دق الدلجة – محمد عبد الماجد – جمال سالم رأيو شنو في قرعة كاس السودان؟ 22 اكتوبر 2016

0
1

 من رأسي :

مشكلة المريخ الحقيقية ليس في أن اللاعب شرف الدين شيبوب (هاوي) – مشكلة المريخ الحقيقية في ان مجلسه نفسه (هاوي)..ولجنته القانونية التى قدمت الشكوى والاستئناف وطلب الفحص ايضا (هاوية).

عندما اسمع تصريحات الفريق طارق او مدثر خيري الذي يطلق على نفسه لقب (خبير قانوني) في قضية شيبوب – اقول ان شيبوب الله شافو ..لمن طلع من الجماعة ديل..

 من كراسي :

إن حاجتنا الكبرى إنما هي ان نعلم كيف نريد لا ان نعلم كيف نعمل ، فاذا اردنا عملنا ، وكل مريد عامل وعارف بوسيلة إلى انجاز مراده.

العقاد

  • عندما غادر جمال سالم حارس مرمى المريخ اليوغندي الاصل الى بلاده للمشاركة مع منتخب بلاده الذي كان يلعب امام منتخب غانا ، جن جنون المريخاب وتعللوا وتسببوا حتى وصلوا الى حيلة يتم بها تأجيل مبارياتهم امام الاهلي شندي والهلال.
  • قلبهم وقف.
  • تدخل اسامة عطا المنان ووضع برمجة لم تطب للخرطوم الوطني والاهلي شندي ، فتدخل رئيس الاتحاد العام معتصم جعفر مستصحبا في قراراته التى اصدرها لبرمجة مباريات المريخ غياب حارس المريخ وعودته.
  • جمال سالم سافر الدوري وقف..والنشاط جمدوه.
  • مجلس المريخ بحجة استئناف شيبوب هدد بالانسحاب من امام الاهلي شندي ، وحقيقة الامر ان التهديد بالانسحاب كان من اجل منح المريخ المزيد من الزمن ليتمكن حارس مرمى المريخ جمال سالم من العودة.
  • السلطة تدخلت بحجة (الحوار الوطني) وقامت بتأجيل المباريات وتجميد النشاط الرياضي في الخرطوم لمدة (72) ساعة.
  • 72 ساعة كان كافية لعودة جمال سالم ولجاهزيته للمشاركة.
  • يتخيل لي لو كان جمال سالم يحتاج الى (10) ايام – كان الحوار الوطني استمر (10) ايام.
  • كل ذلك كان من اجل ان يمنح المريخ الوقت الكافي ليعود جمال سالم من غانا ويحرس مرمى المريخ امام الاهلي شندي.
  • قالوا لينا الحوار الوطني فرض ذلك على اتحاد الكورة.
  • عليكم الله هو اتحاد الكورة عاوز ليه حوار وطني.
  • ديل بي تلفون – ممكن يجمدوا النشاط.
  • رنه ساكت ..بأجلوا المباريات.
  • وقد كان ..تم تأجيل المباريات وعاد اللاعب ووجد ان مباراة فريقه امام الاهلي شندي تم تأجيلها بسبب غياب جمال سالم.
  • اقصد بسبب (الحوار الوطني).
  • جمال سالم شنو؟.
  • انا قلت جمال سالم – مالكم عاوزين تجيبوا لي الكلام؟.
  • جمال سالم ما عندو علاقة بالموضوع.
  • فريق الاهلي شندي لم يكن يحتاج لتأجيل – نقاط مباراة المريخ امام الاهلي شندي اسهل مما تتوقعون.
  • الاهلي شندي ما كان يحتاج الى تأجيل..ولا يحتاج الى ان تعلق مباراة المريخ امامه بسبب جمال سالم.
  • اقصد بسبب (الحوار الوطني).
  • ما تلخبطونا.
  • مالكم عاوزين تجيبوا لينا الهوا.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • لعب المريخ امام الاهلي شندي ..ولم تصدر منه شكوى او اعتراض بسبب عدم الفصل في طلب الفحص (الفضيحة) الذي قدمته لجنة المريخ القانونية.
  • انتصر المريخ على الاهلي شندي ..دون ان يتعرض مرمى جمال سالم لكورة خطرة واحدة.
  • لو كان يقف في مرمى المريخ عشية مباراة المريخ والاهلي اللاعب (موسى الزومة) لما استطاع فريق الاهلي شندي ان يهدد مرمى المريخ ، ناهيك عن الوصول اليه.
  • المهم لعب المريخ امام الاهلي شندي ، لأن جمال سالم عاد ، وشارك ولم يطالب بحقوقه ولم يسأل عنها.
  • جمال سالم بعاين بعيد.
  • وهو عارف متين يطالب بمستحقاته.
  • مباراة المريخ امام الهلال في قمة الممتاز ، مجلس المريخ كان حتى الساعة السادسة مساء لا يعرف ان كان سوف يلعب امام الهلال ام لم يلعب ، حسب تصريحات رئيس المريخ نفسه.
  • ناس صلاح نمر قالوا ليك يرجفوا لغاية الساعة ستة وخمس دقائق.
  • كان تكلموهم من بدري شوية.
  • الاولاد الغداء ما وقع ليهم – بسبب الخوفة الداخلة فيهم من (شيبولا).
  • جمهور المريخ دخل استاد الخرطوم وهو يترقب فريقه (الهارب) من مواجهة الهلال.
  • قرار الانسحاب اعلنه مجلس المريخ بعد السادسة والنصف وبعد ان رفض جمال سالم المشاركة في المباراة وفشل المجلس في توفير حقوق اللاعب المادية التى طالب بها.
  • لذلك انسحب المريخ.
  • قالوا ليك (بص الوالي) لغاية الساعة خمسة ونص حايمين في البنوك والاسواق بفتشوا ليهم في زول يسلفهم (39) الف دولار.
  • لمن قنعوا – وما لقوا ليهم زول يسلفهم ..اعلنوا الانسحاب.
  • ومسكوا ليك في موضوع (طلب الفحص).
  • وقضية المريخ العادلة.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • الآن الاتحاد العام قام باجراء القرعة لما تبقى من مباريات كاس السودان.
  • الكلام واضح.
  • والقرعة معلنة ومعروفة.
  • الهلال سوف يواجه الاهلي شندي في دور الاربعة ، بينما سوف يواجه هلال الابيض فريق المريخ في نفس المرحلة.
  • الفائزان في هذه المباريات سوف يتواجهان في مدني يوم الخميس القادم.
  • يعني بعد 4 ايام.
  • وانتوا عارفين مدني.
  • الهلال ممكن يجامل في اي حتة إلّا مدني.
  • يا ناس المريخ لو عاوزين تنسحبوا انسحبوا من الآن – ما تنتظروا الساعة السادسة مساء   يوم المباراة.
  • اقعدوا مع جمال سالم – (جمال الوالي ما بقدر يحدد ليكم الموضوع دا).
  • الرأي – رأي جمال سالم.
  • اقعدوا مع جمال سالم ..اذا وصلتوا معاه لتسوية في حقوقه يمكن ان يشارك في مباراة القمة المرتقبة في نهائي الكاس ممكن تلعبوا.
  • وان كنا نشعر ان جمال سالم بتلكك ..وعاوز ليه سبب يهرب بيه من (شيبولا).
  • المهم اقعدوا معاه ..وقدموا ليه (القرعة) واشرحوا ليه سير المباريات وشوفوا رأيو شنو؟.
  • عشان لو كان عندو رأي – احسن ليكم تنسحبوا من مباراة الفريق امام هلال الابيض حتى لا يتكرر مشهد الهروب و (الجري) امام الهلال في مدني.
  • ناس مدني ديل ما برحموكم.
  • ولا بقبلوا ليكم بهذا الهروب.
  • صلاح نمر وضفر ومصعب عمر ما تقطعوا ليهم قلوبهم ساكت.
  • لو ما عاوزين تلعبوا ..سرحوا الاولاد.
  • اولادكم ديل قلبهم وقف.
  • والله الايامات دي كمان شيبولا بعمل ليه في جنس حركات.
  • الزول دا قالوا ليك بكون قاعد براهو كدا – ومن غير اي مناسبة بقول اضربوا لي صلاح نمر.
  • شوفوا لي صلاح نمر وين؟.
  • وصلاح نمر ما بقدر على الحاجات دي.
  • يتلفت متل الزول الما عارف الوصف.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • ………….

         و

  • صلاح نمر ومصعب عمر وضفر ورمضان عجب وبكري المدينة وعبده جابر وعنكبة قالوا ليك رأيهم ان ينسحب المريخ.
  • ناس صلاح نمر بعتبروا ان المريخ عندو قضية عادلة.
  • عادلة يا نمر.
  • عاوزين تهربوا تاني.
  • البهدلة التى حصلت لعمر بخيت في المريخ ..عمرو ما حصلت ليه في حتة.
  • لاعب لغاية الساعة ستة مساء ما عارف فريقو سوف يلعب ام لن يلعب.
  • قطعتوا قلوبهم.
  • بهدلتوا الاولاد.
  • نشفتوا ريقهم.
  • طيب قول ناس صلاح نمر وعمر بخيت يستاهلوا البتعملوه فيهم دا.
  • جمهور المريخ ذنبو شنو؟.
  • لغاية الساعة تمانية و15 دقيقة ما عارف فريقو ح يلعب ام ما ح يلعب.
  • ……………
  • السيدة (ل) – اعتقد نحن ذاتو عاوزين لينا (مخرجات) بعد الحوار الوطني دا.

  • وقرّط على كدا.

NO COMMENTS

LEAVE A REPLY