دق الدلجة – محمد عبد الماجد – جددونا القدماء 24 نوفمبر 2016

0
10

 من رأسي :

احساسنا بقى عالي شديد…شتاء مافي ..وقاعدين نرجف من (البرد).

رفع الدعم عن الشتاء ..يكون في انك لا عندك ليه سيوتر ولا بطانية ولا حتى ملايا مدبلة.

ولا عندك ليه (جدادة) تسند ليك حيلك.

 

  • الاربعاء القادمة السيستم بيقفل.
  • بيقفل عديل كدا.
  • ويوم الخميس (السيستم) بطيخة ما بمررها ليكم.
  • عجورة ما بتمر.
  • الوقت ضايق شديد.
  • ونحن لغاية الآن ما شفنا حاجة.
  • مدافع ساكت يتقل لينا قلبنا ما سجلوه لينا.
  • يثبتنا.
  • ح نلعب بطولة الاندية الافريقية بي حسين الجريف.
  • نحن عندنا ندوة.
  • الحقيقة بنقولها ليكم.
  • ولا بنجامل فيها.
  • ما تقولوا لي ابوستة.
  • ابوستة يتقطع ليكم.
  • ابوستة يعمل ليكم شنو وإلّا شنو؟..وإلّا شنو؟.
  • هسع (جاجا) دا جايبنو من البرازيل عشان تعملوا ليه فحص طبي هنا وترجعوه.
  • خسارة صور ساكت.
  • والسوري الملكي لو تقاريرو الطبية طلعت نضيفة – امانة فيك يا بلة جابر لو ما لميت فيه في زقاق ضيق ولجنت ليه ركبه الاتنين.
  • والله لو تقاريره الطبية طلعت نضيفة …المغصة ح تشقنا.
  • نحن في الهلال جننا وجن المحترف البتجاوز الـ (30) سنة.
  • ما بندورو.
  • ولا بنزل لينا من زور.
  • كمان عاوزين تعملوا لينا الهلال المريخ.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازةالكبيرة!!.
  • نحن اللاعب من المريخ لو ما كان صغير في السن ما قاعدين نسجلو.
  • ولا قاعدين نمشي عليه.
  • المريخ سجل هيثم مصطفى بعد (17) سنة في الهلال.
  • والمريخ سجل المعز محجوب بعد (14) سنة في الهلال.
  • والمريخ سجل عمر بخيت بعد (12) سنة في الهلال.
  • والمريخ سجل كلتشي بعد (10) سنة من لعبه مع الهلال.
  • وسجل التاج ابراهيم بعد (8) سنوات.
  • المريخ بيسجل اللاعب من الهلال بعد ان يدخل سن الاعتزال.
  • الهلال بيفعل عكس ذلك.
  • الهلال سجل حمودة بشير وهو مسجل في المريخ تحت السن.
  • والهلال سجل شيبوب وهو يلعب في (رديف) المريخ وكمان هاوي.
  • والهلال سجل قبل ذلك علاءالدين يوسف وهو يافعا في المريخ بعد 3 سنوات فقط لعبها في المريخ.
  • وجاء الهلال هذا الموسم وسجل ابراهومة وهو لاعب صاعد من (الرديف).
  • والهلال سجل اوكرا 23 سنة فقط.
  • وكذلك جابسون.
  • شوفوا نحن بنسجل في شنو؟.
  • وانتوا بتسجلوا في شنو؟.
  • فرق كبير.
  • هسع عليك الله يا الكاردينال ما تخرب لينا النظرية.
  • ما تخرب لينا الرصة.
  • لاعب محترف اتجاوز الـ (30) لو بيجيب لينا بطولة كاس العالم للاندية براهو ..ما عاوزنو.
  • نعمل بيه شنو؟.
  • كلام زي دا ما بنفع معانا.
  • ولا قاعد يخارج.
  • ولا بنقبل بيه.
  • انتوا عاجبكم البيحصل في المريخ.
  • ديل لملموا الناس القطرهم فات ..وقالوا ليهم تعالوا ألعبوا كورة في المريخ.
  • جابوا ليك كلتشي من تاريخ سنة تالتة.
  • والتاج ابراهيم من تاريخ سنة خامسة.
  • وباسكال من تاريخ سنة رابعة.
  • وحقار من كتاب المطالعة.
  • وقالوا ليهم تعالوا ألعبوا في المريخ.
  • انتوا عاوزين تلعبوا بيهم (خماسيات).
  • مشاركين بيهم في دورة رمضانية.
  • باسكال دا من زمن (جدودنا القدماء).
  • زمن عصير الليمون بيعملوه بي (الحرجل).
  • وطلب الفول فيه (سمكة).
  • وجوز الحمام معاه (جدادة).
  • الله – الدنيا كانت بي خيرها والله.
  • لا في رفع دعم.
  • ولا رفع ضغط.
  • زمان ما في صانع العاب او مهاجم بيعمل ليه (مخالفة).
  • المخالفة بيعملها فقط (الباك).
  • هسع تعال شوف الحاصل..رئيس النادي ممكن ينزل الميدان ويعمل ليه مخالفة.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونا في الاجازةالكبيرة!!.
  • باسكال راجع ليه بي (دقن)…الله يسألنا دقن في سواق قندران ما في.
  • انت يا باسكال (جدود الوطن) ..بدون دقن ..كنت قاعد تجلي الكورة ..هسع بي دقنك دي كورتك إلّا تتمها (ارشادات) ونصائح.
  • تقول جايبنك لي عقد.
  • وكان لي كلتشي (جدودنا زمان) ، تاني إلّا يلعبها ليكم (نظري).
  • شوفوا الجماعة الما بيخجلوا ديل ..جايبين ليهم عاشور الادهم.
  • 35 سنة.
  • المشكلة عاشور الادهم بعد السن دي دفعوا فيه 450 الف دولار.
  • هسع عاشور الادهم دا لو قالوا لي (ادفع) ليه باب ساكن بدفعو ليه.
  • قرش ما بيستاهل.
  • المضحك والحاجة البتثبت ان المصريين ديل فاكنها في نفسهم وعايشين في الدور ..ما قالته زوجة عاشور الادهم في اتصالها الهاتفي مع مدحت شلبي عندما استضاف الاخير عاشور الادهم في مساء الانوار بقناة ON ..فقالت زوجة عاشور الادهم انهم فضلوا ان يبقوا في الفندق ..وان يستقروا فيه بدلا من ان يسكنوا في شقة.
  • عارفين ليه.
  • عشان السودان (عتمة).
  • المدام بتخاف تنزل الشارع في السودان.
  • طيب عاشور الادهم بيتفاصح على شنو؟.
  • عامل لينا فيها ابوعرام.
  • عتمة في السودان.
  • انتوا عايشين وين؟.
  • يا ربي عاشور الادهم قادم للمريخ من الارسنال الانجليزي.
  • يا ربي عاشور الادهم متزوج من شجرة الدر.
  • قومي بلا عتمة معاك.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • نهاية الكلام وبالواضح كدا.
  • ومن غير لف ودوران.
  • وكمونية.
  • كمونية شنو؟.
  • عاوز اقول ليكم …المريخ بقى يذكرني ليك بي جدودنا القدماء.
  • زمن النار بيولعوها بالفرك.
  • والموية بيشربوها من الخريف للخريف.
  • زمن الانسان البدائي الاول.
  • المريخ بقى كدا.
  • جدودنا القدماء.
  • فريق …كل لاعبيه الكشافات بيشوفها متل (الشمعة).
  • ديل انتوا ح تلعبوا بيهم كيف في (النقعة)؟.
  • ح تلعبوا بيهم كيف في عطبرة.
  • قالوا ليك سلك كان في الدفعة التى كانت وراء جلال ابراهيم.
  • وود الشريف قرأ مع التاج ابراهيم في الكلاكلة.
  • وكان كلمتكم عن باسكال وعمرو ..ما بتتموا لي العمود دا.
  • ولا بتعاينو لي تاني.
  • باسكال دفعة مازدا في الكورة.
  • غايتو يا شلش وشيبولا واكرا بختكم.
  • جابوا ليكم عجايز …الواحد فيهم لو عاوز يطلع ليه كورنر عاوز ليه (اسبوع).
  • الكبر حصل.
  • والعمر عندو احكام.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • ما يحدث في المريخ ..ما عاوزنو يتكرر في الهلال.
  • نحن لا بنعرف جاجا.
  • ولا بنعرف ملكي.
  • خلونا مع ناس شلش واكرا ديل.
  • مع ناس تيتيه.
  • عشان نرجع (الدعم) من تاني.
  • …………….

         و

  • التسجيلات باقى ليها (6) يوم.
  • والهلال دفاعه مازال يعاني.
  • ولم تحدث فيه اضافة واحدة.
  • المدرب الصربي اذا تم التعاقد معه يمكن ان يعتبر اكبر انجازات الكاردينال الفنية.
  • الموسم الاخير ..هلال الابيض كان وصيف الهلال في الكاس.
  • الموسم الجديد ممكن اهلي شندي يبقى وصيف الهلال في الممتاز.
  • طبعا ذلك اذا كانت هناك رغبة في الاهلي شندي.
  • الاهلي شندي ما عندو طموح اكتر من ان يكون الثالث.
  • والدليل ما حدث في هذا الموسم.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • …………….
  • السيدة (ل) –بينك وبين الحيطة وقفت اعاين.

  • وقرّط على كدا.

NO COMMENTS

LEAVE A REPLY