دق الدلجة – محمد عبد الماجد – كيف يحافظ (الوصيف) على وصافته؟ 2 سبتمبر 2016

0
2858 views

من رأسي :

منذ حادث (ام مغد) ظل فقيري عدلان يدفع في فاتورة عشقه للمريخ من صحته وعافيته دون ان يشكي من شيء.

فقدنا رجل – كان يضع نموذجا عندما تتحدث عن النزاهة والامانة والاخلاص في العمل.

من كراسي :

إن الذين لا تتوقع منهم شيئا، هم الذين يحققون أشياء فوق تصورك.

(من فيلم the imitation game )

  • ليس من الدهشة في شيء.
  • لا من الدهشة ولا من (دجاجي يلقط الحبّ ويجري وهو فرحان).
  • يجري يمشي وين؟.
  • قال ليه الادهشك في فرنسا شنو غير (الشاورما).
  • قال ليه ..ادهشني ان الفرنسيين ديل عندهم (لغة فرنسية) ..ما بتصاقعوا فيها.
  • الشاورما مدهشة؟؟؟.
  • قبل عشر سنوات ..الشاورما كانت بتمثل (دهشة) في البلد دي.
  • قال ليه (التلج) فيه دهشة؟.
  • ردّ عليه ..وقال ليه التلج دهشته مع الليمون.
  • اصبروا انتوا – حكاية (الوصافة) دي انا ماشي ليكم عليها.
  • الوصيف الدائم للدوري الممتاز.
  • السنة دي (الوصافة) ذاتها فيها تلاتة اقوال.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • يوم داك – رأسنا ضرب.
  • قطعنا (فكرة).
  • مشينا لينا لي ناس – ساعة الغداء – الساعة تلاتة ونص (اتنين ونص سابقا).
  • قاعدين كدا – المراوح ما عاوزين يفتحوها لينا.
  • المروحة تعاين لينا وتنكمش.
  • الزول دا دخل جوة – وجانا بعد ساعة ونص شايل لينا بطيخة.
  • قلنا ليه يا زول جايب لينا بطيخة في الوقت دا – الوقت وقت غداء.
  • صاحبنا قال لينا – احسن اني جبت ليكم (بطيخة) – انتوا ما تقولوا الحمدلله ما جبت ليكم (عالم الرياضة).
  • نظرنا ليك للراديو قاعد على الهبشة في الشباك..قلنا ليه ان بقت على (عالم الرياضة) ..جيب البطيخة دي جاي.
  • ونزلنا ليك في البطيخة ..متل الزول المنتظر الفتوح ليه ساعة ونص.
  • البطيخة دي ما تشتغلوا بيها.
  • البطيخة دي برة العمود.
  • ما عندها اي علاقة بالوصافة.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • المريخاب قالوا المريخ يفقد (18) لاعبا امام فريق النيل شندي الذي سوف يواجهه غدا في منافسات كاس السودان.
  • كشف المريخ تبقى منه (7) لاعبين فقط.
  • فريقكم بقى فريق خماسيات.
  • النيل شندي دا بكرة لو لعبتو معاه إلّا تلاقوه بي (عريضة).
  • او شوفوا ليكم حكم كارب.
  • المريخ الذي يديره مجلس يتكون من (28) عضو ، سوف يواجه النيل شندي في كاس السودان بكشف فيه (7) لاعبين.
  • ذكرتوني بي الزول البيكون عندو شعر دقن كثيف ..ورأسو ما فيه ولا شعرة.
  • متل ملاح القرع بدون لحمة.
  • ملاح القرع دا ما تشتغلوا بيه.
  • القرع دا برة العمود.
  • عمودك دا شيء بطيخ ..وشيء قرع ..تقول ماشي ليه (مستشفى).
  • نخش على بند الوصافة.
  • (6) نقاط فقط هي التى تفصل بين المريخ وهلال الابيض – القادم من بعيد ، يمكنها ان تتقلص الى (3) نقاط ان نجح هلال الابيض في الفوز على المريخ يوم الاربعاء القادم.
  • و(6) نقاط فقط ايضا تفصل بين المريخ واهلي شندي ان نجح فريق (النمور) في تحقيق الانتصارات في مباراته المؤجلة.
  • انتصار هلال الابيض على المريخ يعني ان الفارق بينه وبين الوصيف (الرسمي) سوف يصبح ثلاث نقاط.
  • وللمريخ مباريات صعبة في نيالا وفي مدني وله مباراة يمكن ان تقفز باهلي شندي للوصافة ان انتصر على المريخ.
  • وتأتي بعد ذلك مباراة القمة.
  • ذلك يعني ان هزائم المريخ واردة بصورة كبيرة في المباريات القادمة ، مما يجعل الوصيف يفقد مركزه المحبب الموسوم بالوصافة.
  • السنة دي (الوصافة) ذاتها في خطر.
  • شكلكم كدا ..ح تلعبوا في الكونفدرالية.
  • تخيلوا مجلس فيه (28) عضو ..مهدد بفقدان (الوصافة).
  • المريخ لم يتعرض لهذا الموقف في تاريخه في الدوري الممتاز ، وتعرض المريخ الآن لهذا الموقف يكشف الحالة والوضع الذي يعيش فيه المريخ.
  • تلك المرحلة او الوضع الذي هو فيه المريخ الآن وضع خطير وان تجاوزه المريخ وحافظ على (وصافته) المهددة بالفقدان.
  • بنحسب الحكاية دي على مجلس المريخ.
  • بص الوالي.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • المريخ لكي يحافظ على وصافته ، لأبد من ايقاف الدوري.
  • المريخ محتاج يسافر يوغندا او كينيا او تنزانيا ويشارك في بطولة سيكافا ويرجع تاني.
  • اصلو ناس محسن سيد وبرهان ما بيستعدلوا إلّا بي (سيكافا).
  • شوفوا ليهم سيكافا.
  • لو فشلتوا في الموضوع دا – اعملوا ليكم (نفرة) تانية.
  • نفرة رئاسية.
  • نحن ذاتو بندعمكم …الموضوع كلام ساكت.
  • ما في زول بدفع شيء.
  • لو عارفين النفرة كدا – في النفرة الماضية ما كان قصرنا معاكم.
  • النفرة التى يحتاجها المريخ هذا الموسم ..نفرة (نقاط).
  • عاوزين دعم في النقاط ..زي ما حصل الموسم الماضي.
  • يعتبروهم منتصرين.
  • او يعيدوا ليهم المباراة.
  • اصلو يا جماعة ..ناس المريخ ديل بقوا ما بنتصروا ، إلّا وقت يلقوا الفريق التاني منسحب.
  • إلّا يلعبوا براهم.
  • غير كدا ما عندكم طريقة للانتصار.
  • يا ناس المريخ ..بالجد كدا (وصافتكم) مهددة.
  • امشوا القاهرة شوفوا ليكم طريقة لرفع الايقاف من امير كمال وعلي جعفر وعلاءالدين يوسف.
  • ناس صلاح نمر ديل ما بنستروا.
  • حلوا مشكلة تراوري ..واقعدوا مع سالمون.
  • الوصافة في خطر.
  • بكري المدينة ..ما تتكلموا معاهو.
  • ما تقولوا ليه شيء.
  • انتوا موقفكم صعب.
  • ما بيستحمل.
  • رجعوا غارزيتو.
  • وادخلوا في معسكر مقفول.
  • زيدوا الحوافز.
  • لو ما عملتوا كدا ..بتفقدوا (الوصافة).
  • البطولة طبعا ما عندكم فيها (امل).
  • احسن تركزوا في الحفاظ على مركزكم المفضل.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • المشكلة مع الجهجهة الحاصلة في الممتاز يطيروا من كاس السودان.
  • يبقى لا وصافة لا كاس.
  • والله لو مريخ كوستي ونيل شندي موقفهم ما كعب شديد ..كنا قلنا ليكم اعملوا حسابكم من الهبوط.
  • الدوري لسه.
  • وفي مباريات صعبة راجياكم.
  • يكفي ان مباراة القمة في استاد المريخ.
  • انتوا عارفين مباراة القمة باقى ليها كم يوم؟.
  • مباراة القمة باقى ليها (40) يوم.
  • ألحقوا رجعوا امير كمال.
  • وعلي جعفر..
  • وعلاءالدين يوسف.
  • أهلوا بكري المدينة سريع.
  • القمة جاتكم.
  • بي حالتكم دي لا بتنستروا ولا حاجة.
  • انتوا يا ناس المريخ ..عاوز اسألكم سؤال.
  • وين المول التجاري؟.
  • وين النادي الاسري؟.
  • وين الفندق 5 نجوم؟.
  • وين شيبوب؟.
  • …………….

      و

  • سفر كاريكا في هذا التوقيت ..مرفوض ..مرفوض ..مرفوض.
  • الموسم كله تبقى ليه 50 يوم.
  • مباراة القمة في الممتاز تبقى لها 40 يوم.
  • وهناك مباريات مهمة للهلال في الفاشر وامام الخرطوم الوطني.
  • لا بد من الجدية والتركيز.
  • التأهيلي هذا الموسم سوف يكون اكثر سخونة من الممتاز.
  • يا ريت مباريات التأهيلي تنقل في احدى الفضائيات.
  • قناة الملاعب الرياضية ..لو نقلت هذه المباريات سوف تقدم عبرها خدمة كبيرة للمشاهدين.
  • خاصة وان القناة تنقل مباريات الدرجة الاولى في الخرطوم.
  • ………….
  • السيدة (ل) – قدم السبت ..تلقى ناس المرور قدامك.

  • وقرّط على كدا.

NO COMMENTS

LEAVE A REPLY