دق الدلجة – محمد عبد الماجد – بصمة غارزيتو ظهرت 6 نوفمبر 2016

4,803 views مشاهدة
أخر تحديث : الأحد 6 نونبر 2016 - 11:35 صباحًا
دق الدلجة – محمد عبد الماجد – بصمة غارزيتو ظهرت   6 نوفمبر 2016


 من رأسي :


مجلس المريخ (بص الوالي) طبيعي ان لا يعرف اذا كان شيبوب في المريخ بيلعب كـ  (محترف) ام انه كان (هاوي)؟..ما دام المجلس هذا بيقصد يشطب (عمر بخيت) بيلقى نفسو شطب (ابراهومة).
 


 من كراسي :


ضعني حيث شئت من حبك القديم ومن حبك الجديد ، فلن اقول شيئا ، ولكن اجتهد في ألا تنزلني منزلة مخزية فان لا استحق منك هذا الخزي.
مد موازيل دي لسبيناس
 

شاعر جديد ..اكتسح الساحة الادبية.
تصدر المشهد.
قالوا ليك الشاعر دا ..اصبح نجم المنابر الاول.
اخطر زول.
بنافس ليك المتنبيء في قبرو.
اي قصيدة بكون عاوز يقولها للجمهور …بيبدأ ليك بهذه الطريقة :
مدخل اول : ابوستة.
الناس دي تقوم وتقع.
والصفقة من اول زول في الصف ..لي اخر صف.
يقوم شاعرنا ينفلق ليك.
يرجع تاني ويقول.
مدخل تاني : جابسون.
الناس دي تنطط من الفرحة ..لمن (زرارير) القميص تتقطع.
عيونهم تقع في طرفهم من الضحك.
الشاعر يقوم يندلق ليك حن.
ويقول بصوت جهور.
مدخل ثالث : ابراهومة.
الناس تتنفش ..ووزنها يزيد مع الغلاة دي 7 كيلو.
الشاعر يصدق..وينفعل ليك في الموضوع.
ويقول :
نص : ساماتا.
الناس ما بتصدق ..تكوريك بي اعلى صوتها ..الله عليك يا استاذ.
متعتنا والله.
كملت الشعر.
ما خليت لينا حاجة.
فرحة مبالغ فيها.
ثم يشرع بعد ذلك في (عيونها) ، ما بخلي ليها حاجة.
يفلفل ليك (العيون) دي زي (موية الشاي) السخنة.
يقلمها ليك عين ..عين.
واخر حاجة يقول : الجوهرة الزرقاء.
الناس وين تشيلو ووين تختوا ما بتعرف.
و
(ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
و (دروووري ضروووري تروووري) تجونا في الاجازة الكبيرة!!.
ندخل ليكم على العنوان.
على (بصمة غارزيتو ظهرت).
طبعا ح تستعجلوا لي.
وح تقعدوا تتغالطوا لي.
وتهمهموا براكم.
تطنطنوا في دواخلكم.
وانا ولا بشتغل بيكم.
ولا بقول ليكم حاجة.
من تقروا العنوان..ح تقولوا هو متين؟.
وناس الجرايد ديل بتكلموا ساي.
ودا كلام ما منطقي.
وما معقول.
وخلاص يا ناس الهلال عاوزين تنفخوا.
هو العقد الى الآن ما وقعوه مع غارزيتو..كيف يعني بصمتو تظهر؟.
ح تقولوا كدا.
رغم انو كلامكم ما عندو اي منطق.
وانتوا لو صبرتوا وشوفتوا التفاصيل ..ح تعرفوا كيف (بصمة) غارزيتو ظهرت في الهلال قبل ان يبدأ الاشراف الميداني على الهلال ، وقبل حتى توقيع العقد.
لو الهلال لا قدر الله لم يتفق مع غارزيتو ..برضو بنقول بصمة غارزيتو ظهرت في الهلال.
عاوزين تعرفوها ظهرت كيف؟.
ح اقول ليكم.
اصلو ما تستعجلوا.
اي حاجة بالروقة احسن.
بصمة غارزيتو ظهرت في الانتدابات التى سوف يكملها الهلال ان شاءالله في ملف المحترفين.
غارزيتو اشرف ورشح الاجانب الذين سوف يدخلوا لكشوفات الهلال في هذه التسجيلات.
بل ساعد غارزيتو في اكمال التفاوض معهم ، لأنه هو الذي فاوضهم باسم الهلال وهو الذي شجعهم على ذلك وحرضهم على القيد في كشوفات الهلال.
الاكيد لو لم يكن غارزيتو وسيط لهذه العمليات يبقى نجاحها في كف عفريت.
لذلك نقول ان بصمة غارزيتو ظهرت – لأن المدرب الفرنسي انتدب لاعبين يتوافقوا مع الطريقة التى سوف يلعب بها.
الاسلوب الذي سوف يقود به الهلال.
خاصة ان غارزيتو درب الهلال ويعرف مقدرات لاعبيه.
هو يكمل في الهلال الآن ..لأنه يعرف نواقصه ، ويعرف احتياجاته.
واكبر دليل على ذلك ان غارزيتو طلب جابسون بالاسم.
وان جابسون ما شجعه على التوقيع في كشوفات الهلال ..علمه ان غارزيتو سوف يقود الهلال.
جابسون كان قد تألق بشكل ملفت عندما كان غارزيتو يدرب جابسون في المريخ.
اللاعب الآن على موعد مع التألق ..وهو يلتقى باغارزيتو في بيئة افضل ..ومجتمع احسن وفريق اكبر.
و
(ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
و (دروووري ضروووري تروووري) تجونا في الاجازة الكبيرة!!.
فائدة المدير الفني صاحب الشخصية القوية انه يستطيع ان يفرض شروطه واسلوبه.
ويستطيع كذلك ان يلزم مجلس الادارة بتحقيق طلباته.
وقد ألزم غارزيتو مجلس الهلال ورئيسه الكاردينال باستقدام محترفين على اعلى مستوى.
هذه لوحدها حسنة ..ان يكون الاختيار اختيار مدرب.
يحسب لمجلس الهلال اتجاهه للتعاقد مع مدرب صاحب شخصية قوية.
مدرب معروف بصعوبة شخصيته.
لا اظن ان مجلس الهلال يجهل شخصية غارزيتو ولا يعرفها.
هو طالما تعاقد معه ، يبقى ملزم بتحقيق كل طلباته.
بل ملزم كذلك بالابتعاد عن منطقته ..وعدم التدخل في عمله.
واحسب ان الهلال لم يضره شيء في السنوات الماضية غير التدخل في عمل المدير الفني.
غارزيتو يستطيع ان يحمي قراراته ..وان يبعد الكل عن منطقته.
يفرض غارزيتو نفسه وشخصيته من (العقد) الذي يوقعه مع النادي الذي يعمل فيه.
اتمنى ان تكون شروط فسخ العقد بين الطرفين قاسية ..حتى لا يقع انفصال بين الطرفين فيما بعد لا قدر الله.
الهلال يحتاج الى الاستقرار الفني.
ان توفر للهلال استقرار فني سوف يصل الى اهدافه التى يسعى لها.
غارزيتو الآن ساعدوه بالمساندة ..وبالدعم.
اتركوه يعمل وابعدوا عن اختصاصاته.
اتمنى ان نتعلم من تجاربنا.
ان لا نتدخل في تشكيلته.
وان لا يكون لنا رأي في خطته واسلوبه وعمله.
الاعلام الهلالي يجب ان يبعد عن المنطقة الفنية.
وكذلك الجمهور والسوشيل ميديا.
كل هذه الوسائط وكل هذا القطاعات بداية من مجلس الادارة يجب ان تترك الشأن الفني للجهاز الفني.
من ثم يمكن التقييم بعد انتهاء الموسم.
علينا ان نتخلص من عيبونا.
ان نتخلص من اخطائنا.
وان نعمل جميعا لدعم الجهاز الفني.
اتركوا غارزيتو يعمل بعيدا عن تنظيرات الجرايد والقروبات والمدرجات.
الموسم القادم ..هو موسم لدعم الهلال.
لمساندة الهلال.
ان لم يتوفر للهلال الدعم الكافي لن يحقق البطولات.
كل الاصوات السالبة في غارزيتو يجب ان تصمت.
كل الاراء المتحظفة ..يجب ان تختفي.
المرحلة الآن مرحلة مساندة.
ودعم.
اتمني ان يوفر مجلس الهلال كل طلبات غارزيتو وان يبعد كليا من التدخل في شأنه.
اتركوه يعمل.
تقبلوا منه كل شيء.
يمكن ان يخسر الهلال لا قدر الله.
ويمكن ان يتعادل.
البطولات ..لا تحقق بالانتصارات فقط.
هذه معادلة خاطئة.
البطولات تحقق من الانتصارات والهزائم والتعادلات.
البطولات تحقق بالصمود.
والصبر.
ما في حلاوة بدون نار.
لو عاوزين تحققوا بطولات خارجية ..تستحملوا اي حاجة..وتقبلوا اي شيء.
تتعلموا من اي موقف.
وتقيفوا بعد اي عترة.
بعد التسجيلات الاخيرة الهلال يحتاج الى فترة حتى يصل الى مرحلة التجانس.
الهلال عاوز ليه مدة.
ما تفتكروا الموضوع خلاص.
ابوستة.
وساماتا.
وجابسون.
الاسماء وحدها لا تحقق البطولات.
البطولات تحقق بالعمل والجد والكد.
وقبل ذلك بالصبر والصعاب.
و
(ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
و (دروووري ضروووري تروووري) تجونا في الاجازة الكبيرة!!.
 


     و


ضفر الايامات دي قافل تلفونو.
عاوز ليه سبب يشطبوه بيه.
ورمضان عجب..حاسد جابسون وابراهومة عديل.
الشطب اصبح حلم معظم لاعبي المريخ.
بعد التسجيلات …ندخل لاهم مرحلة.
مرحلة الاعداد …هي الطريق الرئيسي لتحقيق البطولات.
اعداد جيد يعني موسم ممتاز.
الهلال هذا الموسم حقق الدوري والكاس.
وسقف الطموحات سوف ترتفع اكبر من الدوري والكاس في الموسم القادم.
……………
السيدة (ل) – بفتش لي عن (صدفة) نتلاقى بيها عرضا في شارع النيل.
وقرّط على كدا.

رابط مختصر

أضـف تـعـلـيق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

ان كل ما يندرج ضمن تعليقات القرّاء لا يعبّر بأي شكل من الأشكال عن آراء اسرة الجوهرة الرياضية الالكترونية وهي تلزم بمضمونها كاتبها حصرياً.