دق الدلجة – محمد عبد الماجد – شفتوا ليكم زول شايل ليه (بطيخة) كبيرة حايم بي هنا؟ 4 يوليو 2016

4,860 views مشاهدة
أخر تحديث : الإثنين 4 يوليوز 2016 - 6:01 مساءً
دق الدلجة – محمد عبد الماجد – شفتوا ليكم زول شايل ليه (بطيخة) كبيرة حايم بي هنا؟   4 يوليو 2016

 من رأسي :

جنى وجن الزول البكون راقد في (الجامع)…وخاتي (موبايلو) في الشاحن كمان!!.

من كراسي :

(اكتب لكي اتصالح مع الاشياء التى لا استطيع السيطرة عليها. اكتب لكي اصنع نسيجا في عالم يظهر غالبا بالاسود والابيض .اكتب لأكشف . اكتب لكي اواجه اشباحي .اكتب لكي ابدأ حوارا. اكتب لكي اتخيل الاشياء على نحو مختلف . وبتخيّل الاشياء بشكل مختلف ..ربما يمكن للعالم ان يتغير.

تيري تيميست وليمز

  • ليه الحاجات دي بتحصل عندنا.
  • ليه؟.
  • واشمعنا ومنطقها شنو؟.
  • فسروها لي.
  • في واحد قال لي رفيقو نفسي (قام).
  • رفيقو ما فاضي ليه ولا عندو وقت.
  • رفيقو قال ليه نفسك قام شنو؟..عُشر وإلّا عيش ريف؟.
  • مالكم انتوا معانا؟.
  • عليكم الله العمود دا ما تدخلوا لي فيه (مصعب عمر).
  • نحن مالنا ومال مصعب عمر.
  • بي طريقتو.
  • الدنيا عيد …ان شاءالله يعمل ليه 120 ضربة جزاء.
  • ما في زول بيسألو.
  • ولا في زول بقول حاجة.
  • ان شاءالله يطلّع المريخ من البطولات كلها.
  • ما عندنا بيهم شغلة.
  • خلوني في موضوعنا دا.
  • ليه الزول قبل رمضان بوصوفوه بالحاجات الفيه ..بينما يوصفونه في شهررمضان بالحاجات الشايلها.
  • قبل رمضان …لو عاوزين يوصفوا ليكم زول بقولوا ليك زول اخضر (طويل).
  • او زول سمين …وقصيّر.
  • ممكن يوصفوه ليك بـ (جلحاته).
  • او الزول ابوصلعة.
  • وقد يصلوا معاه لغاية الزول (ابوكرش).
  • بشوفوا اسوأ حاجة في الزول وبوصفوه بيها.
  • هم ما غلطانين …اوضح حاجة في الزول بتكون اسوأ حاجة فيه.
  • دا نظام عالمي.
  • زول عيونو دقاق.
  • الزول يكون عندو (11) شهادة عليا …غير الشهادات التقديريه ووقت يوصفوه …يوصفوه بي جلحاته.
  • يقولوا ليك عندو جلحات فاتحت شرق.
  • او عندو جلحات (نور طويل).
  • او عندو جلحات دبل قبينة.
  • ما بخلوا ليه شيء.
  • في الكورة ذاتها …الواحد لمن يزهج ليك من (الباك)…بقول ليه طلع الكورة عامل جلحاتك الكبار ديل.
  • ولمن تمشي ليك لي دكتور ما شاطر …وتطلع منو بعد ما يكتب ليك (دواء) ما ينفعك ..بتقول عنو لي اهلك …والله انا الدكتور دا من دخلت عليه ما ارتحت لي (جلحاته) الكبيرة دي.
  • الناس تشيل وترمي في (الجلحات).
  • السواق في الحافلة لمن ما ينزلك في المحطة بتاعتك ..بتقول ليه عامل جلحاتك ديل.
  • وقد يكون ما عندو (جلحات) من الاساس.
  • ولا سمع بيها.
  • لكن بس عشان ما نزلك في محطتك القاصدها بتعمل ليه (جلحات).
  • شايف يا جماعة عصرت على (الجلحات).
  • احسن افكها شوية (الجلحات) دي.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • في شهر رمضان ..الحاجات بتقوم تتعكس.
  • الوصف بكون بي حاجات تانية.
  • مثلا ممكن زول من غير اي مقدمات يثبّتك ويقول ليك عليك الله شفت ليك زول شايل ليه بطيخة (كبيرة) بي هنا.
  • طبعا الزول في حد ذاتو لو ما وقع في عينك …(البطيخة) ما بتجلي.
  • الغريبة الناس البتكون شائلة ليها (بطيخ) وحايمة قريب وقت الافطار بتكون كتيرة خلاص.
  • اي واحد شايل ليه (بطيخة) وحايم بيها.
  • والغريبة كمان بكون فرحان بيها.
  • زي الما مصدق.
  • او زي العندو موقف من (القرع).
  • عليكم الله اتنين في رمضان ما تجيبوا لي سيرتهم.
  • القرع.
  • ومصعب عمر.
  • مصعب عمر في العمود دا قدر ما حاولت اتجاوزه ما قدرت.
  • قدر ما اتحرفنت ..واداغلت على نفسي …ما قدرت.
  • ما خليت لي (جلحة) حايمة.
  • لمن مصعب عمر بقي يلاوز لي مع (البطيخ).
  • اكون عاوز اكتب عن (البطيخ)…بلقى نفسي من غير ما اشعر كدا قاعد اكتب عن (مصعب عمر).
  • ما عارف مصعب عمر الدخلو مع (البطيخ) دا شنو؟.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • بي مناسبة البطيخ دا…مرة جاني زول كبير …العطش ظاهر في موبايلو.
  • موبايلو حق (المسكول) ما فيه.
  • عمك من الساعة خمسة واقف في صينية الفطور.
  • يشوف حاجة ..حاجة ويسأل.
  • يشوف (البطيخ)…ويقول ليهم يا اولادي البطيخة دي باردة.
  • يقولوا ليه بااااردة يا حاج.
  • يقول ليهم وقت باردة …طلعوها لي برة …ختوها لي غادي …عشان امشي عليها بعد الفطور.
  • عمك يصبر شوية …يشوف سلطة الاسود ..يسأل منها …يقول ليهم دي شنو؟.
  • يقولوا ليه دي سلطة اسود يا حاج؟.
  • يقول ليهم فيها (شطة).
  • يقولوا ليه ايوا بي شطتها.
  • يقول ليهم …جنبوها لي في حتة براها …عشان ادخل عليها بعد الاذان مباشرة.
  • وديك شنو؟.
  • يقولوا ليه دي (جوافة مخلوطة) بي لبن يا حاج.
  • يقول ليهم بس …الجوافة البي لبن دي خلوها لي …انا زولها.
  • يسكت شوية…وتاني يسأل …دي بسبوسة.
  • ايوا بسبوسة يا حاج.
  • بس كتلتوني كتل …انا ما في حاجة بتريحني في الدنيا دي في الفطور غير (البسبوسة)…الله يديكم العافية يا اولادي.
  • ووينو الليمون.
  • يجيبوا ليه الليمون.
  • يقول ليهم الليمون دا انا ما ببقى بلاه في رمضان.
  • ما في حاجة بترويني في رمضان غير الليمون.
  • يسكت شوية ..ويسأل..وينو (الحلومر)؟.
  • يقولوا ليه الحلومر جاهز يا حاج.
  • يقول ليهم عليكم الله الحلومر دا لازم يكون بارد ..عاوز اشوف فيه (التلجة) العائمة.
  • الموضوع دا بريحيني ليكم في عضمى.
  • يجيبوا ليه (التلج).
  • القراصة.
  • مالها القراصة يا حاجة.
  • ما في حاجة بتسند الزول في الصيام دا غير (القراصة).
  • اهم حاجة عندي في رمضان (القراصة).
  • والفي الجك الاخضر داك شنو؟.
  • يقولوا ليه دي يا حاج منقه.
  • الله …الله…جيبوها لي جاي …المنقة دي ما في زيها في الافطار.
  • يسكت شوية.
  • ويرفع ليه صحن …ويقول ليهم دا شنو؟.
  • يقولوا ليه دا (عدس) يا حاج.
  • عمك يقوم فيهم …يقول ليهم (العدس) الجابو هنا شنو؟.
  • انتوا يا اولادي عاوزين تكتلوني..
  • انتوا عاوزين تنتهوا مني.
  • انتوا عاوزين تجيبو خبري.
  • الاولاد يقولوا ليه يا حاج في شنو؟.
  • الحاصل شنو؟.
  • يقول ليه : (العدس).
  • شيلوا (العدس) دا اوعكم تجيبوه لي هنا.
  • ما عاوز اشوف العدس.
  • لا العدس…ولا مصعب عمر.
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ……………

           و

  • المريخاب ديل هسع بعيدوا معانا وإلّا عندهم فكرة تانية.
  • الناس ديل العيد دا بيتبلع ليهم كيف مع مصعب عمر دا.
  • غايتو يا شيبولا ..مسخت ليهم العيد.
  • السنة دي المريخاب ما عندهم حلاوة.
  • ولا خبيز.
  • ولا فاضين للحاجات دي.
  • ما عندهم جديد.
  • وكمان مسافرين كادوقلي.
  • هلال كادوقلي ان شاءالله يتم الناقصة.
  • بوريكم حاجة.
  • بتفهموا ليكم شيء منو.
  • سؤال محرج شوية.
  • والله محرج كتير.
  • مصعب عمر ح يسافر معاكم كادوقلي.
  • اتوقعوا في الايام القادمة حملة (كلنا معصب عمر).
  • و
  • (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ……….
  • السيدة (ل) – ليه الزول وقت يشوف (عينيك) صدفة كدا بيقرأ دعاء السفر.
  • وقرّط على كدا.
كلمات دليلية
رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.