دق الدلجة – محمد عبد الماجد – تلفوناتكم بتقفلوها على وصافتكم؟ 5 ديسمبر 2016

0
150

 

 من رأسي :

اغرب حاجة –(كمونية) الزمن دا لا فيها مصارين ولا كرشه ولا فشفاش – الواحد لو اجتهد فيها شديد بيطلع ليه منها (كيس دكوة).

زمان لو اكلت ليك كمونية ..اليوم كلو ريحتك تكون كمونية ..كمونية ..يومك كلو بتكون واقف في الماسورة تغسل في ايدك…هسع الكمونية ولا عندها اثر.

 من كراسي :

في واحد سألوه قالوا ليه رأيك في (شوربة العدس) شنو؟.

قال ليهم بالله شوفو الزمن قلب عليّ كيف؟..زمان كان بيسألوني عن اشعار جرير والبحتري والفرزدق ، هسع بقوا يسألوني عن (شوربة العدس).

دنيا!!.

  • قرأت هذا الخبر – فتحت لي قوس في الشارع.
  • وقفلت الشبابيك.
  • دخلت صندوق الرسائل.
  • لقيت في وارد جديد.
  • قعدت اعاين.
  • شغلت المروحة في 5.
  • وانا وقت اشغل المروحة في 5 ، ما في زول بثبتني.
  • ما في زول بوقفني.
  • ولا بيشتغل بي زول.
  • الخبر بقول :
  • (أصدرالجهازالفني للمريخ بقيادة الألماني انتوني هاي ضوابط صارمة للاعبين في معسكر الفرقة الحمراءالحالي بفندق تايتنك بمدينة انطاليا حيث قرر الجهاز الفني منع استخدام الهواتف أثناءالتجمع ومنع اللاعبين من الخروج من الغرف بعد الحادية عشرة مساءً إلى جانب الالتزام بمواعيد التدريبات حيث طالب اللاعبين بضرورة الالتزام بهذه التوجيهات حتى يتمكن الأحمر من تنفيذ برنامجه الإعدادي بصورة مثالية).
  • غايتو يا ناس المريخ عندكم مدرب – الظاهر القعاد الكتير في المقصورة عمل ليه (منلوخية) في رأسو.
  • بقى يهضرب براهو.
  • بقى يلخبط.
  • نحن عارفين القعاد الكتير في (المقصورة) بأثر في المقدرات التدريبية.
  • مدربكم دا – عاوز يحلل قروشو بي سحب الموبايلات.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • عليكم الله وامانة فيكم – (الوصافة) محتاجة للتعب دا كلو.
  • الموضوع ما بيستاهل.
  • وصافة شنو البقفلو ليها التلفونات؟.
  • وصافة شنو البيسحبوا ليها (الموبايلات).
  • تعبانين في الفاضي.
  • يمين وصافتكم دي (تلفون ثابت) كتير فيها.
  • ناس المريخ ديل كل سنة ..بيلعبوا مع بايرن ميونخ.
  • وبيلعبوا مع شالكه.
  • وبنفخوا في الجرايد.
  • يملأونا (برد).
  • بعكسروا في اثيوبيا.
  • وفي مصر.
  • وقطر.
  • والامارات.
  • وتركيا.
  • في موسم واحد.
  • وبرضو ما بطلعوا بي شيء غير (الوصافة).
  • تعبهم دا كلو في (وصافة).
  • ناس اهلي شندي.
  • وهلال الابيض.
  • والخرطوم الوطني – الحاجات دي بحققوها بدون (بدلة وكرفتة).
  • ومن غير معسكر.
  • بدون ما يلعبوا مع بايرن ميونخ.
  • ومعسكر في تركيا.
  • تتخيلوا هلال الابيض ولا قاعد يعمل الحاجات دي وبغلب المريخ في استاده خمسة.
  • وبطلع المريخ من كاس السودان.
  • كمان جابت ليها سحب للموبايلات.
  • على شنو؟.
  • وفي ايه؟.
  • وعشان شنو؟.
  • لعبتوا مع بايرن ميونخ.
  • وسجلتوا الحضري..والنفطي ووارغو.
  • والهلال فاز بالممتاز.
  • والمريخ حل وصيفا.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • عليكم الله – الواحد لو سألكم سؤال.
  • لو قال ليكم ..(وصافة) المريخ دي ..محتاجة ليها لمجلس فيه (28) عضو.
  • مجلس فيه 28 عضو ..والمريخ وصيفا للهلال في الممتاز.
  • 28 عضو ..والمريخ طار من دور الاربعة في كاس السودان.
  • في داعي للبدل دي كلها.
  • في داعي للكرفتات دي.
  • خسارة فيكم.
  • وانتوا الوصافة حققتوها بي مساعدة الحكام.
  • بي ناس اسامة عطا المنان.
  • نحن الهلالاب عندنا (وصيف) ..بيدلع اخر دلع.
  • وصيف بعسكر في تركيا.
  • وصيف بي بدلتو وكرفتتو.
  • وصيف مجلسو فيه 28 عضو.
  • وعمر بخيت ما قادر يشطبو.
  • وصافتكم عينة لكن.
  • انتوا عارفين – وصافتكم دي ما بتحتاج اكتر من معسكر في جبل موية.
  • مطار حرمان عليها.
  • الطيارة كتيرة عليها.
  • طيارة في شنو؟.
  • وانتوا كل سنة ..تعسكروا برة.
  • وتلعبوا مع بايرن ميونخ.
  • وتلبسوا ليكم بدل وكرفتات.
  • وغير (الوصافة) ما عندنا ليكم حاجة.
  • الاماني توني هاي دا كلموه.
  • قولوا ليه ..الاولاد ديل كبار في السن.
  • البرد دا ما بقدروا عليه.
  • قولوا ليه ..الشيخوخة دخلت عليهم ..ما بستحملوا تنظيراتك دي؟.
  • الناس ديل كبروا.
  • العمر ليه احكام.
  • الالماني دا قولوا ليه ..حركاتك دي عملها غارزيتو.
  • وعملها اتوفيستر.
  • وعملها حسام البدري.
  • وعملها كروجر.
  • وعملها ريكاردو.
  • وفي النهاية المريخ لم يحصد غير (الوصافة).
  • ما تجهجهوا لينا (البدل) ساكت.
  • ما تخربوا لينا سمعة (الكرفتات).
  • الوصافة ما عاوزة الكلام دا.
  • خلوهم في تركيا يتفسحوا.
  • يتكلموا الليل كلو في موبايلاتهم.
  • خلوهم في واتساباتهم.
  • ما تسألوهم.
  • كورة اصلها ما عندهم.
  • تبقى عليهم قفلة ..ووصافة.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • اتذكروا الكلام دا.
  • وتعالوا شوفوا المريخ في الموسم الجديد.
  • ما تسمعوا كلام جرايد المريخ الايامات دي.
  • الحاجات دي بنسمعها في كل معسكر.
  • في كل موسم.
  • ووقت الجد …جماعتكم بينضربوا بالخمسة.
  • وبطيروا من كاس السودان.
  • عليكم الله راجين ليكم شيء من ناس التاج.
  • من حقار.
  • من جلال.
  • زول في الاهلي شندي احتياطي.
  • راجيين كلتشي.
  • باسكال.
  • ديل في (البدل) ممكن يعملوا ليكم حاجة.
  • ممكن الكرفتات تتطلع فيهم ظابطة.
  • لكن (كورة) ما تنتظروا منهم شيء.
  • لعيبة اتجاوزوا الاربعين ..منتظرين منهم شنو؟.
  • ناس التاج وحقار ديل لو عسكرتوا بيهم في (عطارد) ما ترجوا منهم شيء.
  • ولا تحلموا.
  • عشان كدا رجعوا ليهم (موبايلاتهم).
  • ما تبقى عليهم وصافة وعدم موبايلات.
  • عليكم الله – هي الدنيا دي بقى فيها شنو غير (الموبايلات).
  • ناس علي جعفر ..بدون موبايلات يمشوا وين؟.
  • يقبلوا على وين؟.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • الحمدلله نحن في الهلال ما عندنا القشرة دي.
  • شغل الجرايد.
  • وتنظيرات الاجهزة الفنية ما عندنا.
  • ولا بنقبل بيها.
  • الفرحة الظاهرة في (اوكرا) الايامات دي ..بتوضح الفرق بين الهلال والمريخ.
  • كورتكم تامنها (جرايد).
  • هسع عليكم الله – في اعلامي واحد في المريخ الايامات دي بتحدث عن (لاعب).
  • كلهم بتحدثوا عن (شكليات).
  • البتحدث عن (البدل).
  • والبتحدث عن (الكرفتات).
  • والبتحدث عن (الموبايلات).
  • والبتحدث عن (البرد).
  • ما في زول بتحدث ليه عن لاعب.
  • نحن في الهلال بنتحدث عن اوكرا.
  • عن ابوستة.
  • عن جابسون.
  • عن بشه.
  • عن شيبوب.
  • عن كاريكا.
  • عن ابوعاقلة.
  • في زول في الهلال اتكلم ليكم عن (موبايل).
  • في زول في الهلال ولو بالغلط كدا اتحدث ليكم عن (بدلة).
  • ناس بشه ما قاعدين يدوني فرصة للكلام دا.
  • الدوري والكاس.
  • والجوهرة الزرقاء.
  • بدل شنو البنتكلم عنها؟.
  • و
  • (ونحن عايشين والحمد لله، (النفس) بينزل ويطلع إلى الآن ..ولاينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • …………….

    و

  • اكثر ما اسعدني في الجهاز الفني للهلال مدرب الاحمال الغاني.
  • الافارقة ديل في الاحمال ما بتلحقو.
  • وفي التغذية ايضا.
  • نزار حامد وجابسون وابوستة وبشه في خط الوسط …ريال مدريد ما بقيف قدامنا.
  • المتعة حاضرة في الهلال.
  • اوكرا وشيبولا وكاريكا…حاجة تخلع.
  • وتيتيه.
  • الله يستر بس في خط الدفاع.
  • مكسيم براهو بسدها.
  • على مجلس الهلال ان يضع معالجات منذ الآن لدفاع الهلال في التسجيلات القادمة.
  • الكاردينال دا ممكن في التسجيلات القادمة يسجل لينا مهاجم.
  • ويجيب ليه تاني لاعب وسط.
  • ويقوم يقول ليك الدفاع منتظرين ليه (الجنسية).
  • والسلطات وقت تمنح الهلال جنسية ..ممكن الكاردينال يحولها للهجوم.
  • و
  • (ونحن عايشين والحمد لله، (النفس) بينزل ويطلع إلى الآن ..ولاينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • …………
  • السيدة (ل) – فاتح لي قوس من سنة 2007 وما قادر اقفلو لغاية وقتنا دا.

  • وقرّط على كدا.

ترك الرد