دق الدلجة – محمد عبد الماجد – دفاعكم  قاعد ساي زي (الضباحين) تالت يوم في العيد 16 سبتمبر 2016

0
1

 من رأسي :

الرابط (الهلالي) لا يقل عن رابط (الدم) – لذلك كان الحزن كبيرا على رحيل (معاذ الشبلي) عضو رابطة هلالاب خلف الكيان وعضو الاولتراس (محمد بانقا..ودالبان) اللذان رحلا عن دنيانا في هذه الايام العظيمة ..فبكت عليهم امة الهلال كلها – الذين يعرفونهما والذين لا يعرفونهما ..يشعرون نحوهما بالمودة والالفة والحزن الكبير…

نسأل الله لهما الرحمة والمغفرة.

 من كراسي :

فتاة عمرها 18 سنة من سيدني استطاعت الهرب من الشرطة يوم الجمعة الماضية فقامت الشرطة بنشر صورة لها للمساعدة في القبض عليها ، إلّا ان الصورة لم تعجب الهاربة Sharp، فقامت بالتعليق على منشور الشرطة راجية اياهم استبدال الصورة بصورة افضل واجمل وارسلت لهم الصورة التى تفضلها.

  • في اول يوم في العيد ..لو طلعت على اي شارع في الخرطوم ، عشان تشوف ليك (ضباح) يخلص ليك الحكاية – اي واحد فيهم بعمل ليك فيها (عمر محمود خالد).
  • ما فاضي..
  • وشغال..
  • وبرنامجه مليان وما عندو طريقة.
  • الضباح يبدأ ليك من فوق – كل ما كان الزمن بدري – بيرفع ليك في السعر.
  • بيطمعوا.
  • في واحدين بيبدأوا ليك من (400) الف جنيه – تقول شغالين بي محضري عمليات.
  • او كأنهم بيستعملوا (مخدر) كامل للخروف قبل ضبحه.
  • الله يسألني (الخروف) تقول عاوزين يضبحوه في (الزيتونة).
  • دلع شديد.
  • اي واحد فيهم بيرفع ليك القزاز.
  • الشيء العجيب ..(الضباح) لا بتلقاه لابس (نضارة) ولا عندو (صلعة) مع ذلك رافع ليك السعر.
  • في شنو ما عارف؟.
  • يوم العيد الصباح – قلت اعمل جولة على الضباحين ..اشوف (الدراما) حقتهم كيف؟.
  • في واحد منهم يوم العيد قال لي انا بضبح فقط بـ (200) الف جنيه وبضبح واكسر العضام بـ (300) الف وبضبح وكسر العضام واقطع اللحمة بـ (400) الف جنيه.
  • قلت ليه والله نحن اتمقبلنا ساكت..عملناها كلها جرايد وتنظير ..لو الواحد شال ليه (سكين وساطور) وطلع الشارع – كان عمل ليه حاجة.
  • جرايد شنو؟.
  • عاوز تعمل لي (سلسلة) في ضبيحة الخروف..والله ما فاضل ليك إلّا تعمل لي (رسوم ترحيل).
  • انا يا اخوي (الخروف) دا قلت ليك قبل ما تضبحو علمو لي.
  • قلت ليك دخلو لي مدرسة.
  • في شنو القروش الكتيرة دي؟.
  • عاوزك تطلع ليه (رخصة قيادة).
  • 400 الف جنيه في شنو؟.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • في واحد تاني ..شايل ليك (كيس) بلاستيك كبير فيه عدته كلها ..ساطور وفرار وسكاكين ..قلت ليه انت بتضبح بي كم؟.
  • قال لي بي (350) الف جنيه.
  • قلت ليه : ليه معاك سيستر؟.
  • قال لي  لا ما عشان كدا –  انا شايل عدتي معاي ..سكيني وساطوري وحتى (الخشبة) البتكسر فيها اللحمة ما بطلبها منك.
  • قلت ليه : والله لو شايل (الخروف) معاك – 350 الف جنيه ما بديك ليها.
  • لو بطلع الخروف من كيسك دا – الـ (350) ما بتشمها..
  • صاحبكم قاطعني ..قال لا …لا ..انا اللحمة بقطعها ليك جاهزة ..وبطلع ليك منها (ضلعة).
  • قلت ليه على اليمين لو بتطلع منها (شريط كاسيت) لمحمد الامين ..ما بديك (350) الف جنيه.
  • ضلعة شنو؟.
  • الضلعة عاوز تطلعها لي من (جدادة)…ما بتطلعها من خروف دافع فيه الشيء الفلاني.
  • ما تقعد تصعب لي الحكاية كدا.
  • انت عاوز تطلع لي (ضلعة) من (قبقبة).
  • ح تطلعها يعني من جبل عامر.
  • انا ما عاوز لي (ضلعة) لو بطلعها بـ (350) الف جنيه.
  • بالله تقول عاوز يطلعها مع مرتبة الشرف الاولى.
  • زولكم مُصر ..وشايف السعر معقول في اول يوم في العيد -  وفي الساعات الاولى من صباح العيد – عشان كدا – قال لي بسلمك الخروف جاهز..مقطع قطعة – قطعة…ما عندك معاه اي حاجة – لا بقول ليك جيب موية لا بقول ليك جيب (الصواني).
  • ولا عاوز منك (خشبة).
  • باقى في ضباحين ..بكرهوك بالطلبات …عاوزين موية ..وعاوزين ليهم جردل ..وعاوزين ليهم صواني…وخشبة يكسروا فيها.
  • وفي واحدين بعد الحاجات دي كلها ..بيدوك (الكرشه) تغسلها بي طريقتك.
  • قلت ليه يا اخوى لو بتسلمني (الخروف) محمر ..منجض عديل كدا ..الـ (350) الف جنيه ما بديك ليها.
  • انت أزول ما نصيح؟؟.
  • انت رأسك دا فيه (صامولة) مجلية؟.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • باختصار يوم العيد الصباح ..ما بتلقى ليك ضباح ..غير (السعر) البكلمكم عنو دا.
  • ولو لقيت ليك (ضباح) ..بكلفت ليك الخروف ..عشان يلحق السوق.
  • اللحمة كلها يطلعها ليك في الجلد.
  • تالت يوم في العيد ..نفس الشوارع – نفس (الضباحين) بتلقاهم ..بفتشوا ليك فتيش.
  • بمشوا معاك بي اي سعر.
  • الشوارع تلقاها مليانة بيهم ..اي ضل فيه خمسة قاعدين ..وفارشين عدتهم بتاعة الضبح.
  • حالتهم تحنن.
  • ولو سقت ليك واحد منهم ..ما بخلي ليك (نكتة) ما بحكيها ليك من الظرافة والرشاقة الزايدة.
  • الواحد فيهم بيبقى ليك اظرف من ناس محمد موسى وعبداللطيف الطريفي وود الجاك.
  • ظرافة مبالغ فيها.
  • بعدين الخروف ذاتو يطلع ليك لحمتو مثلثات مثلثات.
  • تقول جبنة لباشكري.
  • ولا بقول ليك امسك لي اللحمة – بيشتغل براهو.
  • هملة مبالغ فيها.
  • الضباحين تالت يوم في العيد ..بيذكروني ليكم بي دفاع المريخ.
  • بتعازموا في الكورة.
  • يشيلوا ابراهومة يجيبوا مازن شمس الفلاح.
  • وصلاح نمر تقول فاتح ليه (مغلق).
  • الزول دا لغاية الآن مُصر يجري غلط.
  • عشان كدا اي لفة عندو بكسر فيها (ركبة).
  • امس هلال كادوقلي غابوا منو (8) اساسين ..مع ذلك دخلوا ليك دفاع المريخ في مدرسة.
  • البعمل فيه مازن شمس الفلاح ..كلتشي في شندي ما قاعد يعمله.
  • هيثم مصطفى ما كان بيصلح (الكورة) بالطريقة دي يا مازن.
  • نصيحة ليكم ..دفاعكم دا ما تسافروا بيه الولايات.
  • ولو سافرتوا بيه الولايات..ما تقابلوا بيه اهلي شندي.
  • اهلي شندي فيه كلتشي وعيد مقدم ووالي الدين وعماري ومحمد كوكو.
  • ولو كمان قابلتو بيه الاهلي شندي ..انصحكم من هسع دي ..ما تقابلوا بيه الهلال.
  • والله ناس سادومبا وشيبولا وكاريكا وبشه ..يلموا في دفاعكم دا ..بي الطريقة دي (خمسة) التبلدي ما تمرقكم مننا.
  • بي صراحة كدا ..وبي امانة زايدة ..دفاعكم قاعد ساي.
  • الزي الضباحين تالت يوم في العيد ..زول بيمشي عليهم ما في.
  • حايمين في شوارع الخرطوم زي (صلاح نمر).
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • لكن ناس عباس عندهم جنس (شربوت).
  • انا قلت شربوت.
  • ما تشتغلوا بالموضوع دا.
  • اصلي مرات قاعد اجيب حاجات برة العمود.
  • طلعوا لي (الشربوت) من العمود دا.
  • ………….

        و

  • بتهمنا مباريات الهلال في الفاشر.
  • المهمة الرسمية.
  • والمباريات التى يمكن ان تتوج الهلال باللقب.
  • عاوزين نتوج من الفاشر.
  • فاشر السلاطين.
  • هلالاب الفاشر ..الهلال جاكم…العيد عيدكم.
  • جميل ان يتوج الهلال من مدينة الفاشر.
  • المريخ لن يفلت من مريخ نيالا واهلي مدني..عشان كدا تتويج الهلال باللقب سوف يكون في الفاشر.
  • التركيز مهم في الفاشر.
  • والانتصار لا بد منه هناك.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • …………
  • السيدة (ل) – بقيت شايفك تلاتة تلاتة ..ما عارف الكلام دا من (الشربوت) وإلّا من خبر خطوبتك.

  • وقرّط على كدا.

NO COMMENTS

LEAVE A REPLY