دق الدلجة – محمد عبد الماجد – قالوا (مصاب) ..فاضل ليه (ينط) من الطابق الرابع 18 يوليو 2016

1,176 views مشاهدة
أخر تحديث : الثلاثاء 19 يوليوز 2016 - 11:06 صباحًا
دق الدلجة – محمد عبد الماجد – قالوا (مصاب) ..فاضل ليه (ينط) من الطابق الرابع  18 يوليو 2016

 

 من رأسي :

فيصل سيحة في مباريات المريخ عاوز مدافع المريخ بعد ما يمسك الكورة بي يده ، يقشر (الكورة) ،ويعصر فيها (ليمونة) – عشان الحكم يحسب ليه ضربة جزاء ضد المريخ.

لو ضربات الجزاء بيحسبوها كدا كان كل تلاتة قرون بنشوف لينا (ضربة جزاء واحدة).

 من كراسي :

(ابق متمركزا ، الجلوس إلى طاولتك هو وظيفتك الاولى ككاتب. دائما يوجد شيء آخر لتفعله. لا تقم به ! تذكر : الوقت المستهلك في شيء آخر يعادل عملا منجزا في الكتابة).

آن باتشيت في وصيته للكتّاب

 

  • الصديق الطيب علي فرح في حواره المتميز امس في (الجوهرة) مع محترف المريخ (السابق) سالمون جابسون لا ادري ان كان الطيب سأله بعيدا عن الحوار ان كان في مدينتهم (فندق) من اربع طوابق ام لا؟.
  • عشان سالمون يدخل هذا الفندق وينط من (الطابق الرابع) ، عشان العملية تكتمل بنجاح تام.
  • نحن ذاتو لو ما بنط ما بنفع معانا.
  • انتوا قايلين اختباراتنا الفنية والطبية – نحن قاعدين نعملها كيف؟.
  • بنعملها بي جنس (النط) دا.
  • لاعب ما بنط من الطابق الرابع ما بنفع معانا.
  • ولا بدقها.
  • اقيفوا قبلكم ..انا قلتو  محترف المريخ (السابق) ، وإلّا الموضوع دا بتهيأ لي ساكت.
  • لو قلت محترف المريخ (السابق) …ارجو من القاريء الكريم حذف كلمة (السابق).
  • عشان الحكاية ما تكون واضحة.
  • هسع الكلام دا ما وقتو.
  • يا الطيب عليكم الله الزول دا ما سألك من (الجوهرة) وصلت وين؟.
  • وما قال ليك (شيبوب) عامل شنو؟.
  • ما شال منك تلفون العقيد حسن محمد صالح.
  • ما علق ليك في البعمل فيه مدثر كاريكا الايامات دي.
  • انت ما قلت ليه يا الطيب بتلبس مقاس كم في (الكسكتة)؟.
  •  و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • اي لاعب انتقل من المريخ الى الهلال ..اعلام المريخ كان بأكد ان اللاعب (مصاب).
  • بكتلوه عديل كدا.
  • عملوها مع عبده الشيخ.
  • وباكمبا.
  • وادوارد جلدو.
  • وحمودة بشير.
  • وعلاءالدين يوسف.
  • لغاية (شيبوب) اكدوا اصابته بـ (الصليب الرباطي).
  • اعلام المريخ ما عنده اي ثقافة في الاصابات – اي لاعب انتقل منهم قالوا عنده (صليب رباطي).
  • يعني حتى ثقافة (التغيير) في الاصابات ما عندهم.
  • مسكوهم ليك في (الرباط الصليبي) ومسكوا ليك فيه بي عدلهم.
  • بقى اي لاعب يقنعوا منو يقولوا ليك عندو (رباط صليبي).
  • عشان كدا من قالوا سالمون جابسون (مصاب) – قلت انتوا الزول دا ماشي الهلال وإلّا شنو؟.
  • جاني احساس كدا.
  • غايتو سالمون دا لو قفز من الطابق الرابع (نوفمبر) القادم ان شاءالله بتشوفوه في الهلال.
  • باقى ليه (ينط).
  • ناقصه (النطة).
  • يا سالمون عشان ما نصعبها معاك …لو نطيت من الطابق الاول بنجيبك الهلال.
  • اصلو (النط) دا ما بينا.
  • الموضوع ولا محتاج ليه (شبيبة القيروان).
  • وما عارف كمان ان كان سالمون جابسون عندو كورة عبرت ام لم تعبر.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • يا ناس المريخ ..عشان ما نكتر معاكم الكلام ..سالمون دا يا ألحقوه سريع وقولوا قدم خطاب (اعتذار) زي بكري المدينة.
  • يا كمان الزول دا بنط من الطابق الرابع.
  • وانتوا عارفين اللاعب وقت ينط من الطابق الرابع بكون وين؟.
  • عشان كدا ألحقوه بـ (اعتذ       ار) سريع….(الاصابة) ما بتمرقكم.
  • اعلام المريخ الذي حاول يشوه صورة سالمون …جعل سالمون يقوم بكشف الاوضاع في المريخ.
  • كشف حال المريخ.
  • سالمون قال في حواره امس : (غادرت الخرطوم لبلدي دون ان يمنحني المريخ ولو خمسون دولارا).
  • خمسون دولار لم يمنحوها سالمون وبتكلموا ليك عن الشركة الصينية.
  • والمول التجاري.
  • والنادي الاسري.
  • وفندق خمس نجوم.
  • سالمون (6) شهور ما منحوه مرتبه.
  • تقول (معلم).
  • تقول سالمون دا جابوه المريخ استاذ.
  • (6) شهور ما منحوه مرتب.
  • المشكلة سالمون مشى اتسلف وادين في بلدو وشال ليه (قرض) عشان يعمل ليه مشروع.
  • الولد مقدم العقد ما استلموا ومرتب (6) شهور ما صرفوه ليه.
  • وللاسف الشديد ..اعلام المريخ بعد دا كلو بقول ليك اللاعب مصاب.
  • يا مفتريين.
  • 6 شهور ما تصرفوا ليه مرتب وتقولوا عنو (مصاب).
  • سالمون مشكلتو في (الجيب) ما في الركبة.
  • الزول دا عندو رباط صليبي في (الجيوب).
  • زول (مفلس) بس.
  • وشديد زي الحصان.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • على العموم وعشان تبقوا عارفين ..وعشان الموضوع بعدين ما يبقى ليكم صعب …سالمون مفكوك  في شهر نوفمبر.
  • وعشان الصورة تبقى ليكم اوضح اكتر اتفاقية عصام الحاج ما داخل فيها سالمون.
  • الاتفاقية دي ممكن نلتزم بيها مع بلة جابر.
  • موسى الزومة …مصعب عمر …صلاح نمر …عطرون.
  • لكن سالمون دا ما بنقدر نلتزم ليكم بـ (الجنتلمان).
  • عشان كدا لقطوا ليكم قروش ..واعملوا ليكم نفرة في القروبات عشان ترسلوا ليكم (مصاريف) لسالمون.
  • بس النفرة المرة دي اعملوها بـ (الدولار).
  • الجنيه ما بعمل ليكم شي؟.
  • والله الجنيه مشكلة عاطف الغزالة ما بحلها ليكم.
  • اتجدعنوا كدا ..واتشطروا واعملوا ليكم نفرة (دولارية).
  • نحن ذاتو ممكن نساعدكم.
  • الكاردينال ممكن يدعمكم …ما عندنا مشكلة.
  • ما في اي حاجة بتجمعنا بيكم بعد فارق الـ (9) نقاط.
  • بقيتوا انتوا والرابطة كوستي والامل عطبرة عندنا واحد.
  • ممكن ندعمكم عديل كدا.
  • ما فيها حاجة.
  • ما تتعقدوا ساكت.
  • عليكم الله عندكم مجلس فيه (28) عضو ..وبتعملوا في نفرات القروبات.
  • لغاية الآن شغالين بي تحويل الرصيد.
  • بص الوالي دا لو كلو واحد فيهم دفع ليه عشرة الف دولار …دي 280 الف دولار.
  • 280 الف دولار بتحل مشاكل المريخ كلها.
  • حقوق سلمون ..وعقوبة الاتحاد الافريقي وقروش عاطف الغزالة.
  • مشاكلكم كلها بتحلها ليكم.
  • ما تبقوا بتاعين كلام ساكت.
  • وونسة واتساب.
  • اعملوا ليكم همة.
  • الكاردينل براهو عمل (الجوهرة الزرقاء).
  • انتوا 28 عضو ..مشكلة عاطف الغزالة ما قادرين تحلوها.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ………………..

         و

  • اللاعب وقت يكون ماشي الهلال بعملها ظاهرة.
  • واضحة.
  • اي زول فهمها.
  • سالمون دا يعني إلّا يلبس ليكم (كسكتة).
  • لكن يا سالمون خط وسط الهلال مليان.
  • ابوعاقلة كنبة.
  • شيبوب ذاتو بقعد برة.
  • غايتو إلّا تصبر ليك (6) شهور يا سالمون.
  • لو ما صبرت ما بتلعب.
  • فقدت شندي صبيحة السبت الماضي زينة شبابها وخيرة ابناء المنطقة الشاب الخلوق المهندس دريد عثمان محمد.
  • لتدخل شندي في حالة من (الحزن) الجماعي بعد الرحيل.
  • التعازي لاسرة المرحوم دريد …ولاهالي شندي جميعهم الذين فقدوا (ابنهم) في شخص دريد عثمان.
  • ولا حول ولا قوة إلّا بالله.
  • …………
  • السيدة (ل) – اشترى ليه (دومة) وكتب فيها حرفها – حب (بلدي) خالص.
  • وقرّط على كدا.
رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.