دق الدلجة – محمد عبد الماجد – الفول عندو علاقة بالمطرة ؟؟ 17 يوليو 2016

2,401 views مشاهدة
أخر تحديث : الأحد 17 يوليوز 2016 - 5:08 مساءً
دق الدلجة – محمد عبد الماجد – الفول عندو علاقة بالمطرة ؟؟   17 يوليو 2016

 

من رأسي :

ناس المريخ (الاب) و (الابن) امس لو ما شايفنها شينة كانوا عملوا المباراة (تقسيمة).

معقولة مباراة بهذه الحساسية فيها (كرت اصفر واحد)…السماية بكون فيها (10) كروت.

سيحة يوم الجمعة ح يظهر ويقول ضربة جزاء المريخ العاصمي صحيحة مية المية …وضربة جزاء مريخ كوستي ما صحيحة…ورضا مصطفى الشيخ بقوم يضحك ليه…ويقول ليه الزمن انتهى…تقول (امتحان فيزياء).

 

من كراسي :

(ده كلو من السواحل ديك – ومن ظلم المعدية – وانا البعت الفرح لـ (الليل) – وغشونى المراكبية).

عبدالعزيز العميري

 

• عندنا (روسي) في الحلة فاكيها في نفسو – قال لينا (صرتو) مدفونة في (القمر).

• جدو عالم فضاء.

• طبعا اي (روسي) يا جدو يا عمو (عالم فضاء).

• ما عارف علاقة الفضاء بالعجلات شنو؟.

• الواحد فيهم تلقاه (عالم فضاء) وسائق ليه (عجلة).

• غايتو الروس ديل ما عندهم موضوع …خلو (الدنيا) دي كلها وحضّروا في (الفضاء).

• و

• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).

• الروسي كان عامل لينا فيها (فيلسوف) وبتاع (نظريات) ، وبقرأ (شعر) يوم الخميس.

• ما عارف علاقة (الشعر) بي يوم الخميس شنو؟.

• دي برضو نظرية انا ما فاهمها.

• وما واقعة ليّ.

• بي صراحة كدا.

• الروسي دا كتر خيرو قال لينا انا اكتشفت لي (نظرية).

• اليوم كلو قاعد في مكتبة جامعة الخرطوم.

• عمل ليه (صلعة) مخصوص للنظرية دي.

• كل يوم نازل وطالع.

• من مكتبة لي مكتبة.

• الروسي قلنا ليه نظريتك شنو؟.

• الروسي قال لينا اكتشفت علاقة (الفول) بالمطرة.

• قلنا ليه يا زول انت رايحة ليك (مطرة) في رأسك.

• المطر البدخلها مع (الفول) شنو؟.

• انت ما نصيح.

• انت روسي ما عندك رأس.

• الروسي ما اشتغل بينا الشغلة.

• شغال في نظريتو.

• وقت لقينا ليك ما في طريقة من المخارجة من النظرية – قلنا ليه طيب يا اخوي العلاقة شنو بين الفول والمطرة؟.

• مرات بتكون مجبور على الحاجات دي.

• قلنا نتخارج من النظرية…ونشوف علاقة الفول بي المطرة – يمكن الموضوع يكون فيه (قروش).

• الروسي قال لينا يوم تكون في مطرة – اي بتاع دكان بتمشي ليه الصباح بقول ليك يا زول الفول كمل بدري …وين مع (المطرة) دي تلقى ليك (فول)؟.

• قدر ما تقوم بدري ..وتمشي الدكان عشان تجيب ليك فول – بتاع الدكان بقول ليك : (يا زول فول مع المطرة دي ما بتلقى).

• قلنا للروسي ايوا والله – كلامك صاح.

• الروسي اتبسط لي هنا.

• رجعنا لقينا الموضوع ما بيستاهل ليه (نظرية)..شنو اي (روسي) بفكها فينا ..بلتق ليه كلام وبقول لينا دي (نظرية).

• يعني شنو لو الزول ما لقى ليه فول يوم تصب مطرة.

• دي عاوزة ليها (نظرية).

• تذكروا نظرية (العدس).

• والله لو (النظريات) بالشكل دا – انا براي …انا القدامكم دا عندي (720) نظرية.

• العدس براه عامل لي فيه كم وسبعين (نظرية).

• لكن ما في زول بيشتغل بي كلامنا دا.

• الواحد إلّا يبقى ليكم روسي ..ويجيكم بي عجلة عشان تقتنعوا بي كلامو.

• بعدين النظرية بتاعة (الفول) دي عاوزة ليها (روسي)؟.

• بتحتاج ليها (صلعة)؟.

• النظرية دي اي زول عارفها.

• لا عاوزة ليها فلسفة ولا درس عصر.

• ولا بتدور ليها زول دافنين صرتو في (القمر).

• الموضوع ما محتاج التعب دا كلو.

• و

• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).

• لكن اقول ليكم حاجة – الروسي دا كلامو ما ترموه البحر.

• انا غايتو على المستوى الشخصي ..بقيت من تصب مطرة بلبس لي (سفنجة) واشيل لي (جك) وامشى على بتاع الفول.

• من تنقط.

• اتبرمجت على كدا.

• برضو (النظريات) عندها فائدة…العلم سمح.

• ما في (نظرية) ساكت.

• كدي هسع خلوا النظريات – بعض الاحباب ..قالوا لي شفت مزمل ابوالقاسم كتب شنو؟.

• قلت ليهم مزمل ياتو فيهم …مزمل (عضو المجلس) ام مزمل (الصحفي)؟.

• ما اشتغلوا بي كلامي.

• مزمل ابوالقاسم يوم 15 / 7 / 2016 كتب : (القرار الذي أصدره مجلس المريخ بملاحقة نجمه جابسون قانونياً بسبب تغيبه عن تدريبات الفريق وعدم عودته من نيجيريا غير موفق على الإطلاق… مساواة جابسون المنضبط الذي لعب معظم شهور الموسم الحالي من دون أن ينال مستحقاته بلاعب متسيب ومتمرد مثل تراوري لا تجوز… لا توجد أي مقارنة بين هذا وذاك، لا فنياً ولا سلوكياً.. سجل جابسون يخلو من التمرد، ويزخر بالإيجابيات… قاد سلمون المريخ إلى نصف نهائي دوري أبطال إفريقيا، وساهم في فوز الفريق بلقبي الدوري والكأس في الموسم المنصرم فماذا قدم تراوري للمريخ على مدى ثلاثة مواسم بخلاف التمرد والدلال؟… طلب سلمون منحه بعض مستحقاته، كي يتمكن من الوفاء بالتزاماته في نيجيريا ولم يرفض العودة ولم يتمرد مثل تراوري!.. المريخ بحاجة إلى خدمات لاعب قوي ومتميز، في ظل النقص المريع الذي يعاني منه خط المناورة تحديداً… التشدد مع جابسون يضعف فرقة المريخ التي تعاني الأمرين من كثرة الإصابات وتعدد الغيابات… نرجو من مجلس المريخ أن يراجع نفسه ويتعامل مع لاعبه ببعض الحكمة).

• مزمل في كلامو الاول دا قرب يقول سالمون ما مصاب ..وما عندو اي شيء.

• الاحباب رجعوا قالوا لي مزمل ابوالقاسم يوم 16 / 7 / 2016 كتب عن سالمون الآتي : (ما لا يعلمه كثيرون أن المريخ تسلم تقريراً طبياً من الجهة التي أشرفت على علاج جابسون في الإمارات، يفيد أن إصابة اللاعب (في الركبة) مزمنة، وأنه معرض لتجدد الإصابة، مع توصية بعدم تجديد العقد معه بعد أن خضع إلى عملية في غضروف الركبة اليسرى بالخرطوم، وأكمل عملية التأهيل في دبي، تحت إشراف الحبيب جار النبي… قدم أمين المال تنويراً للمجلس بخصوص اللاعب المذكور، وتم استعراض التقرير الطبي الخاص به، وأظن أن ذلك التنوير تسبب في تشدد المجلس مع اللاعب، لأن التخوف من عدم التزام اللاعب بالعودة حال إقدام النادي على تحويل مستحقاته له في نيجيريا كان حاضراً في أذهان من طالبوا بمحاسبة اللاعب على عدم عودته للمريخ… جابسون كان مصاباً بقطع في الغضروف الداخلي للركبة اليسرى (الذي يحمي العظام من الاحتكاك)، ويعاني من إصابة أخرى مزمنة في الغضروف الهلالي (الكاراتلج)… في دبي أشرف الحبيب جار النبي على تأهيل اللاعب، وعرضه على الدكتور سالم الزهراني، اختصاصي إصابات الملاعب السعودي الشهير، فأجرى له فحوصات جديدة، أفادت وجود كشط (وقرحة) في الغضروف الهلالي، وأوصى بإجراء عملية ترقيع له، وهي مكلفة جداً، ونجاحها غير مضمون، بحسب إفادة الأخ جار النبي.. العملية المذكورة يفترض أن تجري في ألمانيا، وإذا تمت لا يوجد ما يضمن نجاحها، برغم ارتفاع كلفتها).

• هسع دا انضباط دا.

• مجلس المريخ عاقب اللاعب عشان مصاب ..عشان يتخلص منو.

• الجماعة وقت قالوا لي كلامهم ..قلت لازم اقنعهم ليكم بي (نظرية).

• رجعت للروسي الفوق ..حكيت ليه الموقف ….وقلت ليه شفت مزمل ابوالقاسم متناقض كيف؟.

• في 24 ساعة فقط عندو رأيين.

• الموضوع ما زي موضوع المشاركة في البطولة العربية ولا موضوع (شكاوي)…عاوز ليه موسم وسنوات عشان تكتشفوا التناقض.

• الموضوع دا ظهر في (24)ساعة.

• معقول فارق الـ (9) بعمل كدا.

• الناس ديل (شيبوب) لخبط ليهم رأسهم.

• الروسي (شفت) – قال لي كلام مزمل ابوالقاسم ما فيه اي تناقض.

• قلت ليه كيف يا اخوي – انت روسي ما عندك رأس.

• الروسي قال لي كلام مزمل ابوالقاسم الاول بتاع يوم 15 / 7 …دا رأي مزمل (الصحفي)…مزمل الصحفي ضد ايقاف سالمون.

• وكلام مزمل ابوالقاسم التاني بتاع يوم 16 / 7 والذي يؤكد فيه عدم الاستفادة من سالمون كان رأي مزمل (الاداري)…مزمل عضو مجلس ادارة نادي المريخ.

• يعني ما في اي تنافض.

• قلت للروسي …والله اول مرة تقول ليك كلام صاح.

• طلعت زول ما ساهل.

• تستاهل (الصلعة).

• و

• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).

• ……….

و   

• في الدوري الممتاز دا اصلو الزول ما يتكل ليه على (مريخ).

• بعملوها الاهلة.

• مباراة المريخ امس في كوستي زي حفلة الشاي.

• حفلة تعارف بس.

• بالمناسبة لاعب هلال كادوقلي طونق اتونغ ..يستاهل يلعب في الهلال.

• الزول دا ارصدوه ..وشوفوا مستواه كيف؟.

• امام الهلال قدم مباراة كبيرة.

• وعكس كورات خطيرة امام مرمى الهلال.

• ………….

• السيدة (ل) – مبروك للمريخاب ..الفارق ما بقى (12) نقطة.

• وقرّط على كدا.

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.