دق الدلجة – محمد عبد الماجد – عمر بخيت جيبوه (نائب رئيس) للجنة تسيركم القادمة 8 ديسمبر 2016

0
261
محمد عبد الماجد دق الدلجة

 

 من رأسي :

زول مسكين شديد ..اول مرة يشوف ليه (سمك)..افتكرو (فول) مظبط شديد.

دنيا!!.

 من كراسي :

الموسم القادم ممكن الدوري يكون فيه (النيل) شندي و حي (الوادي) نيالا و (تريعة) البجا  جبل اولياء..

عشان كدا ننصح اندية الممتاز تجهز (احذية المطر) من الاسبوع الاول للدوري الممتاز.

  • جاء في اخبار المواقع امس في موقع (كفر ووتر) تحديدا ، هذا الخبر ، ارفعوا رأسكم واطلعوا لينا لي برة واقرأوا هذا الخبر : (اعلن اللاعب عمر بخيت قائد الهلال الاسبق ولاعب المريخ المشطوب عن عقده لموتمر صحافي خلال الساعات المقبله للحديث عن حقوقه بنادي المريخ والحديث عن القضية الشائكة التي ادخل فيها الاتحاد نفسه والمعروف ان اللاعب شطب من المريخ ولم يودع النادي حقوقه بل اودع شيك بتاريخ 30 نوفمبر رفض اللاعب استلامه وبعدها خاطب الاتحاد العام المريخ بخطاب تسلم اللاعب نسخه منه طلب فيه من المريخ تسديد مرتبات اللاعب وحقوقه والّا وسيعتبر اللاعب مقيدا في الكشف ، وفي اليوم الاخير للتسجيلات اعتمد الاتحاد شطب اللاعب دون ان يستلم حقوقه وحول الاتحاد الشيك والقضية للجنه اللاعبين غير الهواه وهو الامر الذي رفضه اللاعب واعلن رسميا عن عقده لموتمر صحافي يكشف فيه القضية وتفاصيلها والظلم الذي وقع عليه دون ان يجد حمايه من الاتحاد العام).
  • هو الاتحاد ضباطه ما قادر يحميهم..يحمي ليكم عمر بخيت.
  • ضباطه في ورطة.
  • الزميل حسن فاروق وهذا حفظا للحقوق كان اول من اكتشف هذا الامر عندما اعلن عن ذلك من خلال برنامجه الاذاعي باذاعة هلا 96 (زمن ضافي) ،عندما استضاف الزميل معاوية الجاك واعلن في البرنامج ان عمر بخيت لم يستلم حقوقه من المريخ.
  • وعملا بالخطاب الصادر من مجدي شمس الدين فان عمر بخيت اذ لم يستلم حقوقه حتى 30 نوفمبر فان الاتحاد لن يعتمد شطبه ، او كان يفترض ذلك  ليعتبر عمر بخيت لاعبا بالمريخ مع عدم اعتماد تسجيل اللاعب الذي سجل في خانة عمر بخيت وهو اللاعب باسكال.
  • لكن يبدو ان خطابات مجدي شمس الدين يمحاها اسامة عطا المنان ، كما حدث في قضية اللاعب بكري المدينة.
  • يحدث ذلك رغم ان اسامة عطا المنان نائب مجدي شمس الدين في الكثير من اللجان.
  • وهو اقل منه منصبا.
  • مع ذلك فان كلمة اسامة عطا المنان هي البتمشي…فقد اعتاد اسامة عطا المنان على ذلك.
  • يمكن عشان هو الزول العندو القروش.
  • وهو البيصرف على الاتحاد.
  • واضح ان اسامة عطا المنان هو الذي  لم يعتمد خطاب مجدي شمس الدين الذي ارسله للمريخ.
  • بدلا من عدم اعتماد شطب عمر بخيت ..اسامة عطا المنان لم يعتمد خطاب مجدي شمس الدين ليعتبر عمر بخيت مشطوبا من المريخ.
  • يعني المشطوب مجدي شمس الدين.
  • وكلام اسامة عطا المنان يصير.
  • عليك الله  يا مجدي شمس الدين تاني وقت ما عندك قدرة على تنفيذ قراراتك واعتماد خطاباتك ما تلخبط لينا الدوري ساكت.
  • ما تزحم لينا جرايدنا دي.
  • الخطابات الصادرة منك بقت ما عندها اي قيمة – لا بتقدم ولا بتأخر ولا بتصمد (5) ثواني قدام اسامة عطا المنان.
  • خطابات اي كلام.
  • و
  • (ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • هسع ناس الاتحاد عاوزين يعملوا شنو؟.
  • الموضوع دا ممكن ينسف الموسم القادم.
  • خاصة ان عمر بخيت عندو مستند صادر من سكريتر الاتحاد العام مثبت فيه ان عمر بخيت ان لم يستلم حقوقه من المريخ حتى يوم 30 نوفمبر يعتبر مقيدا في كشوفات المريخ.
  • يعني ..وبالدراجي كدا.
  • عمر بخيت دا مفروض يكون الآن في (تركيا).
  • الله شافك من (البرد) يا عمر بخيت.
  • طلعت (المعلم) فعلا.
  • بمناسبة تركيا ..ناس المريخ امس فازوا ليهم على فريق تركي بتاع (جبنة) 5 / صفر.
  • عنكبة جايب ليه قونين في الخمسة.
  • يعني تركيا راحت عليكم ساكت.
  • اذا عنكبة لغاية الآن بجيب ليكم في اقوانكم ..وكلتشي بي سنو دي بسجل ..(تركيا) لزومها شنو؟.
  • وين محمد عبدالرحمن؟.
  • وين صانع الالعاب النيجيري؟.
  • هسع عنكبة دا عاوز ليه معسكر في تركيا.
  • بعدين …ماشيين تركيا عشان تلعبوا ليكم مع فريق درجة خامسة.
  • فريق بتاع (جبنة).
  • فريق لمن مسلسل (مهند ونور) يكون شغال ..تمرينه بيطرشق.
  • غايتو تعبانين ساكت.
  • حاجاتكم دي في جبل اولياء كان ممكن تعملوها.
  • طبيعة.
  • وخزان.
  • وسمك.
  • الموضوع ولا عاوز ليه (تركيا) ولا حاجة.
  • و
  • (ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • نعود الى موضوع عمر بخيت.
  • تركيا ملحوقة في (البرد) دا.
  • عمر بخيت قال عاوز يعمل ليه مؤتمر صحفي.
  • والمؤتمر الصحفي ح يكون فيه (مخرجات).
  • والمخرجات ممكن تجيب خبر الاتحاد العام.
  • عمرى بخيت عاوز (600) مليون من المريخ.
  • القروش دي ناس المريخ ما عندهم.
  • هم لو عندهم قروش قدر دي بيسجلوا حقار والتاج وجلال وكلتشي.
  • الـ (600) مليون دي ..ممكن تحل مشاكل المريخ كلها.
  • عشان كدا – ناس المريخ عندهم مشاورات الايامات دي لاختيار لجنة تسيير جديدة.
  • يطلعوا من لجنة تسيير ويدخلوا في لجنة تسيير.
  • تقول (خريف).
  • مع لجانكم الكتيرة دي ..الزول اصلو ما بقول اللجان دي لي فريق كورة قدم.
  • ناس المريخ عندهم ازمة في (نائب الرئيس).
  • عاوزين ليهم (نائب رئيس) يدفع.
  • يكون عندو قروش.
  • افتكر ما بتقلوا افضل من عمر بخيت.
  • عمر بخيت عندو عندكم (600) مليون جنيه.
  • لو خفض ليكم المبلغ دا لـ (400) مليون جنيه ما كعبة معاكم.
  • عشان كدا جيبوه (نائب للرئيس).
  • احسن ليكم من عبدالصمد.
  • عبدالصمد بيعمل ليكم مشاكل.
  • وما بدفع ساكت.
  • جيبوا (عمر بخيت) ، عندو خبرات كبيرة.
  • جيبوه نائب للرئيس.
  • احسن ليكم من (الجهجة) دي.
  • احسن ليكم من كلام الناس.
  • ونقة الجرايد.
  • والله الهلالاب يشيلوا حالكم.
  • وما بريحوكم.
  • ولا بخلوكم تقعدوا في الواطة.
  • عمر بخيت لو عمل ليه (مؤتمر صحفي) بجيب ليكم الكلام.
  • وانتوا ما بستحملوا الكلام.
  • ولا عندكم ليه (رقبة).
  • عشان كدا احسن جيبوه (نائب للرئيس).
  • بشيل ليكم الـ (600) مليون جنيه.
  • و
  • (ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • امس قالوا ليك محمد عبدالرحمن في تجربة المريخ (المسرحية) لعبوه (باك).
  • تستاهل يا محمد عبدالرحمن.
  • باك – وفي البرد دا كمان!!.
  • محمد عبدالرحمن لعب في مباراة الامس (باك) ، وهذا يعني ان المدرب الخمس (باكات) البيلعبوا في الطرف اليمين ما مقتنع بيهم.
  • جلال والتاج ابراهيم..
  • يا حليل ابراهومة.
  • وشمس الفلاح.
  • هسع محمد عبدالرحمن دا دفعتو ليه (3) مليار جنيه – عشان يلعب ليكم (باك).
  • دي عاوزة ليها (3) مليار جنيه.
  • سلك بي نصف القيمة ممكن يجضمها ليكم.
  • …………….

و

  • يا ناس الهلال – ما عاوزين لينا اي تجربة زي النوع دي.
  • ألعبوا لينا مع اندية زي الناس.
  • اندية معروفة.
  • اندية (الجبنة) و (الصلصة) و (حلاوة حربة) دي ما بتنفع معانا.
  • هسع ماشيين لي تركيا عشان تلعبوا ليكم مع فريق درجة خامسة.
  • تيتيه قالوا ليك في معسكر الهلال في القاهرة بكون قاعد في الطابق الاول – رقبتو بتكون في الطابق الخامس.
  • عشان كدا – عملنا الجوهرة تلاتة طوابق.
  • وجابسون هيبة وجسارة.
  • واكرا مهارة.
  • وشيبولا.
  • وشلش.
  • والله انتوا ح تتعبوا معانا شديد.
  • علي جعفر بعد (البرد) دا – يمكن يرجع من معسكر تركيا يفتح ليه (بقالة).
  • برضو السن ليها احكام.
  • و
  • (ونحن عايشين والحمدلله ، (النفس) بينزل ويطلع إلى الآن ..ولا ينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • …………
  • السيدة (ل) – فكرة تعملي لينا (الليل) – (نص النهار) دي جديدة علينا.
  • وقرّط على كدا.

ترك الرد