دق الدلجة – محمد عبد الماجد – يا شيبوب هي عرفت من متين؟؟ 16 يوليو 2016

1,861 views مشاهدة
أخر تحديث : السبت 16 يوليوز 2016 - 5:00 مساءً
دق الدلجة – محمد عبد الماجد – يا شيبوب هي عرفت من متين؟؟   16 يوليو 2016

 

من رأسي :

فيصل سيحة لو جابوا ليه حادث ضحايا مدينة (نيس) الفرنسية التى بلغ عدد القتلى فيه (84) قتيلا وأصيب فيه العشرات بينهم 18 في حالة حرجة ، ح يقول ما فيه حاجة.

لو الكلام دا حصل في منطقة جزاء المريخ…ح يقول ليكم الحالة (تقديرية) لحكم المباراة ..طيب لو اي حالة (تقديرية) انت جايبنك تعمل شنو؟.

من كراسي :

السمعة أكثر الخدع زيفاً وبطلاناً، فهي كثيراً ما تكتسب دون وجه حق وتفقد دون وجه حق.

وليم شكسبير

  • بي صراحة والكلام دا ما يطلع برة العمود دا ..امس قلت لا بشتغل بي (بشه) ، ولا في الشيء البعمل فيه (كاريكا) دا.
  • كاريكا امس تقول بنضف ليه في (كمونية).
  • المطر ذاتها ما عندي معاها قضية.
  • قلت لا بشتغل بي قون نزار حامد المتعودين عليه …ولا بشتغل بي نظريات ايلي بلاتشي.
  • الزول دا بيني وبينكم بعمل ليه في (نظريات) اخطر من (الطابق الثالث) في الجوهرة الزرقاء.
  • قلت ما عاوز اشتغل بي الحاجات دي.
  • كنت مركز بس في (شيبوب).
  • شيبوب بس.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • الشوط الاول كلو ما اشتغلت بيه.
  • ولا عاينت ليه.
  • من شيبوب شارك في الشوط التاني ..قلت النشوف الزول دا بيستاهل (النطة) العملها من الطابق الرابع في جوبا.
  • الزول دا عمل ليه (نطة) ما نطة نصاح.
  • يا ربي بيستاهل الضجة العملها.
  • كل تركيزي كان معاه.
  • ضربة الجزاء عملوها مع سادومبا صفقت لي شيبوب – وقلت ليه الله عليك يا شيبوب.
  • علي كيفي ..اصفق زي ما عاوز.
  • ضربة الجزاء سجل منها سادومبا هدف الهلال الاول …صفقت لي شيبوب ..وقلت ليه انت يا شيبوب البتاكلو ينفعك.
  • في زول عاوز مني حاجة؟؟.
  • القون التاني جابوا نزار حامد – ما اشتغلت بيه الشغلة …صفقت لي شيبوب …الله يخليك يا شيبوب.
  • نزار (الصاقعة) ما قلت ليه كلمة.
  • القون الثالث جابو محمد احمد بشه – صفقت لي شيبوب.
  • مزاج كدا.
  • عندكم اعتراض في (الصفقة) دي.
  • وعشان ما تكون ظاهرة – قلت.. لكن الهدف دا لعب فيه مدثر كاريكا دور كبير.
  • القون الرابع جابو مصعب كبير هدف عكسي في مرماه.
  • بتعاينوا لي شنو؟.
  • عاوزني اصفق لي مصعب كبير – طبعا صفقت لشرف شيبوب.
  • صفقة (منطقية) كدا.
  • الزول دا معلم عديل كدا.
  • الهدف الخامس …اظنكم كلكم بتتفقوا معاي في ان اعجازه كان في تمريرة شرف شيبوب (الطويلة).
  • يمين شيبوب جدع ليه (باص)…بي (بص الوالي) كلو.
  • بي الـ (28) عضو.
  • باص ما باص نصاح …انا القاعد قدام الكورة ما شفتو.
  • لمن مدثر كاريكا جاب قونو …حتين فهمت حاجة.
  • قعدت المباراة كلها اصفق لي شيبوب.
  • كمان (الصفقة) دي فيها حاجة.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • يا ناس الاتحاد العام لو عندكم جمعية (تنويرية) عاوزين تعقدوها ..جيبوها.
  • شيبوب بجيزها ليكم.
  • الزول دا صعب عديل كدا.
  • بيلقى ليكم طريقة.
  • بيلقى ليكم حل.
  • بعدين الشيء المحيرني ..شيبوب دا بنزل يدافع …وبقيف في وسط الملعب ..بقالع ..وبمشي يهاجم.
  • وبيلعب كورات طويلة.
  • مزاج عالي.
  • الزول دا تقول تربية (عم شبشه) ربنا يديه الصحة والعافية.
  • شييوب دا تقول مواليد ستاد الهلال.
  • الزول دا (هلالابي) اكتر من (مساوي).
  • يقالع ..ويحنس ..ويطلع في الكورة.
  • عندو (شخصية) اللاعب في الميدان.
  • شخصية (القائد).
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • شيبوب امس انا قاعد بعاين ليه كدا في مباراة الهلال وهلال كادوقلي …قلت الزول دا ناس احمد الفاضل ما بقدروا (يقفلوه).
  • الزول دا إلّا تجيبوا ليه (50) محامي.
  • هو عليكم الله لو شيبوب دا (بتقفل) كان طلع ليه من غرفة في الطابق الرابع في فندق في جوبا في الساعة اتنين حارسنها 21 بودي قارد.
  • بعوضة ما بتدخل فيها.
  • البودي قاردات حارسنو…لقوه برة الغرفة.
  • جابوه ليك ناس المريخ هنا بـ (120) بودي قارد.
  • طلع منهم زي الشعرة من العجين.
  • ابوجريشة لغاية الآن ما فاهم حاجة.
  • وكان لي عبدالتام ..احسن ليه يمشي يشوف ليه شغلة غير (البودي قاردات) دي.
  • شيبوب طلع من بيت اسامة ونسى عديل كدا.
  • ومن عقود جمال الوالي.
  • ما في زول شعر بيه.
  • اها زول بالشكل دا – وبالطريقة (السحرية) دي …عاوزين صالح الامين واحمد الفاضل (يقفلوه) ليكم.
  • عشان بتقفل ليكم!!!.
  • الزول دا (حاوي).
  • ناس المريخ منتظرنو في المكتب التنفيذي للمريخ في العمارات ..لقوه في (شبيبة القيروان).
  • عليكم الله – الزول دا بي طريقتو دي ما (حاوي).
  • خلاص لقيت ليكم اسم لي شيبوب.
  • الزول دا من الليلة اسمو (الحاوي).
  • عشان بقفلوه في غرفة في جوبا ..بلقوه في نيروبي.
  • بتوقعوه في (الملكية) جوبا – بلقوه في (شبيبة القيروان).
  • اها دي عليكم الله (حاوي) بعملها.
  • الزول دا شدة ما (حاوي) قالوا ليك عبر ليه (5) مطارات من غير اوراق ثبويتة.
  • لا جواز …ولا شهادة سكن من اللجنة الشعبية.
  • (حاوي).
  • حاوي عديل كدا – انا اعمل ليه شنو؟.
  • ناس مزمل ابوالقاسم كتبو اعمدتهم (الغزلية) فيه ما خلوا ليه شيء بعد ما (تلب) من الطابق الرابع.
  • طلعوه (بوجبا) عديل كدا.
  • مزمل ابوالقاسم قرب يبقى حسين الصادق.
  • كان بغني ليه غنى رسمى.
  • اليوم التاني لقوه ليك مع الكاردينال.
  • ظهر كيف ما تسألوني.
  • انا ما عارف اي حاجة.
  • قدر ما يشيلوه من الكاردينال …يلقوه معاه.
  • يطلعوا منو (الكسكتة)…يلبسها تاني.
  • اها دا ما شغل زول (حاوي).
  • بعدين ما تقعدوا تستغربوا لي ساكت ما في فرق كبير بين (الحاوي) و (الهاوي).
  • الشغل دا انا عارفو كبير عليكم – لكن بقولو ليكم.
  • بختوا ليكم عديل كدا في الواطة.
  • عليكم الله الزول دا لو ما (حاوي) ينط من الطابق الرابع الساعة اتنين صباحا ..ما تجيه اي حاجة.
  • هسع الشيء البعمل فيه (شيبوب) دا شغل زول عندو (رباط صليبي).
  • بتعاينوا لي شنو؟.
  • ما قلتوا عندو رباط صليبي.
  • الزول دا امس حايم في الميدان (ما شاءالله عليه) زي (العدس).
  • عدس شنو؟.
  • انا قلت (عدس)؟؟؟.
  • تلخبطوا الزول في شعورو.
  • لكن يمكن اكون قلتو …عشان ما تدوه لينا (عين).
  • عدس عدس – اعمل ليكم شنو؟.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  •  غايتو يا شيبوب البشوفك تقالع وتشاكل كدا في الهلال يعذر ناس علاءالدين يوسف وبكري المدينة …(الدنيا مسخت ليهم في المريخ).
  • يا شيبوب هي عرفت من متين؟.
  • مرة تلقوه بيقالد في (بشه) من الفرحة.
  • ومرة تانية بتلقوه بيسجد مع (كاريكا) بعد الهدف.
  • شغل بتاع (عرفة قديمة) شديد.
  • عرفة شنو؟…الزول دا عشان الهلال مرقها لي (الملكية) جوبا…ومشى (شبيبة القيروان) اتغرب في تونس (6) شهور عشان يلعب في الهلال.
  • عشان اللحظة التاريخية دي.
  • ………….

            و

  • غايتو الكان ضعيف في (الفيزياء) ما بفهم الشيء البيعمل فيه شيبوب دا.
  • ما بفهم لينا سطر.
  • طرب شديد.
  • فرح مبالغ فيه.
  • الله يتم لينا فرحنا الليلة ان شاءالله.
  • عاوزين لينا فرحة (غليدة) كدا بالعصر.
  • ان شاءالله يا رب.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ………….
  • السيدة (ل) – تفتكري (البطيخ) عندو مشكلة مع (القرع)؟.
  • وقرّط على كدا.
رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.