دق الدلجة – محمد عبد الماجد – هو وينو (البرد) عليكم الله؟ 10 اكتوبر 2016

0
3051 views

من رأسي :

ناس عمر ود المكتيل اشتروا ليهم (بوتجاز) وركبوا ليه (اريل) ، جاب ليهم قناة سودانية 24.

القناة برامجها كلها عن (الاكل).

تقول السودان سنة 2040 ح ينظم كأس العالم لسلطة الاسود.

 من كراسي :

اذا كنت تبدو شبيها بصورتك التى في جواز السفر ..فانك في حاجة حقا الى الرحلة التى تقوم بها.

ادوارد ارنولد

  • (الطيب جلبقة) اضنانيو متل (العراضات) الما فيهن (شبكة).
  • متشوبحات من القون للقون.
  • يشوبح في عيونو زي البتذكر ليه في رقم تلفون طار من رأسو.
  • يقطع في الكلام متل اللبن القطع.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • هو عليكم الله الدنيا دي شن طعمها؟.
  • عندنا قريبنا …عندو مرض خبيث – وفشل كلوي – وعندو مشاكل في القلب وضغط وسكري.
  • وفوق دا كلو وقع ليه من قطر – راقد في العناية 43 يوم.
  • قريبنا دا هسع فاتح ليه دكان في السوق الشعبي.
  • يجيبوا ليه (شاي اللبن) من الساعة اربعة.
  • في امان الله.
  • ويضرب في اللحمة والسكريات – ويقول ليك انا الدكتور محذرني من الحاجات دي.
  • كلو يوم قطع ليه (صينية باسطة).
  • صينية الباسطة بقطعها في بطنو – ما بقطعها في كشك.
  • يجيبوا له ام فتفت والفسيخ – يضرب ضرب الجن – ما بتجيه اي عوجة.
  • يهرس ليك في البصل دا زي مفتاح البيبسي.
  • البصلة بقسمها على اتنين.
  • نص في خشمو.
  • ونص في بطنو.
  • ما بتشوف فيها اي حاجة.
  • قريبنا التاني كان زي الحصان – في ريعان الشباب – ما عندو اي مشكلة شارك ليه في (40) منافسة سباق ..كلهم جاء فيهن الاول.
  • قريبنا دا مشينا نصحيه الصباح – لقيناه ميت في سريرو.
  • تلفونو في شاحنو.
  • وجريدتو في ايدو.
  • واخر ظهور ليه في الواتساب قبل ربع ساعة.
  • دنيا.
  • داخل ليه في 198 قروب.
  • بقرأ وما بعلق.
  • لابد بس.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • الطيب جلبقة – كان وهو في المرحلة الابتدائية ..بتمني يبقى (دكتور).
  • ما بتنازل من الحلم دا.
  • عندو قميص ابيض وقت يلبسو ..ما بسأل في زول.
  • كان قاعد يقول لينا والله اسمي دا اسم دكاترة…لكن اوعكم وقت اعمل لي عيادة تجوني فيها.
  • ما تجنوني.
  • ما بعرفكم.
  • والله ما بكشف ساي.
  • لا بعرف دا كان صحابي ولا بعرف دا كان بقرأ معاي في الابتدائي.
  • ما بجامل في الموضوع دا.
  • الطيب جلبقة وقت امتحن من الابتدائي للعام ..ما نجح.
  • عاد.
  • ومشى جاي وجاي …ودخل الثانوي العام بعد تلاتل.
  • قاعد 17 سنة في الابتدائي.
  • الطيب جلبقة في الثانوي العام احلامه اتقلصت شوية …وبقى يقول لينا انا عاوز ابقى (مساعد طبي).
  • الطب دا عاوز ليه (انجليزي) قوي.
  • وانا والله (عربي) ما عندي ليه.
  • وكان بقول لينا والله لو بقيت (مساعد طبي) ما عاوز واحد فيكم يجيني ويقول لي بشعر بي طمام بطن ..وعندي فتور.
  • اوعكم.
  • ما بعرفكم.
  • الطيب جلبقة قعد في الثانوي العام (9) سنوات.
  • الحلة دي كلها جات وفاتت فيه.
  • وهو قاعد في فصلو.
  • مروحة الفصل غيروها (7) مرات وهو قاعد في فصلو.
  • المهم وقت دخل الثانوي العالي قال عاوز يبقى (ممرض) ساكت – المساعد الطبي ذاتها عاوزة ليها قراية ومذاكرة ..وانا والله ما فاضي ليها.
  • ولا عندي ليها وقت.
  • وكان بقول لينا لكن انا لو بقيت (ممرض) اوعكم واحد منكم يجيني ويقول لي اديني حقنة.
  • اوعكم يجيني واحد منكم لافي بي هناك.
  • ما فاضي ليكم.
  • ولا بعرفكم.
  • ولا بقيف عندكم.
  • الطيب جلبقة قعد في الثانوي العالي (12) سنة.
  • اخر سنة كان بقرأ فيها في الثانوي العام (ناظر المدرسة) كان قرأ معاه في الابتدائيه.
  • دفعتو بقو مفتشين في وزارة التربية والتعليم.
  •  المهم وقت كمل الثانوي العالي ما عارفو مشى وين؟.
  • لكن بعد 7 سنوات لقيناه شغال ليه في مستشفى حكومي (غفير).
  • واقف في الباب.
  • قرد ما بدخلو.
  • عايش الدور.
  • نحن دفعتو ..وقت نمشي عليه في المستشفى عشان نزور لينا (مريض) كان بحلف ما يدخل فينا واحد.
  • وكان بقول لينا انا من الابتدائي حذرتكم من الحركات دي.
  • ما عاوز اشوف خلقة واحد فيكم.
  • انا جني وجن الواسطات والمحسوبية.
  • تترزعوا في الصف دا زيكم وزي كل الناس.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • المهم الايام مرت.
  • والدنيا اتغيرت.
  • والطيب جلبقة بقى عامل فيها (فيلسوف).
  • اي حاجة في الدنيا دي يديك فيها (نظرية).
  • محاضرته جاهزة.
  • بقى زول حكيم كدا – والحياة منحتو ليك خبرة السنين.
  • اي حاجة بقيف ليك فيها.
  • الطيب جلبقة كان عندو احساس عالي بالبرد.
  • في عز الصيف ..كان بكون لابس ليه فانيلة سقط.
  • ومتلفلف..
  • ويفتش للشمس فتيش.
  • وكان وقت توقفو ..بقول ليك بالله شفت (البرد) دا كيف؟.
  • والسخانة بتكون بتلخم.
  • تلحم عديل.
  • الساعة 2 ظهرا في الحر دا – يلاقيك في المواصلات العامة …وانت كرهان روحك…يقول ليك والله البرد دا عاوز ليه (قراصة) سخنه.
  • قراصة في عينك.
  • يمين قراصة  في الحر دا لو جابوها لي من (البيت الابيض) ما اقبل عليها.
  • في التلفون ما برد ليها.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • الطيب جلبقة في يوليو – عز الصيف بتلقاه حايم في السوق بيشتري في (السيوترات) وفنايل السقط.
  • وقت يقول لصاحب المحل عليك الله نزل لي فانلة السقط ديك ..صاحب المحل بتخلع.
  • صاحب المحل بلفها ليه مجانا…نسبة لحالة الطقس…وبقول ليه هو وينو البرد البتشتري ليه في الفنايل دي.
  • الساعة واحدة (نص النهار)…بتلقوه في السخانة النحن فيها دي متلفلف ليه بي بطانية.
  • وقت تسألو.
  • يقول ليك والله (البرد) دا – ما في طريقة معاه الزول يمشي ليه حتة.
  • نحن وقت نسمع كلامو دا بنقول ليه : هو وينو البرد؟.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • هسع عليكم الله ..ومن غير مجاملة كدا.
  • انا عاوز اسأل.
  • وعاوز اقول.
  • هو وينو (البرد) عشان تأجلوا ليه مباريات المريخ مع الاهلي شندي والهلال؟.
  • ……………….

       و

  • الهلال عليه التركيز في استعداداته.
  • الهلال المستفيد الاكبر من الموضوع دا.
  • ناس بشه وبويا وكاريكا بيرجعو اخطر.
  • ناس شيبوب وشيبولا.
  • براكم بتجيبوها لي روحكم.
  • ابقوا انستروا عاد.
  • اثبتوا.
  • الناس البرجفو من قبل (10) ايام من المباراة – ديل ما قابلوني قبل كدا.
  • و
  •  (ونحن عايشين والحمدلله  (النفس) بينزل ويطلع إلى الآن..ولا ينقصنا شيء سوى رؤياكم الغالية).
  • و(درررروري ضروري) تجونا في الاجازة الكبيرة!!.
  • …………
  • السيدة (ل) – كل (حوار وطني) وانت طيبة.

  • وقرّط على كدا.

NO COMMENTS

LEAVE A REPLY