دق الدلجة – محمد عبد الماجد – اليوم العالمي لـ (الثعلب) 18 اكتوبر 2016

4,277 views مشاهدة
أخر تحديث : الثلاثاء 18 أكتوبر 2016 - 3:32 مساءً
دق الدلجة – محمد عبد الماجد – اليوم العالمي لـ (الثعلب)   18 اكتوبر 2016

 من رأسي :

الليلة لو غاب سادومبا ما مشكلة.. لو غاب بشه ما مشكلة.. لو غاب كاريكا ما مشكلة ..لو غاب شيبولا ما مشكلة.

المشكلة يغيب صلاح نمر.

 من كراسي :

قيل :

منذ جيل مضى ، كان اغلب الرجال بعد ان ينتهوا من عملهم اليومي في حاجة الى راحة…اما اليوم فانهم يحتاجون الى بعض التدريبات الرياضية.

  • عندنا اقتراعات بنعرفها برانا…ما في زول بيلحقنا فيها…
  • مثلا زي دك الحصة الاخيرة يوم الخميس.
  • دا اقتراع روسي.
  • في اقتراع متقدم اكتر من كدا – زي (الزوغة) من فسحة الفطور.
  • حصة الجغرافيا زمان كانت (40) دقيقة…بندرس فيها جغرافيا وطن مليون ميل مربع.
  • هسع الوطن اتقسم – بعد الانفصال مفروض حصة الجغرافيا تبقى (20) دقيقة فقط.
  • 40 دقيقة في شنو؟.
  • نص حاجات الوطن دي بقت في جنوب السودان.
  • لو اشتغلنا بي نظريتك دي يا استاذ مع التراجع الحدث في الحياة السودانية (حصة الدين) ح تكون (5) دقائق فقط.
  • عليك الله خلوها مستورة.
  • وما تفتح لينا المواجع ساكت.
  • عشان كدا حصص الجغرافيا في السودان بقوا يتموها (مهند ونور) و(وادي الذئاب) ..وواتساب وفيس بوك.
  • اقتراع تاني – عندنا طالب (بليد) شديد في (الاملاء).
  • حرف (العين) بيكتبو (نخرة).
  • زمان الاملاء كانت صعبة – ما زي املاء الزمن دا.
  • اي حاجة اتغيرت.
  • ابو الطالب دا فتح كراس الاملاء بتاع ولدو ..لقاهو كلو (اعد).
  • اي صفحة يفتحها يلقى مكتوب فيها (اعد).
  • الاب ما كضب وقال لولده – يا ولد انت بيصحح ليك (الاملاء) دا عمك (سمير فضل).
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • روسي – اول مرة يضوق (البامية المفروكة).
  • عجبتو ليك عجب شديد.
  • اتخلع.
  • طبعا لقمة ملاح (البامية المفروكة) مرات بتكون عاوز تنزلها في (خشمك) ..تلقى نفسك نزلتها في خشم الزول القاعد جنبك.
  • بتزلق.
  • مرات تكون عاوز تنزلها في (بطنك) ..تلقاها نزلت في (موبايلك).
  • زي (الرصيد).
  • الروسي ساعة ونص يغسل في ايدو في الماسورة.
  • ما فاهم اي حاجة.
  • الروسي بعد ما ضرب (البامية المفروكة) دي رجع روسيا.
  • الروس بتاعين شمارات وملاحظات (وصلو القمر من شماراتهم) – الروسي اول ما وصل موسكو اهلو سألوه وقالوا ليه اكتر حاجة عجبتك في السودان شنو؟..نهر النيل وإلّا القاش وإلّا البركل وإلّا اهرامات البجراوية؟.
  • الروسي قال ليهم : لا.
  • قالوا ليه شنو؟.
  • قال ليهم : البامية (المفلوكة) ..والله عندهم بامية (مفلوكة) – نهر النيل حقهم لو طعموه بـ (تانج) ما يلحقها.
  • طبعا الروس بقولوا للبامية المفروكة – بامية (مفلوكة).
  • الفلكة عندهم فركة.
  • كمان عاوزين تغالطوا؟.
  • تغالطوا الزول في لغتو.
  • لغتهم كدا.
  • شفتو اعصابنا باردة كيف؟ – المباراة ودية – احتفالية ..ما بنديها حيز كبير.
  • هسع دا وقت (روس)؟؟.
  • من اقتراعاتنا الزمان ..اننا كنا بنخصص ايام (عالمية) لبعض المناسبات.
  • مثلا مرات بنعمل اليوم العالمي للجبنة.
  • جبنة ساي.
  • اليوم داك بالذات كدا – كنا بنعمل في الفول جبنة بـ (2) جنيه ..مخصوص عشان اليوم العالمي للجبنة.
  • بنكفها شوية على روحنا.
  • ما بنفوت مناسبة زي دي.
  • مرة عملنا اليوم العالمي لشحن الموبايلات.
  • ما خلينا لينا موبايل ناقص (شخيط).
  • ولا خط.
  • ثقافة الزول البكون معلق سماعات الموبايل في اضنينو اليوم كلو – متل حركات شباب زمان الواحد فيهم بدخل الحفلة مولع (سيجارته) ، يبشر ويطلع شايل سيجارته قصبة.
  • مفتكرها فلاحة.
  • نفس الحركة بتاعة الزول المركب سماعات في اضنينو.
  • او قاعد مع الناس وشغال بالواتس.
  • ومرة عملنا اليوم العالمي للفجل.
  • شاي الصباح بنشربو بي فجل في اليوم العالمي للفجل.
  • فجل صاح.
  • الواحد مننا كان بكون شايل ليه (فجلة) في المواصلات.
  • نازل وطالع بيها.
  • كنا مخلصين في الايام البنخصص للعالمية لبعض الاشياء.
  • مثلا كان عندنا اليوم العالمي للوقوف تحت شجرة النبق.
  • ما بنفوت حاجة.
  • اي ملاحظة بندونها.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • الليلة انا قعدت مخصوص..
  • فتحت (المروحة) في خمسة ..وقلت اكتب عن اليوم العالمي لـ (الثعلب).
  • وانا لمن افتح المروحة في خمسة ..ما في زول بيلحقني.
  • ما في حاجة بتثبتني.
  • عاوزين نخصص لينا يوم للثعلب – وهو اليوم الثلاثاء 17 محرم 1438هـ الموافق 18 اكتوبر من كل عام.
  • الليلة يوم (ثلعبونا).
  • اسمعوا الكلام دا كويس..وما ترموه في الواطة.
  • في اليوم العالمي للثعلب – عازوزين نقول لصهيب الثعلب ..دفاع المريخ دا عبارة عن (مزرعة بطيخ).
  • عشان الكلام يقع ليك.
  • هو الدفاع براهو.
  • مجلس المريخ – مجلس (بطيخ).
  • واعلام المريخ – اعلام (بطيخ).
  • وصهيب الثعلب دا كان تبقوا عارفين – لو جبتوا ليه سيرة (البطيخ) تاني ما بقيف – كطبيعة (ايدولوجية) لكل ثعلب.
  • الثعالب ديل (لوجوستيا) كدا.
  • قالوا ليكم – هو (الثعلبة) جابها من وين؟.
  • من (البطيخ) دا.
  • ما عارف السر في ارتباط بعض المخلوقات الغابية ببعض الفواكه شنو؟.
  • مثلا يقولوا ليك الثعلب والبطيخ.
  • القرد والموز.
  • وغير الفواكه برضو في ارتباطات تانية.
  • الغراب والجبنة.
  • الارنب والملوخية.
  • والكديس واللبن.
  • حكمتو بالغة.
  • عشان الامور تبقى واضحة ليك يا (الثعلب) – صلاح نمر الليلة الساعة تمانية و18 دقيقة لو فتشتو بتلقاه شايل ليه (بطيخة).
  • صلاح نمر يتلفت متل سواق اللوري الما عندو (مرايات).
  • شغال بالرقبة.
  • باللفتة.
  • السواق لمن يكون عاوز يلف ..بطلع للصرة عشان يشوف الشارع ويرجع لحالتو الطبيعية.
  • ومرات بنزل عديل كدا من اللوري – لمن الشارع تكون فيه شجرة.
  • بنزل ويرجع يركب يلف.
  • تقول عاوز يلف ليه (عمة).
  • الحمدلله ما قلت (سيجارة) – عشان ما تقعدوا تشرعوا لي ساكت.
  • تخلوا العمود كلو وتمسكو في الحتة دي.
  • زي حكاية الزول الصعب.
  • صعب شديد.
  • ما بتفاهم.
  • ما عندو بنت بتقيف ليها في باب.
  • ولا بترد ليها تلفون.
  • ولا بتدخل واتس.
  • الزول الصعب دا قال لي ولدو – الجماعة ديل لو جونا الليلة نعقد ليهم طوالي.
  • الولد قال لي ابوه – نعقد ليهم شنو يا حاج؟ – الجماعة ديل جايين يركبوا (الطبق) ويرجعو.
  • ابوه قال ليه نحن ما عندنا (طبق) بركبوه بدون (عقد).
  • زول صعب.
  • ما بتفاهم.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • كدا هسع خلونا مع (ثعلبونا).
  • ليه الثعلب وصفوه بـ (المكر).
  • ليه الثعلب (مكار).
  • المكر جابو من وين؟.
  • هسع عليكم الله صلاح نمر دا عاوز ليه (مكر).
  • مكر شنو؟..الزول دا بي جلابية وعمة وعنقريب بتفوت فيهو عديل.
  • لو شايل ليك (عمود) فيه (14) طاسة …ممكن تفوت فيهو ..وطاساتك الحبة ما تجيهن.
  • سيرة بتفوت فيهو.
  • انا اول مرة اشوف لي (نمر) يجهجو (ثعلب).
  • لاحظو اني لغاية الآن ما جبت ليكم سيرة لي مصعب عمر.
  • ولا وليد بدرالدين.
  • ولا جمال سالم.
  • جمال سالم الايامات دي اكرم الهادي إلّا ربع.
  • الزول دا مالو بقى يفكها جوة؟.
  • شوفوا الكلام دا كلو بيحصل الليلة ان شاءالله في المباراة.
  • قولوا ان شاءالله.
  • وتعالوا بكرة نتلاقى ان شاءالله في نفس المساحة.
  • ………………

         و

  • مباراة اليوم احتفالية يؤكد احتفالية الهلال فيها الانتصار على المريخ ان شاءالله.
  • ألعبوا بي حماس.
  • ما تخلوا حماس (الوصافة) يتغلب على حماس (البطولة).
  • قاتلوا لمدة (90) دقيقة.
  • جمهور الهلال في كل الاوقات في كل الاحوال مطالب بالمساندة والتشجيع والفرح.
  • ابحثوا عن تحقيق رقم قياسي جديد امام المريخ.
  • اي هدف تجيبوه ..ابحثوا عن الهدف التالي.
  • ما تقيفوا.
  • المباراة احتفالية.
  • ما في حاجة بتفقدوها.
  • ما في حاجة بتخسروها.
  • عشان كدا ..اي هدف عاوزين بعدو هدف.
  • ما تقيفو.
  • المريخ في حالة تجعله مستقبل جيد لكل الاهداف.
  • الحماس.
  • والمسؤولية.
  • والروح القتالية.
  • والحضور الجماهيري الكبير – طريق الهلال لتحقيق نصر كبير ان شاءالله على المريخ.
  • اي مشجع هلالابي يجب ان يكون حريصا على الوجود اليوم في استاد الخرطوم.
  • مباراة بعيدة عن الضغوط.
  • وبعيدة عن التوتر.
  • ما الذي يمنعكم من الحضور اليها.
  • هلال 2017 يبدأ من اليوم.
  • ……………..
  • السيدة (ل) – فرحتنا لسه طعمها ليمون ليمون.

  • وقرّط على كدا.

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.