الى ان نلتقي – قسم خالد – في مريخ العجائب كل شيء جاااائز ..! 4 نوفمبر 2016

914 views مشاهدة
أخر تحديث : السبت 5 نونبر 2016 - 12:59 مساءً
الى ان نلتقي – قسم خالد – في مريخ العجائب كل شيء جاااائز ..!  4 نوفمبر 2016

 

حرصت بالامس على مطالعة كافة الاعمدة الحمراء للاعلام السالب ووقفت على حقيقة واحدة هي  ان انتقال سالمون  جابسون لاصحاب السعادة اصابهم  في مقتل .. كيف قولو لي .. اقول ليكم كيف في ناس من قبيلة الاعلام السالب قالو ان جابسون مصاب وعشان يأكدو الموضوع دا جابو ليهم تقرير من الامارات يثبت الاصابة .. نمشي معاهم بي منطقهم دا انو جابسون مصاااااب ومكسر وما بقدر يمشي وعندو قضروف وشلل رعاشي وعمى ليلي ولامي كل امراض الدنيا دي .. طيب زول مصاب وعندو كل الامراض دي انتو قاعدين معاهو واديتهو 100 الف دولار عشان يتعالج بيها ولا شنو ؟؟

يا جماعة نحنا عارفين انكم تجيدون التضليل بدرجة الشرف بس كمان ما لي الدرجة دي .. مصاب وعندو شنو كدا ما عارف في ركبتو اليمنى لاعب زي دا بدفعوا فيهو 100 الف دولار .. وعشان هم عارفين انو جابسون كره كل ما هو اصفر واحمر طلعوا لينا بنظرية ضرورة انو يخضع للكشف الطبي .. كشف طبي لي لاعب مقيد بي كشوفاتكم دا موضوع اول مره نسمع بيهو .. السمعنا بيهو انو الفريق لما يكون عايز يسجل ليهو لاعب اول حاجة بعملا بخضعوا للكشف الطبي ونتيجة الكشف الطبي هي البتحدد لكن لاعب لعب ليهو موسم ونصف معاكم يادوب عايزين تكشفو عليه دي والله ما ادونا ليها قبل كدا لكن في مريخ العجائب كل شيء جاااائز !

نجي لبقية (الكورال) قالو ايه ان الهلال اشترى الترام .. ااااي اشترينا الترام وعاجبنا .. وما بقدر يمشي ذاتو وح نجيب ليهو عجلة متحركة  نقعدو في كنبة الاحتياطي انتو مالكم شوفو فريقكم الماعارف عايز يعمل شنو ذاتو .. فريق من اول يوم تسجيلات سجل ليهو 7 وتاني يوم سجل 3 حتي اليوم التاني دخلو 10 لاعبين في الكشف من جملة 25 لاعبا ولسا التسجيلات باقي ليها 26 يوم يعني الاتحاد لو كل يوم بتسجلو ليكم لاعب واحد بس الا يرفع ليكم الكشف بتاعكم ل 60 لاعب .. موافقين والله لانو السيد الهلال سجل العايزو بالرؤية الفنية المحتاج ليها وخلى الساحة فااااضية من المواهب بعد كدا موافقين انو الاتحاد يعمل ليكم استثناء ويرفع عدد اللاعبين في كشفكم 60 لاعب برضو الوصافة (محمداكم) يعني مافي اي جديد بطل الممتاز معروف والوصيف برضو معروف …!

خليكم من دا كلو الاعلام السالب بعد ان تغزل في (ابوستة) وكتب فيه شعرا ونثرا ودفع فيه 2مليار لهلال الابيض ويقوم بعد ما  يسجلوا يعيرو ليهم تاني بعد كل هذه الاغراءات .. وبعد كل هذه المليارت قالو عنو كبير .. الغريبة لسا العمر رايح ليهم جماعة من الاعلام السالب بقولو ان عمرو 33 سنة واخرين بقولو وصل 36 سنة .. طيب لاعب كبير وعمرو 36 انتو كنتو عايزين تجيبيهو مدير تنفيذي زي ما اعلنتو في الصحف ولا شنو ؟؟؟

اقوليكم عمرو 70 سنة وبمشي بالعكاز برضو عاجبنا وسجلناهو لو ما عاجبكم (اقعو الخزان) !

من كلام الاعلام السالب نصل الي حقيقة  ان تسجيلات السيد الهلال 100% ودا هم الخايفين منو .. يعني زي ما بقولو انو الهلال تعبان ومدعوم من قبل الحكام والاتحاد وبعد دا شال كل البطولات المطروحة بعد التسجيلات ح يعمل شنو .. البطولة الافريقية عديييييييل ودا الخايفين منو الجماعة !

اخيرا اخيرا ..!

بيني وبينكم خط وسط ح يكون فيهو بشه … نزار … جابسون .. ابوستة … محمد عبدالكريم .. وابوعاقلة دي يعني انو مافي اي مهاجم بصل الدفاع .. حتي لو لعب الكاردينال  وهرون كقلبي دفاع ومعاهم عماد وهشام طرفي جنب .. وسط زي دا والله صعب شديد جدا تمشي منو .. يعني بعد كدا لو جابو لينا مهاجمين كبار خلااااص الموضوع دا انتهي … ما تتخيلو الدوري الممتاز او كاس السودان .. انا ما قاصد البطولات المحلية  دي… انا قاصد الاميرة الافريقية ومن بعدها بطولة العالم للاندية … يعني ما تستغربوا لو يوم الجوهرة طلعت ليكم بمنشيت يقول (الهلال والريال من يكسب الرهان ويتوج ببطولة العالم) عادي جدا والموضوع ما صعب مش انا زمان قلت ليكم انو الريال بشبه الهلال في كل شيء .. بس يوم المباراة دي ما بنعرف الريال ولا حاجة .. ما بنعرف الدون ولا بنزيما ولا جاريث  بل .. ولا مودريتش ولا بيبي ولا ايسكو بنعرف الهلال وبس بنجومه الكبار !

اخيرا جدا

كلامي دا ما تشوفوهو بعيد  عادي  ممكن يحصل وممكن نغلب الريال ذاتو ونكون بطل العالم ذاتو البعيد شنو يعني .. هي كرة قدم .. وكرة القدم تعطي لمن يبذل العرق والجهد داخل الملعب ولاعبينا ما شاء الله عليهم موهبة … وقدرات فنية مهوولة .. عارفين ح ينقصهم شنو الجهاز الفني بس .. يعني لو الكاردينال دا خلى (قوة الراس ) وتراجع عن فكرة التعاقد مع غارزيتو من الان يمكن ان نبارك للسيد الهلال بطولة افريقيا واحتمال كمان بطولة العالم !

اروع مافي السجود انك تهمس فيسمعك من في السماء

سبحانك اللهم وبحمدك

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.