الي ان نلتقي – قسم خالد – ورونا من هسي منسحبين ولا لا …؟ 7 اكتوبر 2016

349 views مشاهدة
أخر تحديث : السبت 8 أكتوبر 2016 - 1:09 مساءً
الي ان نلتقي – قسم خالد – ورونا من هسي منسحبين ولا لا …؟  7 اكتوبر 2016

مجلس المريخ يصدر بيانا وبؤكد فيه ان فريق كرة القدم بالنادي لن يؤدي مباراة له في مسابقة دوري سوداني الممتاز (يعني انسحاب راسو عدييل) ثم يخرج علينا الاستاذ عبدالصمد محمد عثمان مؤكدا انه هو المسئول الاول والاخير عن فريق كرة القدم بالنادي لذا طلب من الجهاز الفني للفريق رفع نسق الاعداد بل ووجه بانتظام اللاعبين في معسكر مقفول .. والاعلام الاحمر يؤكد ما اكده بيان المريخ .. وحتي الان لا احد يعرف هل المريخ منسحب ولا ما منسحب ..!

كدى يا جماعه ورونا انتو منسحبين ولا ما منسحبين .. ورونا الحاصل عندنا معاكم مباراة يوم 14 اكتوبر الجاري حددو لينا جايين ولا يفتح الله .. وقبلها عندكم مباراة امام نمور شندي وتحديد الاحد المقبل برضو ما عارفين جايين ولا منسحبين … لو منسحبين ورونا عديل مافي داعى لمسك العصاية من النص ناس منكم يقولو ما منسحبين … وناس تانين برضو منكم بقولو ما منسحبين .. واعلامكم المضلل شغال تضليل .. الغريبة في جماعة من اعلام الفتو كوبي قالو انهم ضد الانسحاب لكن شايفهم من امس غيرو خطابهم الاعلامي وطالبو بالانسحاب وحتي الان المجلس عامل ميت ما عارف يعمل شنو .. يعني لحدي هسي (بص الوالي) دا كلو مافيهو زول قال منسحب .. كل الكلام القاعدين يقولوهو انهم حماة قانون ولازم يعرفو مصير استئناف شيبوب الحاصل فيهو شنو .. وربطو مشاركتهم في متبقي المباريات برد لجنة الاستئنافات يعني لو ما لجنة الاستئنافات ردت عليهم ما بلعبو … هسي عليكم الله دا كلام دا .. خليكم واضحين لو منسحبين طلعو بيان وقولو منسحبين يعني مافي داعي لي (لو) دي منسحبين يعني منسحبين مسك العصاية من النص في حاجات زي دي ما بنفع !

هسي عليكم الله شفتو السيد الهلال ومجلسه لما انسحبو الموسم الماضي من الدوري .. قالو في بيان منسحبين وما ح نلعب .. وفعلا مالعبو وانسحبو يعني اتبعوا البيان بالعمل مش زييكم لحدي هسي ما عارفين انتو عايزين شنو !

اكرر ورونا بالضبط منسحبين عايزين بيان وااااضح منكم مافيهو اي شروط وبعدين ما تختو لينا موضوع شيبوب دا الانسحاب يعني ما تبررو .. قولو عديل منسحبين حتي لو ادونا نقاط المباراة وقامت لجنة الاستئنافات شطبت شيبوب زاتو خليكم واضحين امور اللف والدوران دي ما حلوه وانتو بتقولو انكم نادي كبير .. لو فعلا نادي كبير بطلوا الجرسة بتاعتكم دي وتجو تلعبو كورتكم وانتظروا المركز الثالث عارفين ليه لانو (النمور) حالفين يمين يدحرجو (المدعوم) الاصلي للمركز الرابع ما المركز الثالث لان المركز الثالث سيذهب للخرطوم ..!

اخيرا اخيرا ..!

لما نقول ليكم السيد الهلال ما تزعلو .. ولما نقول ليكم انو الهلال سيد البلد حقو تفرحو .. ولما نصف الهلال بزعيم الكرة السودانية واكثر الاندية تتويجا بالبطولات فتلك حقائق …الهلال سيد بلد لانو قاعد الايام دي خالف رجل علي رجل ومستمتع شديد جدا بما يدور في الساحة الرياضية .. كيف ما نقول ليهو السيد الهلال وقد حسم الامر من زماااان وشال الكاس واحتفل بيهو كمان يعني لو عايزين ننسحب الليلة ح ننسحب وبرضو فوق عدلينا .. افضل فريق … اكثر نقاط … اكثر اهداف … افضل دفاع … افضل حارس مرمي اها دي قولو ما صاح او قولو برضو الافضلية دي جات عن طريق (الدعم) !

مشكلة المريخ الكبيرة الما قادر يحلها في انه فريق تابع للحكومة يعني موضوع انسحاب دا (شعر ما عندهم  ليهو رقبة ) حدودكم لحدي تهديد ووعيد  لكن فعل صعب عليكم شديد وما بتقدور عليهو !

وحتي لما نصف السيد الهلال (بزعيم الكرة السودانية ) فتلك حقيقة تؤكدها البطولات (13 بطولة) من 20 بطولة وفي واحده اداكم ليها الاتحاد مناصفة مع لجنة سمير وبرضو الهلال (مدعوم) !

عشان كدا وعشان غير كدا الهلال هو (السيد) وسيد البلد ( والزعيم) وهلال الملايين واي حاجة حلوة في السودان .. هو السودان ذاتو لو مافيهو الهلال والله ما ليهو اي طعم .. كدى اتخيلو سودان بلا هلال اتخيلو بس مش ح تلقو البلد ظلام دامس ومافيها فرحة واضربات دكاتره … هسي الدكاتره ديل لو الهلال غلبكم يوم 14 والله النقابة حقتهم طواااالي ترفع الاضراب … اضراب لي شنو تاني الامراض ذاتا ح تكون مافي وح يكون في سلااام تام !

اخيرا جدا ..!

طيب امس اخونا مامون ابوشيبه (بتاع المسطرة) عارفين المسطرة … المسطرة بتاعت قون اكرا في مريخ الفاشر عارفنها طبعا .. امس عمل ليهو حسابات كدا جاب فيها المريخ متصدر للدوري وشايل البطولة كمان عليكم الله زي ديل يقولو عليهم شنو ..لحدي هسي قاعدين يضللو في جماهيرهم مرة بي انو المريخ (مظلوم) والسيد الهلال (مدعوم) … ومرة بانو المريخ عندو قضية عادلة (شيبوب) ومرة انو تسجيل الوك صحيح هسي عليكم الله البخلي تسجيل كواي القلوب … اقصد شيبوب ما صحيح وتسجيل (الوك) صحيح شنو ؟؟؟

اقول ليكم حاجة يا مامون نحن موافقين انو لجنة الاستئنافات تديكم نقاط الهلال في (شيبوب)  وتشيل منكم نقاط مباراة الاهلي شندي في (الوك) مش برضو ناس اهلي شندي استانفو في موضوع الوك ؟؟؟

اذهبوا فانتم الطلقاء

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.