دق الدلجة – محمد عبد الماجد – (بيجيبها البياض) الخرطوم ظبطت الساعة..الفرق رجع (9) شوكة!! 28 اغسطس 2016

4,798 views مشاهدة
أخر تحديث : الأحد 28 غشت 2016 - 4:03 مساءً
دق الدلجة – محمد عبد الماجد – (بيجيبها البياض) الخرطوم ظبطت الساعة..الفرق رجع (9) شوكة!!  28 اغسطس 2016

من رأسي :

لو ما شايفها كتيرة ..الواحد فينا كان لِبس (جلابية العيد) من هسع دي!!…ومشى يبارك للجيران.

يا ربي بجيبو لينا (حلاوة وخبيز).

والله الجيران ديل مع هدف صلاح الامير ممكن يعملوها.

 من كراسي :

أخر كتاب قرأته كان للأستاذ الكبير الراحل محمد حسنين هيكل ، وأفضل القراءة لأنيس منصور وموسى صبرى وجمال حمدان ، وليس معنى تفضيل القراءة لكاتبٍ معين ، أن كل رؤاه تتفق مع رؤيتك.

الرئيس المصري عبدالفتاح السيسي

  • من منطلق مباراة الامس بين المريخ والخرطوم الوطني ..صلاح نمر لو قرأ (طب) …كان ممكن ينجح اكتر من كونه يكون لاعب كورة.
  • الزول دا ممكن يكون اختصاصي غدد درقية شاطر جدا – لكن (لاعب كورة) ، لا بنفع ولا حاجة.
  • ممكن دكتور.
  • اقرب من البعمل فيه دا.
  • اقول ليكم حاجة …معاكم لغاية عالم في الفيزياء.
  • رائد فضاء روسي.
  • لكن لاعب كورة …لا.
  • عاوزين الحقيقة وإلّا عاوزين الجنبها.
  • الايامات دي ايام (العدس)..تقّلوا في العدس انتوا داخلين على اللحمة.
  • انا قلت (عدس).
  • عدس شنو مع انتصار الخرطوم الوطني؟.
  • دا وقت عدس!!.
  • ما تشتغلوا بالموضوع كتير.
  • مرات بقول حاجات برة العمود!!.
  • صلاح نمر دا لو امس كان بيلعب (رأس حربة) صريح مع فريق الخرطوم الوطني فريقه السابق ..ما بعمل البعمل فيه دا وهو مدافع للمريخ.
  • الزول دا بفكها قبل ما يمسكها.
  • بقع قبل ما يقوم.
  • بجري على اتجاهين في لحظة واحدة.
  • صلاح بيمشي على حتة.
  • ونمر بيمشي حتة تانية خالص.
  • هسع لو سألناكم سؤال ..النعسان منو فيهم؟.
  • صلاح نمر ام خالد النعسان؟.
  • وكان مشينا على (ضفر) – بنلقاه بكب لياقة التمارين كلها في الكلام مع الحكم.
  • انتوا الزول دا يا جمال الوالي اتفقتوا معاه على اساس انو (محاضر) وكدا.
  • الزول دا لو قلل من الكلام مع الحكم شوية – كان ممكن ما يقطع من الدقيقة الخامسة.
  • من الدقيقة الخامسة بيقيف.
  • لياقتو ماشه كلها في (النقة) مع الحكم.
  • زي عمر بخيت.
  • نفس (النقة).
  • معقولة بس يا ضفر ..اي مخالفة عاوز تعمل لينا فيها (محاضرة) مع الحكم.
  • ضفر (الجدعة) بعمل فيها حصة (دبل).
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • عليكم امان الله – انا امس من شفتو (صلاح الامير) بيسخن ..عشان يدخل ..قلت ليهم (ريحة الشية) ظهرت.
  • السنة دي ..(شية الجمر) طلعت قبل ما يضبحو الخروف.
  • اقول ليكم.
  • قبل ما نشتريه ذاتو.
  • قبل 15 يوم من العيد.
  • مباراة الامس ..وضحت الفرق بين المدرب الوطني ..والمدرب الاجنبي.
  • كواسي ابياه دا معلم والله.
  • كواسي ابياه وقت الخرطوم الوطني كان مضغوط ..ادخل عاطف خالد – مهاجم صريح.
  • ومحسن سيد بتكلم مع الحكم الثالث.
  • الخرطوم الوطني ازداد عليه الضغط.
  • كواسي ابياه ادخل صلاح الامير.
  • الزول دا عاوز يعمل شنو؟.
  • وقت كنا في انتظار ان يدافع فريق الخرطوم الوطني ..كواسي ابياه قام ادخل معاذ القوز.
  • الفرق ظهر.
  • الثلاثي قلبو المباراة.
  • كورة بين معاذ القوز وصلاح الامير ..حسمت المباراة.
  • شغل المعلمة ظاهر.
  • وواضح.
  • المخمخة العالية..ظاهرة.
  • محسن سيد بيبني خطته على الاعتراض على الحكم.
  • بيبني خطته على فانيلته.
  • شابكننا (9) من (10).
  • و (8) انتصارات متتالية.
  • (8) انتصارات على منو؟.
  • الامير والنيل شندي والنسور والاهلي الخرطوم ومريخ كوستي والرابطة وهلال الفاشر ومريخ الفاشر.
  • اول ما ظهر ليهم (الامل) بدأوا تاني من اول السطر.
  • الاهلي عطبرة – اصلا ما بقيف قدام المريخ.
  • يلعب كورة اهـ.
  • لكن ينتصر على المريخ لا.
  • دخلوا على الخرطوم الوطني وقعت الخسارة.
  • يبقى شنو؟.
  • يبقى (8) من (11).
  • والحسابة بتحسب.
  • وهلال الابيض في الانتظار.
  • وهلال كادوقلي.
  • والاهلي شندي.
  • والهلال سيد الاسم.
  • موقفكم خطير.
  • لو الخرطوم الوطني وهلال الابيض والاهلي شندي ..شدوا حيلهم ..ممكن المريخ السنة القادمة ما يمثل السودان في البطولات الافريقية.
  • الناس ديل عندهم مباراة في مدني.
  • وعندهم مباراة في نيالا.
  • وناس صلاح نمر ديل في (استاد الخرطوم) بقعدوا يتلفتوا.
  • زي صينية الغداء ..الما بيدخلها باب الصالون.
  • انا قلت صينية الغداء.
  • ما تشتغلوا بالكلام دا.
  • مرات بقول حاجات برة العمود!!.
  • حاجات برة الشغل.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • نحن وقت المريخ سافر عطبرة ..افتكرنا عطبرة قادرة تظبط الفارق.
  • افتكرنا ..عطبرة ممكن ترجع الفرق تاني (9) نقاط.
  • الامل ثبت..لكن الاهلي عطبرة ما انستر.
  • الخرطوم الوطني الآن ظبطتت الساعة.
  • جابت الفرق.
  • قلنا ليكم قبل كدا.
  • قلنا ليكم الغريق قدام.
  • وحدثناكم.
  • الفرق رجع (9) نقاط.
  • 9 شوكة.
  • ما قلنا ليكم بيجيبها (البياض).
  • معلمين البناء ..عندهم النظرية دي.
  • المعلم تجيه داخل في الصالون ..تلقاه شغال ..ولا بيقيف يعاين ليك.
  • تقول ليه يا معلم الحتة دي فيها لفتة صغيرة كدا؟.
  • المعلم بقول ليك من غير ما يتلفت عليك : (بيحيبها البياض).
  • انتوا قايلننا نحن ما اشتغلنا الشغلة دي.
  • تلقى المعلم شغال في الحيطة.
  • تقول ليه الحيطة دي فيها ميلان.
  • ما بيشتغل بيك.
  • بقول ليك بس : (بيجيبها البياض).
  • وفعلا وقت ترجع ..وتشوف الشغل بعد (البياض) بتلقى الموضوع ظابط.
  • ما في اي شخشخة.
  • هسع نحن وقت خسرنا امام النيل شندي ..قلنا بيجيبها البياض.
  • ما اشتغلوا بينا.
  • رجعنا وخسرنا امام هلال الابيض ..والفرق بقى (4) نقاط فقط.
  • قلنا ما في مشكلة بيجيبها البياض.
  • الشغل دا شغلنا ونحن عارفنو.
  • البنيان دا اشتغلنا فيه ، لمن وصلنا مرحلة نركب (المروحة) قبل ما نعمل (السقف).
  • نركب الابواب قبل الحيطة.
  • شفوت نحن.
  • وصعبين.
  • في ريحة (بامية مفروكة).
  • انا قلت بامية.
  • ما تشتغلوا بالموضوع.
  • مرات بجيب لي حاجات برة العمود.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ناس المريخ امس بعد الخسارة ..تلقاهم قعدوا يفكروا.
  • يقولوا شنو لجماهير المريخ؟.
  • يقولوا (الحكم)..بقت ظاهرة ..ومكشوفة ..الحكم ما عمل اي حاجة.
  • يقولوا (المطر)..لكن امس (مدني) ما فيها مطرة!!.
  • طيب يقولوا شنو؟.
  • يقولوا في لاعب ضرب ليه حكم بونية سنة 87.
  • مزمل بجيب ليكم المستندات.
  • قديمة.
  • في لاعب من الخرطوم الوطني عندو (3) كروت.
  • ما في زول بيصدقهم.
  • طيب يقولوا شنو؟.
  • يتصرفوا كيف؟.
  • اقول ليكم حاجة.
  • قولوا في (شخيط) ما في.
  • في (شخيط) في ارضية ملعب استاد الخرطوم ناقص.
  • الشيء دا ممكن يعيد ليكم المباراة.
  • هسع المباراة دي لو عادوها ليكم ..صلاح نمر دا ح تودوه وين؟.
  • إلّا تودوه (النسور).
  • لكن في وجود صلاح نمر – المباراة لو عادوها ليكم 120 مرة ..برضو ح تخسرو.
  • عشان كدا ..احسن ليكم تمسكوا في شماعة التحكيم دي.
  • انا ما عارف صلاح نمر دا لو كان (حكم) ..المريخاب ديل كانوا عملوا شنو؟.
  • صلاح نمر لو كان (حكم) – مامون ابوشيبة كان لقى ليه موضوع.
  • وكان وجد ليه دلائل واثباتات على كلامه.
  • الحمدلله ان (حكامكم) بيلعبوا معاكم ..وبيلبسوا شعاركم.
  • مع ذلك بيخسروا.
  • سيكافا وجبت.
  • الموضوع دا عاوز ليه (سيكافا).
  • يا جمال الوالي – الجماعة ديل ألحقهم بـ (سيكافا) مستعجلة.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ………….

        و

  • صلاح الامير رفض الاحتفال بي هدفو.
  • عارفين ليه؟.
  • عشان الزول المفروض يحتفل بالهدف هو (صلاح نمر).
  • مجهود صلاح نمر في الهدف ..اكتر من مجهود صلاح الامير.
  • لكن تبقى التحية لصلاح الامير.
  • لعاب كبير ..وخلوق ..وفنان.
  • في الخرطوم الوطني لاعب (خطير)..وما في متلو في الدوري الممتاز اسمه احمد حامد التش.
  • هذا اللاعب نتمناه في الهلال.
  • يا ريت الكاردينال يحسم الامور من بدري.
  • نتمنى ان نشاهد احمد حامد في الهلال.
  • ونتمنى كذلك الطرف الشمال محمد آدم.
  • التسجيلات باقى ليها شهرين.
  • الهلال لو جاب احمد حامد التش ومحمد آدم في التسجيلات القادمة ..يبقى تاني ما عاوزين حاجة.
  • اول مرة اشوف لي طرف في السودان ..بيمشي عديل للقون.
  • ما برجع للخلف.
  • يا الكاردينال احسم ..ونجض الشغل.
  • مباراة اليوم مباراة جمهور.
  • الاهلي الخرطوم والجمهور.
  • …………
  • السيدة (ل) – المواعيد عارفانا ما عندنا ليها (صبر) – خليها على (الصدف).

  • وقرّط على كدا.

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.