دق الدلجة – محمد عبد الماجد – المشكلة فينا ما في المدرب 29 نوفمبر 2016

2,036 views مشاهدة
أخر تحديث : الثلاثاء 29 نونبر 2016 - 4:39 مساءً
دق الدلجة – محمد عبد الماجد – المشكلة فينا ما في المدرب   29 نوفمبر 2016

 من رأسي :

كان صياد ماهر شديد ..مرة مشى (البحر) يصيد ليه (سمكة) ، رمي سنارتو صاد ليه (غزال).

 من كراسي :

الزول الزمن دا لو موبايلي جلاكسي نوت 7 وقع واتكسر ، احسن من يقولوا ليه : (الغاز قطع).

  • بقينا نشيل مدرب ونجيب مدرب.
  • زي كباية الشاي.
  • فترة الكاردينال في الهلال اشرف على الهلال فنيا (15) مدرب.
  • هذا العدد الكبير من المدربين ما فيهم مدرب واحد استمر موسم كامل في الهلال.
  • معقولة الغلط في المدربين ديل كلهم …ونحن الصاح.
  • الغلط فيهم والكاردينال هو الصاح.
  • مرة صربي.
  • ومرة بلجيكي.
  • ومرة مصري.
  • ومرة تونسي.
  • ومرة فرنسي.
  • ومرة سوداني.
  • عملنا اي حاجة في الدنيا دي.
  • والحال يا هو نفس الحال.
  • ممكن بالطريقة دي نحقق البطولات المحلية ..لكن صعب في ظل هذه الاوضاع نحقق بطولة قارية.
  • بتبقى مستحيلة.
  • ما في بطولة قارية بتحقق من غير استقرار.
  • الاستقرار الفني والاداري اهم عناصر تحقيق البطولات القارية.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونافي الاجازة الكبيرة!!.
  • الكاردينال الموسم دا شال ليه مدربين اتنين قبل ما يتعاقد معاهم.
  • اطاح بيهما بعد ان حسم امرهما.
  • الفرنسي لافاني هو المدرب الثالث في ظرف اسبوعين.
  • من محنا قالوا ليك الكاردنيال يحسم امر غارزيتو ويتعاقد معه لقيادة الهلال في الموسم الجديد وينهي التعاقد معه.
  • نفس الشيء فعلوه مع المدرب الصربي.
  • الهلال يحسم امر المدرب الصربي ..وينهي التعاقد معه.
  • وممكن المدرب الفرنسي الذي اعلن التعاقد معه ايضا يعلنوا صرف النظر عنه.
  • بقت ما في حاجة مضمونة.
  • ما بهمنا اسم المدرب.
  • ولا سيرته.
  • ولا انجازاته.
  • طالما في النهاية سوف يتم الاطاحة به بعد اول خسارة.
  • لو كنت في مكان الكاردينال كان اي مدرب اتعاقد معه اتخير ان يكون مدرب صغير وما عندو حاجة.
  • عشان لمن يطيح بيه ما في زول يقول شيء.
  • بيبقى موجع ان يتعاقد الهلال مع مدرب كبير ..ويتم الاطاحة به بعد اول تعثر للفريق.
  • في كورة القدم المدرب بيبني شخصيته من الهزائم.
  • البطولات لا تحقق بالانتصارات وحدها.
  • البطولات تحقق بالهزائم ايضا.
  • هذه جزئية مهمة يجب التعامل معها.
  • يجب وضعها في الاعتبار.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصناشيءسوىرؤياكمالغالية).
  • و (دروووري ضروووري تروووري) تجونا في الاجازة الكبيرة!!.
  • لو جبنا فيرسجون بعد عمرو دا كلو ..بننتظرو عشان يتعادل اول تعادل ونطيح بيه.
  • الناس كلها ح تبرر الاطاحة دي.
  • يقولوا ليك مدرب كبير وفي حجم فيرجسون ويتعادل مع فريق في الدوري الممتاز.
  • معقولة بس.
  • شيلوه.
  • والله ما يدقها معانا تاني.
  • وناس عماد الطيب يعجبوك..يطلعوا ما يخلوا ليهم (مبرر).
  • ديل برروا اي شيء.
  • جابوه يبرروا.
  • شالوه يبرروا.
  • خلوه يبرروا.
  • ما عندهم (قشة مرة).
  • بس مع الجماعة.
  • الكاردنيال شايت وين؟..بيشتوا معاه.
  • لو جبنا فينجر …ح تلقي في جماعة ينتقدوا ليك فينجر ويقولوا ليك هو عمل شنو مع الارسنال؟…عشان تجيبوه لينا.
  • نعمل بيه شنو؟..ومورنيهو كل ما يلاقيه بهين فيه.
  • قاعد ليه قريب لربع قرن مع الارسنال ما عمل اي شيء.
  • عاوز يعمل ليه حاجة مع الهلال في سنة.
  • نحن كدا.
  • طبعنا.
  • سلوكنا.
  • كل حاجاتنا بقت كدا.
  • بنخلي اي شيء.
  • وبنقبل على المدرب.
  • بنفتكر انو المشكلة في المدرب.
  • وبنعتقد ان الحل هو الاطاحة بالمدرب.
  • طبعا الاطاحة بالمدرب اسهل شيء.
  • الاطاحة بالمدرب ما عاوزة ليها عبقرية.
  • ولا فيها (انجاز).
  • يتخيل لي كدا الكاردينال بتعاقد مع المدرب عشان يطيح بيه.
  • يعني اول ما يتعاقد الكاردنيال مع المدرب بكون منتظر بفارق الصبر عشان يطيح بيه.
  • بكون قاعد ليه على الهبشة.
  • والمشكلة ما في الكاردينال فقط.
  • المشكلة فينا كلنا.
  • كلنا نحن شركاء في ذلك.
  • نحن كلنا جمهور واعلام جزء من هذه الثقافة.
  • اصلا ما بنحمّل الكاردنيال المشكلة كلها.
  • نحن اول ما يجيبوا ليهم مدرب جديد بننتظر اول مباراة ليه ومن الشوط الاول بنحكم عليه.
  • دا زول ما عندو اي حاجة.
  • بنقول ما في بصمة ظاهرة.
  • والعجب لو الاداء انخفض في الشوط التاني.
  • بنخلي اي حاجة وبنقول المدرب في شوط المدربين ما عندو اي وجود.
  • ما عندو اي شخصية.
  • دا مدرب ما نافع.
  • شخصيتو لو كانت قوية ..بنقول بيعمل مشاكل وخلافات مع اللاعبين.
  • شخصيتو تكون ضعيفة ..بقولوا ليك بيسمح للمجلس بالتدخل في شأنه.
  • يدخلوا في شأنه بشيلوه عشان شخصيتو ضعيفة.
  • ما يعطي فرصة لي اي زول يدخل في شغلو ..بشيلوه وبقولوا ليك الزول دا رئيس النادي ما قاعد يسمع كلامو.
  • شخصيتو صعبة.
  • المدرب يعمل ليكم شنو؟.
  • الهلال يغلب يقولوا ليك الاداء ما كويس.
  • الاداء يكون كويس ..يقولوا ليك الهلال شبكتو بتستقبل هدف في اي مباراة.
  • اي حاجة بشوفوا ليها مضاد حيوي ..عشان يشيلوا المدرب.
  • الجمهور ذاتو رسخ لهذه الثقافة.
  • المدرب يثبت ليه تشكيلة ثابتة ..يقولوا ليك الزول دا بيلعب بتشكيلة واحدة وما بعطي بقية العناصر فرصة.
  • كتل الفريق.
  • بيلعب بـ (14) لاعب فقط.
  • تبديلاته في المباراة معروفة.
  • المدرب يمنح الفرص لعناصر متعددة من الفريق ، يقولوا ليك المدرب دا اي مباراة بيدخل بتشكيلة جديدة.
  • تشكيلته ما ثابتة.
  • المدرب عليكم الله يعمل ليكم شنو؟.
  • يتقطع ليكم.
  • بعدين انتوا وقت عارفين الحاجات دي كلها ..ما تمسكوا الفريق براكم.
  • جايبين ليكم مدرب فرنسي عشان تنظروا ليه.
  • عشان توروه يشتغل كيف؟.
  • الخبير فيكم منو؟.
  • هو وإلّا المدرب.
  • الاجنبي منو؟.
  • هو وإلّا انتوا؟.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • المدرب القادم للهلال بغض النظر عن اسمو.
  • وهو منو؟.
  • وجنسيتو.
  • وطريقة لعبه.
  • تعالوا نعطيه الفرصة يتشغل.
  • ما نقعد نفتش لينا لي اسباب عشان نشيلو.
  • ما نقعد نمهد للاطاحة به بعد كل مباراة.
  • خلوه يشتغل.
  • يلعب بشه ..ما يلعبه ..بي طريقتو.
  • يشيل الريدة.
  • يجيب كاريكا.
  • بي طريقتو.
  • ما عندنا معاه قضية.
  • حاسبوه بعد انتهاء الموسم.
  • ما تحاسبوه بالقطعة.
  • مباراة ..مباراة.
  • المدرب القادم يكون لافاني.
  • يكون الفاتح النقر.
  • يكون احمد آدم.
  • يكون مورنيهو.
  • ما عندنا معاه قضية.
  • نحن هينين.
  • البقنع المجلس شنو؟.
  • المدرب الجديد ..الاكيد اختارو الكاردينال.
  • واتعاقد معه الكاردينال.
  • وجابو الكاردينال..
  • يعني ما في زول جابو.
  • المدرب الجديد ..ما اختارو صلاح ادريس.
  • ولا جابو ليكم الامين البرير.
  • طالما الاختيار كان من الكاردينال ..يا ريت يا الكاردينال تمنحه الفرصة الكافية.
  • معقولة نحن ح نقعد ندافع ليكم على اختياراتكم.
  • لو عندك رأي فيه من الآن شيلو.
  • ابحثوا عنه كويس.
  • شوفوا سيرته.
  • طريقته.
  • اسلوبه.
  • تعاملاته.
  • عندكم فيه رأي ..ما تتعاقدوا معاه.
  • يا الكاردينال ما تتعاقدوا مع مدرب عشان الزمن ضايقكم.
  • ما تجيبوا ليكم مدرب عشان فترة الاعداد مفروض تبدأ.
  • احسنوا الاختيار.
  • انتظرنا كثيرا.
  • وممكن ننتظر تاني اسبوع.
  • اسبوعين.
  • احسن من تتعاقدوا مع مدرب وتشيلوه لينا بعد فترة الاعداد.
  • لو خلاص الموضوع اتحسم ..يبقى تستحملوا المدرب بكل تفاصيله.
  • تتحملوه بكل اخفاقاته.
  • وتتحملوا معه المسؤولية.
  • بدل ما تشيلوها ليه براهو.
  • الموضوع دا اتكرر كتير.
  • وبقى مشكوف.
  • وما في زول عندو صبر للاعادة تاني.
  • كفاية علينا.
  • عاوزين الاستقرار الفني.
  • ما عاوزين اكتر من الاستقرار.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • ……………

        و

  • اطهر الطاهر اصبح مطلب جماهيري.
  • لا نريد ان يحسب على الكاردينال اخفاق في هذا الجانب.
  • المدافع خليناه.
  • قنعنا منو.
  • احسموا لينا موضوع اطهر الطاهر.
  • ………
  • السيدة (ل) – اول مرة اكتشف (السمك) من الطيور في بيتكم.
  • وقرّط على كدا.
رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.