دق الدلجة – محمد عبد الماجد – صابر معاك 2 ديسمبر 2016

0
150

 من رأسي :

وقت شفت لاعبي المريخ بالبدل والقمصان والكرفتات وهم في طريقهم الى تركيا ..قلت الجماعة ديل ماشيين معسكر كورة في (البرد) دا ، وإلّا ماشيين يشاركوا في مسلسل (العشق الممنوع)؟.

غايتو (البدل) عندكم – لكن كورتكم دي (عراقي) كتير عليها.

من كراسي :

ناس الهلال في اليوم الاخير منتظرين منهم يجيبوا لينا المدافع العاجي دابيلا او على الاقل المدافع بكري بشير جابوا لينا مدافع الشعلة بحري أحمد يحيى.

دا زي الزول البكون منتظر (الغداء) يقوموا يجيبوا ليه (الشاي).

  • صابر جلبقة – عمك درشتو الحياة ما خلت ليه (جلحة) ، رأسو فيه (29) جلحة ، غير (الجلحات) القاعد يتحرفن عليهن.
  • عندو (جلحات) قاعد يواريهن.
  • بدسهن زي (التومات).
  • اسعار الادوية عملت ليه (13) جلحة زيادة.
  • صابر جلبقة نص حياتو كان بيضيعها في (الكوتشينة).
  • يومو كلو (كوتشينة).
  • زول بتاع كوتشينة.
  • في الكوتشينة ما في زول بيلحقو.
  • زول حريف – 14 – حريق – وست – هارتي.
  • ما بتلحق.
  • عندو فلسفة في الكوتشينة ..بقول ليك الكوتشينة بنكتل بيها الوقت.
  • الوقت ممل.
  • دمنا اتحرق ، عشان كدا بنلعب (حريق) ..نخفف بيه شوية على الاوضاع.
  • نهوّد بيها.
  • صابر جلبقة كان بي حرفنتو دي كل يوم بيجروه (خمسين).
  • بتفاصح ساكت.
  • الكرت بفكو ليك بالاسم.
  • من تقفل ، يجيب ليك (الكرت) جاري جري.
  • صابر جلبقة كان قاعد يقول (الاسعار) قاعد تنعكس على (ورقو).
  • بتنعكس على لعبو.
  • يعني لمن الغاز يزيد ..بفك ليك الخمسين من الجرة التانية.
  • لمن الكهربة تزيد ..لو كنت قافل على (انجلينا جولي) بيجيبها ليك.
  • الحاجات دي بتأثر على اعصابو.
  • بتخليه ما مركز.
  • عشان كدا بفك الخمسين.
  • يوم زادوا (الغاز) – صابر جلبقة اتجري من الجره التانية.
  • يوم زادوا الادوية …الخمسين جابها من الجرة الاولى.
  • الزول القاعد يمينو ..جراه ليك بي (شايب) هارتي.
  • الحلة اليوم داك سيّرت ليكم صابر جلبقة.
  • صابر جلبقة قال ليهم بس فلاحتكم فينا ..تخلوا (الغاز) وتمسكو في عمكم صابر جلبقة.
  • صابر كان بيمشي البيت زعلان.
  • زعلان من الجره.
  • ما زعلان من زيادة الغاز.
  • بيمشي البيت ..الساعة اتنين صباحا بقوم من النوم.
  • النوم بطير من رأسو.
  • بقوم يمشي لي صاحبو ود التكيم.
  • بدق ليه الباب في السقط دا.
  • ود التيكم بقوم من نومو ..بقول الحاصل شنو؟.
  • يمشي يفتح الباب يلقى ليك صابر جلبقة واقف في الباب ، بقول ليه الحاصل شنو؟.
  • المات منو؟.
  • صابر بقول ليه ما في اي زول مات.
  • اي حاجة تمام..بس عاوز اسألك يا ود التكيم ..لو فكيت ليك (عشرة الاسود) كانت خمسين برضو.
  • ود التكيم بقول ليه عشرة الاسود ما كانت خمسين ..الخمسين بس (الشايب) الفكيتو.
  • صابر جلبقة بقوم يمشي ..وهو بيطنطن براهو وبقول : الخلاني افك الشايب شنو؟..ما كان افك العشرة..كانت قاعدة ساكت ..خفت منها ساكت.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • صابر جلبقة بنتظر الواطة تصبح بفارق الصبر.
  • وبخليها تغيب ..ويمشي عشان يلعب الكوتشينة.
  • يقعد قدام.
  • يفك ليه خمسة شيرية.
  • ود التكيم يجرو ليك خمسين.
  • الحلة كلها تسير ليك صابر جلبقة.
  • صابر جلبقة يقول ليهم انتوا بس فلاحتكم في خمسة الشيريه الفكيتها.
  • زولكم يقوم من التربيزة.
  • زعلان زعل شديد.
  • ما شايف قدامو.
  • النوم بطير من عينو.
  • الساعة اتنين النوم بغلبو.
  • قدر ما حاول ..ما قدر ينوم.
  • يقوم يمرق في الحوش.
  • يفتح الباب ..ويمشي على ود التكيم.
  • يدق ليه الباب.
  • ود التكيم بقوم مخلوع..بقول الليلة في شنو كمان؟.
  • يفتح الباب يلقى ليك صابر جلبقة واقف بي عراقيه اللونو بقى (داكن) من الهم.
  • ود التكيم بقول ليه يا زول حاصل شنو؟ ..جايني بي عراقيك الزي (الخريطة) دا.
  • متل بستلة الفول.
  • صابر جلبقة بقول ليه عليك الله يا ود التكيم لو فكيت ليك (سبعة الاسود) كانت خمسين.
  • ود التكيم بقول ليه سبعة الاسود ما كانت خمسين …ورقي ما كان بيفتح إلا بي خمسة الشيريه الفكيتها لي.
  • ود التكيم بقول كلامو دا – وبيرجع ينوم.
  • صابر جلبقة بيرجع البيت وهو بتكلم براهو.
  • بقول بينو وبين نفسو ..السبعة كانت قاعدة ساي ..يا ريتني لو فكيتها ..الخلاني افك الخمسة شنو؟..لو ما شلاقة مني.
  • الواطة بتصبح.
  • وبتغيب.
  • زي ما بتغيب كل يوم.
  • ما في اي جديد.
  • غير زيادة في الاسعار.
  • الحاجة الوحيدة البتجدد.
  • صابر جلبقة بقوم يمشي النادي.
  • اول زول بيقعد في التربيزة.
  • بقسمو ليه الورق.
  • بقول المرة دي جاهو ورق سمح.
  • الكوتشينة تصن.
  • يقوم صابر جلبقة يفك ليك بنت اسود.
  • ود التكيم بقول ليه دي ما بفوتوه يا صابر.
  • بجرو ليك خمسين.
  • الحلة كلها تسير ليك صابر جلبقة.
  • صابر جلبقة بقول ليهم انتوا خليتو اي حاجة ..وقبلتو على بنت الاسود دي.
  • دي فلاحتكم.
  • يمشي البيت زعلان.
  • العشا ما بتعشاه.
  • الساعة اتنين صباحا – النوم بيغلبو.
  • يقوم يخت ليه حاجة في رأسو في البرد دي ..وبيمشي على ود التكيم.
  • يدق الباب.
  • ود التكيم يجيه طالع يقول ليه خير ..المات منو؟.
  • زادو شنو تاني؟.
  • صابر جلبقة بقول ليه ما في حاجة..بس عاوز اسألكم سؤال..لو فكيت ليك اربعة هارتي كانت برضو خمسين.
  • ود التكيم بقول ليه ابدا.
  • ورقي ما بفتح إلّا بي بنت الاسود.
  • صابر جلبقة بيرجع زعلان وهو بتكلم مع نفسو وبقول ..الخلاني افك بنت الاسود شنو؟.
  • والله اربعة الهارتي كانت قاعدة ساي.
  • خفت منها ساكت.
  • الواطة بتصبح.
  • وتغيب.
  • وما في اي حاجة جديدة في الدنيا دي.
  • غير زيادات في الغاز.
  • صابر جلبقة بقوم من العصر يمشي النادي.
  • قال عاوز يأخد تارو في الخمسينات البيأخذ فيها كل يوم.
  • يطلع التربيزة.
  • ويفرشها.
  • ويجيب الكوتشينة.
  • ويقسم الورق.
  • يقوم من غير مناسبة كدا يفك ليك ليه عشرة هارتي.
  • ود التكيم بخمو ليك.
  • خمسين.
  • الحلة تخلي اي حاجة.
  • الكهربة.
  • والموية.
  • والغاز.
  • وتسيّر ليك صابر جلبقة.
  • صابر جلبقة بقوم يقول ليهم فلاحتكم في عشرة الهارتي.
  • دي قدرتكم.
  • دي شطارتكم.
  • صابر جلبقة بمشي البيت.
  • النوم بغلبو كالعادة.
  • يقوم الساعة اتنين صباحا…عشان يمشي على ود التكيم.
  • يدق ليه الباب.
  • ود التكيم بقول ليه خير – الحاصل شنو؟..جايني في البرد دا انصاص الليالي.
  • زادوا شنو تاني.
  • صابر جلبقة بقول ليه يا ود التكيم ما في اي حاجة ..بس عاوز اسألك سؤال ..الولد بتاع الهارتي كان بيعمل شيء.
  • ود التكيم بقول ليه ابدا ..بس عشرة الهارتي.
  • صابر جلبقة بقول انا الخلاني افك العشرة شنو؟.
  • كل دا من زيادة الكهربة.
  • صابر يرجع البيت زعلان.
  • ما شايف قدامو.
  • اليوم التاني ..يقوم زي كل يوم يمشي على النادي.
  • يطلع التربيزة.
  • ويرش الحوش.
  • ويوزع الكوتشينة.
  • يفك ليه (دو).
  • ود التكيم ما بسميه.
  • بخمو ليك ..خمسين.
  • الحلة كلها تسيّر ليك صابر جلبقة.
  • تخلي اي شيء.
  • ويسيروا ليك صابر في الخمسين.
  • صابر يقول ليهم دي فلاحتكم.
  • يا ها قدرتكم.
  • شطارتكم بس في (دو) الاسود.
  • صابر بيمشي البيت.
  • زعلان.
  • وما عاوز زول يتكلم معاه.
  • يلبس عراقيه الداكن.
  • الساعة اتنين النوم بيغلبو.
  • يطلع من البيت.
  • يمشي على ود التكيم.
  • يدق الباب.
  • ود التكيم يقوم نعسان.
  • يفتح الباب.
  • يلقي ليك صابر جلبقة واقف بي عراقيه ذاتو.
  • ود التكيم بقول ليه في شنو؟.
  • المات منو؟.
  • صابر جلبقة بقول ليه ما في اي زول مات..بس عاوز اسألك.
  • ود التكيم بقول ليه أسأل في شنو؟.
  • صابر جلبقة بقول ليه (التريس) كان خمسين.
  • ود التكيم بقول ليه التريس خمسين!!.
  • صابر بقول ليه اربعة الاسود خمسين.
  • ود التكيم بقول ليه اربعة الاسود برضو خمسين.
  • صابر بقول ليه تمانية الهارتي خمسين.
  • ود التكيم بقول ليه تمانية الهارتي خمسين.
  • صابر بقول ليه تسعة الشيريه.
  • ود التكيم بقول ليه تسعة الشيريه برضو خمسين.
  • صابر بقول ليه والشايب.
  • ود التكيم بقول ليه اي شايب خمسين.
  • صابر بقول ليه ستة الهارتي.
  • ود التكيم بقول ليه خمسين.
  • صابر بقول ليه اس الشيريه.
  • ود التكيم بقول ليه اي أس خمسين.
  • صابر جلبقة بقول ليه سبعة الهارتي.
  • ود التكيم بقول ليه دي الوحيدة الما خمسين..لكن تاني اي كرت خمسين.
  • صابر بقول ليه يا ريتني لو فكيت ليك سبعة الهارتي ..تتصور مدبلة ..عشان كدا خفت منها.
  • ويمشي على كدا.
  • عليكم الله هسع حالة صابر جلبقة دي ما حالتنا نحن.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.

            و

  • معسكر الهلال بدأ بغياب مكسيم.
  • الموسم باقى ليه 45 يوم وينطلق.
  • يعني ما بيستحمل اي غياب.
  • مشاركة المدافع العاجي مع هلال الابيض في الكونفدرالية سوف تفقد الهلال الاستفادة منه في التسجيلات القادمة.
  • الكاردينال فشل في اعادة قيد اطهر الطاهر.
  • فشل جديد.
  • ………….
  • السيدة (ل) – القرع البلمو مع العنب شنو؟..لو ما شلاقة منكم.

  • وقرّط على كدا.

ترك الرد