دق الدلجة – محمد عبد الماجد – لتقليص الفارق استعينوا بي (سمير فضل) و (51) حاوي وشيلوا (مصعب عمر) 12 يوليو 2016

1
2908 views

 من رأسي :

مصعب عمر قالوا ليه في امتحان التاريخ ..من هو الشخص الذي فتح الاندلس؟ قال ليهم لو ما شيبولا بكون سادومبا ابو رويس.

بالمناسبة انا ذاتي عندي احساس يكون عملها سادومبا…الزول دا ما غريبة عليه.

 

 من كراسي :

يسرقون رغيفك..ثم يعطونك منه كسرة ..ثم يأمرونك ان تشكرهم على كرمهم ..يا لوقاحتهم.

غسان كنفاني

 

  • قالوا ليك في واحد بخاف من زوجتو شديد.

  • خوف مبالغ فيه.

  • النوع البركب (الستائر).

  • وبحضر معاها المسلسلات التركية …وهو عندو مباراة موت احمر في القناة التانية.

  • النوع البشكر ليها ملاح (القرع).

  • الزول دا جابوه ليك في برامج العيد في احدى الفضائيات.

  • المذيعة عاوزة تتراشق قالت ليه رأيك شنو في (العدس)؟.

  • سؤال تعسفي كدا.

  • صاحبكم عاوز يهاجم (العدس) – اتذكر المدام وعدسها.

  • قام قال ليهم والله (العدس) في حد ذاتو ما فيه كلمة – لكن والله يوم الجمعة لا بتأكل ولا حاجة.

  • الصراحة صراحة.

  • دي القدر عليها.

  • العدس دا ذكرني ليك بي (عنكبة) في هجوم المريخ.

  • وعطرون في دفاع المريخ.

  • الله يسألني المريخ بقى عندو خط دفاع …المهاجم بمشي فيهم زي (الرصيد).

  • ينزل جب.

  • يا ناس مريخ كوستي ..يا ناس الرابطة …المريخ لا عندو دفاع ولا عندو هجوم.

  • ابقوا عارفين.

  • ما نوصيكم.

  • يعني ممكن تعملوا فيه اي شيء.

  • ووسط المريخ ذاتو …الشغلة جديدة عليه.

  • والله يا جماعة فرق امير كمال وعلاءالدين يوسف ظهر.

  • اصلو ما كنت فاكر (علي جعفر) غيابه ممكن يؤثر في المريخ بهذا الشكل.

  • صلاح نمر ضربة الجزاء عندو اسهل من شراب الموية.

  • لو ما ضرب المهاجم …بيلمس الكورة بي ايدو.

  • عليكم الله في مباراة هلال كادوقلي والمريخ – الفرق كان شنو بين جمال سالم وصلاح نمر؟.

  • المباراة كلها انا فاكر صلاح نمر هو جمال سالم.

  • صلاح نمر (ثغرة) واضحة في الدفاع ..استفيدوا من العنصر دا.

  • دا طابور خامس عديل كدا.

  • وعطرون – اصلو ما بوصومكم عليه.

  • وكان لي مصعب عمر – الزول دا (شيبولا) ما خلى فيه شيء.

  • مسحو مسح.

  • و

  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).

  • الايامات دي نتائج مباريات المريخ زي نتائج الفحص.

  • لو ما عندك ملاريا …بقولوا ليك ملاريا.

  • عليكم الله – وامانة في (عدسكم) دا – في زول فيكم فحص الملاريا – قالوا ليه ما عندك ملاريا.

  • نتائج مباريات المريخ الايامات دي كدا.

  • يا خسارة يا تعادل.

  • على احسن الفروض بتعادلوا وبيطلعوا فرحانين بالتعادل.

  • انتوا عارفين المريخ في خمس مباريات (متتالية) في الدوري الممتاز لم يحقق غير انتصار واحد.

  • انتصار وحيد على الاهلي شندي.

  • ولولا الاهلي شندي لما انتصر المريخ.

  • المريخ خسر امام هلال الابيض واتعادل امام الخرطوم الوطني.

  • ثم فاز على الاهلي شندي وخسر امام الهلال واتعادل اخيرا مع هلال كادوقلي.

  • لاقكم (وصيف) بهذا الشكل في (5) مباريات يحقق ليه انتصار وحيد.

  • الفارق بين الهلال والوصيف اصبح (9) نقاط.

  • الموضوع دا عاوز سمير فضل.

  • عاوز ليه لجنة استئنافات.

  • واعادة مباريات.

  • واعتبار المريخ فائز.

  • التأجيل ..الموسم دا ما عمل حاجة.

  • التأجيل ما عمل اي شيء.

  • ألحقهم يا سمير فضل.

  • لكن السنة دي سمير فضل براهو ذاتو ما بعمل حاجة.

  • سمير فضل شوفوا ليكم معاهو (51) حاوي.

  • ناس عنكبة ديل ..سمير فضل براهو ما بنفعهم.

  • جيبوا ليكم (51) حاوي.

  • ومع الـ (51) حاوي شيلوا مصعب عمر برة التشكيلة.

  • 15 حاوي ومصعب عمر مشارك مع المريخ ما بقدروا يعملوا ليكم اي حاجة.

  • بعدين و51 حاوي ما كتار عليكم …ومجلسكم فيه (28) عضو.

  • تقول عندهم (سماية).

  • 28 عضو في شنو؟.

  • والفارق (9) نقاط…فضيحة السواد.

  • لو لقيتوا ليكم (حاوي) شاطر كدا …بلقى ليكم (شكوى).

  • بتلقوا ليكم شكوى الموضوع ما صعب عليكم.

  • و

  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).

  • الموسم الماضي عندما اصبح الفارق بين الهلال والمريخ (6) نقاط ووصل لـ (9) نقاط بعد خسارة المريخ امام الاهلي مدني في المناقل ، ناس المريخ قالوا احسن يتصرفوا.

  • احسن يشوفوا ليهم حل بعيد عن (الملعب).

  • قنعوا من الملعب.

  • عرفوا المستطيل الاخضر ما عندهم ليه قدرة – قالوا يفتشوا ناس اسامة عطا المنان ومعتصم ومجدي شمس الدين وسمير فضل يشوفوا ليهم حل.

  • لكن عجبني ليكم – السنة دي ناس معتصم ومجدي واسامة عطا المنان بقوا في رقبتهم.

  • حالتهم هم اصعب من حالة المريخ.

  • هم ذاتهم بفتشوا ليهم في مخرج.

  • بالمناسبة ..انا على قناعة تامة …انو حقنا ما بروح.

  • ناس الهلال ديل بركة.

  • تصوموا وتفطروا على رؤية الهلال.

  • المريخ بعد (الخرمجة) التى احدثها في الموسم الماضي …حيث منح لقب الممتاز والكاس بعد ان خسر خمس مباريات في الممتاز.

  • منحوه لقب الممتاز وهو الذي تأخر على الهلال بـ (9) نقاط.

  • الظلم دا كلو اتعكس على المريخ وعلى الاتحاد ذاتو هذا الموسم.

  • حقنا ظهر.

  • مشاكل ..وايقافات داخلية وخارجية.

  • النار مولعة في المريخ.

  • ووقت يعودوا ليهم بي نقطة من كادوقلي بفرحوا بيها.

  • مجلس المريخ اوقف بعض لاعبيه ..(جات منهم براهم) والاتحاد الافريقي اوقف مجموعة اخرى.

  • المريخ وصل مرحلة ان يكون (ضفر) كابتن الفريق ..وان يفقد المريخ (علي جعفر)…ويمثله صلاح نمر وعطرون.

  • علي جعفر فقدوه – في تواضع اكتر من كدا.

  • دا حقنا يا جماعة.

  • الموسم الماضي قلنا ليكم – حقنا ما بروح ساكت.

  • ظهر فيكم …اوامر قبض صدرت في حق رئيس المريخ وامين المال السابق.

  • وهزائم داخلية ومحلية.

  • حتى بكري المدينة (ولدنا)…الحصل عليه لا بيعجب عدو ولا صديق.

  • بكري المدينة الذي قدم موسم استثنائي في الموسم الماضي ، مجلس المريخ اوقفه هذا الموسم.

  • دا حقنا.

  • وعلاءالدين يوسف.

  • حتي امير كمال الذي اعاد المريخ قيده لهذا الموسم برقم خرافي تم ايقافه محليا وخارجيا من قبل الاتحاد الافريقي.

  • جمال الوالي بصحبة (27) عضو …ما قادرين يعملوا حاجة.

  • يعملوا شنو؟..وعنكبة وعبده جابر بمثلوا هجوم المريخ.

  • عليكم الله في تواضع اكتر من كدا.

  • الله هسع دا هجوم ليكم.

  • هجومك دا هسع فرقو شنو من الناس القاعدين ليهم في (مظلة) منتظرين المواصلات.

  • ما في اي فرق.

  • و

  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).

  •  وحقنا ظهر في الاتحاد العام – جماعتكم بقوا في رقبتهم …ما عارفين يتصرفوا كيف؟.

  • عجبنا ليكم.

  • الوزير محاصر الاتحاد بي جهة والمفوضية بي جهة تانية.

  • والمراجع العام بتابع من بعيد.

  • حالة صعبة.

  • عارفين دا كلو حصل ليه؟.

  • عشان لخبطة الموسم الماضي.

  • عشان الظلم الذي وقع على الهلال والامل وهلال كادوقلي والميرغني كسلا والرابطة كوستي.

  • حقنا خلص فيكم.

  • المريخ الآن يمر باصعب ظروفه على الاطلاق.

  • لم اشاهد المريخ بهذه الوضعية منذ سنوات طويلة.

  • ربما منذ حادث ام مغد المشؤوم.

  • متين المريخ بسجل ليهم لاعب بيصبح (اساسي) من قولة تيت.

  • المريخ قاعد في الصقيعة.

  • ابراهيم جعفر.

  • وصلاح نمر.

  • ومحمد الرشيد.

  • تشكيلة المريخ …بقت زي قائمة الطلاب المهرجلين.

  • زي الطلاب البهرجلوا في الفصل ويكتبهم الالفة ويقدمهم للاستاذ.

  • ما فيهم اي بعد موسيقي كدا.

  • صلاح نمر جابوه مدافع …لقى البلد خلا …اشتغل (ملاكم).

  • زول ليه 17 يوم في المريخ …بضرب بونية بالشكل دا.

  • صلاح نمر دا ما تسوقوهو معاكم برة.

  • اوعكم من المغرب.

  • الزول دا شكلو ح يقيف مدى الحياة.

  • و

  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).

  • ……………

       و

  • يا ربي المريخ بعد العقوبات دي بفكر يحل بديلا عن وفاق سطيف.

  • عقوبات المريخ اكبر من عقوبات وفاق سطيف.

  • مع ذلك اعلام المريخ ومجلسه خاطب الاتحاد الافريقي ليحل بديلا عن وفاق سطيف في مرحلة المجموعات.

  • لاقتكم قوة عين اكتر من دي.

  • والله الناس ديل ما بخجلوا.

  • لو بخجلوا ..ما كان فرحوا بالنقطة.

  • فيصل سيحة بكون بيحفظ منذ الآن في هدف المريخ في هلال كادوقلي صحيح.

  • عبدالرحمن درمة كان شجاع ..وقال رأيه بوضوح وقوة..

  • و

  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).

  • ……

  • السيدة (ل) – المطرة لو عارفة فرحتك بيها …كل يوم تصب ليكم قدام بيتكم.

  • وقرّط على كدا.

1 COMMENT

  1. تشكر الكوتش محمد عبد الماجد ، عمودك دا بصراحة عمود قارب جدا وادخلنا في عالم الفرح والضحك بلاش تجاعيد وصرصرة وزعل . الله يديك العافية نعم دا الصحفي الذي يدخل الفكاهة في الرياضية بلاش سمير فضل ولا ابو شيبة.

LEAVE A REPLY