دق الدلجة – محمد عبد الماجد – ضحية بشه (الدرس التاني لملموا الضلوف) 11-9-2017

0
1376
محمد عبد الماجد دق الدلجة

دق الدلجة

محمد عبد الماجد

ضحية بشه (الدرس التاني لملموا الضلوف)

 من رأسي :

في واحد اول مرة يشوف ليه (ارنب)..سألوه منها..قالوا ليه دي شنو؟.

قال ليهم ما عارف ..لكن (الحكم) لو شافها بيحسبها (ضربة جزاء) للمريخ.

من كراسي :

ريال مدريد في الموسم الماضي حقق (5) بطولات اعلاهم بطولة دوري ابطال اوروبا وبطولة الليغا وبطولة السوبر الاسباني الى جانب السوبر الاوروبي اضافة لبطولة كاس العالم للاندية.

مع ذلك ريال مدريد تعادل مرتين في ملعبه هذا الموسم في الليغا الاسبانية من اصل 4 مباريات لعبها الريال.

  • التومة بنت الكجم …جابوا ليهم (خروف) ، جارنو اربعة.
  • البوكسي وقت وقف ينزل (الخروف) ، الحلة كلها طلعت تتفرج.
  • البقول ليك دا ما خروف – دا (تور) عديل كدا.
  • والبقول ليك دا خروف (روسي).
  • والبقول ليك دا ما خروف نصاح.
  • خروف تشم ريحة شيتو قبل ما يضبحوه.
  • اليوم داك …الخروف حرم ناس الحلة من النوم.
  • يكورك اليوم كلو.
  • تقول عارف نفسو بكرة على موعد مع (الضبح).
  • مرة يقطع الحبل.
  • ومرة يفتح الباب.
  • نسوان الحلة في ما بيناتهن كدا – قالن هسع الخروف دا البيقدر يضبحو منو؟.
  • التومة بنت الكجم ..بتحب (الفخر)…اليوم كلو واقفة في الباب ..تفرج في الناس في الخروف الجابو ليهم ابو العيال.
  • وشفع الحلة يشيلو ويتصوروا مع الخروف (سيلفي).
  • خروف لمن يفكوه في الحوش …الجيران بشوفو (قرنو).
  • جنس دا – عاد نحن اصلو ما شفناه.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • يوم العيد ..التوم بنت الكجم قامت بدري …عاوزة تطمئن على الخروف.
  • الاولاد طلعوا يشوفوا ليهم (جزار).
  • الخروف دا بالذات عاوز ليه (ضباح) محترف.
  • مرة جبنا لينا (ضباح) مبتديء …اللحمة التى طلعها في (الجلد) ، الله يسألني الخروف في (الصينية) ما طلعها لينا.
  • في جزارين بيطلعوا اللحمة في الجلد..حفاظا على (الجلد).
  • وفي النهاية الجلد بيشلوه ناس اللجنة الشعبية.
  • بس اوعك تجيب ليك (جزار) وتقول ليه بعدين شيل (الجلد) ، عشان لو قلت ليه كدا بيعصر على (اللحم).
  • بيركز ليك مع (الجلد).
  • الله يسألني مرة قلنا لينا لي (جزار) بعد ما تخلص شيل معاك (الجلد).
  • الجزار من شفتنتو قام طلع (الكبدة) في الجلد.
  • وطلع ليه مع الجلد (كراع).
  • ولا قدرنا نقول ليه حاجة.
  • يمين نحن فطورنا في العيد داك تميناهو بي (موية فول).
  • الشيء المدهش يوم العيد وتانية العيد والثالثة والرابعة الدكاكين ما بكون فيها (فول).
  • مع ان هذه الايامات هي الايام الوحيدة البتكون عندك مزاج فيها للفول.
  • تشيل (جك) وتحوم الحلة دي كلها ما تلقى ليك فول.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • اولاد التومة بنت الكجم طلعوا يفتشوا ليهم (ضباح) ، زي ما قلت ليكم في بداية العمود.
  • الواحد ذاتو مرات بيسرح.
  • الشفع حايمين تحت كرعينا…كلامك من رأسك بطيروه ليك.
  • اول ضباح لقوه اولاد التومة بنت الكجم قال ليه انا بضبح بـ (500) الف جنيه.
  • أي ضباح في الساعات الاولي من صباح العيد بقول ليك (500) الف جنيه.
  • بيطمع.
  • ولاد التومة بنت الكجم قالوا ليه تضبح لينا بـ (500) الف جنيه ليه؟ …انت ح تجيب الخروف معاك.
  • الخروف منك.
  • وإلّا ح تضبح لينا (الخروف) في (رويال كير).
  • انت ح تجيب معاك محضر عمليات؟.
  • ح تبنجوا؟؟.
  • قال 500 الف جنيه.
  • والله لو اكلناه (سلق)…ما بنضبحو بي (500) الف جنيه.
  • انت يا زول ما عندك رأس.
  • لو الضبيحة بـ (500) الف جنيه …الجماعة التعبانين ديل بيقرأوا (طب) ليه؟…ما يبقوا (جزارين) من الثانوي العالي.
  • الضباح وقت سمع كلامهم دا ..عرفهم ليك ما فيهم رجا.
  • قام اتخارج.
  • قال يلحق السوق.
  • المهم اولاد التومة بنت الكجم ..لافين للساعة تسعة صباحا عشان يجيبوا ليهم (ضباح) يضبح ليهم الخروف.
  • لقوا ليهم ضباح ..قال ليهم انا بضبح ليكم لكن بس ما عندي عدة.
  • ما عندك عدة ..جايبنك تتضبح ..وإلّا تفطر؟.
  • طبعا اسخف شيء تجيب ليك (ضباح)..اول شيء يقول ليك جيب ليك (جردل).
  • شوية كدا يقول ليك جيب لينا (عود) نكسر فيه اللحمة.
  • شويتين يقول ليك عندكم (ساطور).
  • والعجيب لو قال ليك امسك معاي.
  • يندمك على الجلابية الجديدة.
  • يا ود الناس انا لو عندي الحاجات دي جايبك ليه؟.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • اخر شيء اولاد التومة بنت الكجم جابوا ليهم (جزار)…النوع البعاين ليك بي صفحة.
  • ما بديك (نظرة) كاملة.
  • نظرتو بختصرها بي جنبه.
  • الاولاد جابوا الجزار البيت.
  • الجزار شاف (الخروف) كبير – رجع لي وراء ..وقال ليهم خروفكم دا عاوز ليه (كونلستو) بتاع جزاريين.
  • دا جزار واحد ما بيضبحو ليكم.
  • التومة بنت الكجم ختت ايدها في رأسها ..وقالت لي اولادها جايبين لي (جزار) بتاع علم نفس.
  • امشوا ..انتوا اصلو ما فيكم فايدة ..جارتي السرة بنت العسم ..بكونو ضبحو ..اولادها شداد بكونوا جابوا ليهم (جزار) نجيض.
  • التومة بنت الكجم لبست توبها ومشت على جارتها السرة بنت العسم.
  • التومة بنت الكجم لقت (جزار) ناس السرة بنت العسم بغسل في ايدو ..وبلقط في حاجاتو في كيسو.
  • قالت ليه اقيف بارك الله فيك تعال اضبح لينا.
  • الجزار حمد الله لقى ليه زبونة جديدة.
  • شال عدتو ومشى مع التومة بنت الكجم.
  • الجزار شاف الخروف كبير ..قال ليها والله يا حاجة …خروفك دا (السكاكين) العندي دا ..ما بتقدر عليه…بقوم اعولق ليك الضبيحة ساكت.
  • الجزار قال كلام ودا واتخارج.
  • والتومة بنت الكجم مع اولادها قعدوا يفتشوا ويحنسوا في (الضباحين).
  • أي ضباح يجيبوه ليك ..يعتذر ليهم.
  • البقول ليهم عندي عرس.
  • والبقول ليهم والله مرتبط.
  • والبقول ليهم خروفك دا (ونش) ما بعلقو ليكم.
  • والخروف عاجبوه نفسو – قاعد ينطط في الحوش.
  • غلّب ليك التومة بنت الكجم غلبه شديدة.
  • ما عرفوا يعملوا ليه شنو؟.
  • يربطوه ..يفك الحبال.
  • يقفلوه ..يتلب بي فوق.
  • واي جزار يشوفو يقوم يعتذر ليهم.
  • اخر حاجة ..الملكة بنت ام صفق غُلاد …قالت ليهم ما عندكم مشكلة.
  • خروفكم دا ما عندو غير حل واحد.
  • ضباح واحد البيقدر عليه.
  • التومة بنت الكجم قالت ليها دا منو البقدر عليه دا؟ ..عليك الله تدينا تلفونو ..الواطة قربت تمغرب …والاولاد الجوع كتلهم.
  • الملكة بنت ام صفق غُلاد ..قالت للتومة بنت الكجم ما عندكم ضباح غير (بشه).
  • خروفكم د اجيبوا ليه (بشه).
  • يمين يضبحوا ليكم في (10) ثواني.
  • اولاد التومة بنت الكجم ما كضبوا ليك…5 دقائق جابوا ليك بشه.
  • الخروف شاف (بشه) وقع ليهم في الواطة…ومد رقبتو.
  • في 3 دقائق ..بشه ضبح.
  • بشه وقت بقى على السلخ ..الخروف قام علق نفسو براهو..ورأسو في الواطة.
  • 4 دقائق التومة بنت الكجم شيتها طلعت.
  • بشه طلع ليها (ضلع).
  • ومرق لحمة شية الجمر براها.
  • أي حاجة طلعها بي نظام.
  • الكمونية جايبها جاهزة…بي بهاراتها.
  • بشه جدع ليك (الضلوف) في الحوش .ونفض ليك البطن بتاعة الخروف في ثواني.
  • والتومة بنت الكجم ما قصرت في (الشية).
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • ……………….

  و  

  • بكرة نشوف الحكم قدم شنو للمريخ؟.
  • الليلة ما فاضيين لمباراة المريخ.
  • عندنا (ضبيحة).
  • الهلال بكرة يلعب امام الرابطة.
  • والرابطة فريق خطير ..وفيه عدد من المحترفين.
  • وهم متقدم في الدوري على مريخ كوستي.
  • يعني تعملوا حسابكم.
  • وتلعبوا بي روح.
  • وقوة.
  • وما تخلونا ننتظر للدقيقة 81 يا بشه.
  • اعصاب للحاجات دي نحن ذاتو ما عندنا.
  • …………….
  • السيدة (ل) – المطرة ما غلطانة ..غلطانة شوارعنا دي.
  • وقرّط على كدا.

ترك الرد