوا (هاوي).
  • ما قلتوا ما بلعب.
  • غايتي يا مدثر خيري ..شيبوب دا إلّا تشتكوه في (تفتو).
  • التفه حقتو دي ..اقل حاجة بتعيد ليكم المباراة.
  • الفيفا ما فيها (تفه) بالشكل دا.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • وعشان ما تملأوا لينا الجرايد (تفه) اقصد (نقة) – نحن اشركنا شيبوب في الزمن البدل الضائع مخصوص.
  • قصد.
  • ومع سبق الاصرار والترصد.
  • يلا امشوا (الفيفا).
  • ورونا شطارتكم.
  • وبالمرة دا قولوا لي ناس الفيفا (شيبولا) ما صائم.
  • الزول دا فاطر.
  • لقى ليك ناس مصعب عمر الصائمين ديل …رايح عليهم الدرب.
  • هو عليكم الله مصعب عمر (فاطر) مشكلة ..كمان تجيبوه لينا (صائم).
  • الشيء الكان بيعمل فيه شيبولا دي ..(سواة العاصفة في ساق الشتيل الني).
  • سواة زول (فاطر).
  • لا صايم ولا حاجة.
  • امشوا (الفيفا).
  • وإلّا اقول ليكم (الفيفا) ليه ..امشوا لاي (لجنة الاستئنافات).
  • اعملوا ليكم لجنة استئنافات جديدة.
  • كلموا والي الخرطوم بعمل ليكم (لجنة استئنافات).
  • امشوا لي ناس سمير فضل..واسامة عطا المنان ..كلموهم يعيدوا ليكم (المباراة).
  • الفرق بقي (10) نقاط.
  • لا حوله.
  • او قول سبعة.
  • انتوا في (6) نقاط ..عادوا ليكم مباراة الامل عطبرة ..واعتبروكم فائزين في مباراة هلال كادوقلي.
  • هسع الفرق بقى (10).
  • قول سبعة.
  • ممكن اسامة عطا المنان يعيد ليكم مباراة الهلال.
  • ويعتبر المريخ فائز في مباراة النسور والخرطوم الوطني.
  • مباراة هلال الابيض ما بقدروا يعملوا ليكم فيها حاجة.
  • ناس هلال الابيض …عندهم (والي) اقوى من واليكم دا.
  • يعني لا اعادة.
  • ولا اعتبار المريخ فائز في مباراة الابيض.
  • المشكلة ..ان المريخ في العيد عندو مباراة امام هلال كادوقلي.
  • خسارة ..الفرق بيبقى (10) نقاط.
  • تعادل الفرق بيبقى (8) نقاط.
  • عليكم الله هسع الفرق بينكم وبين اهلي شندي شنو؟.
  • معقولة الفرق بين الهلال والوصيف (10) نقاط.
  • انا عارف سمير فضل ايدو ماكلاه.
  • عارف كدا.
  • بكون هسع عاوز ليه اي سبب يعيد بيه المباراة.
  • والله السنة دي يا سمير فضل (المسلسل) ما تقدر تعيدها.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • عموما كدا المباراة كانت ممتعة.
  • ناس المريخ لعبوا (كورة).
  • وشكلوا خطورة كبيرة على مرمى الهلال.
  • الشوط التاني الهلال كان بيلعب في منطقتو.
  • مع ذلك كانت اي هجمة للهلال بتشكل خطورة على المريخ اكبر من خطورة هجمات المريخ على الهلال.
  • لذلك نحن استمتعنا بالمباراة.
  • خليناكم اتقدمتوا من الدقيقة التالتة..وقلنا ليكم تلبعوا شوط كامل ما بتقدروا تعملوا حاجة.
  • ولا تفكروا.
  • ادينكم درس.
  • ناس كوفي واكرا فهمهم كمل.
  • ما عرفوا يعملوا شنو؟.
  • لذلك الانتصار ..اسعدنا شديد.
  • بسطنا في الدنيا دي.
  • هسع الليلة اليوم دا مالو بارد كدا؟.
  • والله بقينا ما بنحس بالصيام.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • …………..

 

          و

 

  • نزار حامد لعب مباراة كبيرة.
  • شيبوب في (3) نقاط ..بعتبرو نجم المباراة.
  • انتوا مالكم؟.
  • على كيفي.
  • شيبولا اخطر من كشافات الهلال الجديدة.
  • وسادومبا الله يديه العافية.
  • كاريكا دافع ..وكان من نجوم المباراة.
  • فداسي ارتكب مخالفات كان يمكن ان تجعل الهلال يخسر المباراة.
  • عمار الدمازين …في الشوط الاول لم يكن جيد ..لكن في الشوط التاني كان ممتاز.
  • اعلام المريخ عشان جمال الوالي ..الليلة بهاجموا الحكم وشيبوب.
  • يا حليل اسامة ونسى.
  • لو اسامة ونسى قاعد ..دا كلو ما كان بحصل.
  • على الاقل مصعب عمر ما كان بيلعب.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ……………….
  • السيدة (ل) – افتكر كدا …صلاح نمر ما حافظ جدول تلاتة.
  • وقرّك على كدا.

NO COMMENTS

LEAVE A REPLY