دق الدلجة – محمد عبد الماجد – (الريدة) ما بالغصب !! 5 اكتوبر 2016

3,529 views مشاهدة
أخر تحديث : الأربعاء 5 أكتوبر 2016 - 4:19 مساءً
دق الدلجة – محمد عبد الماجد – (الريدة) ما بالغصب !!   5 اكتوبر 2016

 من رأسي :

ناس المريخ عشان كورتهم بقت (مكتبية) جدا …اتخيلتهم يقولوا لي عندهم (تمرين) – قالوا لي عندهم (بيان).

حليل كورة (الملاعب) – هسع المريخ كورتو بقى يلعبها ليهم مزمل ابوالقاسم…حليل ناس قلق والعجب و(بلة جابر) ذاتو.

 من كراسي :

قال احد زعماء الهنود الحمر الكهول ينصح زوجين حديثي الزواج كانا في شجار دائم :

(لا يتحدث احدكما الى الاخر بصوت عال إلا اذا كان الشاي على النار!).

  • (الريدة) في الدنيا كلها ما بالغصب – من زمن كنا بنكتب اول حرف من اسم الحبيب في كراسة (الجغرافيا).
  • تقعد تدسدس في (الريدة) زي الحاجة الغلط.
  • تنكرها.
  • وتعمل فيها رايح.
  • وما تجيب سيرة لي اي زول.
  • زمن روايات عبير وزهور.
  • ووقت تتعصر شديد تتمها بـ (تختخ) والشياطين الـ (13).
  • من الوقت داك (الريدة) ما بالغصب.
  • في واحد قال انت تعال هنا ناس الهلال ديل (الريدة) دي كانوا داسنها وين؟.
  • قلت ليه داسنها في (الرديف).
  • مالك انت؟.
  • عامل كدا زي القلم القاطع.
  • الريدة دي حاجة عفوية – والحب ذاتو بتشعر بيه من غير ما تشعر.
  • بتوغلك..
  • ويتسللك…
  • تجيب ليك قميص جديد من غير مناسبة..
  • واليوم كلو تورنش في (الحذاء).
  • تشتري ليك (منديل).
  • وساعة مخصوصة..
  • وتتعلم ليك (4) كلمات انجليزية..ولو اتخللت الكلامات دي كلمة (فرنسية) واحدة ما بتسأل في (كيفانش تاتليتوغ).
  • الحب ما فيه حجز.
  • ولا واسطة.
  • ولا بتقطع ليه تذكرة.
  • اصلو – عمرنا كلو ما شفنا لينا (ريدة) بي الغصب.
  • إلّا في مباراة امس بين الهلال والخرطوم – (الريدة) ظهرت غصب عديل كدا.
  • الريدة جاب ليه قون رجاله.
  • يشهد الله (مهند الريدة) جاب ليه قون لا قون (ريدة) ولا حاجة.
  • قون غصب.
  • متابعة.
  • واصرار.
  • وحضور ذهني.
  • الشوق ظاهر في مهند الريدة.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • في واحد من الجماعة الما عندهم اي قضية بالكورة.
  • النوع القدر ما يدخل عليك بقول ليك الكورة كم؟.
  • بس دا فهمو في الكورة.
  • معتبر السؤال عن نتيجة المباراة فهم.
  • وثقافة رياضية عالية.
  • الزول دا امس قاعد يحضر معاي في المباراة قال لي انت عارف (مهند الريدة) قونو تقول جابو في مسلسل (مهند ونور).
  • قلت ليه كيف الكلام دا؟.
  • ناس المريخ يقوموا يسمعوا الكلام دا يشتكوا.
  • الناس ديل ممكن يمشوا تركيا يجيبوا لينا (نور)..يقولوا ليها (مهند) حايم في استاد الخرطوم.
  • ولا شغال بيك الشغلة.
  • قال لي موش في مسلسل (مهند ونور) الحلول كلها بتكون في الحلقات الاخيرة.
  • قلت ليه بلحيل – اصلك ما قلت ليك حاجة غلط.
  • تنطط في عيونك متل (العدس البايت).
  • اول العدس البايت بينطط عيونه.
  • قام قال لي مهند الريدة امس اشتغل بالنظام بتاع مسلسل (مهند ونور) ، علق ليك الجماعة وحرق ليك اعصابهم وفي نهاية المباراة وضع (الحلول) وجاب ليه قون.
  • نحن 77 دقيقة قاعدين على اعصابنا.
  • يا ربي (نور) بتظهر متين؟.
  • بيضرب ليها.
  • بترجع ليه؟.
  • قون في الدقيقة (77) زي الحل البكون في الحلقة (77).
  • بالمناسبة نحن ما عندنا حاجة ساكت.
  • ولا قاعدين نشتغل بالصدفة.
  • نحن اي حاجة عندنا بي نظام.
  • قاعدين نرتب ليها.
  • ونطلع فيها  للحوش.
  • ونشرب ليها (شاي اللبن).
  • نتفلل برانا.
  • التفلل – كلمة ما تشغلوا بيها كتير – عشان ما بتخصكم في شيء.
  • انا قلت (شاي اللبن) – الموضوع ما عندو علاقة بالعمود ، إلّا اذا كنت افتكرت مباراة امس بين الهلال والخرطوم الوطني حلقة من مسلسل (مهند ونور).
  • زمان كان عندنا زول في المدرسة ..زولة (ريدة) ظاهر.
  • في الاسبوع بخش صالون الحلاقة مرتين.
  • اخر اناقة.
  • وعطور.
  • وشكة.
  • وفاروق جويدة.
  • الزول دا بتذكر كنا بنقول ليه في (الفسحة) ..شوقك زي الملايات الجديدة.
  • الملايات الجديدة طبعا وقت يفرشوها (الفرحة) بتكون ظاهرة فيها.
  • غايتو (الريدة) رجعنا تاني.
  • بقينا نشيل (الدفاتر).
  • وسعاد الصباح.
  • ونزار قباني.
  • نحن مالنا ومال البهدلة دي.
  • الجابرنا على كدا شنو؟.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • بالمناسبة في (الريدة) برضو ..الزول بيدردر ..ويقوم ويقع.
  • ويمكن يتغرب.
  • وريقو ينشف.
  • ويتقدم للبنت ويرفضوه.
  • وتاني يتقدم.
  • واصلو ما يقنع.
  • لمن في النهاية يحقق احلامه ويتزوج الزولة التى انتظرها (6) سنوات.
  • 6 سنوات ليه؟.
  • هي كلية طب؟.
  • المهم هدف (الريدة) دا ..زي حكاية الزول العندو (ريدة) خاصة كدا.
  • ريدة يضاير فيها من حتة لي حتة زي (شاحن الموبايل).
  • لمن يحقق حلمه في النهاية.
  • الريدة الصادقة ما بتقع واطة.
  • هسع الهلال في مباراة الامس ..سادومبا اتقدم (10) مرات ليخطب ود (شباك) الخرطوم الوطني..رفضتو.
  • شيبولا اتقدم ليها (5) مرات..رفضتو.
  • صهيب الثعلب..
  • نزار حامد.
  • اتاريها (البنت) مرتبطة.
  • اقصد (شبكة) الخرطوم الوطني كانت مرتبطة.
  • عشان كدا اي مهاجم اتقدم ليها رفضتو.
  • لمن جاء (مهند).
  • شايل (الريدة) كلها.
  • من اول لمسة جاب ليه قون.
  • شغل بتاع (ريدة).
  • اصلو ما عندي ليه تفسير غير كدا.
  • ما تقعدوا تخلعوا لي في (عيونكم) متل حواشة البصل.
  • اول حواشة البصل بتخلع في عيونها.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • بس يا جماعة نكون واضحين.
  • ما تحاولو تفرزو الكيمان.
  • يعني ما في واحد يطلع يقول لينا (الشباب) في الهلال.
  • نحن امس فقدنا كاريكا وعمار الدمازين وبشه في الشوط الاول والشغيل ومكسيم.
  • الخرطوم الوطني دخلتنا تجربة قاسية.
  • عشان ما تقعدوا تنظروا لينا ساكت.
  • عناصر الخبرة مهمة.
  • والشباب المستقبل قدامه.
  • والريدة لسه.
  • خلونا نخلق نطلع اجمل توليفة في الهلال.
  • اروع تشكيلة.
  • عشان نصل للاهداف التى ننشدها.
  • ما تقعدوا تقولوا لينا الصغار ..والكبار.
  • ما في حاجة بتضر الهلال غير الكلام دا.
  • بيانات المريخ ما عندها اي قيمة.
  • ديل ناس راح ليهم الدرب.
  • بقوا يتكلموا بره رأسهم.
  • بقوا يهضربوا ساكت.
  • نحن عارفين المركز الثالث ممكن يجيب ليه كلام برة الرأس.
  • خلونا نبحث عن هلال اجمل.
  • وقادم اروع.
  • شكرا للخرطوم الوطني لأنها بتلعب كورة.
  • شكرا لقلق.
  • وصلاح الامير.
  • شكرا لمحمد آدم..ومحمد حامد وسمؤال.
  • وامين ابراهيم وعاطف خالد ومحمد حسن الطيب وداؤود.
  • تستاهلوا تكونوا في المربع الذهبي.
  • حافظوا على كواسي ابياه.
  • الخرطوم الوطني بقى عندها (بصمة).
  • بقى عندها كورة.
  • والهلال عندو (الريدة).
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ………….

        و

  • قالوا ليك ناس المريخ ح يطعنوا في قون (الريدة).
  • قالوا لينا الناس في انسحابات وبيانات ..ووقفات احتجاجية وانتوا في (الريدة).
  • انتوا يا ناس الهلال حقارتكم دي اصلو ما عاوزين تخلوها.
  • هسع دا وقت (ريدة).
  • اصلو ما في داعي لـ (الريدة) في الوقت دا.
  • بالمناسبة المباراة امس كانت وين؟.
  • في استاد الخرطوم ام في الامازون؟.
  • شايف لي عصاير ليمون حايمة.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • ……..
  • السيدة (ل) – ما اظن عاوزة ليك دليل اكتر من قون (الريدة).

  • وقرّط على كدا.

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.