دق الدلجة – محمد عبد الماجد – يا هو (…) يا بيت ابوي!! 29 يونيو 2016

3,078 views مشاهدة
أخر تحديث : الأربعاء 29 يونيو 2016 - 3:33 مساءً
دق الدلجة – محمد عبد الماجد – يا هو (…) يا بيت ابوي!!  29 يونيو 2016

 من رأسي :

ضفر قالوا عندو (عين سمكة) ، خايف يقوم يعمل (العملية) يقوموا يوقفوه لنهاية الموسم.

جماعتكم ديل (تقشفهم) كلو عملوه (عقوبات).

لكن (العقوبات) بتحلكم.

من كراسي :

لو اقتضى الأمر أن اكتب مقالا نقديا بالعامية حتى يصل الى جمهور السينما فسأفعل.. الناقد كما قال طه حسين هو مستشار القارىء ، والنقد للناس مش لنخبة محدودة، والنقد تواصل وتفاعل فى اتجاهين: مع الأفلام ومع الجمهور على حد سواء.

الناقد المصري محمود عبدالشكور

  • حركة اولاد الهلال في المريخ ، شغالة الايامات دي بي نظرية (العدس).
  • طبعا من عندكم اي مزاج للعدس الايامات دي.
  • تشوفوا العمى ما تشوفوا (العدس).
  • الله يقطع سنين (العدس).
  • الدنيا رمضان…والعيد لغاية الآن ما عملنا ليه اي حاجة.
  • لكن مع ذلك ما ح افككم من (نظرية العدس).
  • النظرية عبارة عن اعلان قدمته الفنانة حرم النور عن (العدس) ، وقد كنا اشرنا الى هذا الموضوع في كتابة سابقة.
  • الاعلان بحكي عن (امرأة) بتخيّر زوجها بـ (يا هو يا بيت ابوي).
  • المعني يا تجيب لينا (عدس) يا بنزل (الشنطة) من رأس الدولاب وامشي (بيت ابوي).
  • شغل بتاع ارهاب كدا.
  • بتاع دراما.
  • نظرية (الشنطة) هي ذاتها نظرية (عجيبة).
  • انتوا عارفين ليه الزوجة بتضع (شنطتها) في (رأس الدولاب) – في اقصى حتة.
  • عشان لمن تزعل وتقول ماشي بيت ابوها ..ما تقدر تنزل (الشنطة).
  • شفتوا العلم دا كيف؟.
  • وشفتوا (الشطارة).
  • والكيد.
  • المهم – هسع موضوع (رأس الدولاب) دا ما بخصنا.
  • خلونا في (عدسنا) دا.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • حركة اولاد الهلال في المريخ شغالين مع المريخ بـ (يا هو …يا بيت ابوي).
  • اقل حاجة.
  • اقل زعلة.
  • جماعتكم بهددوا المريخ بـ (الهلال).
  • والمريخاب عندهم عقدة من (الهلال) ، من تجيب ليهم سيرة (الهلال) دمهم بفور.
  • علاءالدين يوسف وبكري المدينة ما راعوا حالة المريخ الصعبة ، قاموا جابوا ليك سيرة (الهلال) بعد هدف شيبولا.
  • دي ايام يجيبوا فيها سيرة الهلال.
  • والايامات دي لو جمال الوالي ذاتو جاب سيرة (الهلال) بوقفوه لنهاية الموسم.
  • المهم – دي حاجة ما بتخصنا.
  • نحن مالنا.
  • خلونا في عدسنا دا.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • النظرية بتاعة (العدس) ، يا هو يا بيت ابوي ..اطبقت في المريخ من عدد من اللاعبين الذين انتقلوا من الهلال الى المريخ.
  • ما عاوزين نمشي بعيد ..عاوزين نناقش (النظرية) دي في الموسمين الاخرين.
  • النظرية طبقها اولا لاعب الهلال وقائده السابق هيثم مصطفى – الذي قال لجمال الوالي عديل كدا (يا هو يا بيت ابوي).
  • هيثم مصطفى مشي قعد في بيته موسم كامل ورفض المواصلة مع المريخ رغم ان جمال الوالي قدم لهيثم مصطفى (شيك) على بياض ليكتب الرقم الذي يمكن ان يعيده لمواصله نشاطه مع المريخ.
  • هيثم مصطفى ركب رأسه وقال : (يا الهلال يا بيت ابوي).
  • قطع ناشف كدا.
  • ناس جمال الوالي وعصام الحاج وعبدالله حسن عيسي لغاية الآن مستغربين من (الدروس) القدمها هيثم مصطفى في حبه للهلال.
  • الغريبة مجلس جمال الوالي وعصام الحاج وعبدالله حسن عيسي والفريق عبدالله ما قدر يعملوا اي شيء لهيثم مصطفى.
  • عاوزين تتشطروا هسع على فييرا والعقرب.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • الموضوع لم يكن حصريا على هيثم مصطفى وحده.
  • الموضوع اكبر من كدا بي كتير.
  • نظرية (العدس) الى الآن عندها (بواقي).
  • المحترف المالي ولاعب الهلال السابق والمريخ الحالي (تراوري) ، شغال بي نظرية (يا هو يا بيت ابوي) منذ ان اتسجل في المريخ.
  • تراوري كل (15) يوم بقول لمجلس المريخ (يا هو يا بيت ابوي) ، وبمشي يقعد في بيت ابوه.
  • يقعدوا يحنسوا.
  • ويعتذروا.
  • ويرضوا.
  • وتراوري ما شغال بيهم الشغلة.
  • تراوري دخل ليك المريخ في مدرسة.
  • تراوري خلص لينا حقنا من المريخ على دائر المليم.
  • اللاعب الآن موجود في بيت ابوه ..ومجلس المريخ ما قادر يعمل ليه اي حاجة.
  • عقد تراوري مع المريخ بتقول تفاصيله ان الفترة التى قضاها في بيت ابوه اكتر من الفترة التى قضاها في المريخ.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • علاءالدين يوسف (كابتن المريخ) واحد اهم اعمدته ، هذه الايام بقدم في (نظرية العدس).
  • فييرا هو ذاتو عمل ليهم (نظرية العدس).
  • دفق ليهم (العدس) في الواطة.
  • علاءالدين يوسف الذي لعب في المريخ سنوات عديدة وتقلد (شارة) الكابتنية ..تحدث عن (الهلال) بصورة جميلة ومجلس المريخ يحقق معه.
  • مجلس المريخ استفزاه حديث علاءالدين يوسف عن الهلال ..قاموا وقفوه طوالي لنهاية الموسم.
  • الجماعة ديل ما بيستحملوا زول يذكر ليهم الهلال بي خير.
  • علاءالدين يوسف خطاها ليهم عديل كدا.
  • عدسها ليهم في الواطة.
  • فييرا هو الاخر فضل يقعد في بيتو من المواصلة مع المريخ.
  • اللاعب هدد بان يمزق (جواز سفره) ، عشان ما يسافر مع المريخ لمعسكر القاهرة.
  • القريبة ان مجلس المريخ الذي عاقب فييرا على عدم السفر للقاهرة ..جاء بنفسه وألغى السفر.
  • يعني علاءالدين يوسف معاقب الآن على عدم الانضمام لمعسكر تم إلغائه.
  • عاقبوه على شيء ما قام.
  • وما تم.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • بكري المدينة (البنج) بتاعو فكه.
  • الموسم الاول في المريخ كان مغشوش ساكت.
  • كان منفوش.
  • كان مخدر.
  • المليارات كانت حاجبة عليه الصورة.
  • البنج فكه منو الآن ..والقعاد غلبو في المريخ.
  • بكري المدينة في نظرية العدس ذهب ابعد من ذلك.
  • بكري المدينة رفض استلام خطاب الاستدعاء.
  • وبالتالي رفض الحضور للاجتماع مع لجنة التحقيق التى كونها مجلس المريخ لمحاسبة اللاعب.
  • هذا تجسيد (فعلي) لـ (يا هو يا بيت ابوي).
  • مع ذلك ناس المريخ ..ما فهموا الرسالة.
  • ولغاية الآن (العدس) ما وقع ليهم.
  • جلدهم تخين.
  • وقت الموضوع حرقهم شديد ..قالوا يوقفوا علاءالدين يوسف وبكري المدينة حتى نهاية الموسم.
  • هم اصلهم واقفين.
  • وما فارقة معاهم.
  • الناس ديل قالوا ليكم عديل ..(يا هو يا بيت ابوي).
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ……….

       و

  • لو عارفين شيبولا بيعمل كدا …ما كنا بنخليه ييجب ليه قون في المريخ.
  • شيبولا جاب قونو بي جاي ..جماعتكم دوروا في فييرا والعقرب.
  • القون حار.
  • ورمضان ذاتو سخن.
  • هل سوف يكمل علاءالدين يوسف فترته في المريخ (معاقبا).
  • هل سوف يكمل فترته في البيت ..كما فعل هيثم مصطفى.
  • وتراوري.
  • بالغتوا لكن.
  • تسجلوا اللاعب ..عشان يقعد في بيتهم.
  • بالمناسبة مجلس اسامة ونسى سبق مجلس جمال الوالي في (الانضباط) هذا ..واوقف مازن شمس الفلاح.
  • يعني ما تفرحوا لينا بي (عدسكم) دا ساكت.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ……….
  • السيدة (ل) – بتمدي شارعك بالسلام.
  • وقرّط على كدا.
رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.