دق الدلجة – محمد عبد الماجد – ضحية بشه (الدرس الاول كابتن ماجد جاري من نص الملعب) 10-9-2017

0
1176
محمد عبد الماجد دق الدلجة

دق الدلجة

محمد عبد الماجد

ضحية بشه (الدرس الاول كابتن ماجد جاري من نص الملعب)

 من رأسي :

ناس الهلال وقت يتغلبوا بشيلوا (الجهاز الفني)…ناس المريخ وقت يتغلبوا بشيلوا (جهاز التحكيم).

 من كراسي :

الحركات العملها (كاشا) في مباراة الهلال ومريخ كوستي امس لو عملها للفريق (القومي) كان وصلنا كاس العالم.

  • بعد الحفلة ما تنتهي …في العادة بتلاقى (الكراسي) مجدعة في السهلة ، ويمكن تلقى كرسيين مدبلات.
  • وشافع طالع في الحيطة.
  • وبكون وسط الكراسي دي ..في عمك زول كبير حايم في الحلة ..بيطلب من (الشفع) يلمو (الكراسي).
  • بيقعد يعد فيها.
  • وبيشكي من (الشفع).
  • وبقول شفع الزمن دا رأسهم قوي ..وما بيسمعوا الكلام.
  • ووقت يقول ليك في (كرسي) ناقص ..عيونو الاتنين بيمشن (شمال).
  • وقزاز البيبسي بكون مجدع في الرملة – والحوش الكبير.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • بعد ما ينتهي (العرس)..بكون في باقى (ضلع) مدكن في الحلل الكبار.
  • عماتك الكبار بتحرفنن في (تدكين) الضلع.
  • الضلع ما فيه زيادة.
  • وبتكون في شوية سلطة اسود.
  • وطعمية.
  • طعمية العرس طعمها براهو.
  • طامعة وسمحة.
  • وسكسكانية ورغيف.
  • ساكت بقولوا الرغيف انتهي.
  • والرغيف قاعد في الاكياس.
  • وشافع رايح.
  • امو تفتش ليه من العصر.
  • اتذكرت الحاجات دي كلها وقت جابوا لي (صور) هدف بشه في المريخ.
  • الله يسألني فتشت للكراسي.
  • وقزاز البيبسي.
  • وسلطة الاسود.
  • والشافع الرايح.
  • والشافع البيبكي إلّا يحشو ليه طعمية في رغيفة.
  • هدف بشه في (الضحية).
  • الضحية (المريخ).
  • والمريخ مريخ (الحكام).
  • الناس ديل حولوا المباراة من استادهم وجابوها استاد الخرطوم.
  • وبعد دا ما عملوا حاجة.
  • طيب حولتوها على شنو؟.
  • كان اخير ليكم تستروا في استادكم.
  • باقى ما كتبت عن الموضوع دا – وما عاوز اخلي الموضوع يمر فينا كدا ساكت ، خاصة بعد ان شاهدت ليكم الصور.
  • صورة الهدف في مرمي المريخ.
  • الهدف في (الضحية).
  • والله ما في احلى من الكورة في شباك المريخ.
  • عاينت في الصورة لقيت ليك ناس صلاح نمر ورمضان عجب وجمال سالم (مجدعين) في خط 18 ، تقول مضروبين في غارة جوية.
  • تقول جايبنهم من كتاب المطالعة.
  • يا ربي دي مريم الشجاعة؟.
  • وإلّا الراعي والصفارة؟.
  • الصورة قدر ما قعدت افسر فيها ، ما فهمت فيها حاجة.
  • واحدين مجدعين في الملعب.
  • وواحدين مجدعين برة الملعب.
  • ناس سلك ..ومعاوية الجاك وهيثم كابو.
  • رمضان عجب واقع على رأسو – ضرسو الشمال في اضانو اليمين.
  • وكعب كراعو اليمين في نص رأسو.
  • حالة صعبة.
  • قلت في نفسي ..يا ربي دا عنبر الجراحة؟.
  • وإلّا عنبر العظام؟.
  • وإلّا عنبر (المجنونات).
  • ما عاوز اقول ليكم عنبر الولادة – الدنيا عيد ..والكلام دا ما صاح يطلع مننا.
  • عاينت لي صلاح نمر.
  • بقي لي زي بواقي حملة هكس باشا.
  • الزول دا مجدوع في حتة تانية.
  • صرتو في ضهرو.
  • وعينو في ركبتو.
  • ومصرانو الاعور في كعب الشيطان.
  • يا جماعة الحاصل شنو؟.
  • وينو (النمر) هسع دي؟.
  • خربت سمعة النمر.
  • انتوا قاعدين تسموا ساكت.
  • بتتطلقوا القاب من رأسكم.
  • يمين (النمر) بتاع الغابة يشوف (الوقعة) دي ….تاني يا صلاح نمر (مركوب النمر) بيحرم عليك.
  • يا زول ما في نمر بيعمل كدا؟.
  • ولا كديس.
  • في نمر بنوم اثناء المباراة؟.
  • في نمر بتشقلب كدا.
  • الكورة عند بشه وهو ماسك كاريكا.
  • غايتو يا بشه قاعد تبشتن الناس ديل جنس بشتنه.
  • بتعمل فيهم عمايل.
  • رجعت للصورة …لقيت ليك جمال سالم مجدوع في حتة والكورة في حتة.
  • اتذكرت بطيخة سنة رابعة.
  • شربت لي جك موية باردة.
  • المسافة بعيدة.
  • تعطش.
  • بين الكورة في حتة …وجمال سالم في حتة تانية خالص.
  • تقول ما حافظ جدول اربعة.
  • زي نظرية ضربة الجزاء.
  • جمال سالم وقع يمين …وبشه لعب الكورة على شمالو.
  • مشى شرق.
  • والكورة غرب.
  • وجمال سالم بعد الحركة دي كان عشمان الكورة تتطلع.
  • قاعد يعين في الكورة وهو واقع.
  • وهو في حالة تانية.
  • الزول دا غبيان؟.
  • عشمان في الحكم.
  • شربت لي كباية شاي.
  • بشه كورتو ما قدر ليها رمزي صالح.
  • ولا اكرم الهادي سليم.
  • ولا عصام الحضري.
  • عاوز تقدر ليها انت يا جمال سالم؟.
  • بشه سجل في جميع الجنسيات.
  • البقولوا ليك دا فلسطيني.
  • والبقولوا ليك دا مصري.
  • والبقولوا ليك يوغندي.
  • والبقولوا ليك يمني.
  • كلهم سجل فيهم (بشه).
  • جيبوا ليكم حارس هندي.
  • عشان (الجديع) الحصل عليكم في النجيلة بتاعة استاد الخرطوم جديع بتاع افلام هندية.
  • كل واحد (مجدوع) في حتة.
  • بس فاضل يركبوا ليكم (دربات).
  • محمد آدم خلص عليه محمد موسى بي هناك مع باسكال.
  • وبشه خلص على مضان عجب وصلاح نمر وجمال سالم بي جاي.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • انتوا عارفين بشه طلع من وين عشان يسجل هدفه في (الضحية)؟.
  • الضحية (المدفورة).
  • بشه طلع من (النص).
  • بشه جاء من خط 18 بتاع الهلال.
  • عارفين ليه؟.
  • جاري ليه 4 ايام.
  • زي كابتن ماجد.
  • عشان ما في واحد يقول لينا (تسلل).
  • باقى بشه فتر من الكلام دا.
  • في الممتاز سجل قالوا ليه (تسلل).
  • في البطولة الافريقية سجل قالوا ليه (تسلل).
  • المرة دي بشه قال يجيهم من (النص).
  • عشان يقطع ليهم حيلتهم.
  • عشان ما يديهم فرصة.
  • بشه قطع ليه 7 كيلومترات …وصلاح نمر واقف يعاين.
  • 4 يوم بشه جاري.
  • وصلاح نمر قاعد (يتشهق).
  • صلاح نمر حارس كاريكا.
  • وباسكال مع محمد موسى.
  • ورمضان عجب نايم قفا.
  • بشه جاء خطف الكورة.
  • من وين جاء ما تسألوني.
  • اقيف اشرب لي فنجان قهوة.
  • عشان اعاين في الصورة سمح.
  • حالتكم صعبة.
  • لا عرفنا نقول دا حادث؟.
  • لا عرفنا نقول دي الضحية؟.
  • لا عرفنا نقول دي لوري ضارب عمود.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • هدف بشه بالصورة دي – حالف ما اخليه.
  • ما بتركو.
  • بكرة برجع اواصل ليكم في نفس (الضحية).
  • عشان بكرة ح ندخل على (الدرس التاني).
  • الموضوع دا ما بفوت ساكت.
  • ما تفتكروا (العيد) بخلينا ننسى.
  • الموضوع لسه.
  • فيه كلام كتير.
  • بكرة نواصل ان شاءالله.
  • ……………….

  و  

  • الحمدلله.
  • رغم الارضية.
  • والتحكيم.
  • والغيابات.
  • وكاشا.
  • الهلال انتصر على مريخ كوستي.
  • مباراة صعبة ومحطة مستحيلة تجاوزها الهلال.
  • تبقى مباراة الرابطة.
  • الهلال عليه يركز في ورقو.
  • ننتصر في كل مباراة.
  • ما عندنا قضية بالتانين.
  • الاندية التى تنتصر بواسطة التحكيم …حدها قريب.
  • سوف تنكشف قريبا.
  • وبتظهر.
  • ماذا سوف يمنح الحكم المريخ اليوم.
  • مرة ضربة جزاء.
  • ومرة طرد.
  • ومرة ينقضوا هدف صحيح سجل في شباكهم.
  • سوف ننظر الى هدايا الحكام اليوم.
  • مباريات المريخ بقت مسخرة.
  • بقينا نقعد نضحك فيها.
  • ………..
  • السيدة (ل) – خروفنا طلع ما فيه مرارة.
  • وقرّط على كدا.

ترك الرد