دق الدلجة – محمد عبد الماجد – رونالدو راحت عليه!! 22-8-2017

0
1256
محمد عبد الماجد دق الدلجة

دق الدلجة

محمد عبد الماجد

رونالدو راحت عليه!!

 من رأسي :

بكري المدينة سمع بخبر مفاوضة برشلونة للاعب الهلال اوتارا – قال انا الناس ديل ذاتهم قاعدين يمسكلوا لي.

انت يا بكري المدينة بي (جلحاتك) الكبيرة دي لو مسكلوا ليك ..بكونوا عاوزينك (مدير للكورة). ..او ضابط للمعسكر الفريق.

وفي الفريق الاول ما (الرديف) عشان جلاحاتك كبيرة شديد.

مرة في لاعب محترف في المريخ قال ح يحترف في برشلونة ….جابوا ليه (حلبة) يشربها!!.

 من كراسي :

السماني الصاوي بفتكر اللعب في الدوريات الاوربية يمكن ان يكون عن طريق (بريم) الشعر.

لو (بريم) الشعر بيعمل حاجة – اتير توماس هسع كان بكون بيقاسم راموس كابتن فريق ريال مدريد في (الكاتبنية).

ألعب كورتك يا كابتن…وشوف اسامة عطا المنان يشوف ليك رديف ريال بتيس.

  • مرة ناس المريخ لفحوا ليهم شعار من فيلم هندي ابيض واسود ..زي ما لفحوا لقب (الزعيم) من الهلال.
  • الافلام الهندية فيها شعارات جذابة.
  • ناس المريخ رفعوا شعار كتبوا فيه (احلامكم جزء من ماضينا).
  • وهم لا ماضي …ولا مستقبل.
  • دا زي الزول العاوز يخش كلية الطب بالدراسات البئية.
  • شعار لفحوه من فيلم هندي.
  • الضحك عاوز يشرطنا.
  • انتوا ماضيكم فيه شنو؟.
  • انتوا عندكم ديمقراطية؟.
  • جمعية عمومية سنتين ما قادرين تعملوها.
  • عندكم حركة وطنية؟.
  • عندكم (مواقف) زي الهلال؟.
  • ينسحبوا الصباح يرجعوا العصر من نفس اليوم.
  • عندكم خريجين؟.
  • عندكم (فنان) زي كرومة؟.
  • عندكم (سفير) زي على قاقارين؟.
  • و(قنصل) زي عثمان الجلال؟.
  • و(ضابط) زي امين زكي وفوزي التعايشي؟.
  • و(وكيل نيابة) زي محمود جبارة السادة؟
  • و(صحفي) زي هاشم ضيف الله.
  • وعندكم (طبيب) زي محمد حسين كسلا؟.
  • و(دكتور) زي عمر النقي؟
  • و(اقتصادي) زي حاتم معني؟.
  • و(اكاديمي) زي الرشيد المهدية؟.
  • ديل كلهم لعبوا في الهلال…وارتدوا شعاره.
  • ديل كلهم مروا عن طريق الهلال.
  • ماضي الهلال فيه صديق منزول وجكسا والدحيش.
  • انتوا عندكم شنو؟.
  • غير هروبكم بالكورة.
  • و7 الوحدات.
  • ومباراة سيمبا.
  • عندكم شنو؟..تاريخكم كلو جمال الوالي.
  • لمن جمال الوالي يفوت كهربتكم بتقطع …وناديكم بتقفلوه…ونشاطكم بتجمدوه؟.
  • خلوه الماضي..انتوا عندكم قناة؟.
  • عندكم جوهرة؟.
  • ماضي الهلال جاريين وراهو ..لمن سجلتوا هيثم مصطفى بعد 17 سنة في الهلال.
  • وسجلتوا ريتشارد.
  • ومجاهد..وهيثم طمبل …وبكري المدينة …وعلاءالدين بابكر.
  • وينوا حاضركم انتوا؟.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • نحن هسع عاوزين نثبت ليكم ان (اوهامكم) نحن ممكن نطبقها ليكم بالورقة والقلم.
  • الموضوع الهلال ما صعب عليه.
  • ننزلها ليكم قدامكم.
  • قدام عيونكم.
  • تتوهموا …ونحن بنحقق ليكم (الوهم).
  • تذكروا زمان وقت اعلام المريخ طلع (دعاية) وقال باريس سان جيرمان عاوز موسى الزومة.
  • موسى الزومة مشيتو في الشارع غيرها.
  • وموناكو الفرنسي عاوز بلة جابر.
  • باكات المريخ ماشيين يلعبوا في قمة الدوري الفرنسي.
  • طبعا ديل اقصى (شطحه) ليهم حدها (باريس سان جيرمان).
  • يعني قدر ما يعطوا من الخيال …وقدر ما يشطحوا فيه ما بفوتوا (باريس سان جيرمان).
  • الواحد فيهم لو ما في وعيه –     …ما بتجاوز (باريس سان جيرمان).
  • يعني برشلونة دي في (بن سبورت) ما بلحقوها.
  • ولا في الاحلام.
  • برشلونة لو الواحد فيهم رضعوه (موية نار) ما بجيب سيرتها.
  • لا تقول لي (الرديف).
  • ولا تقول لي برشلونة B.
  • انتوا برشلونة (مشاهدة) ..في نادي مشاهدة ما تحلموا بيها.
  • بلة جابر وموسى الزومة القالوا طلبهم موناكو الفرنسي وباريس سان جيرمان هسع بيلعبوا في الاهلي الخرطوم.
  • الاهلي الخرطوم (باريس سان جيرمان) السودان.
  • طلبهم باريس سان جيرمان ، وبيلعبوا في الاهلي الخرطوم.
  • شوفوا الحكمة.
  • العالم بقى قرية.
  • ومع العولمة دي بقى ما في فرق بين باريس سان جيرمان والاهلي الخرطوم.
  • انتوا ما شفتوا بلة جابر في الاهلي سان جيرمان.
  • بلة جابر بقى معلم.
  • اوهامكم ديك.
  • شطحاتكم.
  • نحن بنحقهها ليكم.
  • جيبوا ليكم ورقة وقلم.
  • وشوفوا (اوتارا) بيجري (الكشف الطبي) في برشلونة.
  • اوتارا سافر عديل.
  • حجزوا ليه.
  • ورسلوا ليه التأشيرة.
  • واوعكم تقولوا اوتارا سوف يلعب في برشلونة B.
  • عشان ح اقول ليكم غوارديولا اخطر مدرب الآن كان بيلعب في رديف برشلونة.
  • وانيستا.
  • اوكزافي.
  • وبيول ابو شعر.
  • الغريبة ديل كلهم اصبحوا كباتن للفريق الكاتلوني.
  • اضافة الى بيكيه.
  • بعدين اذا ميسي ذاتو جاء للفريق الاول لبرشلونة من هذا الفريق  ، انتوا شايفنها صغيرة على اوتارا.
  • زول عمره 20 سنة – من الطبيعي يلعب في الفريق التاني.
  • لكن مع دفاع برشلونة ..اذا برشلونة تعاقدت مع اوتارا ..ليكم علي من الاسبوع الرابع تشوفوا اوتارا في تشكيلة الفريق الاول.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • ناس المريخ وقت نفخوا السماني الصاوي.
  • وقت الموضوع غلبهم.
  • قالوا العربي الكويتي يطلب السماني الصاوي.
  • شوفوا الفرق كبير قدر شنو؟.
  • ناس بتتكلم عن برشلونة.
  • وناس بتتكلم عن العربي الكويتي.
  • افضل لاعب في المريخ مطلوب في العربي الكويتي.
  • ومدافع الهلال مطلوب في برشلونة.
  • والله انتو بي حالتكم دي (الوصافة) كتيرة عليكم.
  • باسكال (اتشقلب) في مباراة النجم.
  • واوتارا (شق) شقة صاح في مباراة النجم.
  • ناس برشلونة لو شافوا (شقلبة) باسكال …اوتارا من مطار انقرا يرجعوه.
  • ما بيصل اسبانيا.
  • بقولوا ليه وقت عندكم مدافع بتشقلب بالصورة دي …انت ما بتلزمنا.
  • شقلبة باسكال ..غير كلام الناس ما جابت لينا شيء.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • لكن يا جماعة مفروض نحي اوتارا.
  • لاعب محترف.
  • ومتلزم ومنضبط.
  • اوتارا ظل في الهلال لمدة (7) شهور قاعد يتمرن ساكت بدون ما يكون في الكشف.
  • 7 شهور بيلعب مع الهلال فقط في المباريات الودية.
  • فقد جاء اوتارا للهلال من نوفمبر الماضي ..ولم يسجل للهلال إلّا في شهر مايو.
  • اللاعب كان يتنقل مع الهلال في كل بعثاته الخارجية والداخلية …وكان وهو قاعد في الكنبة او المدرجات يتفاعل مع كل هدف يسجله الهلال.
  • ليأتي اوتارا ويحقق تلك الطفرة في (5) مباريات فقط لعبها افريقيا مع الهلال.
  • الزول دا لو قعد موسم كامل يعمل شنو؟.
  • طبعا ما ح يعمل اكتر من العملو الآن.
  • لأنه ما في اكتر من برشلونة.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • نتمنى ان يعود اللاعب في الوقت المحدد ليشارك في مباراة القمة ، ولا شك ان وجوده بعد تلك الدفعة الكبيرة في مباراة القمة سوف يحدث اضافة كبيرة للهلال.
  • وسوف تتابع القنوات ووكالات الانباء لاعب الهلال الذي سوف ينتقل الى برشلونة الاسباني.
  • وسوف يمنح وجوده جمهور الهلال ولاعبيه دافع كبير لتقديم مباراة كبيرة امام المريخ.
  • اذا تم التعاقد مع اوتارا من قبل الفريق الاسباني نتمنى ان يكون عائد الصفقة كبيرا ، حتى يسجل الهلال في نوفمبر القادم تسجيلات على مستوى (عالمي).
  • يعني اوتارا لو اتسجل بـ (15) مليون يورو …يمكن للهلال ان يسجل افضل لاعبين في القارة الافريقية كلها …مدافع ومهاجم.
  • افضل لاعب في افريقيا لن يتجاوز سعره محليا في القارة الافريقية 3 مليون دولار.
  • وان لم تتم الصفقة ..لاعبنا ورجع لينا …سوف تسعدنا عودته ..وسوف يكون مطلب لمعظم الاندية الافريقية والاوربية.
  • كما اننا سوف نشعر بقيمة اللاعب ونعطيه القيمة الحقيقية التى يستحقها.
  • الاكيد ان تلك الخطوة سوف تمنح ثقة كبيرة للاعب ستنعكس على مستواه الفني …تعاقد مع برشلونة معه او لم يتعاقد.
  • غايتو تاني (رونالدو) ما بقدر يعمل حاجة قدام برشلونة.
  • هدفه الاخير في لقاء برشلونة والريال سوف يكون اخر هدف له في شباك البارسا.
  • لاقي لي ناس (بيكيه) ديل ومتجدع فيهم.
  • جاك اوتارا.
  • ……………..

  و  

  • امام الشرطة القضارف قدم الهلال عرض ممتع وفاز بثلاثية اكدت ان الهلال يمتلك تشكيلتين.
  • ارضية استاد الهلال تحتاج الى اسعاف فوري.
  • الارضية مع الجوهرة شكلها اصبح مخجل.
  • ناس برشلونة تابعوا مباراة الهلال امس امام الشرطة وسألوا من اللاعب صاحب الرقم 7.
  • صهيب الثعلب لو لعب بجدية اكبر ..سوف يعيد المتعة للملاعب السودانية.
  • شيبوب بالرقم 32 عمل ليه (كعب)..بنقلو مباشرة لليغا الاسبانية.
  • بشه سجل ..بلوا رأسكم.
  • …….
  • السيدة (ل) – عينك قدر (الريال) ، خاصة الايامات دي.

ترك الرد