لقاء كل يوم – رمضان احمد السيد – الهلال ينجو من كمين ود هاشم  بالترجيحية  10 سبتمبر 2016

0
4315 views

# الهلال ينجو من كمين ود هاشم  بالترجيحية 

# لاعبو الهلال يتحملون الأداء السيء والاعذار مرفوضة  

# خماسية التبلدي في المريخ هل ألهت الجميع عن هذه المباراة

# الهلال سيظل مستهدف في كاس السودان من اجل الموازنات

# تجربة ودهاشم تصحي الهلال قبل المواجهات في الممتاز

# غياب الرباعي وبلاتشي هل اثر على اداء الهلال …!!؟ 

# الثلاثي الخرطوم والارسنال وهلال التبلدي يحاصرون الهلال و المريخ من جديد في كاس السودان …

# سيحة يؤكد المعز يستحق الطرد وشانتير جامله بالأصفر وخماسية التبلدي صحيحة  

# موازنات سيحة تعود ويقول الحكم لم يحتسب ركلة جزاء وهدف للمريخ… 

# المريخ يعود للمدرب الألماني الذي رفضه من سنوات ..!!؟

# مباريات ملتهبة في الممتاز الانجليزي وقمة مانشيستر تفرض نفسها…

# مواجهات مثيرة في ابطال اوروبا بالثلاثاء والاربعاء بمشاركة الكبار 

# فاجأ الهلال قاعدته الجماهيرية العريضة وهو يحقق فوزا صعبا على ود هاشم سنار في كاس السودان في ربع النهائي ، وكان يمكن ان يودع الهلال من هذا الدور المبكر قياسا حتى على خصمه ناهيك من ربع النهائي بعد ان انتهت المباراة بالتعادل ، ووصلت لركلات الحظ وكان الهلال بالفعل محظوظا وود هاشم يهدر ركلة ويصد ماكسيم ركلة ، برغم ان نجم الهلال ولاء الدين عاد مجددا واهدر ركلته…

_ ولكن لماذا هذا المستوى الذي ظهر به الهلال ؟

هل استهان بخصمه ، وهل خاض لاعبوه وانشغلوا بخسارة المريخ بخماسية من هلال الابيض ام ماذا !؟

هل لتخلف المدرب تاثيره ، ؟ ومهما يكن الم يلعب مبارك سليمان بنفس التوليفة مع بعض الغيابات الطفيفة مثل عمار الدمازين ، الشغيل وكاريكا وبويا المصاب…

لعب الهلال بتشكيلة شبه معتادة ماكسيم والطاهر الحاج واطهر الطاهر حسين ومساوى…

هل دخول مساوي بعد طول غياب له تاثيره على خط الدفاع…

في الوسط بدأ هذه المرة ابوعاقلة مع نزار وبشة وشابولا في الوسط والثعلب وسادومبا في الهجوم…

_ وحتى التبديلات قد يكون الجديد فيها محمود ام بدة الذي لعب بديلا للطاهر الحاج المنهك ، وولاء الدين بديلا للثعلب…

# تقدم ود هاشم مبكرا بهدف المحترف النيجيري اسحق ، وعادل للهلال سادومبا ، والذي سجل ايضا من نقطة الجزاء مع محمود امبدة ونزار واطهر الطاهر…

# صحيح ان ارضية الملعب سيئة وكذلك التحكيم الذي يقول عنه مبارك سليمان بانه صرف هدفا صحيحا للهلال ، ولكن الهلال من المفترض ان يتعود على هذه الأجواء وان يكون جاهزا لكل الظلم والاحتمالات والاستهداف والذي لن يتوقف ، خاصة في هذه المنافسة التى يعتبرها اتحاد الكرة بطولة موازنات وترضيات ، اذا حسم الهلال الممتاز يجب ان يذهب الكاس للمريخ وهكذا وهذا واحد من أسباب انفراد المريخ بكأس السودان بعد ان يكون الهلال قد استحوذ على الممتاز ، وما يعضد هذا الحديث ان بطولات كاس السودان كانت تختتم بعد بطولة الممتاز ، وبعد العديد من الاحتجاجات والملاحظات من المفترض ان يغير الاتحاد هذه الطريقة وهذا النظام…

# نعم تأهل الهلال وكان يمكن ان يودع وهنا يجب ان يقع اللوم على اللاعبين وعلى هذا الأداء الذي قاد الي ما قاد اليه مقارنة مع ود هاشم البعيد عن المنافسات الكبيرة وامكانيات وتدريب الهلال وجماهيره وغيره…

# حسنا والتجربة جاءت قبل المباريات الحاسمة للممتاز ، وصحيح ان الهلال حسم الممتاز حتى ولو خسر بعض النقاط ولكن هل كل ذلك دافع ومطلوب الهلال 

الجماهير تريدها انتصارات متوالية وشباك نظيفة وتتويج بشرف ، حتى ختام الممتاز ما لم يحسمه الهلال باكتساح المريخ فإننا لا نعتبره افضل تتويج…

بل الشعار المرفوع الجمع بين البطولتين…

نتمنى ان يتدارك الجميع الموقف ، فمنافسات ومباريات الممتاز غير…

تواصل 

- بعد إقالة محسن سيد وبرهان تيه من الجهاز الفني للمريخ دار بينهما هذا الحوار  في شكل مجادعة بين احمد بشرى في دور (برهان ) ،، وعمر بشير ( محسن سيد)

أحمد بشرى ( برهان ):

يا محسن اخوي الناس دي ،،،، عااااصرة علينا

زعلانين شديييد ،،،  يا صحبي شن سوينا ؟؟؟؟

ما قصرنا ،،،،،    لي كل الصعاب ،،،، عدينا

الا فريقنا  يااا حبوب ،،،،  بشوفو ( جنييينة )

***

عمر بشير ( محسن):

يابرهان تعال  ،،،،،  إيه الحصل ورينا ؟؟؟؟

التيم في النهايه ،،،،  بشوفو راقد  ،،طينه

لي قدام كمان ،،،، أظنو ،،، ح يودينا

إتخووذقنا جد ،،،   بقت النهايه حزيييينه

***

احمد بشرى ( برهان ):

نسمع في الجرايد ،،، ، عن فريق ،،، الواااالي

مليان بي الشباب ،،،، إسكورو  دااايما عالي

مريخ الجرايد ، ،،،،، بخلللعك  ،،، طواااالي

تحلف بس تقول ،، ،،، في الكالشيوو  الإيطالي

***

عمر بشير( محسن ):

تيم النجمه يا برهان ،،،،  مبشتن،،،، وخالي

ولة الكوره ،،،،  ما بتدي الحريف ياغالي؟؟؟

شايف في الجرايد ،،،،  قالو تيمنا مثالي !!

الا  امورهم الكتبوها ،،،، ماااا واقعااالي

**

أحمد بشرى ( برهان ):

يوم ما شافو شكل المستوى ،، ،،،،، المتدني

قالوا كلام كتييير ،،، يا صحبي عنك ، وعني

اعلام الضلال يا كوتش ، ،،،، خيييب ظني

قال   العلة  اصلا ،،،،،،، في الجهاز ، الفني

***

عمر بشير ( محسن ):

إعلامهم  على  التدريب ،،، دواام ،،، متجني

ح يزيدو الكلام ،،،  يا صحبي ،، عنك وعني

ح يفوت الرئيس ،،،، كان لي الفريق  متبني

بكرة تشوفنا قاعدين ،،،، في الصقيعة نغني

**

أحمد بشرى ( برهان ):

يا محسسن ،،، دحين قول ليا شن وداااك ؟؟؟

جينا برااانا ،،، شان بس ،،،، نسمع  الكورااااك

ديل ما بعرفو حارس مرمى ،، ،، لا سيرباااك

وديل يا صحبي محتاجين عديل   ،،،،سباااك

***

عمر بشير ( محسن):

بتحب المصايب ،،،،،،  وتمشي ليها ،،، براك

ولسه الحفره ،،، ياصاحبي العزيز ،، جاياك

يوم كورة التبلدي ،،، بنسمع ،، العااك عاااك

فوت لي  الوالي  ،،،،،، يمكن يقتنع ،،،،يعفاك

****

أحمد بشرى ( برهان ):

يا محسنكو   مااا خشينا ،،، ،بي  الواسطااااات

براهم جووونا ،،، قالوا بنرفع  ،،،  الواقعااات

دا الخواجة جاااط التيم ،،،،،،    وشتت فاااات

ونحن تعبنا ،،، سوينا الفسيخ ،،،،،،، شرباااات

**

عمر بشير ( محسن):

جايين لي الزعيم ،،،،  راكزين  وناس حوبات

وهمنا كلللو  ،،،،  كيف تتصلح ،، العوجات؟

البكا  والنويح ،،،،،   ياخ زمنو عدى ، وفات

كيفن نبكي والتيم ،،،،،، ، بدري ودع ،، ومات                        

- سوهندا عبدالوهاب

موكورو العجيب الكورتو فن وقيافه

والهاتريك جميل الحير الوصافه

النجمه إنتهت جمهورا سابا وعافا

واليوم كان عجيييب برعاية الكردافه

**

في تيم الغزال كل الدرر محصوره

شوف عيني  النجوم بكوها في المقصوره

ارجع لي اقيف من تاني عيد الصوره

عيني مابتشوف نظارتي كان مكسوره

****

اب نجمه إنضرب والعيد ثبت باكريه

والمدفع ضرب والعرضه كات صقريه

موكورو العجيب الكورتو ميه الميه

سلاخ النجوم خلاها ليه ضحيه

***

إتنين يلا احسب زيد عليها تلاته

نتغزل سوا وعاجبانا نحن حلااااااااااته

مابننسى الحصل حافظنو جوه الداتا

شكرآ يارجال ابدعتو ياشفاااااااااااااته

لحن الختام

# علينا ايضا الا نسلب فريق ود هاشم حقه ويكفي انه وصل لهذه المرحلة ربع النهائي في وقت تساقطت فيه فرق عديدة من الممتاز وغيره من فرق ،

وما يؤكد اهتمام إدارة الفريق انها تعاقدت مع مدرب الهلال السابق عاكف عطا ، كما تعاقدت مع محترفين 

ودائما في مواجهة مثل هذه الفرق مع القمة ان تلعب بروح الندية والإثارة واثبات الذات 

_ اكثر ما يعجب في مشاركات الهلال في الولايات هذه الاحتفائيات والتكريمات 

والحق يقال اننا سعدنا تماماً بتكريم ابن الهلال ومنطقة سنار واتحاد الكرة وسيكافا السيد احمد الحاج المعزل  ، ونتمنى من الهلال ان يكرم شقيقه السيد ادريس الحاج المعزل بإستاد الهلال فهو واحد من افضل من شغل منصب السكرتير وكان من الإداريين المميزين وقاد العديد من التنظيمات 

نفخر بعائلة المعزل في كل مكان 

_ على المريخاب الا يفرحوا كثيراً بتأهل الهلال الصعب امام ودهاشم ، هذا لو الفريق لو كان واجه المريخ الذي شاهدناه امام هلال التبلدي لتأهل بنفس النتيجة…

بالمناسبة الثلاثي اهلي شندي والخرطوم الوطني وهلال الابيض ايضا متواجدون في كاس السودان ومن المنتظر ان يتأهل هلال الابيض على حساب النسور ، وواحد من اهلي شندي والخرطوم لنصف النهائي او المربع الذهبي مع الهلال والمريخ…

طموح الثلاثي يتمدد حتى مع بطولة كاس السودان 

توقعوا المزيد من الإثارة والقوة 

# نذكر بقمة مانشيستر يونايتد ومانشيستر سيتي او جوارديولا ومورينيو في الدوري الانجليزي لفك ارتباط الصدارة المشتركة…

من ثلاثة مباريات لم يخسر اي فريق منهما…

وهناك لقاء ليفربول وليستر سيتي والذي ربما يشهد اول ظهور للجزائري اسلام سليماني مع مواطنه محرز والنيجيري احمد موسى…

# في اسبانيا ظهور الريال وبرشلونة في بروفة قبل جولات الثلاثاء والاربعاء في ابطال اوربا 

ونذكر بابرز مبارياتها

باريس سان جيرمان مع الارسنال ، ومانشيستر سيتي مع بوروسيامونشنغلادباخ ، ويلعب برشلونة مع سيلتيك… 

ويلعب يوفنتوس مع إشبيلية ، وتوتنهام مع موناكو ، وبايرن ميونخ مع روستوف ، ايندهوفن مع اتلتيكو ، والريال مع لشبونة البرتغالي 

الحالة

ردود أفعال خسارة المريخ المدوية تتواصل ، غضب على عدد من اللاعبين 

التعاقد مع مدرب اجنبي جديد ، وهذه المرة يرجع المريخ لمدرب ألماني سبق وان عرضت سيرته من سنوات ورفضت ، اسمه هاي ، لم يحقق اي إنجازات او نجاحات مع الفرق والمنتخبات التى دربها في افريقيا…

وضع المريخ الحالي يجعله يتعاقد مع اي مدرب 

ان الأوان ان يجربوا هاي لأي هذا…
# أنصف سيحة هلال الابيض وقال ان أهدافه صحيحة ، وقال ان حالة المعز والمخالفة خارج الصندوق كانت تستحق الطرد ، لكنه عاد للموازنات وقال بان المريخ كان يستحق ركلة جزاء من مكاتفة عادية السماني  حول فيها الكرة للكورنر ، وقال بان حالة تسلل خطا حرمت المريخ من هدف العجب…

NO COMMENTS

LEAVE A REPLY