دق الدلجة – محمد عبد الماجد – (فيلم هندي) بي عربي الكلاكلة اللفة 30 اكتوبر 2016

0
3050 views

 من رأسي :

مريخابي عاوز يعبر عن دخول فصل الشتاء بي اي صورة – (عندو سيوتر جديد) ما لاقي حاجة يعبر بيها عن (البرد) ، غير انو يقول : (الفرق بين الهلال والمريخ في الممتاز 13 نقطة غير كاس السودان) ولبس (السيوتر) على كدا.

برد شديد!!.

 من كراسي :

تدل الاحصاءات على ان الفرص كثيرا ما تدق ابوابنا ، ولكننا لا نسمعها بسبب انهماكنا في مشاهدة التلفزيون.

ستيفن شيلنزر

  • دراسة هندية – (جبتها من رأسي دا) ، ما تقعدوا تغالطوني فيها ، اثبتت ان (القرع) هو (بطيخ) راسب (انجليزي وعربي ورياضيات).
  • عشان كدا اي (بطيخة) بليدة في الرياضيات (قرعة).
  • في نظرية (روسية) بتقول ليك (شوربة العدس) محاولة فاشلة لشوربة الفراخ.
  • والفحم هو (بوتجاز) اهلو ما احسنوا تربيتو.
  • والحمام لو لقى (مدرب اجنبي) كان بقى (جداد الوادي).
  • ونهر النيل لو كان في اسبانيا كان (النيل) شندي فاز بالليغا الاسبانية.
  • لذلك الهلالاب عندهم عبقرية خاصة – قالوا ان المريخابي في طبيعة الحال هو هلالابي زعلان.
  • السنة دي ح يطرشقوا من (الزعل).
  • لا دوري.
  • لا كاس.
  • وكمان معاهم (بودي قاردات).
  • في شنو ما عارف؟.
  • قابلتكم في الدنيا (وصافة) محتاجة للتعب دا.
  • وصافتكم ولا بتستاهل التعب دا كلو.
  • متل الزول الصلعتو حدها جدو التاسع ..مع ذلك شايل ليه (خُلال) وعامل ليه (قُصة).
  • عامل فيها شاروخان.
  • وبمشي يوم الجمعة افخم صالون عشان يحلق (الصلعة) دي.
  • ناس المريخ فقدوا الدوري.
  • وفقدوا الكاس.
  • بي مجلس فيه (28) عضو.
  • عشان كدا زي ما قال الزميل حسن فاروق بيبحثوا يعملوا ليهم (بطولات) في التسجيلات.
  • عاوزين يعملوا ليهم (فيلم هندي) بي عربي الكلاكلة اللفة.
  • يعني بي لغتنا دي.
  • مجلس المريخ (28) عضو …ما بخجلوا خطفوا السماني الصاوي من معسكر فريقه.
  • 28 عضو خطفوا ليهم (باك).
  • خطفوه من فندق في قلب الخرطوم.
  • الخطف لا كان في غابة..ولا كان في الصومال.
  • الخطف تم في الخرطوم.
  • وبعد دا كلو بتكلموا ليك عن الاخلاق.
  • والمثل.
  • وليه شيبوب مشى الهلال.
  • البتعملوا فيه دا ما عندو اي علاقة بالرياضة.
  • والاخلاق.
  • وعليكم الله تاني لو عاوزين تتكلموا عن الاخلاق اغسلوا ايديكم اول.
  • اغسلوها من اثار الخطف.
  • بعدين الزول وقت يخطف ليه حاجة …بتكون حاجة بتستاهل ..يعني ما معقول تخطف ليك (باك) عشان تدفع ليه (3) مليار جنيه.
  • وبيت.
  • وبوكسي.
  • والخطف يتم الساعة واحد صباحا.
  • اصلكم انتوا عاوزين تخطفوا (كارينا كابور).
  • السماني بعد الحاجات دي ..مفروض يعمل ليه (مستشفى).
  • كورة شنو البلعبها ليكم بعد (القروش) دي؟.
  • ويلعبها ليه؟.
  • وعشان شنو؟.
  • 3 مليار وبيت وبوكسي ..وعاوزنو يلعب ليكم (باك).
  • القروش دي رأس الحربة كتيرة فيهو.
  • لو بيلبس (10) وبنقطها ليكم (شوربة فراخ)..اكتر من 150 مليون جنيه ما بيستاهل قرش زيادة.
  • هلال الابيض نحن شلنا منو (كاس السودان).
  • شلناه منو عديل كدا في الميدان.
  • وانتوا هلال الابيض شلتوا منو (السماني).
  • وخطف كمان.
  • والساعة واحدة صباحا.
  • عشان كدا اصلو ما بتمشوا لي قدام.
  • ما بتتقدموا شبر.
  • جمال الوالي بقى ما عندو اي بطولة في (الميدان).
  • لذلك هو بيصنع في مثل هذه البطولات.
  • والضجة.
  • وكلام الجرايد.
  • هذه السيناريوهات قاعدين نشاهدها منذ 14 سنة.
  • الافلام الهندية دي مكررة.
  • وبرضو في النهاية ما قاعدين تتحققوا ليكم شيء غير (الوصافة).
  • وكاس السودان ذاتو بقيتوا تطيروا فيه من دور الاربعة.
  • تخطفوا هيثم طمبل.
  • تخطفوا كلتشي.
  • تخطفوا بكري المدينة.
  • وارغو.
  • الحضري.
  • السماني.
  • ما قاعدين تعملوا حاجة.
  • طموحاتكم اتراجعت شديد.
  • من بكري المدينة لي محمد عبدالرحمن.
  • ومن وارغو لي السماني.
  • تدهور فظيع.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • الطريف ان (رمرم) الفرحان ..جاء كمل صوره في الاكاديمية.
  • الزول دا خالعاهو (الصور).
  • جديد في الشغلة.
  • رايحة ليه (صورة).
  • يمكن صور العرس ما كملها.
  • جاء يكملها في الاكاديمية.
  • غايتو الزول وقت يكون (فرحان) في الصورة بكون ظاهر.
  • السماني جاء مع محمد عبدالرحمن ورمرم مع فرقة حراسة.
  • مع بودي قاردات.
  • يعني رمرم قاعد (صورة) ساكت.
  • شيبوب جبناه من تونس من غير اي حراسة.
  • مشي جوبا..
  • اديس ابابا.
  • نيروبي.
  • براهو.
  • بودي قاردات ليه؟.
  • معقولة بعد (28) عضو ..محتاجين ليكم لي (حراسة).
  • حركات ندي القلعة وبودي قارداتها عاوزين تدخلوهم لينا في الكورة.
  • اذا كان اللاعب في الاتحاد عاوز ليه حماية بواسطة فريق حراسة كامل ..يبقى يا رمرم الصور مفروض تخلوها.
  • بتشيل في حالكم ساكت.
  • الصور خلوها لي البودي قاردات.
  • نسيت اقول ليكم اخر بودي قاردات ظهروا مع المريخ كان ذلك في الكنغو.
  • وذلك عندما واجه المريخ مازيمبي.
  • وانتوا عارفين هناك حصل شنو؟.
  • المريخ واجه مازيمبي بي (بودي قاردات) ، مع ذلك ضربوهم ليك ضرب شديد.
  • البودي قاردات طلعوا بتاعين (صور) ساكت.
  • قالوا ليك وقت البودي قاردات سألوهم وقالوا ليهم انتوا مالكم ما حميتوا ناس شيبوب وضفر ورمضان عجب..قالوا عاوزننا نحميهم من (استاد) كامل.
  • طيب سافرتو لي شنو؟.
  • نفس طريقة الاستعراض والبطولات المصنوعة والافلام الهندية ..امس السماني ومحمد عبدالرحمن ظهروا بي بودي قاردات.
  • ثقة ما في نهائي.
  • او محاولة لخلق بطولة وتصعيب الموضوع ..والظهور على ان (ابداء الرغبة) انجاز.
  • بطولة.
  • شغل بتاع افلام هندية.
  • يعني في الفيلم الهندي ممكن (الباب) يكون فاتح ، وبفوت جمل ..البطل يقوم يقفز ليك من الطابق العاشر.
  • وممكن البطل في الفيلم الهندي يجيبوا ليه (كباية شاي) ..يقوم يكبها وهي سخنة في رأسو.
  • عشان الناس تصفق.
  • وتقول بطل خطير.
  • هسع ناس المريخ بعملوا في نفس الشيء.
  • الموضوع ولا محتاج.
  • ابداء رغبة.
  • الهلال صرف النظر عن السماني.
  • وطلع بيان رسمي قال فيه ان مجلس الهلال لا يريد التجديد لمحمد عبدالرحمن.
  • مع ذلك الجماعة وصلوا الاتحاد بي بودي قارداتهم.
  • معقولة خايفين من الاهلي شندي.
  • كان للاهلي شندي ما تشيلوا هم.
  • صلاح ادريس بيدردق ليكم في الحاجات..وبصلحها ليكم.
  • بدفرها ليكم دفر.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • تتخيلوا بعد البودي قاردات دي ..رمرم لسه قاعد يتصور.
  • وقاعد كمان في النص.
  • الخلعة كعبة.
  • والله يا رمرم حركاتك دي عبدالتام في مجلس اسامة ونسى ما كان قاعد يعملها.
  • زول (فرحان).
  • وعاوز يتم فترته (صور).
  • وبودي قاردات.
  • المريخاب كلهم بقولوا احسن تسجيلات للمريخ كان في فترة اسامة ونسى.
  • وفي فترة اسامة ونسى ما في لاعب وصل سعره 300 مليون.
  • وما في بودي قاردي واحد حايم ليه في اتحاد.
  • بطولاتكم بقت في الجرايد.
  • ……………..

        و

  • عروس الرمال احتفلت بعريس الموسم.
  • دوري وكاس.
  • هلال الابيض يعتبر ايضا من عرسان هذا الموسم.
  • قدم مستوى رفيع.
  • وابعد اخطر فريق من المشاركة الخارجية بعد سنوات من المشاركات المستمرة.
  • يكفي هلال الابيض فخرا انه ابعد الخرطوم الوطني بدعمها الكبير الذي تجده من جهاز الامن والمخابرات.
  • وبادارتها القديرة.
  • وجهازه الفني العالم.
  • ومجموعة من اللاعبين الافذاذ ..يكفي ان بينهم صلاح الامير وقلق وسمؤال ومحمد ادم ومحمد حامد التش وعاطف خالد.
  • لذلك يستحق هلال الابيض تقدير خاص.
  • ويستحق كذلك مديره الفني ابراهومة الف تحية على ذلك الانجاز.
  • ولسه الغد مليان بالافراح.
  • نتمنى ان يهتم هلال الابيض بالتسجيلات ويحدث اضافات تساعده وتجعله يتقدم في الكونفدرالية.
  • ……..
  • السيدة (ل) – شايف (ضلي) حايم في حلتكم.

  • وقرّط على كدا.

NO COMMENTS

LEAVE A REPLY