دق الدلجة – محمد عبد الماجد – جبتوا لي تركيا (الهوا) 13 ديسمبر 2016

0
921

 

 من رأسي :

في حلتنا الصغيرة – الزول بقى يطلع من البلد ويتغرب (10) سنوات ..وما يضرب تلفونات ولا يسأل من الناس عشان يرجع ليه في النهاية بـ (اسطوانة غاز).

ونوت 4.

 من كراسي :

لمن تضرب لي زول عشرين مرة وما يرد عليك – اعرف طوالي ، الزول دا انت عاوز منو (قروش).

  • القذافي حكم ليبيا اكتر من  (40) سنة.
  • القذافي في ليبيا كان اقدم من السلام الوطني.
  • 40 سنة …القذافي الشعب الليبي ما قادر يعمل ليه حاجة.
  • قاعد في امان الله.
  • ما في شيء بتحركو.
  • الامم المتحدة ما قدرت عليه.
  • امريكا.
  • قاعد في حكمو.
  • ينزل ويطلع زي ما هو عاوز.
  • يعمل ليه خيمة في قصر.
  • قصر في خيمة.
  • عادي عندو الكلام دا.
  • يدخل ليه (ناقة) في طيارة.
  • طيارة في ناقة.
  • ما في زول بقول شيء.
  • يبيع (النفط).
  • يدفقو.
  • يخللو.
  • ولا في حد بقول شيء.
  • على كيفو.
  • عند الشعب الليبي الكلام دا زي العسل.
  • حارة ..حارة وبيت بيت وزنقة زنقة.
  • الكتاب الاخضر.
  • يشرع زي ما هو عاوز.
  • ما في زول بيسألو.
  • يشيل الكهربة.
  • يقطع الموية.
  • ما في زول بقول ليه تلت التلاتة كم؟.
  • 40 سنة – بالحالة دي.
  • اول ما المريخ مشي (ليبيا) – الثورة قامت.
  • البلد اتململت.
  • والناس طلعت الشارع.
  • الشعب الليبي قام ليك في القذافي.
  • ضرب صاح.
  • مظاهرات.
  • وحرايق.
  • وطيارات بتقع.
  • وناس بتموت.
  • وحاجات عجيبة بتحصل.
  • والقذافي في رقبتو شاف ليه (حفرة) اختفى فيها.
  • بقى في نفسو.
  • في زول كان بتخيل القذافي يشيلوه من الحكم.
  • في زول كان مصدق.
  • ناس المريخ عملوها.
  • كراعهم حارة زي المكوة.
  • و
  • (ونحن عايشين والحمدلله ، (النفس) ينزل ويطلع إلى الآن ..ولا ينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • انتوا قايلين مبارك الشالو شنو من مصر؟.
  • الجاب خبرو شنو؟.
  • ناس المريخ جوا عابرين ساكت بمطار القاهرة.
  • مبارك راح فيها.
  • لا امن الدولة.
  • ولا الحزب الحاكم.
  • كلهم ما عرفوا يثبتوا حسني مبارك.
  • مبارك اتحي من تلقاء نفسو.
  • زول كان قاعد في امان الله.
  • ما في زول كان  بيسألو.
  • ما في زول بقول ليه حاجة.
  • مساك مصر دي كلها بقبضة من حديد.
  • مبارك راح.
  • فات فيها.
  • واتنحي من تلقاء نفسه.
  • براهو كدا.
  • منو وليه.
  • تونس دي ..ما عارف ناس المريخ شالو زين العابدين بن علي كيف؟.
  • ما عارف سبب هروب بن علي شنو؟.
  • لكن الاكيد ..(رديف) المريخ كان في المنطقة.
  • اصلو بن علي دا ما بهرب ساكت.
  • الشيء الغريبة ناس المريخ مشوا يشاركوا في دورة ودية في الامارات قبل سنوات.
  • الملك مات.
  • رجعوهم ليك تاني يوم طوالي.
  • طبعا الخليج ما فيه طريقة للثورات.
  • إلّا الموت.
  • هسع انتوا قالوا ليكم ناس المريخ ما جابوا لتركيا (الهوا).
  • جابوا ليهم الكلام.
  • تركيا فيها (تفجيرات).
  • كلام زي دا قبل معسكر المريخ ما كان بيحصل.
  • ناس كراعهم حارة.
  • لو ما قلبوها ..بيكتلوا (الملك).
  • لو ما كتلوا الملك – بتحصل (تفجيرات).
  • الاتراك ديل اكتر حاجة عندهم مهند يقوم يزعّل من نور.
  • نور تقوم تشيل شنطتها وتمشي اهلها.
  • تمد بوزها.
  • دي اكتر حاجة ممكن يصلوا ليها.
  • ناس مكملين (الرومانسية).
  • من الزهرة البيضاء الى العشق الممنوع.
  • من العشق الممنوع للعشق الاسود.
  • كلها عادنها (عشق).
  • من عشق لي عشق.
  • من حديقة لي حديقة.
  • تركيا كمان تعجبك ..طبيعة خلابة.
  • كباري طايرة.
  • ولا عندهم (ركشات).
  • هسع (الركشات) الدخلها هنا شنو؟.
  • ناس عايشين حياتهم.
  • المريخ مشى عسكر في انطاليا ..طارت ليهم في رأسهم.
  • عرفو حاجة.
  • قالوا ليك الاتراك عاوزين يعملوا ليهم جزء تاني من مسلسل (مهند ونور).
  • عارفين ليه؟.
  • عشان نور تتطلب الطلاق من مهند.
  • الجماعة ديل – الكلام دا قبل معسكر المريخ ما كان عندهم.
  • ناس ضفر.
  • على جعفر.
  • حقار.
  • كراعهم حارة.
  • مولعة.
  • عليكم الله لو ما كراعهم حارة ..محمد عبدالرحمن في المريخ يلعب (باك).
  • ولابس (10) كمان.
  • في باك بيلبس (10).
  • مالكم عاوزين تخربوا للعشرة سمعتها.
  • ماردونا ممكن يرفع فيكم قضية.
  • ممكن يشيل حالكم.
  • ما في (باك) بيلبس (عشرة).
  • لكن برضو ما مشكلة.
  • عشرة اصلا بتكون قاعدة في (الكنبة).
  • محمد عبدالرحمن هو وقت يلعب (مهاجم) بقول يا (ركبتي) وما بقدر ألعب ..وقت يلعب ليكم (باك) يقول شنو؟.
  • غايتو كملو (صوركم) معاه في تركيا.
  • عشان الزول دا بعد تركيا ما ح تشوفوه.
  • و
  • (ونحن عايشين والحمدلله ، (النفس) ينزل ويطلع إلى الآن ..ولا ينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • لو عاوزين تحلوا مشكلة سوريا.
  • لا بحلوها ليكم الروس.
  • ولا الامريكان.
  • ولا حتى مجلس الامن.
  • لو عاوزين تنتهوا من الاسد…خلوا المريخ يمشي يعسكر في سوريا.
  • اليوم والتاني ..بتسمعو بي خبر بشار الاسد.
  • موش بشار الاسد دا ما في قوة قدرت عليه.
  • ودوا ليه المريخ.
  • بقوم بالمهمة على اكمل وجه.
  • انتوا قايلين المجهجه اليمن شنو؟.
  • اليمن كراع جوة وكراع برة.
  • ما معروف الحاكم في اليمن منو؟.
  • المعارضة ام الحكومة.
  • عارفين حالة اليمن دي من شنو؟.
  • عشان المريخ ما حصل عسكر في اليمن.
  • بالمناسبة معسكرات المريخ في السنوات الاخيرة – بقت زي حكاية الزول البكون قادم من البلد ..وعاوز يطلع ليه (جنسية) في الخرطوم.
  • الكلام دا طبعا زمن (الجنسية).
  • هسع في ايام (الرقم الوطني) ما عارف ليكم الحصل شنو؟.
  • موش زمان الزول وقت يكون عاوز يطلع ليه (جنسية) او (جواز سفر) بقوم يشوف ليه اقرب (خال) او (عم) في الخرطوم ويقعد معاه (3) شهور عشان يطلع ليه جنسية.
  • ناس المريخ عملوا نفس الشيء.
  • مشوا تركيا ..قاعدين ليهم مع زول.
  • معسكرهم في تركيا متكفل بيه زول.
  • طيب انتوا الـ (28) عضو ديل بيعملوا في شنو؟.
  • بس فالحين للصور مع الشركة الصينية.
  • الشيء الغريب ..ناس المريخ بعد معسكر تركيا ..ماشيين يعسكروا في قطر على نفقة رابطة المريخ في الدوحة.
  • يعني برضو ح ينزلو الدوحة على نفقة زول.
  • زي حكاية الزول البينزل مع خالو …عشان يطلع (الجنسية).
  • او (جواز السفر).
  • زمان الدينا بي خيرها.
  • الجنسية ساكت تقعد ليها (3) شهور.
  • ولا في زول بقول ليك حاجة.
  • و
  • (ونحن عايشين والحمدلله ، (النفس) ينزل ويطلع إلى الآن ..ولا ينقصنا شيء سوى رؤياكم الغالية).
  • و (دروووري ضروووري تروووري) تجونا في الاجازة الكبيرة!!.
  • ………….

و

  • الجماهير بتترقب مباريات الهلال الاعدادية.
  • عاوزين نسمع لينا شيء عن جابسون.
  • عن اكرا.
  • عن تيتيه.
  • الجماهير متشوقة.
  • والناس ديل شوقهم بحر.
  • الحمدلله الهلال في الخرطوم سوف يلعب مباريات اعدادية قبل بداية الموسم.
  • ح تشوفو بي عيونكم.
  • وتحكموا براكم.
  • نشوف المواضيع وصلت وين؟.
  • عشان ما تكون ليكم كلام جرايد ساكت.
  • …………
  • السيدة (ل) – قالوا في زيادة في (التفاح) ح تنعكس تاني يوم طوالي على (الرغيف).
  • وقرّط على كدا.

ترك الرد