دق الدلجة – محمد عبد الماجد – في الجزيرة نزرع (قطنا) هدف (قصير التيلة) وهدف (طويل التيلة) 28 اكتوبر 2016

0
1

من رأسي :

مريخابي سأل ليه هلالابي قال ليه لو زرعت لي (شجرة نبق) ما بتجيب لي (نبق) في السقط دا؟؟..

الهلالابي قال ليه : لا ..بتجيب ليك (طلبات فحص).

علاقة (النبق) بالسقط شنو؟؟؟ لو ما عاوزين ليكم (طلب فحص) ساكت.

 من كراسي :

استطيع ان اعيش شهرين … على كلمة اطراء واحدة!!.

مارك نوين

  • حسب معلوماتي البسيطة (البقطعها ليكم من رأسي دا) مشروع الجزيرة بنتج (القطن).
  • وقت المشروع كان بي خيرو ..كنا بنغني في الجزيرة نزرع قطنا.
  • ومن ارض المحنة ..من استاد ود مدني.
  • وكنا حسب فهمنا بنطلع ننطط في الحوش ..بي عيون (غبش)..وكرعين (مغبشات) – وتفه (مغبرة).
  • ملامحنا كانت (متمردة) ، بين بين كدا.
  • مرات كانوا بقولوا لينا عن (القطن) – القطن (طويل التيلة) ..ومرات بقولوا لينا القطن (قصير التيلة).
  • ونحن ولا فاهمين اي حاجة.
  • وكنا بنفتكر هذا التميز (عدم موضوع ) منهم.
  • وقلة شغلة بس.
  • عليكم الله الفايق ليه لي قطن طويل التيلة وقطن قصير التيلة منو.
  • فهمنا كان كدا.
  • ما ناقشين اي حاجة.
  • الحاجات دي بتطلع مننا ونحن قاعدين لينا (تحت عمود) ، ما كان بتفرق معانا كتير.
  • غبش ..زي الفول وقت يكون بدون زيت.
  • كان عندنا رأي واضح وقاطع.
  • كان يزرعوه  (طويل التيلة) ..وكان يزرعوه (قصير التيلة)…نحن نعمل ليهم شنو؟.
  • وصوت (القطر) بنسمعو ونحن في (الفصل) زي (عشرة الايام) بتاعة عثمان حسين ..يطربنا صوت القطر ..لمن نقوم ننقز فيه.
  • لكن الامانة ، امس بعد المباراة رجعت عملت لي (بخرة).
  • قعدت ابحث.
  • قلت اشوف حكاية القطن طويل التيلة ..والقطن قصير التيلة دي شنو؟ – (للامانة لمن انتهيت من دراستي  وكملت القراية..موضوع طويل التيلة وقصير التيلة دا ما كان واقع لي).
  • انا ذاتي ما كنت فاضي للموضوع دا.
  • شايف الموضوع – قلة شغل ساكت.
  • رجعت للجغرافيا امس – فتحت درس (مشروع الجزيرة).
  • الخبرة ليها اثر طبعا.
  • الموضوع طلع في غاية البساطة.
  • اسهل مما تتوقعوا.
  • تتخيلوا ..قصير التيلة ..زي شنو؟.
  • زي هدف مهند الريدة في زكريا حيدر.
  • هدف قصير التيلة تماما.
  • تمريرة قصيرة من نزار حامد ..بيلعبها مهند الريدة (قصيرة) في المرمى.
  • دا شنو؟.
  • دا القطن قصير التيلة.
  • كدا افتكر الموضوع بقى واضح.
  • ما في اسهل من كدا.
  • والله انتوا ما فاهمين لي حاجة في الموضوع دا.
  • قاعدين تفوّتوا فينا ساكت.
  • (تيلة) شنو في (البرد) دا؟.
  • اصبروا الموضوع بيقع ليكم.
  • كملوا العمود بس.
  • ما تضايقوا.
  • نخش على القطن طويل التيلة.
  • القطن طويل التيلة دا – يا جماعة هدف رمضان كابو.
  • هدف من بعيد.
  • من كورة طويلة.
  • اقصد من (تيلة) بعيد.
  • مخالفة من منتصف الملعب.
  • نفذها رمضان كابو ..على طريقة مشروع الجزيرة ذاتو …(الموسم الشتوي).
  • ما في اي زول بقدر يقول حاجة.
  • هدف موضوع من (النص).
  • الموضوعية واضحة فيه.
  • الله يسألني ..والكورة بتتهادي فوق (الحيطة) ، قاطعة المسافات دي كلها ..كنت زي البسمع لي في (صوت قطر).
  • دو ..دو ..دو..
  • هدف بي صوتو.
  • الصورة طبعا واضحة.
  • كدا – افتكر انتهينا من الدرس الاول في الجغرافيا – والدرس دا مهم شديد ..بجيبوا ليكم في (الامتحانات).
  • زمان عندنا استاذ جغرافيا (قميصو اخضر) ، وعنده نضارة قدر ما وقعت منو ما غيرها – استاذنا الفاضل دا عشان نركز معاه …كان بقولوا لينا الدرس دا بجيبوا في الامتحانات.
  • نحن نخلي اي شيء.
  • ونقبل بي كلياتنا نحو ذلك الدرس.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • الدرس التاني بتاع الجغرافيا …رجعت ليه تاني.
  • قلت اشوف (جغرافيا) البلد دي حصل فيها شنو؟.
  • لقيت ليك المقررات نفس المقررات ما في اي جديد.
  • نفس المعلومات.
  • رغم ان الحاجات كلها اتغيرت…بما في ذلك مساحة السودان نفسو ..السكان ذاتهم اتغيروا.
  • تلت البلد طلعت من الخريطة.
  • طلعت من الخريطة – لكن لغاية الآن قاعدة في قلوبنا.
  • زينب وميري ..شول والسنجك.
  • الحالة واحدة.
  • فطومة وادروب.
  • تتغير (التضاريس)..تتغير (الخرائط).
  • المراوح.
  • المكيفات.
  • المكاتب.
  • نحن ما بنتغير.
  • ملامحنا يمكن – لكن وجدانياتنا لا.
  • مشروع الجزيرة كان اكبر مشروع في المنطقة – هسع وين؟.
  • لافتة وشوال قمح.
  • مع ذلك في المقررات ..مشروع الجزيرة لغاية وقتنا دا – هو المشروع الاكبر في المنطقة.
  • كسل عجيب.
  • حتى (المعلومات) والارقام ما عاوزين يغيروها لينا.
  • قلت اشوف لي (بخرة) تانية.
  • لقيت ليك مشروع الجزيرة بنتج (القطن).
  • وبنتج (القمح).
  • وبنتج (الذرة).
  • والخضروات.
  • الحاجات دي كلها لقيتها من ضمن المحاصيل (النقدية) التى ينتجها المشروع – وبمسك بيها السودان كلو.
  • مشروع الجزيرة دا كان بيصرف على السودان كلو.
  • الزمن داك لا في بترول.
  • ولا في دهب.
  • ولا في ضرائب.
  • مشروع الجزيرة كان ماسك السودان.
  • المشروع زي ما قلت ليكم كان بنتج القطن (طويل التيلة وقصير التيلة)..وكان بنتج القمح والذرة ..والخضروات الموسمية.
  • الحتة دي مهمة شديد.
  • ركزوا لي فيها – عشان بجيبها ليكم في (الامتحانات).
  • الكلام دا قلنا كان متين.
  • الكلام دا كان زمان قبل شعارات (ناكل مما نزرع ونلبس مما نصنع).
  • هسع عارفين مشروع الجزيرة بقى ينتج شنو؟.
  • المنتج الرئيسي لمشروع الجزيرة بقى (الريدة).
  • ريدتنا ومحبتنا.
  • مشروع ما ساهل ..انتج لينا (الريدة).
  • جاب لينا (الريدة).
  • انتوا قايلين (من قلب الجزيرة ومن ارض المحنة) دي طالعة ساكت.
  • طبيعي (الريدة) تظهر في ارض المحنة.
  • حاجة منطقية.
  • مدني عشان (الريدة) دي ..جابت لينا الكاشف والمساح ومحمد الامين وفضل الله محمد وابوعركي البخيت وثنائي الجزيرة ومحمد مسكين وعصام محمد نور وعمر جعفر.
  • من مدني ظهرت (الشال قلبي وسلاه اخاصمه وإلّا لا؟)..وطلعت (كانت ايام سعيدة ، يا ربي مناي تعيدها) و (الجريدة) و(اشوفك بكرة في الموعد) و(قلنا ما ممكن تسافر) وما عاوزين بعد دا كلو (الريدة) تظهر ليكم في (مدني).
  • مدني الجمال.
  • مدني الفن.
  • مدني الثقافة والادب.
  • مدني الرياضة.
  • ومدنى (الريدة) ذاتها.
  • في مدني كتب فضل الله محمد وغني محمد الامين (وين ح نهرب منو وين؟).
  • الجماعة طبعا وقت تجيب ليهم سيرة (الهروب) بضايروا.
  • عشان كدا كان لازم (الريدة) تظهر في مدني.
  • مهند الريدة دا في ناس بفتشوا ليه في (تركيا).
  • مهند الريدة طلع ليهم في مدنى.
  • الريدة طلعت من مشروع الجزيرة.
  • الشيء المدهش – والما قادر افهمو لغاية الآن – وما واقع لي…ان مشروع الجزيرة بقى ينتج (كابو).
  • بنتج (زبادي).
  • دي وقعت ليكم؟.
  • دي حصلت قبل كدا؟.
  • الروب بيزرعوه.
  • بيزرعوه.
  • شوف عيني دي.
  • مشروع الجزيرة امس طلع لينا (زبادي) عديل كدا.
  • كابو.
  • نحن باقى المباراة كلها قاعدين نلحس في اصابعنا.
  • يا ناس – يا خلق ،  (رمضان) جاب ليه قون في (محرم).
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • …………

        و

  • شكرا جزيلا لانسان الجزيرة.
  • لناس مدني.
  • منحونا اجمل حفل.
  • ساندوا وشجعوا الهلال وتوجوه بكاس السودان.
  • مدني عزيزة علينا.
  • عشان كدا اعزها الهلال بهذا الانتصار.
  • والافراح مستمرة.
  • والتسجيلات كاسحة ان شاءالله.
  • الهلال جمع بين الدوري والكاس.
  • الموضوع دا عاوز ليه (تخصيص نغمة).
  • شهر بندور في الموضوع دا.
  • احتفالاتنا بتستمر شهر.
  • هلال الابيض رغم العنف المبالغ فيه الذي لعب به امام الهلال ..لكن قدم مباراة كبيرة.
  • وشكل ندية للهلال خاصة في الشوط الاول.
  • رمضان كابو كفر عن الخطأ الذي ارتكبه بهدف يغفر ليه مليون خطأ.
  • عموما المباراة كانت جميلة.
  • واستحق هلال الابيض الاحترام والتقدير.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • ……………
  • السيدة (ل) – صريت لي (وقية سكر) في شوفتك.

  • وقرّط على كدا.

NO COMMENTS

LEAVE A REPLY