دق الدلجة – محمد عبد الماجد – رئيس بعثة  المريخ لنيالا نجم المباراة الاول 26 سبتمبر 2016

1,822 views مشاهدة
أخر تحديث : الإثنين 26 شتنبر 2016 - 12:16 مساءً
دق الدلجة – محمد عبد الماجد – رئيس بعثة  المريخ لنيالا نجم المباراة الاول  26 سبتمبر 2016

 من رأسي :

في واحد جنو افلام هندية ..دخل السينما يشوف ليه فيلم هندي ..جابوا ليه هدف مهند الطاهر الاول في (بص الوالي).

صاحبنا عاين للهدف كدا – وقال والله الهنود ديل مشوا جنس مشى في السينما دي.

 من كراسي :

(ليس لى مذهب شعرى، فقد حاولت التعبير عن نفسى بصدق، ولم ألتفت إلى مذهب نقدى، ولم أجعل اللغة غاية، وأخشاها، وأشتهى الخروج على قوانينها الصارمة، ولا أعرف تقطيع البيت على التفاعيل، ومازلت أتعجب ممن يطبق هذا التركيب وأشهد له بالبراعة).

محمد المهدي المجذوب

  • لو عاوزين نتعامل بنفس تعامل اعلام المريخ (التخويني) فان ذلك ايسر ما يكون لنا عند الكتابة عنهم.
  • تشويه الصورة امر في غاية البساطة – الموضوع لا محتاج (عبقرية) ولا عاوز ليه بدال عجلة (صينية).
  • انا قلت عجلة صينية؟.
  • ما تشتغلوا بالموضوع – بدال العجلة الصينية البدخلو في الموضوع دا شنو؟.
  • الشطح والنطح بدون عدل – ايسر ما يكون.
  • لا عاوز ليه ذكاء.
  • ولا رخصة قيادة.
  • ولا واسطة.
  • ما عاوز اي شيء.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • نظريا كدا – وعشان الموضوع يقع ليكم الصدق عاوز (حقائق) – عاوز (وقائع) حصلت فعلا.
  • الصدق فيه حركة وفيه جهد.
  • والكذب – ما عاوز شيء اكتر من الخيال.
  • هوا ساكت.
  • يعني اذا وقعت صاقعة في رأس زول – لكي تكون صادق في هذا الامر لا بد من وقوع الصاقعة فعلا في رأس زول ..وهذا امر صعب.
  • تشوفها بي عينك.
  • اما اذا كنت كاذب في ذلك فانك لا تحتاج الى ان تقع صاقعة فعلا في رأس زول حتى تنقل الخبر.
  • الفرق كبير.
  • زي الفرق بينا وبينكم.
  • 9 بقرات.
  • لو عاوزين نجاري اعلام المريخ  في ذلك لنا من (المقومات) و(الدعومات) ما يجعل كتاباتنا اكثر صدقا واكثر تصويرا لواقع معاش.
  • لو اتعاملنا بي طريقتكم دي – تاني الواحد فيكم لو عاوز يضيف ليه ملعقة سكر زيادة في كباية الشاي لو ما اتلفت شمال ويمين ما بكبها في الكباية.
  • يشربو مسيخ.
  • الواحد فيهم – تاني لو عاوز يرد على تلفونه – لو ما نزل في الواطة تحت ما برد.
  • يضاير من عيونو.
  • في حاجة غريبة.
  • ليه الزول وقت تجيه مكالمة – بشيل تلفونو وبمشي بعيد.
  • منطق.
  • او ما منطق.
  • عشان بكرة ما يقوم يطلع لينا واحد يشرع لينا في الحاجات دي.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • اعلام المريخ اي ضربة جزاء تحتسب للهلال ..بطلعوا تاني يوم بتكلموا عن لجنة الحكام.
  • شغل مرصوص ساكت.
  • سيناريو مكشوف.
  • وعبارات مكررة.
  • بقولوا في نفس شيء.
  • عمود دا – من عمود دا ما بتفرقو.
  • رغم ان ضربات الجزاء شوف عيني في مباراة الترجي التونسي حسبوها ليهم من نص الملعب.
  • وفي مباراة الاسماعيلي – الحكم قعد يحسب في ضربات الجزاء وفيصل العجب ينفذ فيهن الى ان انتقل فيصل العجب  الى مريخ الفاشر.
  • لو فيصل ما اعتزل ..كان لغاية وقتنا دا بنفذ في ضربات الجزاء.
  • وكان للهردبيس – الموسم الماضي ..(ما في العصر الحجري).
  • الكلام دا الموسم الماضي.
  • طلّعوا ليهم الشرطة برة الملعب.
  • وحسبوا ليهم ضربة جزاء.
  • وطردوا ليهم لاعب.
  • الكلام دا كلو في مباراة واحدة وطلعوا بعد كدا خسرانين في ملعبهم من مريخ الفاشر.
  • وعادوا ليهم مباراة.
  • واعتبروهم فائزين في مباراة (مكتبيا) كدا.
  • وكان رجعنا لي وراء ..كتلوا ليهم صحفي عديل كدا في مباراة سيمبا التنزاني.
  • الكلام دا ما بعجب مامون ابوشيبة.
  • مامون ابوشيبة عاوز يتكلم عن ضربة جزاء وهمية سنة 1996 لعرقلة اعتقدها ابوشيبة من احمد النور لعبدالمجيد جعفر…ورافض لينا نتكلم عن موت صحفي في مباراة المريخ وسيمبا.
  • عليكم الله ضربة الجزاء وإلّا موت الصحفي؟.
  • تصوروا بعد الموت دا عادوا ليهم المباراة.
  • الكلام الزي دا ما غالب ليه زول.
  • ولا عاوز ليه فلاحة.
  • ولا داير ليه شطارة.
  • ولا حتى درس عصر ساكت.
  • لو عاوزننا نكرره ليكم كل يوم بنكتبو..اصلو ما غالب ليه زول.
  • لو الواحد رجع لتاريخكم ساكت..بيلقى حاجات لا اول لها ولا اخر.
  • بصمة علاءالدين.
  • وواقعة مرتضي حارس شمبات.
  • وبري قيت.
  • وشبيبة القبايل في الجزائر..بي مستنداتها وجرايدها.
  • حاجات كتيرة..لا اول ولا اخر لها.
  • عشان كدا احسن اتلموا.
  • اسكتوا.
  • امشوا ساي.
  • خليكم مع منافسة هلال الابيض والاهلي شندي احسن ليكم.
  • الكبير ما بتقدروا عليه.
  • ما تفتحوا ليكم باب بجيب ليكم الريح.
  • ديل حسبوا ليهم (13) ضربة جزاء في هذا الموسم ..ومعترضين على (4) ضربات جزاء احتسبت لصالح الهلال.
  • لاقتكم فلاحة قدر دي.
  • لاقتكم (فاصوليا) زي دي.
  • ديل من ظلمهم – ضربة جزاء واحدة للهلال ما عاوزين يحسبوها للهلال.
  • وهم بيحسبوا ليهم ضربة الجزاء من نص الملعب.
  • الناس ديل ما فاهمين شيء.
  • الناس ديل ما عارفين حاجة.
  • اي بطولة جابها المريخ ..جابها بي ضربة جزاء.
  • او ضربات ترجيحية.
  • ضربات الجزاء انتوا فايتكم وين؟.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • الهلال قبل فترة سافر الى نيالا ببعثة يقودها رئيس نادي الهلال اشرف الكاردينال.
  • رئيس نادي الهلال قاد بعثة فريقه – دي فيها حاجة.
  • اعلام المريخ اعترض على الموضوع دا.
  • قالوا ليه يكرموا رئيس الهلال في نيالا.
  • وليه رئيس الهلال يتبرع لمدينة نيالا؟.
  • الايام لفت وجات ..وفريق المريخ غادر الى نيالا ببعثة يقودها عضو مجلس المريخ (مدلل) والذي كان رئيس نادي مريخ نيالا.
  • قابلتكم دي.
  • سمعتوا بيها.
  • الناس ديل ..الفهم دا بجيبوه من وين؟.
  • معترضين على رئيس نادي الهلال يقود بعثة الهلال الى نيالا ..في الوقت الذي قاد فيه بعثة المريخ العاصمي الى نيالا رئيس نادي مريخ نيالا السابق.
  • شفتوا الفهم.
  • ومدلل كمان سبق البعثة الى نيالا.
  • شفتوا كيف؟؟؟.
  • تقول بعثة المريخ مسافرة باريس.
  • على كدا – وحسب فهمكم دا ..يبقى (مدلل) هذا هو نجم مباراة المريخ ومريخ نيالا.
  • قولوا واحد.
  • حسب منطقكم.
  • ومدلل هذا – هو صاحب هدف المباراة وليس اكرا.
  • قولوا اتنين.
  • جماعتكم ديل ..بيتكلموا عن مدرب مريخ الفاشر محمد الفاتح حجازي الذي هزم فريقه الهلال.
  • شفتوا ليكم تواطؤ  زي دي.
  • تواطؤ يخسر فيه الهلال الذي يحتاج لنقاط المباراة ويكسب فيه مريخ الفاشر الذي لا يحتاج لنقاط المباراة.
  • انتوا درستوها وين؟.
  • احسن تلعبوا كورتكم ساي.
  • لو عاوزين تمشوا في الدرب دا ..بنوديكم البحر ونرجعكم عطشانين.
  • بيوتكم من قزاز.
  • بص الوالي ذاتو كلو من قزاز.
  • ما تتكلموا ساي.
  • ومحمد الفاتح حجازي هذا هزم الهلال في شندي وهو يقود النيل شندي.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • …………

         و

  • فهم زي دا اصلو ما قابلنا.
  • ولا صادفنا حتى في (قرع).
  • المضروب ماشي على مدني.
  • نشوف ناس الاهلي مدني بتصرفوا كيف؟.
  • شوفوا ليكم رئيس بعثة لمدني كان رئيس لنادي الاهلي مدني.
  • اعملوها.
  • المضروب ولا بخجل.
  • ولا بكضب.
  • …………..
  • السيدة (ل) – الحنين وقت كتر علينا دخل في (دولاب) الهدوم.

  • وقرّط على كدا.

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.