الي ان نلتقي – قسم خالد – (احتمالات) مامون وتتوييج الهلال ! 16 اكتوبر 2016

0
1

* تردد إن لجنة الاستئنافات لن تقرر في طلب فحص المريخ بالقبول أو الرفض إلا بعد لقاء القمة وانتهاء منافسة الدوري..

* هل تريد اللجنة أن تبني قرارها حسب ما تسفر عنه نتيجة لقاء القمة؟

* بمعنى إذا فاز المدعوم فلن يكون هناك تأثير لشكوى المريخ على مسار البطولة.. وفي هذه الحالة يمكن أن تقبل اللجنة طلب الفحص والذي لن يفيد المريخ لأن فارق النقاط سيكون قد اتسع لعشر نقاط.. فإذا تم خصم 3 نقاط من المدعوم ومنح المريخ 3 نقاط سيصبح الفارق 4 نقاط لصالح المدعوم ولن يؤثر ذلك على فوزه بالبطولة..

* وأيضاً في حالة التعادل في القمة سيبقى فارق النقاط عند 7 نقاط.. وفي حال كسب المريخ للاستئناف ومنحه 3 نقاط وخصم 3 نقاط من المدعوم سيكون الفارق نقطة واحدة لصالح المدعوم وبالتالي فكسب المريخ للاستئناف لن يمنحه البطولة.

* في حال فوز المريخ في القمة سيتقلص فارق النقاط إلى 4 نقاط وفي حال كسب المريخ للاستئناف ومنحه 3 نقاط مع خصم 3 نقاط من المدعوم سيتقدم المريخ بنقطتين وبالتالي يتوج بطلا !

انتهي حديث الاخ مامون (ابومسطرة ) وبالطبع لن يهدأ لمامون بال ولن يهدأ بال لكل كتاب الكوبي بست الا بتتويج المريخ بطلا للممتاز .. الجماعة لقو الموضوع حلو السنة الفاتت شالو الكاس اوانطة السنة دي برضو دايرين يشيليهو اوانطة !

مامون وبعد ان فرغ من محاولة تضليل جماهير المريخ بحكاية (المسطرة) وصحة هدف اكرا في شباك مريخ نيالا تحول لاستاذ رياضيات تخصص (تفاضل وتكامل ) وهو يتحدث عن (الاحتمالات) وعن امكانية فوز المريخ بالبطولة حال فوز المريخ علي الهلال ثم خصم نقاط شكوى شيبوب من الهلال واضافة النقاط للمريخ وطفق يهدد في لجنة الاستئنافات وقال مامون في عموده بالامس (في حال فوز المريخ في القمة سيتقلص فارق النقاط إلى 4 نقاط وفي حال كسب المريخ للاستئناف ومنحه 3 نقاط مع خصم 3 نقاط من المدعوم سيتقدم المريخ بنقطتين وبالتالي يتوج بطلا !)

بالله عليكم زي دا يقولو عليهو شنو هسي !

خلاص يا مامون انتو ح تفوزو في لقاء القمة .. ولجنة الاستئنافات ح تعتبر اشراك شيبوب خاطئ .. وتشيل النقاط تديكم ليها وتخصم النقاط من الهلال وبالتالي المريخ سيتوج بالبطولة عشان ترتاح وتريحنا معاك !

في كل يوم ازداد قناعة ان الاعلام الاحمر هو سبب كل البلاوي التي يمر بها المريخ الان وحتي عندما كان يسمى فكتوريا ثم الاهلي الي ان صار المريخ !

وعشان يواصل الاخ مامون في تخدير الجماهير لمرحلة مقبلة طالب بعدم تتويج الهلال بالبطولة في لقاء القمة .. يا عزيزي اهل الهلال توجوا انفسهم براااهم عشية لقاء الامل بعد ان تم حسم الدوري في الملعب … اكرر في الملعب مافي (مكاتب الاتحاد ) اصلا انتو متعودين دائما علي التتوييج في المكاتب .. تتويج الملاعب دا حقنا برانا …وانتو عارفين كدا عشان دا كلو احتفلنا مع جماهيرنا بالتتويج .. يعني الشركة الراعية لو عايزا تتوج السيد الهلال في لقاء القمة ما عندنا مانع ولو استجاب الاتحاد لتهديداتكم برضو ما عندنا ما نع المهم في الامر نحن الابطال توجنا انفسنا برااانا واحتفلنا مع جماهيرنا  وانتو لسا واصلو في تضليل جماهيركم وادوهم احساس انو في احتمال لتتويجكم بالدوري الممتاز هذا الموسم .. هو الكلام بي قروش  !

اخيرا اخيرا ..!

عقب كل انتكاسة حمراء يسارع مجلس المريخ في امتصاص غضب جماهيره باي طريقة مما كانت خيالية .. ويخرج علينا الاخ جمال الوالي اما باستقالة .. واما بدعوة فريق اوربي .. او المشاركة في سيكافا .. او تسجيل لاعب بمبلغ خرافي لصرف الانظار .. بالامس تحدثت الصحافة الحمراء عن معسكر احمر باوربا وتحديدا (هولندا) استعدادا للموسم الجديد ودوري الابطال .. هسي عليكم الله فريقكم دا كان بفتش عشان يكون (وصيف ) لقاها بعد تعب شديد شي تهديد بعدم اللعب .. وشي تهديد بالانسحاب … حتي تم تاجيل مباراة معلنة له اكثر من 4 مرات علي التوالي في اقل من 48 ساعة ولسا بتتكلموا عن بطولة تم حسمها ليها 20 يوم !

تلك هي صفات اهل المريخ مزيدا من التضليل بقاء  في المناصب لاكبر فترة ممكنة … واعلام يكتب بغرابة عن امكانية فوز فريقه بالبطولة وهو   يتخلف عن البطل حتي الان بسبع نقاط كاملة قابلة لتصل لعشر نقاط وجماهير مسكينة تصدق ما يكتبه اعلام الكوبي بست !

اخيرا جدا ..!

ننتظر انتهاء الموسم الرياضي فالهلال ولله الحمد فاز ببطولة الدوري الممتاز بجدارة واستحقاق .. وامامه كاس السودان لننتهي من اسطوانة ان المريخ هو البطل الدائم لهذه المسابقة .. وبعدها سنفتح العديد من الملفات الهلالية التي رأينا ان الحديث عنها والفريق يخوض غمار البطولتين غير مجد لكن بانتهاء البطولتين والموسم سيكون الحديث عن تلك الملفات (المسكوت عنها ) فقط انتظرونا لان حديثنا يومها سيكون بالمستندات !

اذهبوا فانتم الطلقاء

NO COMMENTS

LEAVE A REPLY