شقلبة كوستي

0
1079

# من رأسي :

الدقيقة 81 في مباريات الهلال ما شاءالله عليها …بقى دائما فيها (هدف) للهلال…

الدقيقة 81 في مباريات الهلال بقت زي (العقد بعد صلاة العصر).

وتاني توبة…لا ريد لا غرام لا خطوبة…

عقد بس.

زي ما بقول محمد بشير بشه.

………………

# من كراسي  :

في ناس (خروفهم) لسه فيه باقي…….

الليلة العيد فات منو (12) يوم…يعني (الكمونية) و (الضلوف) ذاتها (تم الحذف)..ما فيها الحبة.

لكن محمد بشير بشه ….اثبت لينا في كوستي ان (ضحيتو) فاضل فيها (كراع).

………………

  • في هذه المساحة قلنا امس لبشه …ما تقعدوا لينا للدقيقة (81).
  • ما عندنا صبر.
  • ولا فينا حيل لتلاتل دي.
  • ما تدونا السهر.
  • احسموا لينا المواضيع من بدري.
  • مباريات العصر ما تنتظروا الواطة تمغرب.
  • احسموها لينا من عصر بدري.
  • اعصاب للدقيقة (81) بقت ما عندنا.
  • اضبحوا بدري.
  • واسلخوا سريع.
  • عشان (شيلتكم) تتطلع سريع.
  • الفطور البدري ..ما في احسن منو.
  • لكن ناس بشه ومحمد موسي على ما يبدو عندهم فهم تاني.
  • عندهم رأي.
  • بيسلخوا اول حاجة.
  • ثم يضبحوا بعد ذلك.
  • عشان ناس المريخ (يعشموا).
  • ويفكروا في نتيجة المباراة.
  • ويقعدوا يحلموا بالصدارة.
  • صدارة (المطر) دي حدها قريب ان شاءالله.
  • بالمناسبة الهلال حسم الاهلي الخرطوم في الدقيقة 81.
  • وعلى ما اعتقد فعل نفس الشيء ولاء الدين مع فريق الخرطوم الوطني.
  • وفعل محمد موسي في مريخ كوستي نفس الشيء.
  • وجاء محمد بشير بشه ليسجل في الدقيقة 81 في فريق الرابطة كوستي.
  • شفتوا النظام دا كيف؟.
  • شفتوا (العشم).
  • اكول لاعب الرابطة كوستي جاب ليه هدف …قاعد يرقص ربع ساعة بعد الهدف.
  • لمن مغربت.
  • اكول ما عارف ناس بشه ديل عندهم فهم تاني.
  • عندهم كلام.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • امس جابوا لي (الصور) تاني.
  • صور الهدف.
  • قالوا لي شوف (ضحية) بشه التانية.
  • قعدت امخمخ ليك في الصور.
  • واشرب في الموية الباردة.
  • قطعت لي جك..ورصيد بي عشرة.
  • انا قلت رصيد.
  • هسع الدخل الرصيد في الموضوع دا شنو؟.
  • تلخبطوا الزول.
  • قلت ليهم بشه دي معقول بعد (12) يوم من العيد قاعد يضحي لغاية الآن.
  • العيد انتهي.
  • الضحية دي ما بحسبوها ليه.
  • الشيء دي إلّا كرامة؟.
  • ما في ضحية بعد 12 يوم من العيد.
  • يمكن بشه يكون عندو زول جاء من الحج.
  • كرامة يعني.
  • عشان كدا ضبح ليه امس تاني.
  • الشغل دا ما شغل (ضحية).
  • بعدين نحن شية (الضحية) بنعرفها.
  • وشية (الكرامة) بنعرفها.
  • كل واحدة بكون طعمها براها.
  • شية الضحية بتكون مقطعة كبيرة.
  • وشية الكرامة بقطوعها صغار.
  • نحن عندنا خبرة في (الضبائح) دي.
  • بنعرفها.
  • جابوا لي صور الهدف.
  • استغربت.
  • كبيت كمية بتاعة (استغراب) مبالغ فيه.
  • قعدت استغرب.
  • كمان عاوزين تقيفوا لي في استغرابي.
  • قلت ليه بشه دا اصلو ما بتعظ.
  • بشه دا ما بحرم.
  • ما بقيف.
  • الزول دا ما عندو رحمة.
  • الشقلبة العملها بشه في استاد الخرطوم مشى عملها في استاد كوستي.
  • ما في أي فرق في (الشقلبة).
  • المتشقلبون في استاد الخرطوم كانوا لابسين (احمر).
  • والمتشقلبون في استاد كوستي كانوا لابسين (اخضر).
  • بشه دا كمان ما بفرز (الالوان).
  • لا بعرف احمر.
  • ولا بعرف اخضر.
  • كلو عندو (متشقلب).
  • في الصورة الاولى شفت شقلبت جمال سالم وصلاح نمر ورمضان عجب.
  • وفي الشقلبة التانية عبدالله الزبير وايمن الربيع ونبيل عابدين.
  • نبيل عابدين دا بالذات اقيفوا لينا في شقلبتو.
  • عامل لينا فيها مقطعها.
  • يضرب في الناس.
  • ويرتكب في المخالفات.
  • وفي النهاية نبيل عابدين …جاء يكحلها عماها.
  • جاء يطلعها…كملها في المرمي.
  • عشان تاني تقعد تتفاصح لينا.
  • انت ما قالوا ليك بشه الايامات دي شغال (شقلبة).
  • لا بعرف ليك والي المريخ.
  • ولا بعرف ليك والي ولاية النيل الابيض.
  • كلو بتشقلب.
  • بيتشقلب على طول.
  • ناس المريخ حاولوا يتخارجوا من (الشقلبة).
  • قالوا يمرقوا منها.
  • قاموا حولوا مباراة القمة لاستاد الخرطوم.
  • عشان احراجات (الشقلبة) دي.
  • عندهم مدافع اسمو باسكال بدون مناسبة بقع يتشقلب.
  • بتشقلب براهو.
  • قالوا الشقلبة في النجيل الصناعي ..احسن ليهم من الشقلبة في النجيل الطبيعي.
  • باقى هم جربوا الشقلبتين.
  • شقلبة استاد المريخ امام النجم.
  • وشقلبة استاد الخرطوم امام الهلال.
  • هسع ظهرت ليهم (شقلبة) كوستي.
  • شقلبة جديدة.
  • شقلبة مع المغارب.
  • في الدقيقة 81.
  • بشه ما عندو هدف بدون (شقلبة).
  • اهم شيء في اهداف بشه (الشقلبة).
  • بشه اول حاجة بيطلع تصديق (الشقلبة) ثم يسجل بعد ذلك.
  • اسألوا جمال سالم.
  • واسألوا عبدالله الزبير.
  • وكان لي شقلبة (المدافعين)..اسكتوا خلوهم ساكت.
  • ملأوا لينا خط 18 شقلبات.
  • الواحد فيهم من يشوف بشه في المنطقة بيقعد يتشقلب.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • قالوا ليك ..الناس القاعدين في استاد الخرطوم بعد شقلبة مباراة القمة لغاية الآن قاعدين بفتشوا في (الجلد).
  • قالوا ما لقوا جلد الضحية.
  • هسع جلد (كرامة) كوستي ..ما عارف الحاصل عليه شنو؟.
  • في واحد قال لي انت بس فالح لي جمال سالم.
  • وعبدالله الزبير.
  • بوفون بعد العمر دا قاعد (يتشقلب).
  • والله ناس ميسي ديل يشقلبوا بلد.
  • غايتو الايامات دي في موضة (شقلبة).
  • نحن قونا بيقعوا فيه تلاتة.
  • ما زي اقوان المريخ.
  • الكورة تضرب في ساق صلاح نمر وتخش قون.
  • حظوظ.
  • نحن نقعد نجاهد.
  • ونكابس للدقيقة 81.
  • الحكم قبل كدا..بيصرف لينا ضربة جزاء.
  • ويحرمنا من هدف.
  • مع ذلك ما بنقيف.
  • ولا بنحبط.
  • بنتجي الدقيقة 81 ونجيب لينا قون.
  • ونشيل النقاط الـ 3.
  • ونخلي ليكم (الجلد).
  • نحن لا عاوزين الجلد.
  • ولا الرأس.
  • ولا الضلوف.
  • ولا الكمونية.
  • نحن ناس (شقلبة) ساكت.
  • ناس شية جمر.
  • وتشة بشه.
  • وشية بشه.
  • وقون بشه.
  • وشقلبة بشه.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • ……………..

و

  • يلا اجتهدوا من اجل المباريات القادمة.
  • ما في مباراة ساهلة.
  • مباراة الهلال القادمة امام هلال كادوقلي.
  • وهي مباراة صعبة.
  • كفى ان هلال كادوقلي انتصر على الامل عطبرة برباعية في اخر مبارياته.
  • وجاء الامل وتعادل امس مع هلال الابيض.
  • يعني الامل ذاتو ما ساهل.
  • جمهور الهلال عليه مسؤولية كبيرة.
  • الليلة ان شاءالله فرحتنا تتواصل في العصر.
  • في المناقل.
  • او في مدني.
  • ما فارقة معانا.
  • قولوا بس يا رب.
  • و
  • (ونحن عايشين والحمدلله ، (النفس) ينزل ويطلع إلى الآن …ولا ينقصنا شيء سوى رؤياكم الغالية).
  • و(دروووري ضروووري تروووي) تجونا في الاجازة الكبيرة!!
  • …………
  • السيدة (ل) – قلبو نظام (شريحتين).
  • وقرّط على كدا.

ترك الرد