دق الدلجة – محمد عبد الماجد – ابوستة (اتكسكت) 2 نوفمبر 2016

0
1

من رأسي :

مريخابي قالوا ليه المريخ سجل ابوعشرين والتاج وجلال ومحمد عبدالرحمن وكلتشي بعد العمر دا – قال ليهم خلاص (بص الوالي) نزل (التراب).

 من كراسي :

انما تفسر اعمال الانسان بالبواعث والدوافع قبل ان تفسر بالنتائج والغايات.

العقاد

  • سألوني في اذاعة (روسية) ، اذاعة (في الليلة ديك محمر) قالوا لي هل يوسف ابوستة لقبوه بي (ابوستة) عشان سعروا في السوق (6) مليار جنيه؟.

  • قلت ليهم بالروسي برضو حسب لغتهم – ابدا ..ابوستة لقبوه بي (ابوستة) ، عشان عندو (6) كرعين.

  • و(6) عيون.

  • و(6) رئات.

  • بي صراحة (رئة) بالروسي ما عرفت اقولها ليهم ..عشان كدا تميتها ليهم (120) السماني الصاوي.

  • اقول ليهم شنو عاد؟.

  • اتكسكت وسكت.

  • الروس ديل وقت يمسكوا ليك في الموضوع لو ما جاب ليه ريحة (حريقة) ما بفكوه.

  • امس في اخبار المواقع قرأت هذا الخبر : (هناك إجتماع مشترك سيعقد ما بين الهلال وإدارة الرياضة بالولاية الشمالية خلال الثلاثة أيام القادمة بالخرطوم للتفاكر والترتيبات لزيارة الهلال لدنقلا قبل إنطلاقة الموسم القادم).

  • في اذاعة (هندية) (اذاعة ابني عشك يا قماري قشة قشة الاسمنت طار السماء) – سمعت بالموضوع دا وين ما عارف؟.

  • ناس الاذاعة (الهندية) ضربوا لي يسألوني عن (الزيارة).

  • الهنود شفوت.

  • الهنود بيدردقوا في (النجيلة) وقت الفيلم يسخن.

  • زمان افلامهم عملوها لينا كلها (دردقة في النجيلة).

  • ونحن حسب غبانا ..كنا فاكرين (الدردقة) دي حب.

  • كنا فاكرنها حاجة مدهشة.

  • الفيلم كلو نصفق.

  • جينا الخرطوم ، لقينا ليك ناس بلة جابر وموسى الزومة والتاج ابراهيم بيدردقوا في (النجيلة) من غير افلام هندية.

  • ناس بشه ديل بيدردقوا ليك بلد بي حالها.

  • المهم ناس الاذاعة الهندية ..قالوا انت ما بتفتكر بحكم انك مراقب خطير (وعارف اي حاجة) ما بتفتكر زيارة الهلال للولاية الشمالية ممكن يكون فيها (ابوستة) جديد.

  • قلت ليهم يعني (12).

  • لا ..لا اعتقد ..(عملت ليهم شغل محمد لطيف المحلل السياسي)..لا اعتقد ذلك ..الهلال اكتفى بي (ابوستة) شمال كردفان.

  • كفاية علينا واحد.

  • و

  • (ونحن عايشين والحمدلله (النفس) بينزل ويطلع إلى الآن ..ولا ينقصنا شيء سوى رؤياكم الغالية).

  • و (دروري ضروري) تجونا في الاجازة الكبيرة!!.

  • في تحليل خطير ايضا في تلفزيون (الكديسة ما لقت اللحمة جابت ليها موية فول)..في التلفزيون دا سألوني عن ابوستة.

  • قلت ليهم انتوا يا جماعة وقت تحصل ليكم مشكلة ..بتعملوا شنو؟.

  • بتصرفوا كيف؟.

  • قالوا لي بنضرب (3) تسعات.

  • قلت ليهم تاني لو حصلت ليكم مشكلة ـ او اي كارثة ..ما تضربوا (3) تسعات.

  • قالوا لي نعمل شنو؟.

  • قلت ليهم تاني لو حصلت ليكم حاجة بالشكل دا ..اضربوا (6) واحدة ..ابوستة ذاتو بيجيكم جاري.

  • ستة واحدة بتفككم.

  • ستة واحدة بتحلكم.

  • (3) تسعات ليه؟.

  • في تلفزيون (اتنين لو قالوا ليك رأسك ما فيك ..ما تمشي ليك صالون حلاقة تتعب نفسك ساكت) – في التلفزيون دا سألوني ليك ..قالوا لي الفرق بين تسجيل شيبوب في الهلال وتسجيل ابوستة شنو؟.

  • قلت ليهم اول حاجة دعونا نتفق انهم الاتنين لبسوا (الكسكتة).

  • قالوا لي جميل.

  • نخش على الفرق.

  • الفرق شيبوب قفز من الطابق الثالث ..وابوستة قفز ليك من الطابق السادس.

  • ناس تلفزيون (اتنين لو قالوا ليك رأسك ما فيك ..ما تمشي ليك صالون حلاقة تتعب نفسك ساكت) طوالي قطعوا الارسال.

  • بمناسبة التلفزيونات  دي ..قالوا ليك قناة S 24  طلعت ما قناة اقتصادية.

  • تتخيلوا طلعت شنو؟.

  • طلعت قناة منوعات.

  • عارفين دا زي شنو؟.

  • دا زي يكون جنبكم في الحلة في (صيدلية).

  • الصيدلية دي في حلتكم ليها (24) سنة.

  • كل يوم بتجي ماري فيها.

  • وكل يوم الصيدلية دي بتشيل منها دواء.

  • تتخيلوا في النهاية (الصيدلية) دي طلعت شنو؟.

  • الصيدلية طلعت (مكتبة).

  • يعني لو عندكم قريبكم عندو سكري ..ممكن يروح فيها.

  • عمرنا كلو فاكرنها (صيدلية)..وهي في الحقيقة (مكتبة).

  • قناة  S 24  زي الزول البيعزمك فطور.

  • يجيب ليك في الفطور (عدس).

  • عدس ..عدس ..ما في ذلك شك.

  • عدس ما فيه ولا كلمة.

  • تتضرب في العدس دا ..لمن لونك يبقى (عدسي).

  • وقت خلاص تقوم من العدس ..الزول العزمك يقول ليك ..انت قايل الشيء دا (عدس).

  • تقول ليه شنو؟.

  • هو بالله ما عدس ..دا كمان شن جنسو؟.

  • الزول العزمك عشان يرفع رأسو..يقول ليك دا (سمك).

  • كمان نحن ما بنعرف السمك.

  • وإلّا العدس غريب علينا؟.

  • عشان ترفع للزول العزمك معنوياتو ..تقوم تقول ليه ..والله سمكك دا ما فيه اي شوك.

  • ولا شوكة.

  • اول مرة اشوف لي سمك (فتة).

  • ناس الطاهر حسن التوم بعد كم وسعبين يوم ..طلعوا يقولوا لينا القناة حقتنا دي ما قناة اقتصادية.

  • ابدا.

  • القناة حقتنا دي قناة منوعات.

  • غايتو في البلد دي ..قادر الله.

  • مخير الله.

  • في البلد دي لو في زول زرع ليه (لالوبة)..ينتظر ثمرها ..يمكن تجيب ليه (تفاح).

  • اصلو ما بعيدة عليهم ناس الطاهر حسن التوم ديل.

  • يعني زول يقرأ (اقتصاد) خمس سنوات.

  • وقت يتخرج..تلقاه حايم ليه بي سماعة طبية.

  • تقول ليه دا شنو البتعمل فيه دا؟.

  • يقول ليك ..بعد ما اتخرجت من اقتصاد ..اشتغلت (طبيب).

  • فكت.

  • و

  • (ونحن عايشين والحمدلله (النفس) بينزل ويطلع إلى الآن ..ولا ينقصنا شيء سوى رؤياكم الغالية).

  • و (دروري ضروري) تجونا في الاجازة الكبيرة!!.

  • عليكم الله خلونا مع (ابوستة).

  • نحن مالنا..

  • ان شاءالله في النهاية يقلبوها (محل توزيع باسطة).

  • انابة عن كل الهلالاب الشرفاء.

  • عن كل الاحباب..

  • عن ناس الحلة ..واحد ..واحد..

  • الزول البلاقني الصباح ..والما بلاقيني.

  • الهنا والهناك…

  • الفى البلد ..والذي قرر ان يتخارج.

  • كلهم بدون فرز..

  • الجماعة ديل ..جميعهم ..وصوني ليك ..والوصية بالمهلة.

  • كلهم قالوا لي ..عليك الله اشكر لينا السماني الصاوي شديد.

  • واشكر لينا ابوه.

  • ومدير الكورة في هلال الابيض.

  • ومنسقهم الاعلامي.

  • اشكرهم لينا جميعا ..وقول ليهم السماني الصاوي قدم للهلال اكبر خدمة.

  • بركة الخطفوه.

  • بركة اللفحوه.

  • السماني هو نجم التسجيلات الحقيقي ..عارفين ليه؟.

  • عشان جاب لينا (ابوستة).

  • والله لو السماني ما خطفوه ..(ابوستة) دي لو جنستوه ما تلموا فيه.

  • ولا تحلموا بيه.

  • عشان كدا (الخطفة) ذاتها مسرحية هلالية.

  • حاجة خلتنا نطلع بالسمينة.

  • بالقوية.

  • عشان كدا ..حافز السماني مفروض يدفعوا الكاردينال..

  • مفروض الكاردينال ما يرجّع قروشو من السماني الصاوي.

  • الزول دا قدم لينا اجمل خدمة.

  • عاش السماني.

  • عاش نضال مدير الكورة في هلال الابيض.

  • غايتو يا السماني ..خايفك بعدين تطلع زي  S24.

  • يعني بدل (طرف شمال)..تقول ليهم انا بلعب (حارس مرمى).

  • ناس المريخ امس سجلوا ليهم تلاتة حراس مرمي ..تقول عاوزين يقلبوا المريخ (شركة الهدف).

  • الخوف بيعمل اكتر من كدا.

  • والله ناس الهلال ديل قالوا جايبين ليهم مهاجم …المرمى قاعد يشوفو متل السوق الشعبي.

  • يشوت من اي حتة يجيب فيه قون.

  • و

  • (ونحن عايشين والحمدلله (النفس) بينزل ويطلع إلى الآن ..ولا ينقصنا شيء سوى رؤياكم الغالية).

  • و (دروري ضروري) تجونا في الاجازة الكبيرة!!.

  • …………

           و

  • والله بعد ابوستة دا ..عاوزين لينا (مطرة) عديل كدا.

  • ناس المريخ تاني ح يمسكوا في (طلب الفحص) قوى.

  • ما اظن ..تاني يلعبوا قدام الهلال.

  • انسحاب على طول.

  • التاج ابراهيم لسه بيلعب كورة؟.

  • وكلتشي جابينو..لاعب وإلّا مدير كورة؟.

  • السن ليها احكام.

  • الحمدلله الهلال انهى عقد سادومبا.

  • عشان تاني ما في واحد فيكم يقول لينا ..الهلال جاب سادومبا.

  • المريخ انسحب هذا الموسم ..اي تلفزيون تفتحتو تلقى فيه واحد من ناس المريخ بقول ليك الهلال انسحب الموسم الماضي.

  • اصلو ما عندهم اصالة عن نفسهم.

  • …………

  • السيدة (ل) – الليلة الفول طعمو من الفرح لحمة ..لحمة.

  • وقرّط على كدا. 

NO COMMENTS

LEAVE A REPLY