دق الدلجة – محمد عبد الماجد – من جمال الوالي لي جمال الوالي 11 ديسمبر 2016

0
244

 

 من رأسي :

باسكال …قالوا في تركيا ..قال ليهم : لو كنت عارف (البرد) في انطاليا قدر دي ..كان اعلنت اعتزالي للكورة من سنة 2014م.

وكان شفت لي (حافلة) اشتغلت بيها في كلاكلات (ساحل العاج).

 من كراسي:

لجنة تسيير المريخ القادمة ..اول حاجة ممكن تعملها بعد التعيين تقدم (طلب فحص) تالت في قضية اللاعب شيبوب.

الناس ديل ما عندهم غير (طلبات الفحص)…والصور مع (الشركة الصينية).

  • 14 سنة – جمال الوالي رئيسا للمريخ.
  • جمال الوالي من زمن امير دامر ..وجندي نميري وميرغني علي كنيد.
  • عيك.
  • هسع امير دامر بقى (مدير فني).
  • وجندي نميري ما معروف مشى وين؟.
  • وكنيد ما في زول فاكرو.
  • الحكاية طولت.
  • الزول دا من زمن (نجمة المسالمة) يا خلف الله ابومنذر.
  • الموضوع دا طوّل شديد.
  • زمن الدولار كان بي اتنين جنيه.
  • قاعة الصداقة كانت طابق ارضي.
  • ومقرن النيلين كان في السبلوقة.
  • الكلام دا بدري شديد – زمن لن نذل ولن نهان.
  • وامريكا روسيا قد دنا عذابها.
  • طولنا.
  • جمال الوالي رئيس للمريخ.
  • مرة معيّن.
  • ومرة منتخب.
  • مرة زعلان.
  • ومرة ما في اي مشكلة.
  • مرة في البيت.
  • ومرة برة البلد.
  • ومرة في المجلس.
  • ومرة مستقيل.
  • وفي كل الاحوال – مع كل هذه الظروف – جمال الوالي رئيسا للمريخ.
  • كان ترضى ..كان تزعل.
  • بالدرب عديل..او باللفة.
  • بـ (11) عضو.
  • او بـ (28) عضو.
  • 14 سنة.
  • جمال يزعل.
  • جمال يقفل التلفون.
  • جمال يقفل البلف.
  • جمال يفتح البلف.
  • جمال الوالي رئيس طوالي.
  • المريخ وصيف..
  • المريخ خفيف..
  • المريخ نظيف..
  • المريخ ينزل الدرجة التانية.
  • جمال الوالي رئيس للمريخ.
  • مرة مع عبدالصمد محمد عثمان.
  • ومرة مع محمد جعفر قريش.
  • مرة عبدالصمد مع جمال الوالي.
  • ومرة عبدالصمد معارض لجمال الوالي.
  • قريش مرة معاهو.
  • ومرة ضدو.
  • وفي كل الاحوال جمال الوالي رئيس للمريخ.
  • ناس متوكل احمد علي ..مرة جوة ..ومرة برة.
  • وصديق علي صالح.
  • وازهري محمد علي.
  • جمال الوالي رئيسا.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • عصام الحاج مرة في مجلس جمال الوالي.
  • ومرة في المعارضة.
  • مرة داعم.
  • ومرة معارض.
  • مرة الامين العام.
  • ومرة ماسك الاستثمار.
  • وجمال الوالي رئيسا للمريخ.
  • ديل جربوا اي شيء.
  • عملوا اي حاجة.
  • الحاجة الوحيدة الثابتة في الموضوع دا جمال الوالي.
  • اي حاجة ممكن تتغير إلّا جمال الوالي.
  • يجيبوا الحضري.
  • يشيلوا النفطي.
  • يسجلوا ريتشارد.
  • مجاهد.
  • علاءالدين طيارة.
  • يرجعوا محمد عبدالرحمن يلعب وراء.
  • وجمال الوالي رئيسا للمريخ.
  • تتخيلوا جمال الوالي دا من زمن علي النونو.
  • الوقت داك الامين البرير كان مدير كورة في الهلال.
  • جمال الوالي قاعد لمن الامين البرير بقى رئيس للهلال.
  • 14 سنة نحن في الحالة دي.
  • جمال الوالي رئيسا ..والمريخ وصيفا.
  • في فترة جمال الوالي رئيسا للمريخ عبر مجالس ولجان مختلفة ..منتخبة ومعينة جاء للهلال 6 رؤوساء.
  • 6 رؤوساء – كل رئيس من جهة.
  • كل رئيس من حتة.
  • 6 رؤوساء في الهلال في فترة جمال الوالي رئيسا للمريخ.
  • جمال الوالي عاصر الفريق عبدالرحمن سرالختم رئيسا للهلال.
  • عبدالرحمن سرالختم هسع عاوز يبقى رئيس للاتحاد.
  • وجمال الوالي رئيسا للمريخ.
  • جمال الوالي عاصر صلاح ادريس اكثر من دورة.
  • صلاح ادريس هسع في المعارضة.
  • وعاصر الامين البرير.
  • الامين البرير اتخارج.
  • وعاصر المهندس يوسف احمد يوسف.
  • وعاصر المهندس الحاج عطا المنان.
  • وعاصر اشرف الكاردنيال.
  • اشرف الكاردينال في سنة شال الدوري والكاس وشيبوب.
  • وابوستة.
  • الكاردينال في سنة عمل الجوهرة (3) طوابق.
  • وجمال الوالي في نفس الشيء.
  • يقفل ملف الممتاز.
  • يفتح ملف سيكافا.
  • يطير من سيكافا (اي دمعة حزن لا لا).
  • 6 رؤوساء في الهلال مقابل رئيس واحد للمريخ.
  • امريكا حكموها 3 رؤوساء في فترة جمال الوالي.
  • جمال الوالي عاصر كلينتون.
  • وعاصر اوباما.
  • ويعاصر الآن ترامب.
  • وممكن يعاصر كولني.
  • كولني دا زول ساكت …ممكن يتتطور ويصبح رئيسا للولايات المتحدة.
  • وجمال الوالي في حتتو.
  • انتوا عارفين لو جمال الوالي دي كل سنة بيمشي خطوة للامام ، هسع كان اصبح رئيس مانشيستر يوناتيد.
  • كان بقى رئيس للفيفا.
  • ابوالعائلة ..اشهر رؤوساء المريخ.
  • وشاخور.
  • وخالد حسن عباس.
  • والضوء حجوج..
  • ومهدي الفكي..
  • ديل ما في واحد فيهم حكم المريخ نص المدة التى حكمها جمال الوالي للمريخ.
  • ويمكن كلهم مجتمعين ..فترتهم ما تصل لـ (14) سنة.
  • مع ذلك اي واحد فيهم وضع بصمتو في المريخ.
  • اي واحد وضع تاريخو في المريخ.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (درووور يضروووري تروووري) تجونا في الاجازة الكبيرة!!.
  • 14 سنة ..ونحن في نفس الحالة.
  • ضربات جزاء.
  • واعادة ضربات جزاء.
  • وحالات طرد.
  • ولجنة استئنافات.
  • واعادة مباريات.
  • واعتبار المريخ فائزا.
  • 14 سنة ونحن في الحالة دي.
  • طلبات فحص.
  • ونحن ما بنلعب.
  • 14 سنة..
  • يلعبوا مع بايرن ميونخ.
  • مع شالكة.
  • يعسكروا في تركيا.
  • يعسكروا في مروي.
  • يجيبوا هيثم مصطفى.
  • يرجعوا كلتشي.
  • غارزيتو.
  • اتوفيستر.
  • ريكاردو.
  • المريخ وصيف.
  • وجمال الوالي رئيس.
  • 14 سنة – ونحن في نفس الحالة.
  • جمال الوالي يتحدث عن انو استفاد من تجاربه.
  • وانو لن يكرر الاخطاء السابقة.
  • وح يعمل لجان مختصة.
  • 14 سنة..
  • حاتم عبدالغفار ..يا هو حاتم عبدالغفار.
  • ومصطفي توفيق ..يا هو مصطفى توفيق.
  • والفريق طارق ..يا هو الفريق طارق.
  • ومتوكل ..يا هو متوكل.
  • ومزمل…
  • وسلك..
  • ومعاوية الجاك.
  • وابوشيبة عندنا ضربة جزاء سنة 1996 ما حسبوها لينا.
  • 14 سنة ..ونحن في هذه الحالات.
  • تسجيلات نوعية.
  • ومعكسر نموذجي.
  • وغزل مبالغ فيه في فترة الاعداد.
  • 14 سنة …والحالة نفس الحالة.
  • وجمال الوالي ..هو جمال الوالي.
  • يمشي عبدالرحمن سر الختم ..يجي صلاح ادريس.
  • يمشي صلاح ادريس ..يجي البرير.
  • يمشي البرير ..يجي يوسف.
  • يمشي يوسف يجي الحاج عطا المنان.
  • يمشي الحاج عطا المنان يجي الكاردينال.
  • وفي كل هذه الاوضاع.
  • كل هذه الاحوال.
  • جمال الوالي رئيس للمريخ.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا  شيءسوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • يعملوا مرة مجلس شورى.
  • ومرة مجلس شرف.
  • ومرة لا عاوزين شورى ولا عاوزين شرف.
  • مرة يجيبوها من قاصرها.
  • ومرة يشيلوها موزة.
  • مرة المشكلة من المطر.
  • ومرة من ارضية الملعب.
  • ومرة من الحكم.
  • جمال الوالي اصلو ما غلطان.
  • ولا بغلط.
  • وما عندو اي مشكلة.
  • المشكلة في ناس عصام الحاج.
  • والفريق عبدالله.
  • والفريق طارق.
  • ومتوكل.
  • وتوفيق.
  • يشكوها من اول جديد.
  • يوزعوها تاني.
  • واي زول حتتو تتغير ..إلّا جمال الوالي.
  • يشكوها ..جمال الوالي رئيس.
  • يدكوها ..جمال الوالي رئيس.
  • يوزعوا تاني ..جمال الوالي رئيس.
  • يرفعوا التربيزة ..جمال الوالي رئيس.
  • يخلوها ..جمال الوالي رئيس.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • ……………

و

  • بعد تيتيه ..الجوهرة الزرقاء مفروض تعملوها لينا 4 طوابق.
  • الزول دا قالوا بعد الطابق الثالث رأسو برة.
  • قرعة افريقيا عرفناها يوم 21 ديسمبر.
  • قرعة الممتاز متين؟.
  • عاوزين نشوف مواجهة المريخ متين؟.
  • عليكم الله ما تخلوها لينا في نهاية الدوري.
  • الناس ديل تاني بينسحبو.
  • ما بنستروا.
  • عشان كدا اعملوها لينا من الاسبوع التاني.
  • عشان نشوف موضوع (تركيا) دي.
  • الناس في البلد اشتاقوا للهلال.
  • من شوفتوا طولنا.
  • الهلال بعد ما يرجع …مع الجوهرة وابوستة واكرا وجابسون ..ح يعمل جوطة تقيلة.
  • من هسع اعملوا ليه لجان استقبال.
  • رتبوا ليه.
  • وجهزوا ليه.
  • وافرشوا ليه الارض ورود.
  • و
  • (ونحن عايشين والحمدلله، (النفس) بينزل ويطلع إلى الآن ..ولاينقصنا شيءسوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • ………….
  • السيدة (ل) –ضرب نجمة تلاتة (8) مربع عشان يشوف رصيدو .. شاف صورتها.

ترك الرد